1. Saihu 2023hu diru gambooshshiwa maa ronsoommo?

 SAIHU 2023hu diru gambooshshiwa a ammananke daafira biddi assinoonniha mito dhagge ikkanno roso ronsoommo; soqqanshonke daafirano dhagge ikkanno egensiishsha kulloonni. Lawishshaho Bayira Baabiloone baꞌuhu gedensaanni nafa mitu manni Yihowa manni wido ikkate faro afiꞌrara dandaannota ronsoommo. Qoleno Bocaasa 2023nni hanaffe halashshaano baalanta soqqanshote rippoorte qoltanno gede xaꞌminanninsakkita kulloonni. Kuni biddi assinoonni coyi soqqanshonke hakkeeshsha hasiissannokkita woy wiinamme sabbaka hasiissannokkita leellishannoni? Deeꞌni!

2. Hashshe soodi kiiro albinni roore wiinamme sabbaka hasiissannonkehu mayiraati? (Maarqoosi 13:10)

² Hashshe soodi kiiro albinni roore wiinamme sabbaka hasiissannonke. Mayira? Korkaatuno yanna gooffanni no. Hanni Yesuusi goofimarchu yannara loonsannihu sabbakate loosi daafira mayinoro laꞌno. (Maarqoosi 13:10 nabbawi.) Yesuusi Maatewoosi Wongeellira “goofimarchu” daara albaanni dancha duduwo uulla woꞌmate dudumbannita coyiꞌrino. (Mat. 24:14) Tini yaatto Sheexaanu alame woꞌmunni woꞌma baꞌannota leellishshanno. Yihowa muli yanna giddo tini alame baꞌanno ‘barranna saate’ murino. (Mat. 24:36; 25:13; Soq. 1:7) Hashshe  soodi kiiro tini yanna gambisse dagganni no. (Rom. 13:11) Goofimarchu daa geeshsha agurrummokkinni sabbaka hasiissannonke.

3. Sabbankeemmo gede assannonkeri maati?

³ Soqqanshonke daafira hendeemmo woyite ninkeneeto aante noota lowo geeshsha hasiissanno xaꞌmo xaꞌma hasiissannonke: Dancha duduwo dudumbeemmohu mayiraati? Dudumbeemmo gede assannonkehu baxilleho. Sabbakate looso loosanke, dancha duduwo banxeemmota, manna banxeemmota, wolu baalunkunni roore Yihowanna suꞌmasi banxeemmota leellishshanno. Hanni tenne mitte mittente hajo daafira laꞌno.

SABBANKEEMMOHU DANCHA DUDUWO BANXEEMMO DAAFIRAATI

4. Hagiirsiisanno duduwo macciishshinummoro hiitto ikkineemmo?

⁴ Hagiirsiisanno coye macciishshittoro lawishshaho maateꞌne giddo qaaqqu ilaminota kullihero woy lowo geeshsha hasiise noohe looso afiꞌrittoro hiitto ikkatto? Macciishshoottoha hagiirsiisinohe coye maatekkiranna jaallakkira kulate quqquxamattoti dihuluullissannote. Wolu baalunkurinni roore hagiirsiisanno coye yaano Maganu Gashshootiha dancha duduwo macciishshittoti hatto assootto?

5. Umo Maganu Qaali giddo noo halaale rosittoti hiitto ikkootto? (Misillano lai.)

⁵ Hanni umo Maganu Qaali giddo noo halaale rosittoti hiitto ikkoottoro hedi. Iimi Annikki baxannoheta, iso magansidhanno maatesi wido ikkattora hasiꞌrannota, qarranna shetto hunannota kule qaale einota, shiiꞌrootto manni haaro alamera reyotenni kaeenna xaadate hexxo noohetanna wole batinye halaale rosootto. (Maq. 10:29, 30; Yoh. 5:28, 29; Rom. 8:38, 39; Aju. 21:3, 4) Kuni rosootto halaali lowo geeshsha hagiidhatto gede assinohe. (Luq. 24:32) Rosoottore lowo geeshsha baxootto; hattono konne muxxe halaale manna baalaho kula hasiꞌrootto!—Ermiyaasi 20:9 ledo heewisiisi.

6. Irnestinna Roozi woꞌnaalshinni maa rosootto?

 ⁶ Hanni mitto woꞌnaalsha laꞌno. Irnesti b yinanni rodii annasi shiiꞌrinohu tonnu diri balla heeꞌreeti. Irnesti hakkawarita qaage togo yiino: “‘Anniꞌya iimira haꞌrinonso xaate isiri kainokka?’ yee yaadoommo. Annu noonsa ooso hinaaseemmo.” Irnesti ganye annasi madaarroonni waammawa mare guluphe togo yee huucciꞌranno: “Maganoꞌya ballo, anniꞌya hiikko nooro afeemmo gede kaaꞌlie.” Irnesti annisi reyihunni 17 diri gedensaanni Qullaawa Maxaafa xiinxallanno gede koyinsoonnisi; isino tennera maahoyye yiino. Isi reyitinori natare goxino manchi gede ikkitinotanna Qullaawu Maxaafi kaote hexxo noota kulannota rositi lowo geeshsha hagiidhino. (Ros. 9:5, 10; Soq. 24:15) Jeefote isi lowo diro huluullitanni qarrissinosi xaꞌmuwara dawaro afiꞌrino! Irnesti Qullaawu Maxaafinni rosinore lowo geeshsha dhagge assiꞌrino. Minaamasi Roozino Qullaawa Maxaafa xiinxalla hanaffino; iseno Qullaawu Maxaafinni rossinore baxxino. Hakkiinni 1978nni lamunku cuuantino. Insa rosinoha muxxe halaale mininsa mannira, jaallansara hattono macciishshannonsa mannira baalaho quqquxame sabbakino. Konni garinni Irnestinna Roozi 70 saꞌꞌanno manni ayyaanaamittetenni lophe cuuamanno gede kaaꞌlino.

7. Qullaawu Maxaafi halaali wodaninkera rumuxxiro ma assineemmo? (Luqaasi 6:45)

⁷ Qullaawu Maxaafinni ronsoommo halaali wodaninkera rumuxxiro sammi yineemmokkiti egennantinote. (Luqaasi 6:45 nabbawi.) Ninkeno umi xibbi diro heedhinori Yesuusi rosaano yitinota yineemmo; insa, “Ninke anfoommorenna macciishshinoommore kula diagurreemmo” yitino. (Soq. 4:20) Qullaawu Maxaafi halaale lowo geeshsha banxeemmo daafira dandiinummo deerrinni batinyu mannira kula hasiꞌneemmo.

SABBANKEEMMOHU MANNA BANXEEMMO DAAFIRAATI

8. Wolootaho dancha duduwo dudumbeemmo gede assannonkeri maati? (“ Manna Baxxe—Rosaano Asse” yitanno saaxine lai.) (Misileno lai.)

⁸ Yihowanna Beettisinte gede manna banxeemmo. (Law. 8:31; Yoh. 3:16) ‘Hexxo nookkirenna Magano afidhinokkire’ lowo geeshsha mararreemmo. (Efe. 2:12) Insa lowo qarri amadannonsa daafira, qarrinsara mala ikkannoha Maganu Gashshootiha dancha duduwo kulleemmonsa. Konne manna banxeemmonna mararreemmonsa daafira insara dancha duduwo kulate dandiinummore baala assineemmo. Tini kaajja sokka insara hexxo heedhannonsa gede, xaa yannara hagiirru noo heeshsho heedhanno gedenna haaro alamera  “halaalaancho heeshsho” yaano hegere heeshsho hexxo afidhanno gede kaaꞌlitannonsa.—1 Xim. 6:19.

9. Mannaho mayi daafira qorowisiinseemmo? Mayira? (Hiziqeeli 33:7, 8)

⁹ Mannaho noonke baxilli tini busha alame baꞌanno yanna gambissinota kulle qorowisiinseemmo gedeno assannonke. (Hiziqeeli 33:7, 8 nabbawi.) Olliinke mannanna Yihowa magansiꞌrannokkiha mininke manna lowo geeshsha mararreemmo. Batinyu manni “xaa geeshsha daye egenninokkihu, layinkimeeshshono daannokkihu quuxxote qarri” daannota afinokki daafira, dilgonsara calla helli buufi yaanno. (Mat. 24:21) Insa hattenne yoote yannara kaphu ammaꞌno baꞌannotanna Armagedooni gedensaanni tini busha alame woꞌmunni woꞌma baꞌannota affara hasiꞌneemmo. (Aju. 16:14, 16; 17:16, 17; 19:11, 19, 20) Dandaami deerrinni batinyu manni kulleemmota qorowishshu sokka macciishshe ninke ledo halaalu magansiꞌrara halamanno gede huuccineemmo. Mininke manni hattono kulleemmota qorowishshu sokka macciishshinokkihu wolu manni hiikkannoyya?

10. Agurrummokkinni manna qorowiisiisa hasiissannota ikkitinohu mayiraati?

¹⁰ Sai birxichira ronsummonte gede, Yihowa Bayira Baabiloone baꞌanna lae heeshshonsa biddi assiꞌranno manni gatara hasiꞌranno. Hatto ikkiro, agurrummokkinni manna qorowisiisa albinni roore hasiissannote. Hanni tenne hedi: Xaa yannara kulleemmonsa coyi hatte yannara mitore qaagganno gede assansara dandaanno. (Hiziqeeli 33:33 ledo heewisiisi.) Insa ninke kulloommonsa qorowishsha qaaggaranna yanna gooffukkinni ledonke halaalu magansiꞌrara halantara dandiitanno. Filiphisiyusi katamira heeꞌrannohu mittu usuru mini agaraanchi ‘baatto shafantanna’ lae hedosi biddi assiꞌrinte gede, xaa yannara kulloommonsa sokka macciishshe adhinokkihu mitu manni Bayira Baabiloone baꞌuhu gedensaanni heeshshonsa biddi assiꞌrara dandaanno.—Soq. 16:25-34.

SABBANKEEMMOHU YIHOWANNA SUꞌMASI BANXEEMMO DAAFIRAATI

11. Yihowara ayirrinye, guweenyanna wolqa uyineemmohu hiittoonniiti? (Yohaannisi Ajuuja 4:11) (Misillano lai.)

¹¹ Baalunkunni roore dancha duduwo dudumbeemmohu Magano Yihowanna qullaawa suꞌmasi banxeemmo daafiraati. Soqqanshonke banxeemmo Magano guwisiꞌrate kaaꞌlitannonke faro gede assine laꞌneemmo. (Yohaannisi Ajuuja 4:11 nabbawi.) Ninkeno woꞌma giddonni, “Maganonke . . . atera ayirrinyu, guweenyunna wolqa ikkitohe!” yineemmo. Yihowa ‘baalankare kalaqinotanna’ heeshsho uyinonkehu iso ikkinota leellishshannota  ammansiissanno taje wolootaho kulleemmo woyite isira ayirrinyenna guweenya uyinanni heeꞌnoommo. Dandiinummo deerrinni yannanke, wolqankenna woxenke horoonsiꞌne soqqammeemmo woyite, atera wolqa ikkitohe yinanni heeꞌnoommohu gedeeti. (Mat. 6:33; Luq. 13:24; Qol. 3:23) Banxeemmo Magani daafira wolootaho kula hagiirsiissannonke. Qoleno wolootaho Maganu suꞌmanna isi ayimma kulate kaꞌneemmo. Mayira?

12. Soqqanshonkenni Yihowa suꞌmi qullaawanno gede assineemmohu hiittoonniiti?

¹² Yihowa banxeemmo daafira suꞌmisi qullaawa ikkanno gede assate kaꞌneemmo. (Mat. 6:9) Sheexaanu waajjo kapho kaphe huninoha Maganinke suꞌma keereensa hasiꞌneemmo. (Kal. 3:1-5; Iyo. 2:4; Yoh. 8:44) Soqqammeemmo woyite macciishsha hasiꞌranno mannira baalaho Maganinke daafira halaale kulle, isira halamate quqquxammeemmo. Isihu qaru akati baxille ikkinota, gashshootisi taashsho noohanna keeraancho ikkinota, muli yannara Gashshootisi qarranna shetto baala hunannota hattono mannu ooso baalate keerenna hagiirre abbannota baalunku manni afara hasiꞌneemmo. (Far. 37:10, 11, 29; 1 Yoh. 4:8) Soqqammeemmo woyite mannaho kuri coyibba kulleemmoha ikkiro suꞌmisi qullaawanno gede assineemmo. Qoleno suꞌminke garinni heeꞌnoommota anfoommohura harshammi yineemmo. Hiittoonni?

13. Yihowa Farciꞌraasine ikkankenni fenjeejjineemmohu mayiraati? (Isayaasi 43:10-12)

¹³ Yihowa ‘naqaashshesi’ asse doorinonke. (Isayaasi 43:10-12 nabbawi.) Boodu diri albaanni Aliidi Bisi soyinoti mitte sokka togo yitanno: “Yihowa Farciꞌraasine yaamame woshshama ninkera lowo ayirrinyeeti.” Hatto yineemmohu mayiraati? Hanni mitto lawishsha laꞌno. Yoote mine naqaashshe ikkannohe  manchi hasiisihero egennoottohanna ammanattoha hattono wolootuno ammantanno mancho doodhatto. Yihowa ninke Farciꞌraasinesi asse doodhasi, seekke afinonketanna halaalaanchu Magani iso calla ikkinota wolootaho farciꞌneemmota addaxxannonketa leellishshanno. Isi farciꞌraasine ikka ninkera lowo ayirrinyeeti; hakko daafira afiꞌnummo faro baala horoonsiꞌne mannu suꞌmasi afanno gedenna isi daafira kullannihu batinyu coyi kapho ikkinoti leeltanno gede assineemmo. Kuri coyibba assine Yihowa Farciꞌraasine ikkanke leellishanno garinni heeꞌneemmo!—Far. 83:18; Rom. 10:13-15.

GOOFIMARCHU GEESHSHA SABBAKA DIAGURREEMMO

14. Albillitte dhagge ikkannohu hiikku coyi ikkanno?

¹⁴ Albillitte dhagge ikkanno coyi ikkanno. Yihowa kaaꞌlonni quuxxote qarri hanafara albaanni batinyu manni halaale macciishshe adhanno yine hexxineemmo. Qoleno hattenne lowo geeshsha qarrissannote quuxxote qarri yannara, lowo manni Sheexaanu alamenni fule ninke ledo Yihowa guwisiꞌrara dandaanno!—Soq. 13:48.

15-16. Agurrummokkinni maa assa hasiissannonke? Mamooti geeshsha?

¹⁵ Hakka geeshsha diinaggaambe loosa hasiissannonke. Layinkimeeshsho dudumbannikki sokka yaano uulla woꞌmate Maganu Gashshootiha dancha duduwo duduwate qoosso noonke. Qoleno manna qorowisiisa diagurreemmo. Mannu tenne busha alame goofimarchi rahe daanni noota afa hasiissannonsa. Hakkiinni insa yoote yanna iillitanno woyite sabbankeemmo sokka Maganu Yihowawiinni dagginota ikkitinota huwattanno.—Hiz. 38:23.

¹⁶ Maa assate murciꞌra hasiissannonkeyya? Dancha duduwo banxeemmo daafira, manna banxeemmo daafira wolu baalunkunni roore Yihowanna suꞌmasi banxeemmo daafira, Yihowa “Xaate ikkino!” yaa geeshsha quqquxamme, wiinammenna diinaggaambe sabbaka diagurreemmo.