1, 2. Mitu manni Yihowa Farciꞌraasine daafira mayyiino?

 MANNU Yihowa Farciꞌraasinera dancha akatta noonsata coyiꞌranno. Lawishshaho, Antooni Giili yinanni borreessaanchi Naazi Jarmanera heedhinote Yihowa Farciꞌraasine daafira togo yee borreessino: “Naazi gaamo Yihowa Farciꞌraasine effidhe gibbanno. . . . [manna usurranni kaampera] 1939nni 6,000 Yihowara Farciꞌraasine usurantino.” Qoleno isi Yihowa Farciꞌraasinera lowo darti iillinsarono “ammannannire, qarru yannara nafa beꞌe yitannokkire, ammanantinorenna mittimma noonsare” ikkitinota borreessino.

² Wodiidi Afirikira heeꞌranno mannino Yihowa Farciꞌraasinera baxissanno akatta noonsata huwatino. Wodiidi Afirikira heedhannoti addi addi sircho afidhinoti Yihowa Farciꞌraasine waajjishannori noonsakkiha gamba yaa dandiitinokki yanna no. Ikkollana, Sadaasa 18, 2011nni Sambatu barra Wodiidi Afirikinna qooxeessaho noo gobbuwanni 78,000 saꞌannori addi addi sircho afidhino roduuwi, ayyaanaamittete sagale sagaꞌlate Johaanisibergi katamira noote jawa istaadiyeemera gamba yitino. Istaadiyeemete sooreeyye giddo mittu togo yiino: “Xaa geeshsha tenne istaadiyeemera gamba yiino manni giddo togooha dancha amanyoote afiꞌrino manna afe diegennoommo. Baalunku danchu garinni uddiꞌrino. Qoleno, tenne istaadiyeeme dancha gede assitine fiitinoonni. Baalunku coyinni roore  dhagge ikkinoeri kiꞌne babbaxxino sirchinni gamba yitinoonnire ikkaꞌneeti.”

3. Alamete doyichora noo roduuwanke wolu manniwiinni baxxinoha assannonsari maati?

³ Yihowa Farciꞌraasine ikkinokki manni ninke daafira coyiꞌrannori, alamete doyichora noo roduuwinke addinta baxxinoha ikkinota leellishanno. (1 Phe. 5:9) Ikkina, wole dirijjituwa baalantenni baxxinoommore ikkineemmo gede assinonkeri maati? Maganu Qaalinna qullaawu ayyaanisi kaaꞌlonni ‘akkala mannimma mulqine tugankeetinna’ “haaro mannimma” uddiꞌrankeeti.—Qol. 3:9, 10.

4. Konni birxichira maa ronseemmo? Mayira?

⁴ Akkala mannimma fushshe huna hasiissannota ikkiturono, togoo akattawiinni xeertiꞌne heeꞌrano hasiissanno. Konni birxichira, akkala mannimma fushshine huna dandiineemmohu hiittoonniitironna kuni coyi ranke assa hasiissannore ikkinohu mayiraatiro ronseemmo, hattono mittu manchi busha coye assa roso assiꞌrinoha ikkirono, amanyootesi biddi assiꞌra dandaanno yineemmohu mayiraatiro xiinxallineemmo. Hakkiinni saeno halaalu mine lowo diro keeshshitinori albihu bushu rosichinsara qeelantannokki gede maa assa hasiissannonsaro ronseemmo. Togoo qaagiishshi hasiisannohu mayiraati? Yihowara soqqamanni keeshshinohu mitu manni qoropha hoogginohura alba assannoha gara ikkinokki coye galagale assa hanafino; tini dadillissannote; konnira, “Uurre nooha lawannosihu, uwannokki gede qoropho!” yitanno amaale qaaga hasiissannonke.—1 Qor. 10:12.

5. (a) Akkala mannimma ranke fushshine huna hasiissannonkehu mayiraatiro lawishshunni kuli. (Hanafote noo misile lai.) (b) Qolasiyaasi Sokka 3:5-9 kulloonni garinni akkala mannimma widira kiiramannohu bushu assooti hiikkonneeti?

⁵ Uddanoꞌne xurte foole abbituro maa assitinanni? Xurtino uddano hakkawotenni fushshitine hooltinanniti egennantinote. Hatteente gede, Maganu akatta ledo sumuu yitannokki akatta hunneemmo gede hajanjoonninke; konni daafira tenne hajajora ranke hajajama hasiissannonke. Phaawuloosi isi yannara noo Kiristaana “akkala mannimma loosise ledo mulqitine [tugge]” yee amaalino amaale harunsa hasiissannonke. Xa hanni Phaawuloosi qummi assinohu lamu cubbi yaano foorretenna battete daafira laꞌno.—Qolasiyaasi Sokka 3:5-9 nabbawi.

6, 7. (a) Phaawuloosi horoonsiꞌrino qaalla akkala mannimma fushshe hunate sharrama hasiissannota leellishshannohu hiittoonniiti? (b) Sakura hiittoo heeshsho heedhino? Ise albi heeshsho facci assite agurtanno gede jawaante afidhinohu hiittoonniiti?

⁶ Foorre. Qullaawu Maxaafi giddo kulloonnihu “foorre” yine tirroonni qaali adhamikkinni siimu xaadooshshe assanna labbaahu labbaahu ledonna meyati meyate ledo foorano leellishannoho. Phaawuloosi Kiristaanaho “foorrete” ledo xaadooshshe afidhinota “uullate aana noota tenne gobba yorto shiiyye” yee amaalino. Phaawuloosi horoonsiꞌrino qaalla busha yorto qeeꞌlate sharrama hasiissannota leellishshanno. Ikkirono busha yorto sharrammiro qeela dandiinanni.

⁷ Hanni Jaappaanete heedhannota Sakura a lawishsha laꞌno. Ise anje heedheenna callimma macciishshantinose, hattono waagu dinooete yite heddanno. Hakko daafira, 15 diriti heedhe callimmase hawate addi addi manni ledo foora hanaffu. Ise assootise saalfachishinoseha ikkirono, “godowu gato sase higge huntinota” coyidhino. Ise ledde togo yitino: “Umi qara amanyoote bainore asseemma wote, mannu hasiꞌrannoetanna baxannoeta ikkoommoha lawannoe daafira, shiima geeshsha giddoꞌya harshammi yitanno. Ikkollana amanyoote bainore assa roso assiꞌranni harummati, yaadeemmata ikkumma.” Sukara 23 diro ikkase geeshsha togoo heeshsho heedhino.  Gedensaanni ise Yihowa Farciꞌraasine ledo Qullaawa Maxaafa xiinxalla hanaffu. Sakura rossinori lowo geeshsha hagiirsiisinose; ise umose bushiishanna saalfata, hattono amanyoote baꞌino heeshsho facci assite agurtanno gede Yihowa kaaꞌlinose. Xa ise woꞌma yanna suwisaancho ikkite soqqantanni no; ise biꞌree gede callattinohu gede assite diheddanno. Ise xa heedhanno heeshsho daafira togo yitino: “Duuchanka wote Yihowa baxille qamase laꞌꞌaꞌya lowo geeshsha hagiirsiissannoe.”

8. Maganu albaanni battaambeemmo gede assankera dandaannohu mitu assooti hiikkoonneeti?

⁸ Batte. Qullaawu Maxaafi giddo “batte” yine tirroonni qaali foorre calla ikkikkinni, hakkiinni saꞌino tirono afiꞌrino. Sijaara aga woy maaeela haariimo haaꞌriimano battete assooteeti. (2 Qor. 7:1; Efe. 5:3,4) Maaxamme bushare assa, lawishshaho busha yorto kakkayissanno borro nabbawa woy teeda baꞌino misilla laꞌꞌano battete assooteeti; togoo assooti maasterbeeshiinete rosichiwa qole massara dandaanno.—Qol. 3:5. b

9. “Maalu yorto” lexxitanni hadhuro mayi ikkara dandaanno?

⁹ Teeda baꞌino misilla ganyite laꞌannorira “maalu yorto” giddonsa lexxitanni hadhara dandiitanno; tini siimu xaadooshshi araado ikkannonsa gede assitanno. Xiinxallaano teeda baꞌino misilla ganyite laꞌꞌate rosichi noonsari agattotenna jingilli assitanno xagga adhanno mannira noote gedee araado heedhannonsata xawissino. Teeda baꞌino misilla laꞌꞌate rosichi saallanninna looso danchu garinni loonsannikki gede assanno, hattono maatete hagiirri baꞌanno, adhama diigantannonna meessaneeto shinanni gede assitara dandiitanno. Mittu manchi teeda baꞌino misilla laꞌꞌa agurihunni mitto diro ikkisi barra ayirrisi yannara togo yee borreessino: “Biꞌreeꞌya gede giddoꞌya galagalte fayyo ikkitino.”

10. Ribeero teeda baꞌino misile laꞌꞌate araado qeeꞌlate kaaꞌlinosiri maati?

¹⁰ Lowo manni teeda baꞌino misilla laꞌꞌate rosicho qeelate agurikkinni sharrama hasiissinonsa. Ikkirono, Biraazilete heeꞌrannohu Ribeero lawishshi, konne rosicho sharramme qeela dandiinannita leellishanno. Ribeero mininni fulinohu wedellichu heeꞌreeti; hakkiinni isi horoonsiꞌnoonni woraqatta wirro horoonsiꞌnanni gede assanno faabiriki giddo loosa hanafi; isi hakko loosanni heeꞌre teeda baꞌino misilla amaddino borro laꞌꞌa hanafi. Isi togo yiino: “Suutu suutunni teeda baꞌino misilla laꞌꞌate araado amaddue. Teeda baꞌino misilla laꞌꞌate araado lexxitanni hadhino daafira, togoore leellishshanno viidiyo laꞌꞌate ledo heeꞌreemmo mancho mininni fulta geeshsha cince agara nafa didandeemmo.” Mitto barra Ribeero wirro horoonsiꞌrate duunnoonni borruwa, Maatete Hagiirrira Qara Ikkinori Maati? (Amaaru Afoo) yaanno maxaafa lai. Isi konne maxaafa haaꞌre nabbawi. Ribeero nabbawinori Yihowa Farciꞌraasine ledo Qullaawa Maxaafa xiinxallanno gede assinosi; ikkollana isi busha rosichosi agurate lowo yanna sharramino. Konne rosicho qeelanno gede kaaꞌlinosiri maati? Isi togo yiino: “Huuccatto, Qullaawa Maxaafa xiinxallanna rosoommo coye hiinca, hattono Maganu akatta naadaꞌya Yihowara nooe baxilli teeda baꞌino misilla laꞌꞌate hasatto rooranno gede assitino.” Maganu Qaalinna qullaawu ayyaani kaaꞌlonni, Ribeero akkala mannimma fushshe hune cuuamino; xa isi songote cimeessa ikke soqqamanni no.

11. Mittu manchi teeda baꞌino misilla laꞌꞌatewiinni xeertiꞌrate maa assa hasiissannosi?

¹¹ Ribeero teeda baꞌino misilla laꞌꞌate rosicho qeelanno gede kaaꞌlinosihu Qullaawa Maxaafa nabbawa calla ikkitinokkita deꞌooti. Isi Qullaawu Maxaafi sokka wodanisira coꞌanno gede assiꞌrino. Huuccatto assiꞌrasinna  rosinore hiincasi Maganoho noosi baxilli, teeda baꞌino misilla laꞌꞌate hasatto rooranno gede assitino. Yihowara noonke baxilli lexxanno gede assiꞌranna busha coye effiꞌne giwa, teeda baꞌino misilla laꞌꞌatewiinni xeertiꞌrate maltino doogooti.—Faarso 97:10 nabbawi.

12. Istiifeni hanqonna xonama aguranno gede kaaꞌlinosiri maati?

¹² Hanqoho muddamanno manchira gara ikkinokkire coyiꞌra rakkannosi. Togoo akati maatete mereero hagiirre hunannoti egennantinote. Awustiraaliyaho heeꞌrannohu Istiifeni yinanni anni togo yiino: “Ani bashshoora xonama rakkannoehonna shiimu coyira hanqeemmoho. Galteꞌyanna ani sase hinge babbaxxinoommo, hattono adhamanke diigate kaꞌnoommo.” Gedensaanni kuri minaanninna minaama, Yihowa Farciꞌraasine ledo Qullaawa Maxaafa xiinxalla hanafi. Istiifeni Qullaawu Maxaafi amaale harunsa hanafasi mayi guma abbitu? Isi togo yiino: “Maatenke heeshsho dhagge ikkanno garinni woyyaabbino. Alba hanqummoro beleqe kaeemmo; xa kayinni Yihowa kaaꞌlonni salaametenni heeꞌreemmohanna jooga mancho ikkoommo.” Xa Istiifeni songote soqqamaancho ikke soqqamanni no; galtesi haammata diro woꞌma yanna suwisaancho ikkite soqqantanni no. Songote cimeeyye isi daafira togo yitino: “Istiifeni muddamannokkihonna diinaggaawe loosanno rodooti, hattono umosi heeshshi assannoho.” Insa Istiifeni mitto barra nafa hanqanna affe diegentino. Isi akatasi biddi assiꞌrinohu umisi sharronni ikkinohu gede asse hedinoni? Isi togo yiino: “Yihowa akataꞌya biddi assiꞌreemmo gede kaaꞌlinoe kaaꞌlo adha hoogoommoro, konne hagiirsiisanno atoote diafiꞌreemmo.”

13. Hanqu gawajjannohu hiittoonniiti? Qullaawu Maxaafi mayyee qorowisiisanno?

¹³ Qullaawu Maxaafi hanqo, gibbonna xonama agurreemmo gede qorowisiisannonkehu dimullaati. (Efe. 4:31) Togoo akatta giwammanni gede assitanno. Alamete noo manni hanqu hakkeeshshi geeshsha qarra afiꞌrinokkihu gede asse hedanno; ikkollana hanqu Kalaqaanchinkera ayirrinye diabbanno. Lowo manni haaro mannimma uddiꞌrara albaanni, tenne busha akatta fushshe hoolino.—Faarso 37:8-11 nabbawi.

14. Bashsho giwamanno manchi jooga ikka dandaanno?

¹⁴ Hanni Awustiraaliyaho mitte songora cimeessa ikke soqqamannohu Hansi lawishsha laꞌno. Mittu songonsa cimeeyye bisi qineessaanchi Hansi daafira togo yiino: “Isi jooga rodooti; isi gedeeha jooga manna afe diegennoommo.” Ikkollana, Hansi alba togoo akati noosiha diꞌꞌikkino. Isi anje noo waro quwa sae agannohonna hanqoho muddamannoho. Mitte hige age dimbe heeꞌre lowo geeshsha hanqe meya jaalasi shiino; konnira yoo yineennasi 20 diro usuramino. Isi usuru mine usuramasi mannu ledo giwamate akata hooꞌlanno gede diassitinosi. Gedensaanni kayinni amasi mitto songote cimeessa usuru mine noo beettose hasaawisanno gede coye qineessitu; Hansi konni garinni Qullaawa Maxaafa xiinxalla hanafi. Isi togo yiino: “Akkala mannimma fushshe hunate lowo geeshsha sharrama hasiissinoe. Jawaante afiꞌreemmo gede kaaꞌlitinoeti, “Bushu manchi bunshete doogonni higo” yitannote Isayaasi 55:7 giddo noo hedootinna ‘konni albaanni mitu mitu hattooreeti’ yitannote heeshshonsa biddi assiꞌrino mannire kultannote 1 Qorontoosi 6:11 giddo noo hedooti. Yihowa batinye diro cince qullaawu ayyaanisinni haaro mannimma uddiꞌreemmo gede kaaꞌlinoe.” Hansi usuru mine 17 dironna lee agana keeshshino; hakkunni gedensaanni usuru mininni cuuamino Kiristaancho ikke fulino. Isi togoo yiino: “Yihowa maarinoenna gatonna yiinoe daafira galaxxeemmosi.”

15. Xaa yannara mannu maa assa roso assiꞌrino? Qullaawu Maxaafi kayinni mayyaanno?

¹⁵ Kaphuno akkala mannimma akati widooti. Lawishshaho lowo manni giwire baata  giwe woy loosino soꞌrora xaꞌmama giwate kaphanno. Yihowa ‘halaalu Maganooti.’ (Far. 31:5) Konni daafira Yihowa mittu mittunku iso magansiꞌrannohu “mimmitinsara halaale coyiꞌra” hattono “kapho” coyidhannokki gede hasiꞌranno. (Efe. 4:25; Qol. 3:9) Konnira qarrisanno coyi giddo nafa heeꞌnummoro adda coyira hasiissannonke.—Law. 6:16-19.

16. Akkala mannimma fushshe hunate kaaꞌlannonkeri maati?

¹⁶ Akkala mannimma meessi sharronni calla fushshine hunne didandiinanni. Aleenni kulli manni, Sakuura, Ribiriwo, Istifenenna Hansi loossannoha busha looso agurate lowo geeshsha sharrantino. Insa qeeltinohu Maganu Qaalinna ayyaanisi kaaꞌlannonsa gede surrensanna wodanansa fantinohuraati. (Luq. 11:13; Ibi. 4:12) Maganu wolqa kaaꞌlo afiꞌrate, Qullaawa Maxaafa barru baala xiinxalla, nabbamboommo coye hiinca, Qullaawu Maxaafi amaalannonkere assate kaaꞌlitannonketa hayyonna jaawaante afiꞌrate agurrummokkinni huuccatto assiꞌra hasiissannonke. (Iya. 1:8; Far. 119:97; 1 Tes. 5:17) Qoleno songote gambooshshe qixxaambe haꞌneemmoha ikkiro Maganu Qaalinninna qullaawu ayyaaninni kaaꞌlo afiꞌneemmo. (Ibi. 10:24, 25) Hattono, alamete doyichora Maganu mannira babbaxxitino doogganni qixxaabbannota ayyaanaamittete sagale seekkine sagaꞌla hasiissanno.—Luq. 12:42.

17. Aananno birxichira maa roseemmo?

¹⁷ Konni birxichira Kiristaanu fushshe tuga hasiissannonsaha haammata busha assoote ronsoommo. Ikkollana busha akatta fushshine huna calla diguddanno. Hatteentenni, haaro mannimma uddiꞌra hasiissannonke. Aananno birxichira aye woteno uddiꞌre heeꞌra hasiissannonkete haaro mannimma daafira ronseemmo.