1. Maganu Qaali wolqa afiꞌrinota huluullammeemmokkihu mayiraati? (Hanafote noo misile lai.)

 YIHOWA daga ikkinoommo daafira, Isi Qaali “lubbo afiꞌrinohanna loosannoha” ikkinota dihuluullammeemmo. (Ibi. 4:12) Ninke giddo rooru Qullaawu Maxaafi uminke heeshshonna wolu mannita soorre biddi assanna laꞌnoommo. Roduuwinke giddo alba mitootu mooraanote, jingilli assitanno dhagga adhitannoreeti woy maaeela coye assitannoreeti. Mitootu maalaamittete jironni qiniinonsare ikkiturono, heeshshonsa giddo mitu coyi xeinonsaha lawannonsareeti. (Ros. 2:3-11) Haammatu hexxo mudhinohunna ragu bainonsa manni Maganu Qaali afiꞌrino wolqanni soorrame halaalu doogo aana haꞌra hanafino. Agarooshshu Shaera sae sae fulannoha “Qullaawu Maxaafi Mannu Heeshsho Soorre Biddi Assanno” yaanno birxicho nabbabbe dhagge assiꞌroottoha ikkara dandaanno. Mannu cuuame Kiristaana ikki gedensaanni nafa, Qullaawa Borro kaaꞌlonni ayyaanaamittetenni lophannota huwatoottoha ikkara dandaanno.

2. Umi xibbi diro ikkinori Maganu Qaali wolqa noosiha ikkinota leellishannohu hiittoonniiti?

² Yannankera batinyu manni Maganu Qaale xiinxallansanni heeshshonsa soorrante biddi yitinoti dhagge ikkitannonkeni? Diꞌꞌikkitannonke! Tini umi xibbi dirira heeꞌrinohu iimira haꞌrate hexxo noonsa roduuwinke xagge qaangeemmo gede assitannonke. (1 Qorontoosi 6:9-11 nabbawi.) Soqqamaasinchu Phaawuloosi  Maganu Mangiste ragiꞌnannikki gede assitanno coyibba kulihu gedensaanni,“Kunni albaanni kiꞌne giddonni mitu mitu hattooreeti” yee coyiꞌrino. Ikkollana insa Qullaawa Borronninna qullaawu ayyaani kaaꞌlonni soorrante biddi yitino. Mitootu Kiristaana ikkitu gedensaanni nafa Maganu ledo noonsa jaalooma hunanno coye assitino. Qullaawu Maxaafi umi xibbi diro mittu buuramino Kiristaanchi bohaminotanna gedensaanni songo higinota kulannonke. (1 Qor. 5:1-5; 2 Qor. 2:5-8) Kuri ammanate roduuwinkera addi addi qarri iillinsarono Maganu Qaali afiꞌrino wolqanni iillinonsa qarra dandiite saꞌinota afanke jawaachishshannota diꞌꞌikkitino?

3. Konni birxichira maa ronseemmo?

³ Qullaawu Maxaafi wolqa afiꞌrinoha ikkino daafira, konne maxaafa seekkine horoonsira hasiissannonke. (2 Xim. 2:15) Konni birxichira Maganu Qaali afiꞌrino wolqa, (1) heeshshonke giddo, (2) soqqameemmo wotenna (3) madirake fulle rosiinseemmo wote woꞌmunni woꞌma horoonsiꞌra dandiineemmo gara ronseemmo. Tenne xiinxallanke woyyannonkere rosiisannonkehu iimi Anninkera noonke baxilli lexxannonna galanteemmore ikkineemmo gede assitannonke.—Isa. 48:17.

4. (a) Maganu Qaalinni horo afiꞌrate maa assa hasiissannonke? (b) Qullaawa Maxaafa nabbawate gaaꞌmootto yanna hiitteeti?

⁴ Maganu qaali kaaꞌlankera hasiꞌnummoro ganyine xiinxalla hasiissannonke; konni daafira, Qullaawa Maxaafa barru baala nabbawate sharrama hasiissannonke. (Iya. 1:8) Ninke giddo rooriidi loosu batiꞌrannonkere ikkinoommoti egennantinote. Ikkirono loonseemmo loosino ikko, wolu aye coyino, Qullaawa Maxaafa nabbambeemmota hoolankera wodha dihasiissannonke. (Efesooni Sokka 5:15, 16 nabbawi.) Batinye Yihowa Farciꞌraasine Qullaawa Maxaafa barru baala nabbawate hayyotenni yanna gaaꞌmitino; lawishshaho mitootu soodo, barra woy hashsha nabbabbanno. Insara faarsaasinchu gedee hedo noonsa; isi togo yiino: “Seerakki lowo geeshsha baxeemmo; barra woꞌma iso hedeemmo.”—Far. 119:97.

5, 6. (a) Nabbamboommore hiinca hasiissannonkehu mayiraati? (b) Danchu garinni hiinca dandiineemmohu hiittoonniiti? (c) Qullaawa Maxaafa nabbawakkinna hiincakki kaaꞌlitinohehu hiittoonniiti?

⁵ Qullaawa Maxaafa nabbambeemmo wote nabbamboommo coye hiincano lowo geeshsha kaaꞌlitannonke. (Far. 1:1-3) Qullaawu Maxaafi giddo noo hayyonni horo afiꞌra dandiineemmohu hatto assinummoro callaati; Qullaawa Maxaafa borreessininku lowo diro ikkirono, konni maxaafinni afiꞌnanni hayyo woꞌmanka wote kaaꞌlitannote. Maganu Qaale nabbambeemmohu attammoonniha woy elektirooniksete uduunnichinni ikkirono, loosoho kakkayisanno garinni nabbawa hasiissannonke.

⁶ Danchu garinni hiinca dandiineemmohu hiittoonniiti? Lowo roduuwi Qullaawu Maxaafi gafa nabbabbu gedensaanni shiima geeshsha taxxi yite konni woroonni noo  xaꞌmuwa hedansa lowore kaaꞌlitinonsa: ‘Tini hedo Yihowa daafira maa rosiissannoe? Maganu Qaali giddo nooha xintu seera heeshshoꞌya giddo harunsanni noommohu hiittoonniiti? Woyyeessiꞌra hasiissannoe coyi maati?’ Huuccatto assiꞌne Maganu Qaale hiincanke, Qaalisi giddo noo amaale harunsate kaꞌneemmo gede assitannonke. Togo assineemmoha ikkiro, Maganu Qaali afiꞌrino wolqa heeshshonke giddo horoonsira dandiineemmo.—2 Qor. 10:4, 5.

7. Soqqammeemmo wote Maganu Qaale seekkine horoonsira dandiineemmohu hiittoonniiti?

⁷ Soqqammeemmo wote Qullaawa Maxaafa seekkine horoonsiꞌrate kaaꞌlannonkeri maati? Umihunni sabbankeemmo wote Qullawa Maxaafa ganyine horoonsiꞌrate. Mittu rodii Qullaawa Maxaafa horoonsiꞌrate daafira togo yiino: “Yihowa ledo minunni mine hadhe soqqantanni noottoha ikkoommero, baalankare ati callu coyiꞌrattonso, isino coyiꞌranno gede assatto?” Kuni rodii yaa hasiꞌrinoti, soqqammeemmo wote Maganu Qaale fanne nabbambeemmoha ikkiro, hasaawinseemmo mancho Yihowa hasaawisanno gede assinanni heeꞌnoommo yaate. Seekkine hende doorroonni qummeeshshi ninke coyiꞌneemmote aye hedonnino rooranno. (1 Tes. 2:13) Konnira ateneeto togo yite xaꞌmi: ‘Dancha duduwo mannaho kuleemmo wote Qullaawa Maxaafa nabbaweemmo faro hasiꞌreemmo?’

8. Sabbankeemmo wote Qullaawa Maxaafa nabbawatenni sainore assa hasiissannonkehu mayiraati?

⁸ Hasaawinseemmo manchira Qullaawa Maxaafa nabbawa calla diguddanno. Mayira? Korkaatuno batinyu mannira gariti Qullaawu Maxaafi egenno dinonsa. Umi xibbi dirono ikko yannankera noo manni hattooho. (Rom. 10:2) Konni daafira qummeeshsha nabbamboommo daafira calla mittu manchi sokka huwatanno yine heda dihasiissannonke. Qara qara qaalla lende nabbambenna tironsa xawinse, qummeeshshunnita qara hedo bande fushsha hasiissannonke. Togo assinummoro, Maganu Qaali sokka rosiinseemmo manni wodaniranna surrera qaꞌmidhanno gede assineemmo.—Luqaasi 24:32 nabbawi.

9. Qummeeshsha egensiinseemmo wote, mannu Qullaawa Maxaafa ayirrisanno garinni egensiisa dandiineemmohu hiittoonniiti? Lawishsha kuli.

 ⁹ Qullaawa Maxaafa nabbambeemmo wote mannu Maganu Qaale ayirrisanno gede qummeeshsha seekkine egensiisa hasiissannonke. Lawishshaho, “Hanni Kalaqaanchinke tenne hajo daafira mayyaannoro laꞌno” yaa dandiineemmo. Kiristinnu daafira afinori nookki manchi ledo hasaambeemmo wote “Hanni Qullaawa Borro mayitannoro laꞌno” yaa dandiineemmo. Woy ammaꞌnote gari hasatto noosikki manchi ledo hasaambeemmo wote, “Tenne hundi yaatto macciishshite egennootto?” yine xaꞌminammora dandiineemmo. Ee, hasaawinseemmo manchi hedosi maatiro afanna, isi hedo ledo sumuu yaanno garinni hasaawisa hasiissannonke.—1 Qor. 9:22, 23.

10. (a) Mittu rodii woꞌnaalsha kuli. (b) Soqqamatto wote Maganu Qaali loosannoha ikkinota buuxoottohu hiittoonniiti?

¹⁰ Batinye halashshanno soqqantanno wote Qullaawa Maxaafa seekkine horoonsira dancha guma abbitannota buuxxino. Hanni mitto lawishsha laꞌno. Mittu rodii metseetenke lowo diro nabbawanni keeshshinoha jawa mancho galagale mare hasaawisino. Mule fultinota Agarooshshu Shae ele calla haꞌrantenni, borrote giddo noo qummeeshsha nabbawate hedi. Isi 2 Qorontoosi 1:3, 4 nooha “Maarote Anni jawaante baalate Magani . . . qarrinke baalu giddo jawaachishannonke” yaanno qummeeshsha nabbawisi. Kuni manchi qummeeshsha lowo geeshsha baxino daafira roduu lede nabbawannosi gede xaꞌmiri. Kuni manchi isiranna minaamasira jaawaante hasiisse noonsata kulino; qoleno isi Qullaawu Maxaafi daafira roore afa hasiꞌrino. Ee, Maganu Qaali afiꞌrino wolqa soqqammeemmo woteno loossanno!—Soq. 19:20.

11. Madirake fulte rosiissanno roduuwi maa assa hasiissannonsa?

¹¹ Ninke baalunku Kiristaanunniha songote woy jajjabba gambooshshenke haꞌra banxeemmo. Gambooshshe haꞌneemmohu qaru korkaati Yihowa magansiꞌrateeti. Qoleno gambooshshunniwa rosiinsannihu ayyaanaamittete rosinni lowo horo afiꞌneemmo. Madirake fulte rosiissanno roduuwi tenne kaajja qoosso afiꞌransanni hagiidhitanno. Ikkirono, tini qoosso shotinse laꞌnannikkita ikkitinota dea dihasiissannonsa. (Yai. 3:1) Insa woꞌmante yannara rosiissanno wote Qullaawa Maxaafa seekkite horoonsira hasiissannonsa. Madirake fulte rosiisatto gede kifile uyinihero, rosiisatto wote Maganu Qaali afiꞌrino wolqa horoonsira dandaattohu hiittoonniiti?

12. Lallawo shiqishshanno roduuwi Qullaawa Maxaafa seekkite horoonsira dandiitannohu hiittoonniiti?

¹² Lallawo shiqishatto wote,Qullaawa Maxaafa seekkite horoonsiꞌri. (Yoh. 7:16) Togo assa dandaattohu hiittoonniiti? Umihunni, macciishshanno manni Qullaawu Maxaafi qummeeshshinni roore kulatto woꞌnaalshuwa, woy lawishshuwa, woy lallawo shiqishatto gara calla illachishannokki gede qoropha hasiissannohe. Qoleno, mittu manchi haammata qummeeshshuwa nabbawino daafira calla Qullaawu Maxaafi giddonni rosiisino yaa ikkitinokkita huwata hasiissannohe. Isinni batinye qummeeshsha nabbawa macciishshanno manni mitto qummeeshshano amadikki gatanno gede assitara dandiitanno. Konni daafira, qara qara qummeeshshuwa qorophite doorittohu gedensaanni, dancha gede assite nabbawate, xawisate, lawishshunni irkisatenna loosunni leellinshannihu hiittoonniitiro kulate seekkite qixxaawi. (Neh. 8:8) Lallawo xintantinohu dirijjite qixxeessitino fushshaato aana ikkiro, fushshaatonna qummeeshshuwa seekkite xiinxalli. Fushshaatote giddo noo hedonna qummeeshshu mereero noo fiixoomi maatiro huwatate woꞌnaali. Hakkunni gedensaanni fushshaatote giddo noo hedo rosiisate malino qummeeshsha doorte horoonsiꞌri. [Tiokiraasennihu Soqqanshote Rosi Mine Uyinanni Qajeelsha Horoonsiꞌri (Amaaru Afoo) yaanno maxaafira qoola 150-159  aana kaaꞌlitannohe hedo afiꞌra afiꞌra dandaatto.] Baalunkunni roore, Qaalisi giddo nooha muxxe roso garunni rosiisa dandaatto gede kaaꞌlahera Yihowa seekkite huucciꞌri.—Izira 7:10; Lawishsha 3:13, 14 nabbawi.

13. (a) Mitte rodoo Kiristaanu gambooshshiwa macciishshitino qummeeshshi hedose biddi assidhanno gede kaaꞌlinosehu hiittoonniiti? (b) Gambooshshinkewa kullanna macciishshootto qummeeshshi kaaꞌlinohehu hiittoonniiti?

¹³ Mitte Awustiraaliyaho heedhanno rodoo gambooshshunniwa macciishshitino qummeeshshi lowo geeshsha kaaꞌlinose. Tenne rodoora anje heedheenna lowo geeshsha dadillisanno coyi iillinose; ikkirono ise Qullaawu Maxaafi sokka macciishshite heeshshose Yihowara sayisse uyitino. Ikkollana, isera Yihowa baxannoseta ammana qarra ikkitinose. Gedensaanni kayinni Maganu baxannoseta ammantu. Ise Maganu baxannoseta ammantanno gede assinoseri maati? Hedose biddi assidhanno gede kaaꞌlinoseri, gambooshshunniwa xawinsoonni qummeeshsha hiincaseetinna wole qummeeshshuwa ledo xaadisse hedaseeti. a Ate songotenna jajjabbu gambooshshiwa kullanna macciishshootto qummeeshshi loosoho kaꞌꞌatto gede asse egenninohe?—Neh. 8:12.

14. Yihowa Qaale naandeemmota leellisha dandiineemmohu hiittoonniiti?

¹⁴ Yihowa Qaalesi Qullaawa Maxaafa uyinonke daafira Iso galata dihasiissannonke? Isi mannu oosora Qaalesi uyinoha calla ikkikkinni kaajje heeꞌranno gede asseemmo yee eino qaaleno wonshino. (1 Phe. 1:24, 25) Maganu Qaale ganyine nabbawa, loosu aana hosiisanna woloota kaaꞌlate seekkine horoonsira hasiissannonke. Togo assinummoro, muxxe ikkinoha Qullaawa Maxaafa banxeemmotanna naandeemmota leellinsheemmo; baalunkunni roore kayinni, Qullaawu Maxaafi Anna ikkinoha Magano Yihowa banxeemmota leellinsheemmo.