1, 2. (a) Yesuusi reyara albaanni rosaanosira maa kulinonsa? (Hanafote noo misile lai.) (b) Sabbankeemmo korkaata ganyine heda hasiissannonkehu mayiraati? (c) Konninni aanchine maa ronseemmo?

 YESUUSI reyara albaanni noo hashsha soqqamaasinesira lowore kulinonsa, hattono wodaninni baxannonsata buuxisinonsa. Sai birxichira ronsummonte gede, woyinete haqqicho daafira lawishsha kulinonsa. Yesuusi konne lawishsha horoonsiꞌre, rosaanosi “batinye guma laala” agurtannokki gede yaano, Maganu Mangiste sokka sabbakate loosinsanni kaajjitanno gede jawaachishinonsa.—Yoh. 15:8.

² Ikkirono Yesuusi rosaanosira maa assa hasiissannonsaro calla ikkikkinni hakkonne coye assa hasiissannonsahu mayiraatirono kulinonsa. Sabbakate looso loosa hasiissannonsa korkaata kulinonsa. Ninkeno konne korkaata afa hasiissannonkehu mayiraati? Sabbankeemmohu mayiraatiro ganyine hendeemmoha ikkiro, hexxo mudhinummokkinni dancha duduwo “gosa baalate” duduwa dandiineemmo. (Mat. 24:13, 14) Konninni aanchine sabbankeemmo gede assannonkeha shoole korkaata ronseemmo. Qoleno, guma laallanni heeꞌrate kaaꞌlitannonketa Yihowa uyinonketa shoole elto laꞌneemmo.

3. (a) Yohaannisi 15:8 te kulloonni garinni sabbakate looso loosa hasiissannonkehu mayiraati? (b) Yesuusi coyiꞌrino lawishshi giddo kulloonniti woyinete laalo maa riqibbanno?

³ Sabbakate looso loosa hasiissannonkehu qaru korkaati, dagate albaanni Yihowa ayirrannonna suꞌmisi qullaawanno gedeeti. (Yohaannisi 15:1, 8 nabbawi.) Yesuusi Annasi Yihowa woyinete haqqe towaatanno loosaasinchi ledo, umosi woyinete haqqicho ledo, hattono rosaanosi sinnate ledo taashshino. (Yoh. 15:5) Konni daafira, lawishshu giddo kulloonniti woyinete laalo, Kiristoosi harunsaano laaltannoha Maganu Mangiste guma riqibbanno. Yesuusi soqqamaasinesira “Batinye guma laaltiniro, konninni Anniꞌya ayirranno” yiino. Woyinete haqqicho dancha guma laalturo hatte haqqicho towaatanno manchi hagiidhannonte gede, dandiinummo deerrinni Maganu Mangiste sokka dudumbeemmoha ikkiro Yihowa ayirranno.—Mat. 25:20-23.

4. (a) Maganu suꞌmi qullaawanno gede assa dandiineemmohu hiittoonniiti? (b) Maganu suꞌmi qullaawanno gede assate qoosso afiꞌrakkinni mayi macciishshamannohe?

⁴ Sabbakate loosinke Yihowa suꞌmi qullaawanno gede assannohu hiittoonniiti? Ninke Maganu suꞌmi roore qullaawa ikkanno gede assa didandiineemmo. Korkaatuno wonanni suꞌmisi qullaawahonna xalalaho. Kayinni Isayaasi 8:13 togo yitanno: “[Manniꞌya] ani Olantote Mootichi Kaaliiqi [“Yihowa,” NW] qullaawa ikkoommota hawoonke; waajjinannihu ane callaati.” Maganu suꞌmi qullaawanno gede assa dandiineemmo doogga giddo mitte, suꞌmisi wole baalante suꞌmuwanni baxxinohu gede asse laꞌꞌatenna wolootuno suꞌmisi qullaawa ikkinota huwattanno gede kaaꞌlate. (Mat. 6:9) Lawishshaho, dhagge ikkitinota Yihowa akattanna isi mannu oosora hedinore wolootaho dudumbeemmoha ikkiro, Sheexaanu Maganu suꞌmi daafira coyiꞌrinori kapho ikkinota leellinsheemmo. (Kal. 3:1-5) Qoleno qoqqowinkera noo manni Yihowara “ayirrinyunna guweenyu” hasiisannosita huwatanno gede kaaꞌlineemmoha ikkiro Maganu suꞌmi qullaawanno gede assinanni heeꞌnoommo. (Aju. 4:11) Ruuna yinanniti 16 diro suwisaancho ikkite soqqantino rodoo togo yitino: “Kalqete alame Kalaqaanchi daafira farciꞌrate qoosso afiraꞌyanni tashshi yaannoe. Tini agurummakkinni farciꞌreemma gede assitinoe.”

5. (a) Yohaannisi 15:9, 10 te garinni sabbakate looso loosa hasiissannonkehu mayiraati? (b) Yesuusi cinca hasiissannota luphi asse xawisinohu hiittoonniiti?

⁵ Yohaannisi 15:9, 10 nabbawi. Yihowaranna Yesuusira noonke baxilli Maganu Mangiste sokka dudumbeemmo gede assannonke. (Maq. 12:30; Yoh. 14:15) Yesuusi rosaanosi ‘baxillisinni heedhanno’ gede kulinonsa. Mayira? Korkaatuno Yesuusi harunsaano ikkine lowo diro heeꞌrate cinca hasiissanno. Yesuusi cinca hasiissannota xawisate Yohaannisi 15:4-10 te noo qummeeshshira calla, ‘heedhe’ yaanno qaale haammata hige qummi assino.

6. Kiristoosi baxillinni heeꞌra hasiꞌneemmota leellisha dandiineemmohu hiittoonniiti?

⁶ Kiristoosi hagiirsiisanna isi baxilli giddo heeꞌra hasiꞌneemmota leellisha dandiineemmohu hiittoonniiti? Isi hajajo agadhatenniiti. Haranchunni Yesuusi ‘Anera hajajammeꞌꞌe’ yiino. Ikkirono Yesuusi ninke asse yiinonkehu isi umisi assinoreeti; korkaatuno isi togo yiino: “Ani kiꞌnera assoommore kiꞌneno assitinanni gede lawishsha ikkaꞌnera assoommo.” (Yoh. 15:10) Ee, Yesuusi umisi dancha lawishsha ikkinonke.—Yoh. 13:15.

7. Hajajamanna baxillu mayi xaadooshshe afiꞌrino?

⁷ Yesuusi baxillunna hajajama xaadooshshe afidhinota xawisanni soqqamaasinesira “hajajoꞌya adhannohunna wonshannohu baxannoeho” yiino. (Yoh. 14:21) Qoleno Yesuusi ‘hadhine sabbakke’ yiino hajajo ayirrinseemmoha ikkiro, Yihowara noonke baxille leellinsheemmo; korkaatuno Yesuusi hajajino hajajora  Buicho Yihowaati. (Mat. 17:5; Yoh. 8:28) Yihowaranna Yesuusira baxille leellinsheemmoha ikkiro, insano baxillinsanni heeꞌneemmo gede assitannonke.

8, 9. (a) Sabbankeemmo gede assannonkehu wolu korkaati maati? (b) Hiziqeeli 3:18, 19 nna 18:23 noohu Yihowa qaali sabbankeemmo gede kakkayisannonkehu mayiraati?

⁸ Sabbaka agurreemmokki gede assannonkehu wolu korkaatino no. Sabbankeemmohu manna qorowisiisateeti. Qullaawu Maxaafi Nohi farciꞌraasincho ikkinota kulanno. (2 Pheexiroosi 2:5 nabbawi.) Nohi Baote Wayi daara albaanni sabbakino sokka manna dagganni noo bao daafira kule qorowisiisa ikkitukki digattino. Hatto yineemmohu mayiraati? Yesuusi togo yiino: “Hakka waro baote wayi daara albaanni Nohi markaawe ei barri geeshsha, mannu itanninna aganni, adhanninna adhamanni no. Baote wayi daye baalanka fee haaꞌre haꞌra geeshsha diaffino. Manchi Beetti daanno yannano hattoota ikkitanno.” (Mat. 24:38, 39) Mannu adha giwirono, Nohi uyinoonnisita qorowishshu sokka ammaname duduwino.

⁹ Yannankera, Maganu Mangiste sokka dudumbeemmohu wolootu Yihowa mannu oosora hedinore affanno gedeeti. Ninkeno Yihowa gede mannu kulleemmonsa sokka macciishshe “lubbote heeꞌrara” hasiꞌneemmo. (Hiz. 18:23) Minunni mine haꞌne, hattono lowo manni noowa sabbankeemmo woyite, mulenni Maganu Mangiste dagge tenne busha alame huntannota kulle manna qorowisiinseemmo.—Hiz. 3:18, 19; Dan. 2:44; Aju. 14:6, 7.

10. (a) Maatewoosi 22:39 te sabbaka hasiissannonkeha hiikkonne korkaata kulloonni? (b) Phaawuloosinna Silaasi Filiphisiyuusi katamira heedhe usuru mini agaraancho kaaꞌlitino gara xawisi.

¹⁰ Agurrummokkinni sabbankeemmo gede assannonkehu wolu korkaati mannaho noonke baxilleeti. (Mat. 22:39) Mannu noo gari soorramanno woyite laonsano soorrantannota anfoommo daafira, sabbakate loosinkenni kaajjine uurrineemmo. Hanni soqqamaasinchu Phaawuloosiranna soqqanshote jaalisi Silaasira iillinonsare laꞌno. Filiphisiyuusi katamira heedheenna giwannonsa manni usuru minira eessinonsa. Hakkiinni hashshu taalootira, baattote huxano kaꞌe usuru mine shaffeenna usuru mini xullichuwa faꞌnantu. Usuru mini agaraanchi usuranyu fule bainoha laweennasi isonoo shaara bise fushshiꞌrino. Hakkiinni Phaawuloosi mancho “Ninke baalunku konne heeꞌnoommona umokki galaffattooti” yee huurosi naggi asse coyiꞌrino. Usuru mini agaraanchi mase, “Gateemmo gede maa asso?” yee xaꞌmino. Hakkiinni insa “Atino minikki mannino gattinannina, Mooticha Yesuusa ammani” yitinosi.—Soq. 16:25-34.

11, 12. (a) Usuru mini agaraanchi xagge soqqanshonke ledo mayi xaadooshshe afidhino? (b) Sabbaka agura hasiissannonkekkihu mayiraati?

¹¹ Usuru mini agaraanchi xagge sabbakate loosinke ledo mayi xaadooshshe afidhino? Hanni tenne hedi: Kuni agaraanchi hedosi biddi assiꞌre kaaꞌlo xaꞌmiꞌrinohu baattote huxano kaꞌu gedensaanni. Hatteente gede, konni albaanni Qullaawu Maxaafi halaale macciishsha giwino manni, heeshshonsa giddo buutote qarri iillannonsa woyite hedonsa  biddi assiꞌre kaaꞌlo xaꞌmirara dandaanno. Lawishshaho, qoqqowinkera heedhannori giddo mitu lowo diro loossanni keeshshitino looso hedeweelcho hoogge baasa dadillitinoha ikkara dandaanno. Wolootu qolte maatensa diiganteenna qarrante nooha ikkara dandaanno. Mitoota buutote xibbi amadinonsaha, woy shiidhe manchittinoha ikkara dandaanno. Alba halaale macciishsha gibbinori togoo qarri iillannonsa woyite, ‘Isi kalaqammoommohu mayiraati?’ yite xaꞌmitara dandiitanno. Insa ‘Gatate maa assa hasiissannoe?’ yite heddannoha ikkara dandiitanno. Togoo manninni xaandeemmo woyite, heeshshonsa giddo mite yite kulleemmonsa sokka macciishshate sumuu yitara dandiitanno.

¹² Konni daafira sabbakate looso agurrummokkinni ammanamme loosanke, mannu dancha duduwo macciishsha hasiꞌranno yannara sheshifachishate kaaꞌlitannonke. (Isa. 61:1) Sharlooti yinanniti 38 diro woꞌma yanna soqqansho soqqantino rodoo togo yitino: “Xaa yannara mannu higannowa hoogino. Konni daafira, dancha duduwo macciishshanno tunceenya afiꞌra hasiissannonsa.” Evoori yinanniti 34 diro suwisaancho ikkite soqqantino rodoono togo yitino: “Yannankera mannu albinni roore shete no. Konne manna kaaꞌla hasiꞌreemma. Tini qolte sabbakeemma gede assitannoe.” Ee, mannaho noonke baxilli agurrummokkinni sabbankeemmo gede kakkayisannonke!

13, 14. (a) Yohaannisi 15:11 te hiittenne elto kulloonni? (b) Ninkeno Yesuusi gede hagiidha dandiineemmohu hiittoonniiti? (c) Soqqanshotenni afiꞌneemmo hagiirri kaaꞌlannonkehu hiittoonniiti?

¹³ Yesuusi reyara albaanni noo hashsha soqqamaasinesira hexxo mudhitukki guma laaltanni heedhanno gede kaaꞌlitinonsa elto kulinonsa. Tini elto maati? Ninke tenne eltonni horo afiꞌra dandiineemmohu hiittoonniiti?

¹⁴ Hagiirre. Yesuusi sabbankeemmo gede hajajino hajajo duha ikkitinoni? Diꞌꞌikkitino! Yesuusi woyinete haqqicho daafira lawishsha coyiꞌri gedensaanni, Maganu Mangiste sokka dudumbummoro hagiirraamma ikkineemmota coyiꞌrino. (Yohaannisi 15:11 nabbawi.) Isinni isi afiꞌrino hagiirre ninkeno afiꞌra dandiineemmota buuxisinonke. Hiittoonni? Aleenni ronsummonte gede Yesuusi isonooto woyinete haqqicho ledo, rosaanosi qole sinnate ledo taashshino. Haqqicho, sinna irkisse amaddanno. Sinna waanna wole hasiissanno sagale afidhannohu woyinete haqqichora qaꞌmidhe heedhuro callaati. Hatteente gede, Kiristoosi faale haꞌne isi ledo noonke mittimma agadhine heeꞌnummo geeshsha, isi Annisi fajjo wonshe afiꞌrino hagiirre ninkeno afiꞌra dandiineemmo. (Yoh. 4:34; 17:13; 1 Phe. 2:21) Hanee yinanniti 40 saꞌꞌanno diro suwisaancho ikkite soqqantino rodoo togo yitino: “Soqqamumma gedensaanni macciishshamannoe hagiirri, Yihowara soqqama agureemmakki gede assannoe.” Ee, soqqanshotenni afiꞌneemmo hagiirri, mannu sokkanke macciishshannokki qoqqowira nafa hexxo mudhinummokki sabbankeemmo gede assannonke.—Mat. 5:10-12.

15. (a) Yohaannisi 14:27 te hiittenne elto xawinsoonni? (b) Keeru, guma laallanni heeꞌneemmo gede kaaꞌlannonkehu hiittoonniiti?

¹⁵ Keere. (Yohaannisi 14:27 nabbawi.) Yesuusi reyara albaanni noo hashsha soqqamaasinesira “keereꞌya eemmoꞌne” yiinonsa. Tini elto yaano Yesuusi keeri guma laalate kaaꞌlannonkehu hiittoonniiti? Kaajjine sabbankeemmoha ikkiro, Yihowanna Yesuusa hagiirsiinsanni heeꞌnoommota anfoommo daafira giddiidi keere afiꞌneemmo. (Far. 149:4; Rom. 5:3, 4; Qol. 3:15) Ulfi yinannihu 45 diro woꞌma yanna soqqansho giddo keeshshino rodii togo yiino: “Sabbakate loosi daafursannoeha ikkirono, giddiidi harshammo afiꞌreemmonna hagiirru noo heeshsho heeꞌreemmo gede kaaꞌlinoe.” Ee, geedannoha giddiidi keere  afiꞌnoommo daafira Yihowa galanteemmosi!

16. (a) Yohaannisi 15:15 hiittenne elto kulloonni? (b) Yesuusi soqqamaasine isi jaalla ikkite heeꞌrate maa assa hasiissannonsa?

¹⁶ Yesuusi jaala ikka. Yesuusi, soqqamaasinesi hagiirri “woꞌma ikkanno gede” halchannota coyiꞌri gedensaanni, meessi horo agurre baxille leellisha hasiissannohu mayiraatiro xawisino. (Yoh. 15:11-13) Hakkiinni isi “jaallaꞌya yoommoꞌne” yiinonsa. Yesuusi jaala ikka kaajja eltooti! Soqqamaasinesi isi jaalla ikke heeꞌrate maa assa hasiissannonsa? Insa ‘hadhe batinye guma laala’ hasiissannonsa. (Yohaannisi 15:14-16 nabbawi.) Yesuusi mitu lamu diri albaanni soqqamaasinesi togo yee hajajinonsa: “Hadhine, ‘Gordu Gashshooti gamba yiino’ yitine kulle.” (Mat. 10:7) Konni daafira isi jeefote hashsha, hanaffino loosinni kaajja hasiissannonsata kulinonsa. (Mat. 24:13; Maq. 3:14) Yesuusi hajajino hajajo wonsha shota ikka hooggurono, isi jaalla ikkite heeꞌrate tenne assa hasiissinonsa. Togo assate kaaꞌlannonsari maati? Tennera kaaꞌlitinonsati wole elto no.

17, 18. (a) Yohaannisi 15:16 te hiittenne elto kulloonni? (b) Tini elto Yesuusi rosaano kaaꞌlitannohu hiittoonniiti? (c) Xaa yannara kaaꞌlitannonketi Yihowa uyinonke elto hiittenneeti?

¹⁷ Huuccattonkera dawaro afiꞌneemmo. Yesuusi “Ane suꞌminni huuccidhinannire baala Anniꞌya aannoꞌne” yiino. (Yoh. 15:16) Tini hexxo Yesuusi soqqamaasine baasa jawaachishshinonsati egennantinote! a Soqqamaasine hatte yannara huwattinokkiha ikkirono, Massagaanchinsa reyanno yanna rakke no; ikkirono kaaꞌlo afidhanno doogo no. Maganu Mangiste sokka duduwate loosonsa loosa dandiitanno gede kaaꞌlansara huuccidhuro Yihowa huuccattonsa macciishshannota addaxxa dandiitanno. Qoleno shiima yanna gedensaanni huuccidhino huuccattora Yihowa dawaro qolanna laꞌino.—Soq. 4:29, 31.

¹⁸ Yannankerano kaajjine guma laallanni heeꞌnummo geeshsha Yesuusi jaalla ikka dandiineemmo. Qoleno, Maganu Mangisteha dancha duduwo dudumbeemmo woyite xaadannonke guficho qeelleemmo gede kaaꞌlankera Yihowa huucciꞌneemmoha ikkiro isi kaaꞌlannonketa addaxxa dandiineemmo. (Far. 46:1) Yihowa huuccattonkera dawaro qolannotanna Yesuusi jaalla ikkineemmota afanke lowo geeshsha hagiirsiissannonke! Tini Yihowa uyinonke elto guma laallanni heeꞌrate kaaꞌlitannonke.—Yai. 1:17.

19. (a) Sabbakate looso loosa agura hasiissannonkekkihu mayiraati? (b) Maganu looso umo fushshate mayi kaaꞌlannonke?

¹⁹ Konni birxichira ronsummo garinni, Yihowa ayirrannonna suꞌmisi qullaawanno gede, Maganohonna Yesuusira baxillenke leellishate, manna qorowisiisatenna wolootaho baxille leellishate agurrummokkinni sabbaka hasiissannonke. Yihowa uyinonke elto yaano, hagiirru, keeru, Yesuusi jaala ikkate qoossonna huuccattonkera afiꞌneemmo dawaro Maganu uyinonke looso umo fushshate kaaꞌlitannonke. Yihowa woꞌmu wodaninkenni ‘batinye guma laalate’ sharrammanna laꞌꞌanno woyite lowo geeshsha hagiidhanno!