1. Yihowa uyinonketa huuccattote qoosso ma garinni laˈˈa hasiissannonke?

 DHAGGE ikkitannoti iimanna uulla kalaqino Magano huuccattotenni hasaawisate qoosso noonke. Hanni tenne hendo: Dinye amandummokkinni hasiˈnummo yannara hasiˈnoommo qaalinni giddonketa gudinse Yihowara hasaapha dandiineemmo. Baxillaanchu Anninke huuccattonke macciishshannota addaxxine, akimete mine gonxoommowa heeˈne woy usuru mine heeˈne huuccatto assiˈra dandiineemmo. Tenne qoosso mulluri gede assine dilaˈneemmo.

2. Moote Daawiti huuccattote qoosso naadannota leellishinohu hiittoonniiti?

² Moote Daawiti huuccattote qoosso lowo geeshsha naadanno. Daawiti Yihowara, “Huuccattoˈya hixaanu gede . . . assite lai” yee faarsino. (Far. 141:1, 2) Daawiti waro kakkalaasine halaalu magansiˈrara horoonsidhannoha qullaawa hixaana qorophine qixxeessinanni. (Ful. 30:34, 35) Daawiti hixaanu daafira coyiˈrinori, iimi Annasi huuccattotenni hasaawisanno woyite yaannore seekke heda hasiˈrannota leellishanno. Ninke hasattono tenneeti. Huuccattonke Yihowa hagiirsiissannota ikkitara hasiˈneemmo.

3. Huuccatto assiˈneemmo woyite Yihowa ma garinni hasaawisa hasiissannonke? Mayira?

³ Yihowa huucciˈneemmo woyite iso lowo geeshsha ayirrinseemmota leellisha hasiissannonke. Hanni Isayaasi, Hiziqeeli, Daanieelinna Yohaannisi laˈinota dhagge ikkitanno ajuuja hendo. Insa laˈino ajuuja babbaxxitinote; ikkirono mitto assannonsa coyi no. Insa baalunku Yihowa ayirrado Moote ikkinota laˈino. Isayaasi, Yihowa “ayirrinyunni gaamaare ayirradu baarcimi gashshootunnihura ofolle nooha” laino. (Isa. 6: 1-3) Hiziqeeli, Yihowa ‘magani-seemote gedeehu waraˈa yiino xawaabbi gaangeesseennasi’ iimi saragallisira ofolle nooha laino. (Hiz. 1:26-28) Daanieeli, “Hegerera Heeˈrannohu” waajjo uddano uddiˈrinotanna giirate buwani ayirradu barcimisinni fulanna laino. (Dan. 7:9, 10) Yohaannisi kayinni, Yihowa haanja dilqa labbannoti biifado magani-seemo doyissitino barcimira ofolle nooha laino. (Aju. 4:2-4) Yihowaha taalle nookki ayirrinye hiincanke, huuccattotenni iso hasaawisa lowo qoosso ikkitinotanna huucciˈneemmo woyite iso ayirrisa hasiissannonketa qaangeemmo gede assitannonke. Ikkina ma garinni huucciˈra hasiissannonke?

4. Yesuusi Maatewoosi 6:9, 10 kulinote lawishsha ikkitanno huuccattonni maa ronseemmo?

⁴ Maatewoosi 6:9, 10 nabbawi. Yesuusi Ilaalu Sibikatesi yannara, rosaanosi Magano hagiirsiisanno garinni huucciˈra dandiitannohu hiittoonniitiro rosiisinonsa. Yesuusi ‘togo yitine huuccidhe’ yee kulihu gedensaanni umo, Yihowa hedinori ledo xaadooshshe afiˈrinoha lowo geeshsha hasiisanno coye qummi assino. Insano: Maganu suˈmi qullaambeeti, Maganu diinna baala hunannohu Maganu Gashshooti daatinna albillitte isi uullatenna mannu oosora abbara hedino atooteeti. Huuccatto assiˈneemmo woyite kuri coyibba daafira huuccanke, Maganu fajjo woˈmitara hasiˈneemmota leellishshanno.

5. Uminke hajo daafira huucciˈra hasiissannote?

⁵ Yesuusi hakkiinni aane uminke hajo daafirano huucciˈra hasiissannota ikkitinota rosiisino. Yihowa barru sagale aannonke gede, cubbonke gatona yaannonke gede, jifamatenni agarannonke gedenna bushuwiinni gatisannonke gede huucciˈra dandiineemmo. (Mat. 6:11-13) Yihowa kuri coyibba huucciˈneemmo woyite, isi kaaˈlo hasiissannonketa huwantoommotanna iso hagiirsiisa hasiˈneemmota leellinsheemmo.

6. Lawishshu huuccattora kulloonnire calla huucciˈra hasiissannonke? Xawisi.

⁶ Yesuusi harunsaanosi lawishshu huuccattora kulloonnire calla huuccidhara hasiˈranno yaa diˈˈikkino. Isi wole yannara yaachishinosihu addi addi coyi daafira huucciˈrino woyiti no. (Mat. 26:39, 42; Yoh. 17:1-26) Ninkeno yaachishinonkehu aye coyi daafirano  huucciˈra dandiineemmo. Mitto doorsha doodhate kaˈneemmo woyite Yihowa hayyonna egenno aannonke gede huucciˈra dandiineemmo. (Far. 119:33, 34) Mitto shaaˈˈa ikkinokki looso uyinanninke woyiteno hayyonna wodancha aannonke gede Yihowa huucciˈra dandiineemmo. (Law. 2:6) Annuwunna amuuwu oosonsara, ooso qolte annuwinsanna amuuwinsa daafira huucca dandiitanno; hattono ninke baalunku Qullaawu Maxaafi rosaanonkeranna sabbankeemmo mannira huucca dandiineemmo; qoleno togo assanke hasiissannote. Ikkollana Yihowawiinni mitore afiˈrate calla huucciˈra dihasiissannonke.

7. Yihowa huuccattotenni guwisa hasiissannonkehu mayiraati?

⁷ Huuccattotenni Yihowa guwisa hasiissannonketa qaaga hasiissaanke. Maganinke geeshsha guweenyu hasiisannohu dino. Isi ‘shaqqadohonna cubbono agurannoho’; qoleno isi, ‘maarannohonna mararannoho, hanqate muddamannokkiho, bagamannokkihu baxillisinna halaalisi batiˈraho.’ (Far. 86:5, 15) Addanko akattasinna assinori Yihowa galanteemmosi gede assannonke.

8. Yihowa galaxxineemmo gede assannonkehu mitu coyi maati? (Faarso 104:12-15, 24)

⁸ Yihowa huuccattotenni guwinseemmotano agurranna, isi qixxeessinonkehu maalaˈlinanni coyira iso galatano hasiissannonke. Lawishshaho baxisannoha addi addi kuula afidhino daraaro daafira, kiirre tunqannikkite coommitanno sagale daafiranna jaallanke ledo yanna sayinse afiˈneemmo hagiirri daafira Yihowa galata dandiineemmo. Baxillaanchu Anninke kurinna wole batinye coyibba uyinonkehu hagiidhinammora yeeti. (Faarso 104:12-15, 24 nabbawi.) Wolu baalunkunni roore, falakkinota ayyaanaamittete sagale shiqishannonke daafiranna dhagge ikkitannote albillittete hexxonke daafira Yihowa galaxxineemmosi.

9. Yihowa galata hambeemmokki gede kaaˈlankera dandaannori maati? (1 Teselonqe 5:17, 18)

⁹ Yihowa assinonke coyi baalaho galata hambeemmoha ikkara dandaanno. Qaangeemmo gede kaaˈlankera dandaannori maati? Yihowa huucciˈnoommo coye borreessine amaxxanna isi huuccattonkera dawaro qolinonkehu hiittoonniitiro afate hakko  coye wirro laˈˈa dandiineemmo. Hakkiinni isi kaaˈlinonke daafira huuccattotenni galaxxa dandiineemmo. (1 Teselonqe 5:17, 18 nabbawi.) Hanni tenne hendo: Wolootu galattannonke woyite lowo geeshsha hagiidhineemmo. Hatteente gede Yihowa huuccattonkera dawaro qolinonketa qaange galanteemmosi woyite lowo geeshsha tashshi yaannosi. (Qol. 3:15) Kayinni Maganonke galanteemmo gede assannonkehu wolu lowo geeshsha hasiisanno coyino.

10. Umi Pheexiroosi 2:21 kultanno garinni, Yesuusa uullara soyinonke daafira Yihowa galaxxa hasiissannonkehu mayiraati?

¹⁰ Umi Pheexiroosi 2:21 nabbawi. Yihowa rosiisannonke gede baxanno Beettosi soyinonke daafira galaxxa hasiissannonke. Yesuusi heeshsho daafira xiinxalline Yihowa daafira lowore rosanna iso hagiirsiinseemmo gara afa dandiineemmo. Kiristoosi kakkalo ammanneemmota loosunni leellinshummoro, Yihowa ledo danchu jaaloomi heeˈrannonke hattono isi ledo keerunni heeˈneemmo.—Rom. 5:1.

11. Yesuusi suˈminni huucciˈra hasiissannonkehu mayiraati?

¹¹ Beettisi widoonni iso huucciˈra dandiineemmo daafira Yihowa galaxxineemmosi. Yesuusi Yihowa huuccattonkera dawaro qolate horoonsiˈranno buusaati. Yihowa Yesuusi suˈminni huucciˈnanni huuccatto macciishshanno hattono dawaro qolanno. Yesuusi togo yee coyiˈrino: “Maganu Annu, Beettunni ayirranno gede suˈmiˈyanni huuccidhinannire baala asseemmoˈne.”—Yoh. 14:13, 14.

12. Beettisi daafira Yihowa galanteemmo gede assannonkehu wolu coyi maati?

¹² Yihowa Yesuusite wodote kakkalo widoonni cubbonke gatona yaannonke. Qullaawu Maxaafi Yesuusi daafira kulanni, “Gordoho ayirradu Magani barcimira qiniiteenni ofollinohu togoo qeesichi [“kakkalaanchi,” NW] noonke” yaanno. (Ibi. 8:1) Yesuusi “Maganu Annunniwa ninkera sae coyiˈramanno.” (1 Yoh. 2:1) Yihowa laanfenke afinohanna ‘ninke daafira huuccannoha’ Kakkalaanote Biilo qixxeessinonke daafira galanteemmosi. (Rom. 8:34; Ibi. 4:15) Guuntete xeˈne noonkere ikkinoommo daafira Yesuusi kakkalo nookkiha huuccattotenni Yihowawa shiqa didandiineemmo. Addanko Yihowa tenne baxxitino elto yaano muxxe Beettosi uyinonke daafira woˈmunni woˈma galata qoˈla didandiineemmo!

13. Yesuusi reyara albaanni noo hashsha rosaanosi baxannota leellishinohu hiittoonniiti?

¹³ Yesuusi reyara albaanni noo hashsha, Annisi rosaanosi ‘bushuwiinni gatisannonsa’ gede seeda yanna huuccino. (Yoh. 17:15) Tini Yesuusi insa mageeshshi geeshsha baxannonsaro leellishshanno! Isi lowo qarri iillasira kae noota afirono soqqamaasinesi keeri yaachishinosi.

14. Ammanate roduuwanke banxeemmota leellisha dandiineemmohu hiittoonniiti?

¹⁴ Yesuusi lawishsha harunsineemmoha ikkiro uminke hasatto calla dibalaxisiinseemmo. Hatteentenni woˈmanka woyite ammanate roduuwinke daafira huuccineemmo. Hatto assineemmo woyite Yesuusi mimmito banxeemmo gede hajajinonke hajajo wonshinanni heeˈnoommo; hattono ammanate roduuwanke mageeshshi geeshsha banxeemmoro leellinshanni heeˈnoommo. (Yoh. 13:34) Ammanate roduuwinke daafira huucca mulla yanna guxxa diˈˈikkitino. Maganu Qaali, “keeraanchu manchi huuccatto, lowo guma uyitannota jawa wolqa” afidhinota kulanno.—Yai. 5:16.

15. Ammanate roduuwinke daafira huucca hasiissannonkehu mayiraati?

 ¹⁵ Ammanate roduuwinkera lowo qarri iillannonsa daafira huuccatto assa hasiissannonke. Insa dhibba, kalaqamu dano, olanna darte hattono wole qarra dandiite saˈanno gede kaaˈlansara Yihowa huucca dandiineemmo. Qoleno uminsa horo agurte kaaˈlo hasiissannonsare kaaˈlitanno roduuwinke daafirano huucca dandiineemmo. Togoo qarri iillanni noonsari affinoonni roduuwi heedhara dandiitanno. Suˈmansa gantine insa daafira huuccatto assa dandiitinanni. Yihowa iillannonsa qarra dandiite saˈanno gede kaaˈlansara huuccineemmoha ikkiro addu baxilli noonketa leellinsheemmo.

16. Albisa ikkite soqqantanno roduuwi daafira huucca hasiissannonkehu mayiraati?

¹⁶ Albisa ikkite soqqantannori insa daafira huuccinannita lowo geeshsha baxxanno; qoleno tini huuccatto kaaˈlitannonsa. Soqqamaasinchu Phaawuloosi woˈnaalshino tini adda ikkase leellishanno. Isi togo yee borreessino: “Danchu Duduwiha goˈlino coye ruxxi yuummokkinni coyiˈrate, hasiisino qaale aannoe gede anerano huucceˈˈe.” (Efe. 6:19) Xaa yannarano albisa ikkite diinaggaabbe soqqantannori batinyu roduuwi no. Yihowa loosonsa maassiˈranno gede huuccine insa banxeemmonsata leellinsheemmo.

17-18. Mannu albaanni huuccineemmo gede koyinsankera dandiinannihu hiittoo woyiteeti? Togoo woyite maa heda hasiissannonke?

¹⁷ Mito woyite mannu albaanni huuccineemmo gede koyinsankera dandiinanni. Lawishshaho mitte Qullaawa Maxaafa xiinxallissanno rodoo, ledose xiinxallissannota wole rodoo huuccatto assitanno gede koyissara dandiitanno. Ledose xiinxallissanno rodoo Qullaawu Maxaafi rosaancho daafira garire affinokkiha ikkara dandaanno; hakko daafira ise huuccatto xiinxallo gooffanno woyite assa doodhitara dandiitanno. Konni garinni Qullaawu Maxaafi rosaancho daafira mayite huuccitannoro afa dandiitanno.

¹⁸ Mitto rodoo qanchu soqqansho gambooshshiwa woy songote gambooshshiwa huuccatto assanno gede koyinsasira dandiinanni. Gambooshshunniwa huuccatto assate  qoosso noonsa roduuwi gambooshshu mayi daafira kulannohoro heda hasiissannonsa. Huuccatto assinoonni widoonni songo amaala woy mitore egensiisa dihasiissanno. Roore woyite songote gambooshshiwa faarsotenna huuccattote fajjinoonni daqiiqi onteho; hakko daafira huuccatto assanno rodii roorenkanni hanafote ‘huuccatto seedisa’ dihasiissannosi.—Mat. 6:7.

19. Yihowahu yoote barrira qixxaambeemmo gede kaaˈlannonkeri maati?

¹⁹ Yihowahu yoote barri gambise dayi kiiro, heeshshonke giddo albinni roore huuccatto balaxisiisa hasiissannonke. Yesuusi tenne daafira kulanni togo yiino: “Daannohu bushu coyi baaluwiinni gatate wolqa afidhinanni . . . gede woˈmanka woyite jaattine huuccidhe.” (Luq. 21:36) Ee, jaante huucciˈra Maganu barri hedeweelcho daye amadannonkekki gede, ayyaanaamittetenni baqqi yine heeˈrate kaaˈlitannonke.

20. Huuccattonke tanni yee suˈnaanno hixaani gede ikka dandiitannohu hiittoonniiti?

²⁰ Xaa geeshsha maa ronsoommo? Huuccattote qoossonke lowo geeshsha naandeemmo. Huucciˈneemmohu qaru coyi Yihowa hedinori ledo xaadooshshe afiˈrinoha ikka hasiissannosi. Qoleno Maganu Beettinna gashshootisi daafira Yihowa galata hattono ammanate roduuwinke daafira huucca hasiissannonke. Maalaamittetenna ayyaanaamittete hasiisannonkeri daafirano huucciˈra dandiineemmo. Huuccatto assiˈneemmo woyite mayineemmoro seekkine hedanke, tenne dhagge ikkitanno qoosso lowo geeshsha naandeemmota leellishshanno. Huuccattonke tanni yee suˈnaanno hixaani gede Yihowa ‘tashshi assitannota’ ikkito.—Law. 15:8.