1. Umi xibbi diri jeefora soqqamaasinchu Yohaannisira mayi tuncu yiinosi?

 UMI xibbi diri jeefora soqqamaasinchu Yohaannisira lowo geeshsha qarrisanno coyi tuncu yiinosi. Isi hatte yannara geerchoho; qoleno Fiximo yinanni giddichora usurame no; hattono soqqamaasinete giddo hatte yannara lubbotenni noohu iso calla ikkikki digatino. (Aju. 1:9) Yohaannisi, Kiristaana gibbannori songuwa soꞌrisiissanninna roduuwu mereero babbadooshshe kalaqqanni noota afino. Hattee yannara addu Kiristinni baꞌꞌara kae nooha lawanno.—Yih. 4; Aju. 2:15, 20; 3:1, 17.

2. Yohaannisi Ajuuja 7:9-14 kultanno garinni, Yohaannisi hiittenne dhagge ikkitanno ajuuja laino? (Aaniidi qoolira noo misile lai.)

² Tenne quuxxote yannara, Yohaannisi mitte hagiirsiissanno ajuuja laino. Tenne ajuujara, sokkaasine Maganu borojje ikkitinote mitte gaamora jeefote sumuda sumunda geeshsha, bao abbitannota bayiru qarri bubbe amadde hooltanno gede hajanjoonninsa. (Aju. 7:1-3) Tini gaamo, iima Yesuusi ledo gashshitannote 144,000 Maganu soqqamaasineeti. (Luq. 12:32; Aju. 7:4) Hakkiinni Yohaannisi wole gaamore coyiꞌrino; isi “Kuneeti” yaannoha malaꞌlinoonnita leellishanno qaale horoonsiꞌrino; isi hatto yiinohu tenne gaamo wido ikkino manni lowo geeshsha batiꞌra ikkinohura dhagge assiꞌre ikkara dandaanno. Yohaannisi lainori maati? Isi togo yiino: “Ayino kiire dandaannokkiha lowo manna afummo. Kuni manni gosa baalatenni, gaꞌre baalatenni, fiixu fiixunkunninna addi addi afoo coyiꞌranno manni giddonni gamba yiinoho. Insa . . . ayirradu barcimiranna [zuufaanete] Geꞌrechu albaanni uurrite [no].” (Yohaannisi Ajuuja 7:9-14 nabbawi.) Yohaannisi albillitte Magano halaalunni magansiꞌrannohu lowo manni heeꞌrannota afasi, lowo geeshsha hagiirsiissinositi egennantinote!

3. (a) Yohaannisi laino ajuuja ammananke kaajjishshanno yineemmohu mayiraati? (b) Konni birxichira maa ronseemmo?

 ³ Tini ajuuja Yohaannisi ammana kaajjishshinoti dihuluullissannote. Tini ajuuja woꞌmitanni noo yannara heeꞌnoommore ninke isinni, hakkiinni roore ammananke kaajjishshannoti egennantinote! Bayira qarra gate sae uullate aana hegerera heeꞌrate hexxo noonsari lowo miliyoone ikkanno manni gamba yaanna laꞌnanni heeꞌnoommo. Konni birxichira, Yihowa 80 saꞌꞌanno diri albaanni mannisira lowo daga ayimma xawisinohu hiittoonniitiro ronseemmo. Hakkiinni tenne gaamo (1) batinyenna (2) gaamote miilla alame woꞌmatenni gamba yitinore ikkansa laꞌneemmo. Hattee gaamo wido ikkitannori baalu tenne afansa ammanansa kaajjishshannoti egennantinote.

4. Suꞌmu Kiristinni ammaꞌno hiikkonne Qullaawu Maxaafi roso dihuwattino? Qullaawu Maxaafi Rosaano kayinni mayite dirosiissino?

⁴ Xaphoomunni laꞌniro, suꞌmu Kiristinni ammaꞌno, hajajamanno manni albillitte uullate aana hegerera heeꞌrannota kulannoha Qullaawu Maxaafi halaale dirosiissanno. (2 Qor. 4:3, 4) Xaa yannara roore suꞌmu Kiristinni ammaꞌno, danchu manni baalu reyanno woyite iimira haꞌranno yite rosiissanno. Tonaasettikki sani jeefora Agarooshshu Shae metseete qixxeessitannori boode Qullaawu Maxaafi Rosaano kayinni hatto yite dirosiissino. Insa Maganu Gannate wirro abbannotanna lowo miliyoone ikkannohu ammanamino manni iima ikkikkinni kowiicho uullate aana hegerera heeꞌrannota huwattino. Ikkollana, insa hattee yannara konni ammanamino manni ayimma dihuwattino.—Mat. 6:10.

5. Qullaawu Maxaafi Rosaano 144,000 manni daafira mayite ammantanno?

⁵ Qullaawu Maxaafi Rosaano iima Yesuusi ledo gashshannohu “baattote aaninni wondoonni” manni noota Qullaawa Borronni huwattino. (Aju. 14:3) Insa uullate aana noo yannara heeshshonsa Maganoho sayisse uyite diinaggaabbenna ammanante soqqantinore 144,000 ikkitanno Kiristaanaati. Qullaawu Maxaafi Rosaano lowo daga daafira mayite ammantannoyya?

6. Alba Qullaawu Maxaafi Rosaano lowo daga wido ikkitinori daafira mayite ammantanno?

⁶ Yohaannisi ajuujasira lowo daga “ayirradu barcimiranna Geꞌrechu albaanni uurrite” noore laino. (Aju. 7:9) Tini hedo, Qullaawu Maxaafi Rosaano 144,000 manni gede wole dagano iimira hadhe heedhanno yite ammantanno gede assitinonsa. Wole dagano ikko 144,000 wido ikkitinori iimira hadhannoha ikkiro, lamente gaamo mereero mayi badooshshi nooyya? Hakka waro Qullaawu Maxaafi Rosaano wole dagaati yinanniri, uullate aana noo yannara Maganoho woꞌmunni woma hajajaminokki Kiristaanaati yite ammantanno. Kuni Kiristaani Qullaawu Maxaafiha amanyootu seera harunsannoha ikkirono, insa giddo mitu kaphu ammaꞌnonni fulinokkiha ikkara dandaanno. Qullaawu Maxaafi Rosaano kuri Kiristaani mito geeshsha Maganoho diinaggaabbinoha ikkirono, diinaggaawansa Yesuusi ledo gashshate ikkadda assitannonsata diꞌꞌikkitino yite ammantanno. Lowo daga wido ikkitinori Maganoho noonsa baxilli lowoha ikkinokki daafira, iima zuufaanete albaanni uurritanno ikkinnina zuufanete diofoltanno.

7. Alba Qullaawu Maxaafi Rosaano Kumu Diri Gashshooti yannara uullate aana ayeoo heedhanno yite ammantanno? Qullaawu Maxaafi Rosaano alba heedhinote ammanantinote Maganu soqqamaasine daafira mayite ammantino?

⁷ Uullate aana heedhannori ayeootiyya? Qullaawu Maxaafi Rosaano 144,000 wido ikkitinorinna lowo daga iimira hadhuhu gedensaanni, lowo miliyoone ikkannohu wolu  manni Kiristoosihu Kumu Diri Gashshooti abbanno atoote afidhanno yite ammantanno. Qullaawu Maxaafi Rosaano, kuni manni Kiristoosi Gashshooti hanafara albaanni Yihowara soqqama hasiissannonsa yite diheddino. Qoleno Kumu Diri Gashshooti yannara, tini gaamo Yihowa daafira rossanno yite heddino. Hakkunni gedensaanni, Yihowa seera agadhitannori uullate aana hegerera heedhanno; finqiltannori kayinni baꞌanno. Qoleno Qullaawu Maxaafi Rosaano, reyotenni kaꞌꞌannohu Kiristoosi uullara daara albaanni reyinohu ammanamino mannino ikko hatte yannara “gashshaano” ikke soqqamannohu mitu manni Kumu Diri Gashshooti jeefora iimira haꞌre baraarsha adhanno yite ammantino.—Far. 45:16.

8. Alba Qullaawu Maxaafi Rosaano hiitti sase gaamo no yite ammantanno?

⁸ Konni daafira, alba Qullaawu Maxaafi Rosaano sase babbaxxitino gaamo no yite ammantanno; insano: (1) iima Yesuusi ledo gashshitannori 144,000; (2) iima Yesuusi zuufaanera albaanni uurrannohu Maganoho gari geeshsha diinaggaawannokkihu lowo daga wido ikkino manninna (3)Kiristoosihu Kumu Diri Gashshooti yannara uullate aana heeꞌre Yihowa daafira rosannohu lowo miliyoone ikkanno manni. b Ikkollana, Yihowa yannasira halaalu xawaabbi waraꞌa yee xawanno gede assino.—Law. 4:18.

9. (a) Lowo daga zuufaanetenna “Geꞌrechu albaanni” uurritannohu hiittoonniiti? (b) Yohaannisi Ajuuja 7:9 noo hedo huwantoommo gara lainohunni biddi assinoonni rosi ammansiisannoho yineemmohu mayiraati?

⁹ Yihowa Farciꞌraasine Yohaannisi ajuujatenni lainota lowo daga ayimma 1935nni garunni huwattino. Insa, wole daga wido ikkitinori ‘ayirradu barciminna Geꞌrechu albaanni uurrate’ iimira haꞌra hasiissannonsakkita huwattino. Hatteentenni insa hakkiicho uurritannohu lawishshunniiti. Lowo daga heedhannohu uullate aana ikkirono, insa Yihowa silxaanenna aliidimmasi ayirrissannoha ikkiro, zuufaanete albaanni uurrite no yaa dandiinanni. (Isa. 66:1) Qoleno, Yesuusita wodote kakkalo ammantannoha ikkiro, ‘Geꞌrechu albaanni’ uurra dandiitanno. Maatewoosi 25:31, 32, bushuulluno ikko “gosa baala” Yesuusi zuufaanera albaanni ‘gamba yitannota’ kultanno. Tini gosa baala gamba yitannohu iima ikkikkinni uulla ikkinoti egennantinote. Kuni biddi assinoonni rosi ammansiisannoho. Qoleno, Qullaawu Maxaafi lowo daga iimira hadhanno yaannokkihu mayiraatiro huwatate kaaꞌlanno. Iimira hadhe hegerera heedhanno yine qaale eꞌnoonninsari 144,000 wido ikkitinore callaho; insa Yesuusi ledo mootoolla ikkite “gashshitanno” gaamooti.—Aju. 5:10.

10. Lowo daga wido ikkitinori Kumu Diri Gashshooti hanafara albaanni Yihowa daafira rosa hasiissannonsahu mayiraati?

¹⁰ Hakko daafira Yihowa Farciꞌraasine 1935nni kayise Yohaannisi ajuujatenni laiti lowo daga, uullate aana hegerera heeꞌrate hexxo noonsaha ammanamino Kiristaana ikkinota buuxxino. Bayira qarra gate saꞌꞌate, lowo daga Kumu Diri Gashshooti hanafara albaanni Yihowa daafira rosanna iso magansiꞌra hasiissannonsa. Insara Kiristoosihu Kumu Diri Gashshootira albaanni ‘daanno coyi baaluwiinni gatate’ kaajjado ammana hasiissannonsa.—Luq. 21:34-36.

11. Mite Qullaawu Maxaafi Rosaano, ‘Mitu manni Kumu Diri Gashshooti gedensaanni iimira haꞌrara dandaanno’ yite heddinohu mayira ikkara dandaanno?

¹¹ Ammajje 15 1913nnite Agarooshshu Shaera (Ingilizete Afoo) togo yaanno rosi fulino: ‘Dancha lawishsha ikkannohu uullate aana heeꞌrannohu mitu manni Kumu Diri  Gashshooti gedensaanni iimira haꞌranno.’ Kuni rosi lame soꞌro ikkitino hedo aana xintaminoho: (1) Lowo daga iimira hadhanno; (2) Lowo daga, Maganoho gari geeshsha diinaggaawannokki mannaati. Ikkollana mittu manchi togo yee xaꞌmara dandaanno: ‘Hunda heeꞌrinohu ammanamino manni uulla ragiꞌranni heeꞌreenna, Maganoho gari geeshsha diinaggaawannokki manni kayinni iimira haꞌrannohu mayiraati?’

12-13. Buuramino Kiristaanino ikko wole daga wido ikkitinori afidhanno baraarshi daafira maa huwattino?

¹² Ikkollana aleenni ronsummonte gede, Yihowa Farciꞌraasine Armagedooninni gatanno manni, Yohaannisi ajuujatenni laita lowo daga ikkitinota 1935nni kayisse huwattino. Tini daga kowiicho uullate aana bayira ‘qarra gatte saꞌanno’; hattono “qoonqonsa naggi assite, ‘Gato ayirradu barcimira ofollino Maganitenna Geꞌrechunnite’” yitanno. (Aju. 7:10, 14) Qoleno, Qullaawu Maxaafi reyotenni kaꞌe iimira hadhannori, hunda heedhinoti ammanantinoti Maganu soqqamaasine afidhino coyinni “woyyanno coye” afidhannota kulanno. (Ibi. 11:40) Kuni biddi assinoonni rosi, roduuwinke Yihowara soqqamannohanna uullate aana hegerera heeꞌrate hexxo afiꞌranno manna diinaggaabbe hassanno gede assinonsa.

¹³ Lowo daga wido ikkitinori, uullate aana hegerera heeꞌrate hexxo afiꞌransanni hagiirraammaho. Insa, Yihowa ammanantino soqqamaasinesi iimanso uulla soqqantannosiro murannohu iso ikkinota huwattino. Buurantinorino ikkito wole daga wido ikkitinori, baraarsha afidhara dandiitannohu Yihowa Yesuusi Kiristoosite wodote kakkalo widoonni uyinonke eltonni ikkinota wodanchitino.—Rom. 3:24.

14. Mitoota 1935 gedensaanni lowo daga daafira kulloonni masaalo woꞌmitanno gari huluullisinonsahu mayiraati?

¹⁴ Yihowa Farciꞌraasine alba yite ammantannore 1935 biddi assitu gedensaanni, mitootu ‘Uullate aana heeꞌrate hexxo noonsa manni kiiro lowota ikkitannohu hiittoonniiti?’ yite huluullantino. Lawishshaho, Ronaaldi Paarkini yinannihu hakkonne roso biddi assini yannara 12 diro ikkannosi rodii togo yiino: “Hattee yannara, alamete doyichora nooti halashshaanote kiiro 56,000 balla ikkitanno; qoleno insa giddo roore halashshaano buurantinore ikkitukki digattino. Konnira lowo daga wido ikkitinori kiiro batinye dilabbanno.”

15. Lowo daga kiiro lexxitanni hadhinohu hiittoonniiti?

¹⁵ Ikkollana hakkuyi gedensaanni noo dirra giddo, misiyoone batinye gobbuwa sonkoonni; hattono Yihowa Farciꞌraasine kiiro lexxitanni hadhino. Hakkiinni 1968nni Hegere Heeshshowa Massanno Halaale yaanno maxaafa  horoonsiꞌne manna Qullaawa Maxaafa xiinxallisa hananfoonni. Qullaawu Maxaafi halaale huwatate qarrisannokki garinni xawisanno daafira, suwashshu wodani noonsa manni konne maxaafa baasa baxino. Shoolu diri giddo calla 500,000 saꞌꞌanno manni cuuame Yesuusi rosaano ikkino. Kaatooliketete ammaꞌnora Laatinete Ameerikiranna wole gobbuwara wolqase ajjanni hadhino daafira, hattono Soojjaati Awuroppiranna mite Afiriku gobbuwara loosonke fajjinoonnihura miliyoonetenni kiirranni manni cuuamino. (Isa. 60:22) Muli yanna kawa qole, Yihowa dirijjite mannu Qullaawu Maxaafi roso huwatanno gede kaaꞌlitannota kaajja borro qixxeessitanni no. Yannankera noore sette miliyoone saꞌanno halashshaano laꞌneemmo woyite, masaalotenni kulloonni garinni lowo daga gamba yitanni noota huwata dandiineemmo.

16. Lowo daga hiikkiinni gamba yitinoreeti?

¹⁶ Yohaannisi ajuujasi borreessi yannara lowo daga wido ikkitinori ‘baalante daga, gaꞌre, gosanna afii giddonni’ gamba yitinore ikkitinota xawisino. Masaalaanchu Zakkaariyasino togo yee masaalino: “Hakkawaro, tonnu wole gobba manni mittu Yihudichiwa mare, uddanosi handaara amade, ‘Maganu kiꞌne ledo noota macciishshinoommona, ninkeno ledoꞌne haꞌnoni?’ yite xaꞌmidhanno.”—Zak. 8:23.

17. Yihowa Farciꞌraasine baalante gosanninna afiinni gamba yiino manna kaaꞌlate maa assitanni no?

 ¹⁷ Yihowa Farciꞌraasine, addi addi afiinni dayino manna gamba assate, dancha duduwo lowo afiinni duduwa hasiissannota huwattino. Hakko daafira, 130 saꞌꞌanno diro Qullaawu Maxaafi aana xintantino borruwa tirtanni keeshshitino; xaa yannara qole albinni roore lowo afiinni tirranni heeꞌnoonni. Addanko, Yihowa lowo daga wido ikkanno manna duuchante gosanni gamba asse yannankera maalale loosanni no. Ayyaanaamittete sagale qixxeessinanni afii yannate kiiro lexxasinni, addi addi daga giddonni gamba yiino manni Magano mitteenni magansiꞌranni no. Qoleno Yihowa Farciꞌraasine sabbakate looso diinaggaabbe loosatenninna roduuwu gede ikkite baxamatenni egennantinoreeti. Tini qolte ammananke baasa jawaachishshanno!—Mat. 24:14; Yoh. 13:35.

18. (a) Isayaasi 46:10, 11te garinni, Yihowa lowo daga daafira kultanno masaalo woꞌmitanno gede assasi dhagge diꞌꞌikkitannonke yineemmohu mayiraati? (b) Uullate aana heeꞌrate hexxo noonsari iimira haꞌra hoogansanni xiixantannokkihu mayiraati?

¹⁸ Lowo daga daafira kultanno masaalo lowo geeshsha hagiirsiissannote! Yihowa tini masaalo maalaꞌlisanno garinni woꞌmitanno gede assasi dhagge diꞌꞌikkitannonke! (Isayaasi 46:10, 11 nabbawi.) Lowo daga wido ikkitinori Yihowa uyinonsa hexxora iso galattanno. Insa Yesuusi ledo iima gashshitanno gede qullaawu ayyaaninni buurama hoogginohura dixiixantanno. Qullaawa Borro, Maganu ayyaaninni massagaminohu batinyu mannire kultanno; ikkirono, kuni manni 144,000 wido diꞌꞌikkino. Insa giddo mittu Cuuaancho Yohaannisiiti. (Mat. 11:11) Wolu qole Daawitiiti. (Soq. 2:34) Insano ikko wolu kiirre tunqannikki manni reyotenni kaꞌe gannate ikkitino uullara heedhanno. Baalunku wole daga ledo Yihowara ammanantinore ikkitinotanna aliidimmasi ayirrissannota leellishshanno faro afidhanno.

19. Yohaannisi lowo daga daafira laino ajuuja huwatanke maa assineemmo gede kakkayissannonke?

¹⁹ Maganu konni albaanni asse egenninokki garinni, babbaxxitino daga giddonni gamba yiinohu lowo miliyoone ikkanno manni iso mitteenni magansiꞌranno gede assanni no. Hexxonke iimira haꞌra woy uulla ragiꞌra ikkiturono, dandiinummo deerrinni lowo manni “wolu geꞌreewi” wido ikke lowo dagga ikkanno gede kaaꞌla hasiissannonke. (Yoh. 10:16) Muli yannara Yihowa masaalotenni kulloonniha bayira qarra abbanno; hattee yannara mannu oosora qarra abbino gashshootenna ammaꞌno hunanno. Lowo daga wido ikkitinorira taalle nookki hexxo noonsa! Insa uullate aana Yihowara hegere geeshsha soqqamate tunceenya afidhanno!—Aju. 7:14.