Anniꞌya Kanaadaho Yunayitidi yinanni Beetekiristaanera cimeessaho; hakko daafira anenna rodooꞌya lamalate kiiro Sambatu rosi minira soyannonke; hakkuyi gedensaanni 5 saatenni isi ledo xaande beetekiristaane haꞌneemmo. Hawarro kayinni amanke ledo Yihowa Farciꞌraasine gambooshshe haꞌneemmo. Konni garinni lamente ammaꞌno mereero noo badooshshe afa dandiinoommo.

Amaꞌya Qullaawu Maxaafinni rossino halaale Boobinna Mariyooni Hachiseni yinanniri seeda yanna jaallasera kultu; insano halaale macciishshe adhino. Hakkiinni 1958nni Niwu Yorkete Katamira settu barriha Maganu Fajjo yaannoha Daga Dagiyyote Gambooshshe assinoonni; Boobinna Mariyooni Hachiseni sase oosonsa ledo konne gambooshshe haadhe hadhinoe. Insara hakkawaro, ane gambooshshe haadhe haꞌra shota ikkitinonsakkita gedensoonni wodanchoommo; kayinni hakku gambooshshi kaaꞌlinoe gara horo dihaweemmo.

Shiimu noommo yannara addi addi saada noonke; ani qole saada towaata baxeemmo. Hakko daafira saadate akime ikka hasiꞌroommo. Amaꞌya tenne songote cimeessira kultu. Isi shaqqillunni, heeꞌnoommohu ‘goofimarchu barri’ giddo ikkinota qaageemmo gede assinoe; hattono lowo diro yuniversitete roso rosa Yihowa ledo nooe jaalooma huntara dandiitannota wodancheemmo gede kaaꞌlinoe. (2 Xim. 3:1) Hakko daafira yuniversite eꞌꞌe rosa giwummo.

 Kayinni, layinki dirimi roso gudummoro ma asseemmoro heda diaguroommo. Qidaamenna Sambata soqqansho ganye fuleemmoha ikkirono soqqansho dihagiirsiissannoe; hattono suwisaancho ikkeemmo yee dihedeemmo. Hatte mereero, Yihowa Farciꞌraasincho ikkinokki anniꞌyanna wosiiliꞌya Toronto katamira noote jawa inshuraansete dirijjite giddo woꞌma barra looseemmo gede jawaachishshinoe. Wosiiliꞌyara hatte dirijjite giddo lowo silxaane noosi; hakko daafira hakko loosate maahoyye yuummo.

Torontote roore yanna sayiseemmohu looso loosanniiti; qoleno Yihowa Farciꞌraasine ikkitinokkiriwa aana hanafummo; tini ayyaanaamittete coye ganye asseemmokki gede assitinoe. Umo heeꞌroommohu Yihowa Farciꞌraasincho ikkinokkihu ahaahiꞌya ledooti; isi reyihu gedensaanni kayinni heeꞌreemmohu wolu bayichi hasiisinoe.

Boobinna Mariyhoni Hachiseni yaano 1958 gambooshshe haadhe hadhueri anera annunna amate gede ikkitinoe. Insa minensa heeꞌreemmo gede koyissinoe; hattono ayyaanaamittetenni lopheemmo gede kaaꞌlitinoe. Hakkiinni 1960nni Jooni yinanni beettinsa ledo cuuamummo. Jooni suwisaancho ikke soqqama hanafi; tini anino albinni roore soqqameemmo gede jawaachishshinoe. Songote giddo noo roduuwi ayyaanaamittetenni lophanni noommota wodanchitu; gedensoonni Tiokiraasete Rosi Mini soqqamaancho assine shoommie. a

Hakkiinni 1966nni diinaggaabbe soqqantanno suwisaanchonna sabbakkannori roore hasiissannowa hadhe soqqamate quqquxantannote Raandi Bergi yinanni rodoo ledo adhammummo. Woradu aliidi laꞌꞌaanchi ninkera hedannonketa leellishinonke; hattono Ontaariyo Oriilla yinanniwa noo songo haꞌne kaaꞌlineemmo gede jawaachishinonke. Hakko daafira uduunnenke gamba assiꞌne bayichonkonni hakkiira haꞌnummo.

Oriilla iillinanni heeꞌneennanni Raandi ledo woꞌma yanna suwisaancho ikke soqqama hanafummo. Ise diinaggaabbe soqqantanno gari wonanni halchishe nooe! Suwisaancho ikke dancha gede sabbaka hanafummohu gedensaanni, Qullaawa Maxaafa horoonsiꞌre sabbakanna mannu halaale macciishshe adhanna laꞌꞌa  lowo geeshsha hagiirsiissinoe. Oriilla heeꞌrannori mittu minaanninna minaama heeshshonsa biddi assiꞌre Yihowara soqqamanno gede kaaꞌlinoommo daafira lowo geeshsha hagiidhinoommo.

Toronto haꞌnoommowa Beeteelete albisa ikkite soqqantanno roduuwi giddo Arinooldi Makinamaara yinanni rodiinni xaadummo. Isi baxxitino suwisaano ikkine soqqama hasiꞌneemmoronna teꞌee xaꞌminke. Bayichonkonni, “Eewana! Kiwubeekella ikka hoogiro” yuummo. Hatte yannara Kanaadaho heeꞌrannohu Ingilizete afoo coyiꞌranno manni Faransayete afoo coyiꞌnannihu Kiwubeeki qoqqowi daafira coyiꞌrannori hakko qoqqowi daafira gara ikkinokkire hedeemmo gede assinoe. Hatti yanna Kiwubeeki qoqqowira heeꞌranno manni Kanaadunni baxxe fula hasiꞌre gashshooteho finqilanni noote.

Arinooldi qole, “Sinu biiro xaa yannara baxxitino suwisaano soya hasidhanno bayichi Kiwubeeki callaati” yiie. Anino bayichonkonni hakkiira haꞌrate sumuu yuummo. Raandi wonanni hakko hadhe soqqama hasidhannota afoommo. Gedensoonni, kuni heeshshonke giddo doodhinoommohu kaajju doorshi giddo mitto ikkinota huwatoommo!

Onte lamala geeshsha Faransayete afoo ronsummohu gedensaanni, Raandinna ani wolu minaanninna minaama ledo Montiriyaaliyaho aliyye soojjaati widoonni 540 kiilo meetire xeertiꞌre nooha Rimoski yinanni bayicho haꞌnummo. Ikkirono xaano rosa hasiissannonkeri lowori no; mitto egensiishsha nabbawummo yannara Faransayete afoo lende rosa hasiissinonketi xabbe leeltino. “Aanannohu jawa gambooshshira Ostiriyu gobbanni lowo wosini daanno” yaammora hasiꞌre, “aanannohu jawu gambooshshira lowo ostiriiche (bajja yinanniti lowo cea) dagganno” yoommo.

Rimoski haꞌnummoti ninke shoolunku, mine assiꞌrinokkiri diinaggaawe soqqamannori shoolu seenni, Huberdeesi yinanni rodiinna minaamasi hattono lamu seennisi ledo egennammummo. Huberdeesi lamala kifile afiꞌrino mine karaayyae heeꞌranno; suwisaanono isira woxe baattanni hakko heedhanno; insa waajjo qalame gannoonni daafira konne mine Waajjo Mine yitanno. Hakko mine duucha woyite 12 woy 14 manni heeꞌneemmo. Baxxitino suwisaano ikkinoommo daafira Raandinna ani soodo, barranna hawarro soqqansho fulleemmo; hakko daafira, woꞌmanka woyite wole agurina hawado qiidu yannara hawarro nafa ledonke soqqamannoha dihoongeemmo.

Kuri ammanantino suwisaano ledo lowo geeshsha egennammoommo daafira insa ninkera maatete gede ikkitinonke. Mito woyite gobba giira giidhine baalunku mitteenni sagale qishiꞌneemmo. Ninke giddo mittu rodii muuziiqa dandaannoha ikkino daafira duucha woyite Sambatu hashsha sirbinanni godoꞌlineemmo.

Rimoski qoqqowira dancha guma afiꞌnoommo! Ontu diri giddo Qullaawu Maxaafi rosaano ayyaanaamittetenni lophite cuuantanna laꞌne hagiidhinoommo. Halashshaanote kiiro lexxite 35 balla ikkitino.

Kiwubeeki heeꞌnoommo yannara wongeellu loosira kaaꞌlannonkeha kaajja qajeelsha afiꞌnoommo. Yihowa soqqanshonkeranna maalaamittenkera hasiisannonkere wonshe kaaꞌlinonke gara laꞌnoommo. Qoleno Faransayete afoo coyiꞌranno manna, qaalensanna budensa baxa ronsoommo; tini qolte wolu manni budeno banxeemmo gede assitinonke.—2 Qor. 6:13.

Hedeweelcho sinu biiro Niyu Birunsiwikira soojjaatoonni baaru qaccera nooha Tirakadayi yinanni katama haꞌneemmo gede kultunke. Galleemmo mine karaayyaꞌne kaꞌnoommohuranna mittu rosi mine darate barra rosiisate maahoyye yoommo daafira tenne agure haꞌra shota diꞌꞌikkitinoe. Qoleno mite Qullaawu Maxaafi rosaanonke xaalla halashshaano ikkite no; hattono Gambooshshu Addaraashe minnanni mereedhine heeꞌnoommo.

 Heeꞌnoommohu Rimoski qooxeessinni lowo geeshsha baxxannohu Tirakadayi katama haꞌrate daafira Qidaamenna Sambata woꞌma barra huuccatto assiꞌnoommo. Kayinni Yihowa hakkiira haꞌnammora hasiꞌrino daafira haꞌrate murciꞌnoommo. Yihowa fonqolle laꞌnoommo; isino guficho ikkannoha mitto mittonka coye hoolinonke. (Mil. 3:10) Raandi ayyaanaamittetenni worba, umise horo agurtannotanna muushshi assannore coyidhannota ikkase hakkiira haꞌra shota ikkitannonke gede kaaꞌlitinonke.

Haarote marroommo songora cimeessu Rooberti Roosi callaati. Isi minaamasi Linda ledo suwisaancho ikke soqqamanno; insa umi qaaqqonsa ilihu gedensaannino hakkiicho heeꞌrate murciꞌrino. Insa qaaqqonsa towaaxxanni heeꞌrenni wosina adhanno garinna diinaggaawe soqqamanno gari Raandinna ane lowo geeshsha jawaachishinonke.

Tirakadayaho lame diro suwisaano ikkine soqqammummohu gedensaanni xaano hendoommokkire kullinke; yaano woradu aliidi laꞌꞌaano ikkine soqqammeemmo gede koyinsinke. Ingilizete afiinni massanganni songuwa lamala diro towaantummohu gedensaanni, Kiwubeeki qoqqowira noota Faransayete afiinni massanganni songuwa towaanteemmo gede gaamminke. Kiwubeeki qoqqowira awuraajju aliidi laꞌꞌaancho ikke soqqamannohu roduu Liyoonsi Kiripolti shiqisheemmo lallawora galatannoe. Kayinni isi, “Lallawokki roore kaaꞌlitannota ikkitanno gede ma assa dandaatto?” yee woꞌmanka woyite xaꞌmannoe. b Isi ane kaaꞌlate assinori rosiisate dandooꞌya woyyeessiꞌreemmo gedenna huwatate qarrisannokki garinni rosiiseemmo gede kaaꞌlinoe.

Xaa geeshsha haweemmokki loosi giddo mittu 1978nni Montiriyaaliyaho assinoonnihu “Qeeltanno Ammana” yaannohu Daga Dagiyyote Gambooshshiwa uyinoonnie loosooti. Hakkiicho sagale qinshanniwa loosoommo. Gambooshsheho 80,000 ikkanno manni daanno yine hendoonni; hattono sagale qixxeessinoonni gari konni albaanni qixxeessinoonni garinni baxxinoho. Baalunku coyi haaroho: sagale qixxeessinoonni uduunni, sagalete daninna sagale qinshoonni gari. Sagale qiissitannota 20 jajjabba firiije qixxeessinoonni; mito woyite tini firiije loosa gibbe waaddannonke. Pirogiraame gaꞌa gede heedheenna ispoortete godoꞌle noo daafira istaadiyeeme eꞌne baalanka coye biddi assate hashshu taalooti geeshsha agarroommo. Qoleno soodo gutu kaꞌne mannu afoo seekkiꞌrannore qixxeessa hasiissannonke! Lowo geeshsha daafurroommo; ikkirono diinaggaabbe loossannori, ayyaanaamittete gikki yitinorinna muushshi assannore coyidhannori ammanate  roduuwiꞌyawiinni lowore rosoommo. Tini mimmitu ledo xaa geeshsha jaalla ikkineemmo gede kaaꞌlitinonke. Lowo darti nooha ikkirono 1940 nna 1960 mereero Kiwubeeki assinoonnihu konni hambannikki gambooshshinni lowo hagiirre afiꞌnoommo!

Montiriyaalaho assinoonnihu jawu gambooshshiwa ledoꞌya aliidi laꞌꞌaano ikkite soqqantino roduuwiwiinni lowore rosoommo. Mitto diro, xaa yannara Aliidi Bisi miila ikke soqqamannohu roduu Deevidi Ispileeni konni gambooshshira aliidi laꞌꞌaancho ikke soqqamino. Wole yannara assinoonni gambooshshira hakko looso ani looseemmo gede kullie; hatte yannara roduu Deevidi lowo geeshsha kaaꞌlinoe.

Raandinna ani 36 diro woradu aliidi laꞌꞌaano ikkine soqqammummohu gedensaanni 2011nni Songote Cimeeyyera Qixxeessinoonni Rosi Mine rosiiseemmo gede koyinsie. Raandinna ani lamu diri giddo calla addi addihu 75 daallasira gonxoommo; ikkirono tini gaabbissannota diꞌꞌikkitino. Mitte mittente lamala jeefora songote cimeeyye Aliidi Bisi ayyaanaamittensa daafira mageeshshi geeshsha hedannoro huwattannohura lowo geeshsha hagiidhitanno.

Gedensoonni Maganu Mangiste Sawaakooti Rosi Mine rosiisoommo. Rosaano rosu batiꞌrannonsa daafira duucha woyite daafurtanno, hatto yaaddanno; mitto barra kifilete ofolte lamala saate woꞌma rossanno, hawarrote kiiro sase saate woꞌma mini looso loossanno hattono mitte lamala giddo shoole woy onte kifile shiqishshanno. Aninna ledoꞌya rosiisanno rosiisaanchi, rosaano tenne assa dandiitannohu Yihowa kaaꞌlinsaro calla ikkinota kulleemmonsa. Rosaano Yihowa addaxxite, heddinohunni nafa roorinore assite dhagge assidhannota woꞌmanka woyite qaageemmo.

Amaꞌya wolootaho heddannota ikkase Qullaawu Maxaafi rosaanose ayyaanaamittetenni lophitanno gede kaaꞌlitino; hattono anniꞌyara nafa halaaleho noosi lao soorrantanno gede assitino. Amaꞌya reyituhunni sasu barri gedensaanni anniꞌya lallawo macciishshate Gambooshshu Addaraashe dayita dhagge assiꞌnoommo; isi hatte yannanni kayise 26 diri geeshsha gambooshshe haꞌra diagurino. Anniꞌya xaa geeshsha cuuaminokkiha ikkirono songote cimeeyye lamalate kiiro gambooshshe balaxe daannota kultannoe.

Amaꞌya roduuwiꞌyaranna anera dancha lawishsha ikkitinonke. Sasenti roduuwiꞌyanna minaannuwinsa Yihowara ammaname soqqamanni no. Lame roduuwiꞌya soqqamannohu sinu biiroraati; mitte Porchugaalete mitte qolte Heyiti soqqantanno.

Raandinna ani xa Ontaariyo Hamilteni yinanniwa baxxitino suwisaano ikkine soqqammanni heeꞌnoommo. Woradu looso loonseemmo yannara roduuwu galagalte marte hasaawisatenna Qullaawa Maxaafa xiinxallisate hadhanno woyite ledonsa haꞌneemmo. Xa kayinni ninke uminke rosaano ayyaanaamittetenni lophitanna laꞌne hagiidhinoommo. Xa heeꞌnoommote haaro songora noo roduuwi ledo dancha jaalooma kalaqiꞌnoommo; hattono Yihowa insa qarrunna faffote yannara kaaꞌlinonsa gara laꞌꞌanke jawaachishshinonke.

Batinyu roduuwi ninke daafira heddannota leellishshino gara qaangeemmo woyite insa galanteemmonsa. Ninkeno wolootu ayyaanaamittetenni lophitanno gede kaaꞌline hendeemmonsata leellishate dandiinummore baala assinoommo. (2 Qor. 7:6, 7) Lawishshaho mitte maate giddo ama, beettisenna beettose woꞌma yanna soqqamaano ikke soqqamanno. Minaanni suwisaancho ikkate daafira hede egenninoronna teꞌee xaꞌmummo. Isi minesi nooha sasenka suwisaano ikkino manna kaaꞌlanni noota kulie. Hakkiinni, “Ati insa Yihowa kaaꞌlannohunni roorsite kaaꞌla dandaatto?” yee xaꞌmummosi. Hakkiinni isino insa assitannore asse hagiidhanno gede jawaachishummosi. Isino lewu agani gedensaanni suwisaancho ikkino.

Raandinna ani “dagganno ilamara” dhagge ikkannoha Yihowa looso kula diagurreemmo; insano Yihowara soqqante hagiirre afidhanno yine hexxineemmo.—Far. 71:17, 18.