1. Yihowa heeshsho noonsare kalaqinohu mayiraati?

 YIHOWA callichisi heeꞌrino yanna no. Ikkirono iso callimma diamaddinosi. Yihowara xeinosiri mitturino dino. Ikkirono isi hagiidhitanni heedhanno gede woloota kalaqa hasiꞌrino. Yihowa baxillunni heeshsho noonsare kalaqa hanafino.—Far. 36:9; 1 Yoh. 4:19.

2. Yihowa baalankare kalaqi woyite Yesuusinna sokkaasine hiitto ikkitino?

² Yihowa balaxe Beettosi kalaqino. Hakkiinni bayiru Beettisi widoonni lowo kume ikkitanno sokkaasinenna wole “baalanka coye kalaqino.” (Qol. 1:16) Yesuusi Annisi ledo loose lowo geeshsha hagiidhino. (Law. 8:30) Maganu sokkaasineno hagiidhitanno gede assannonsari no. Yihowanna qaru loosaasinchisi Yesuusi iimanna uulla kalaqqu woyite sokkaasine laꞌanni no. Hakkiinni insa hiitto ikkituyya? Insa Maganu uulla kalaqi woyite hagiidhite “ilillissino” hattono Yihowa mitto mittonka coye kalaqi woyite roorenkanni manna kalaqi woyite hagiidhitinoti dihuluullissannote. (Iyo. 38:7; Law. 8:3) Kuni baalunku kalaqami Yihowa baxillenna hayyo leellishannoho.— Far. 104:24; Rom. 1:20.

3. Umi Qorontoosi 15:21, 22 kultanno garinni Yesuusiti wodote kakkalo mayi faro fantino?

³ Yihowa mannu ooso biifado uulla aana hagiidhitanni hegerera heedhara hedino. Ikkollana Addaaminna Heewani baxillaanchu Anninsara finqiltuta cubbunna reyo tenne alame eino. (Rom. 5:12) Ikkina Yihowa maa assino? Bayichonko isi mannu sircho gatisanno gara coyiꞌrino. (Kal. 3:15) Yihowa  Addaaminna Heewani sirchi cubbunna reyotenni wolaphanno gede Beettisita wodote kakkalo qixxeessate hedino. Qoleno Yihowa baalunku manni isira soqqama doodhanno faro fanino; hattono isira soqqama doodhitannorira hegere heeshsho aannonsa.—Yoh. 3:16; Rom. 6:23; 1 Qorontoosi 15:21, 22 nabbawi.

4. Konni birxichira hiikkuri xaꞌmuwa xiinxallineemmo?

⁴ Maganu kaote daafira uyino hexxo batinye xaꞌmuwa xaꞌmineemmo gede assitannonke. Lawishshaho, reyino manni kaꞌꞌannohu ma garinni ikkara dandaanno? Shiiꞌnoommori reyotenni kaꞌanno woyite insa bande afa dandiineemmo? Kaote hexxo hagiidhineemmo gede assitannonkehu hiittoonniiti? Kaote hexxo hiincanke Yihowa baxille, hayyonna cinca albinni roore naandeemmo gede assitannonkehu ma garinniiti? Hanni kuri xaꞌmuwa xiinxallino.

5. Reyino manni baalu mitteenni dikaꞌꞌanno yine hendeemmohu mayiraati?

⁵ Yihowa Beettisi widoonni lowo miliyoone ikkanno manna reyotenni kayisanno woyite baalanka mitte hige kayisanno yine dihendeemmo. Mayira? Korkaatuno kageeshshi manni mitteenni kaꞌꞌannoha ikkiro luulu woy kooccu batiꞌrara dandaanno. Yihowa kayinni mittoreno qinaawinokki garinni diloosanno. Isi Mannu salaame afiꞌranno gede baalunku coyi qinaawinoha ikka hasiissannota afino. (1 Qor. 14:33) Yihowa Beettisi ledo uulla mannu heeꞌranno gede asse dirimu dirimunni kalaqi woyite hayyichanna cincannoha ikkinota leellishino. Yesuusino Kumu Diri Gashshooti yannara Armagedooninni gatte saꞌannori ledo uulla reyotenni kaꞌꞌanno mannira heeꞌrate injiitannota assitanno woyite hayyichanna cincannoha ikkinota leellishanno.

6. Soqqamaasinete Looso 24:15 kultanno garinni Yihowa reyotenni kayisanno manni giddo rooru hiittooho?

 ⁶ Baalunkunni roore Armagedooni gatte saꞌinori reyotenni kaꞌannorira Maganu Mangisterenna Yihowa insa maa assitara hasiꞌrannoro rosiisa hasiissannonsa. Mayira? Korkaatuno reyotenni kaꞌannori giddo rooru ‘cubbaataammaho.’ (Soqqamaasinete Looso 24:15 nabbawi.) Insa Kiristoosite wodote kakkalonni horo afiꞌrate lowo coye biddi assiꞌra hasiissannonsa. Hanni Yihowa daafira afinori nookkihu lowo miliyoone ikkannohu reyotenni kaꞌꞌanno mannira Maganu daafira halaale rosiisate loosi mageeshshi geya halaꞌlado ikkannoro hendo. Xaa yannara assinannihu gede mittu mittunku manchira Qullaawa Maxaafa xiinxallisanno rodoo worranni ikka? Woy haaruudde songuwate gaammanni ikka? Hattono reyotenni kaꞌannore rosiissanno gede qajeelsinanni ikka? Tini hakkawote anfeemmota ikkitanno. Ikkirono, Kiristoosihu Kumu Diri Gashshooti jeefora ‘Kaaliiqa egennino manni baatto’ woꞌmannota anfoommo. (Isa. 11:9) Hattee yannara hagiirsiisanno looso diinaggaambe loonseemmo!

7. Maganu soqqamaano reyotenni kaꞌannore rosiissanno woyite qarrinsa leellannonsa yineemmohu mayiraati?

⁷ Kiristoosihu Kumu Diri Gashshooti yannara baalanti Yihowa soqqamaano iso hagiirsiisate biddi assiꞌra hasiissannonsare biddi assidhanno. Konnira insa reyotenni kaꞌinori cubbo loosa agurate sharrantannonna Yihowa biddishshi garinni heedhanno gede kaaꞌlitannonsa woyite qarrinsa leellannonsa. (1 Phe. 3:8) Reyotenni kaꞌꞌanno manni Yihowa soqqamaano umonsa heeshshi assitannorenna iso hagiirsiisate sharrantannore ikkitinota laꞌꞌanno woyite ledonsa Yihowa magansiꞌrate kaꞌꞌanno.—Fil. 2:12.

8. Shiiꞌnoommori reyotenni kaꞌanno woyite bande afa dandiineemmo yine hendeemmohu mayiraati?

⁸ Shiiꞌnoommori reyotenni kaꞌanno woyite bande afa dandiineemmo yine hendeemmo gede assannonkehu duuchu korkaati no. Yihowa alba mito manna reyitinore kayisi garinni albillitte reyino manna kayisanno woyite daninsa, coyidhanno garinna heddanno gari soorramikkinni kayisannoha ikkara dandaanno. Yesuusi reyo goxichu, kao kayinni goxino mancho goxichunni kayisate ledo heewisiisinota qaango. (Mat. 9:18, 24; Yoh. 11:11-13) Mittu manchi goxinowiinni kaꞌꞌanno woyite danisi woy coyiꞌranno gari disoorramanno hattono surresira noori dibaꞌꞌanno. Hanni Alaazaari lawishsha laꞌno. Isi reyinkunni shoole barra ikkino daafira reeshshisi shola hanafino. Ikkirono Yesuusi iso reyotenni kayisita roduuwisi bayichonko bade afino; isino insa qaaginoti dihuluullissannote.—Yoh. 11:38-44; 12:1, 2.

9. Reyitinori kaꞌanno woyite guuta surrenna mannimma afidhe kaꞌannokkihu mayiraati?

⁹ Yihowa Kiristoosi Gashshooti yannara “‘Dhiwamoommo’ yaannoha dianfanni” yee qaale eino. (Isa. 33:24; Rom. 6:7) Konnira Yihowa reyitinore ordu fayyimma oye kayisannonsa. Ikkollana insa reyotenni kaꞌanni heedhenni guunte noonsare diꞌꞌikkitanno. Guunte noonsare ikkite kaꞌuro fiixinsa insa bade afa hoogara dandaanno. Baalunku manni guuta ikkannohu Kiristoosihu Kumu Diri Gashshooti yannara sunu sununni ikkikki digatino. Hakkiinni Yesuusi kumu diri jeefora Maganu Mangiste Annisira qolanno. Maganu Mangiste loosose umo fushshitanno; hattono mannu ooso guuta ikkitanno  gede assitanno.—1 Qor. 15:24-28; Aju. 20:1-3.

10. Reyino manni kaꞌꞌanno woyite hiitto ikkattoha lawannohe?

¹⁰ Shiirootto manchi reyotenni kaeenna xaadatto woyite hagiidhatto gara hanni hedi. Hagiirru batinyinni ikkattoti baꞌannnoheha ikkara dandaanno. Woy Yihowa faarsotenni guwisiꞌrattoha ikkara dandaanno. Ikkihano ikkiro Yihowanna Beettisi dhagge ikkitannota tenne kaote hexxo uyitinohe daafira insa lowo geeshsha baxattoti dihuluullissannote.

11. Yohaannisi 5:28, 29 kultanno garinni Maganu seerinni galtannori mayi atoote afidhanno?

¹¹ Reyotenni kaino manni akkala mannimmansa fushshe hoole Maganu seerinni galanno woyite mageya hagiidhannoro hanni hedi. Hatto assanno manni hegerera gannatete heeꞌranno. Maganoho finqiltannori kayi gannatete noo salaame huntara worre dilaꞌnanninsa.—Isa. 65:20; Yohaannisi 5:28, 29 nabbawi.

12. Yihowa uullate aana heedhanno soqqamaasinesi baala maassiꞌrannohu hiittoonniiti?

¹² Lawishsha 10:22 Yihowa “maasso jiro abbitanno; aanahono mitiimma dileddanno” yitanno; Maganu Mangiste hunda heedhanno soqqamaasinesi baala tini halaale ikkitinota laꞌanno. Yihowa ayyaani kaaꞌlannonsa daafira Maganu manni ayyaanaamittetenni durooꞌmanno; insa albinni roore Kiristoosi faale hadhanno daafira guuta ikkitanno. (Yoh. 13:15-17; Efe. 4:23, 24) Insa barru baala gellessanna dancha manna ikkitanni hadhanno. Hakka woyite heeshsho baxissanno gari addiiti! (Iyo. 33:25) Kaote hexxo hiincakki xaa yannara kaaꞌlitannohehu hiittoonniitiyya?

13. Faarso 139:1-4 kultanno garinni kaote hexxo Yihowa seekke afinonketa leellishshannohu hiittoonniiti?

¹³ Aleenni ronsummonte gede Yihowa mitto mancho reyotenni kayisanno woyite surresinna akattasi qolanno. Hatto yaa mayyaatero hanni hedi. Yihowa lowo geya baxannohe daafira hedattore, giddokkita, coyiꞌrattorenna assattore baala laꞌꞌanno hattono qaaganno. Yihowa mitto mancho reyotenni kayisanno woyite surresi, hedosi, akatasinna ayimmasi qolanno. Moote Daawiti Yihowa ninke mitto mittonka seekke afinota huwatino. (Faarso 139:1-4 nabbawi.) Yihowa seekke afinoheta huwatittoro hiitto ikkatto?

14. Yihowa seekke afinonketa hendeemmo woyite mayi macciishshamannonke?

¹⁴ Yihowa seekke afinonketa hiincineemmo woyite isi laanfenke illachishanno yine yaada dihasiissannonke. Mayira? Yihowa ninkera hedannota qaango. Ninke mittu mittunku isi albaanni muxxete. Isi heeshshonke giddo iillannonkeha mitto mittonka coye afino. Tini lowo geya sheshifachishshannote! Callantoommo yine heda horo dihasiissannonke! Yihowa ninke kaaꞌlanno faro hasiꞌranni woꞌmanka woyite ledonke ikkanno.—2 Dud. 16:9.

15. Kaote hexxo Yihowa hayyo leellishshannohu hiittoonniiti?

¹⁵ Reyo waajjineemmoha ikkiro diinnanke gibbiniro shineemmoꞌne yite assa hasiꞌneemmokkire assineemmo gede giddeessitankera dandiitanno. Insa banxeemmo manna woy ammanneemmo coye kaandeemmo gede assitankera woꞌnaaltanno. Ikkollana diinnanke  shitunkero nafa Yihowa kayisannonketa anfoommo daafira tenne diwaajjineemmo. (Aju. 2:10) Diinnanke baxxureno assite Yihowawiinni baddankera didandiitanno. (Rom. 8:35-39) Yihowa kaote hexxo aasi hayyicha Magano ikkinota leellishshanno! Isi hatto assasi Sheexaanu ninke waajjishiishate horoonsiꞌranno massaari shuffanno gede assitino; hattono worbuulle ikkineemmo gede assitannonkehura beꞌe diyineemmo.

16. Ateneeto mayite xaꞌma hasiissannohe? Kuri xaꞌmuwara qolatto dawaro Yihowa mageeshshi geeshsha addaxxattoro leellishshannohu hiittoonniiti?

¹⁶ Diinna shineemmohe yite waajjishiishshuhero Yihowa reyotenni kayisannoheta addaxxatto? Togoo coyi tuncu yiihero iso addaxxattotanna teꞌee mayinni afa dandaatto? Ateneeto togo yite xaꞌmi: ‘Barru baala asseemmohu shiimmaaddu coyi Yihowa addaxxeemmota leellishannoreeti?’ (Luq. 16:10) ‘Heeshshoꞌya gari Yihowa Mangistesi balaxisiisummoro hasiisannoere aannoeta addaxxeemmota leellishanno?’ (Mat. 6:31-33) Kuri xaꞌmuwara dawaro ee yite qolittoro Yihowa addaxxattotanna ayi geeshshi fonqoli iilliherono dandee saꞌꞌate qixxaawoottota leellishatto.—Law. 3:5, 6.

17. (a) Kaote hexxo Yihowa cincannoha ikkinota leellishshannohu hiittoonniiti? (b) Cincasira Yihowa galanteemmosita leellinsheemmohu hiittoonniiti?

¹⁷ Yihowa tenne busha alame hunanno barranna saate murino. (Mat. 24:36) Isi cinca hooge murino barri iillikkinni tenne busha alame dihunanno. Yihowa reyino manna kayisate quqquxamannoha ikkirono yanna iillita geeshsha cince agadhanno. (Iyo. 14:14, 15) Isi murino yanna iillita geeshsha agaranno. (Yoh. 5:28) Yihowa cincanno Magano ikkino daafira galanteemmosi. Ninkeno ikko wolu batinyu manni “aagintaawe” higanno faro afiꞌrinohu Yihowa cincino daafiraati. (2 Phe. 3:9) Yihowa lowo manni hegere heeshsho hexxo afiꞌrara hasiꞌranno. Yihowa cincino daafira galantosi. Hatto assa dandiineemmohu hiittoonniiti? “Hegere heeshsho afiꞌrate gara ikkitinoti wodanu dooꞌꞌo noonsare” diinaggaambe hanso; hattono Yihowa baxxannonna isira soqqantanno gede kaaꞌlino. (Soq. 13:48, NW) Hatto assinummoro insano ninke gede Yihowa cincanni horo afidhanno.

18. Woloota cincine kaaꞌla hasiissannonkehu mayiraati?

¹⁸ Yihowa kumi diri gashshooti jeefora guuta  ikkineemmo yanna cince agaranno. Hakka geeshsha kayinni isi cubbonke gatona yaannonke. Ninkeno Yihowa gede wolootaho noonsata dancha akatta laꞌꞌanna cinca hasiissannonke. Hanni mitte rodoo lawishsha laꞌno; minaannise buutote yaaddo waaddeennasi gambooshshe daa agurino. Ise togo yitino: “Tini baasa xissiissinoe; hendoommori baalu mullare ikke gatino.” Ikkirono ise minaannase cincite kaaꞌlitino. Ise Yihowa addaxxitino hattono hexxo dimudhitino. Ise qarrase illachisha agurte Yihowa gede minaanniseta dancha akatta illachishshino. Togo yitino: “Minaanniꞌyara kaajja akatta noosi; qoleno isi woyyimma afiꞌrate woꞌnaalanni no.” Ninkeno maatete giddo woy songonkera buutote qarri iillinonsare cincine kaaꞌla hasiissannonke.

19. Maa assate murciꞌra hasiissannonke?

¹⁹ Yesuusinna sokkaasine Maganu uulla kalaqi woyite hagiidhitino. Hanni insa albillitte uullate aana Yihowa baxannohunna isira soqqamannohu guutu manni woꞌmanno woyite mageeshsha hagiidhitannoro hedde. Iima Yesuusi ledo gashshitara uullanni hadhinori loosinsa mannu ooso kaaꞌlanni noota laꞌanno woyite mageeshshi geeshsha hagiidhitannoro hendo. (Aju. 4:4, 9-11; 5:9, 10) Hanni dadillu hagiirreho soorramannota hattono dhibbu, qarrunna reyo hegerera baꞌanno yanna hedi. (Aju. 21:4) Hakka geeshsha baxillaanchu, hayyichunna cincanno Annikki Yihowa faale haꞌrate murciꞌri. Hatto assittoro aye geeshshi fonqoli iilliherono hagiirrikki baikkinni heeꞌratto. (Yai. 1:2-4) Yihowa ‘cubbaataammanna keeraano reyotenni kayiseemmo’ yee qaale eino daafira galaxxineemmosi!—Soq. 24:15.