1. Hayyo afiꞌra dandiineemmohu hiittoonniiti? Tini hayyo kaaꞌlitannonkehu ma garinniiti?

 YIHOWA hayyote Buichooti; qoleno wolootaho hayyo aanno. Yaiqoobi 1:5 togo yitanno: “Kiꞌne giddo egenno [woy, hayyo] xeꞌinosihu heeꞌriro, Magano huucciꞌro; Maganuno aannosi. Isi ayeno mishikkinni baalunkura elate shooshaqa Maganooti.” Maganuwiinni hayyo afiꞌra dandiineemmo doogga giddo mitte isi aannonke seejjo adhate. Tini hayyo gara ikkinokkire assineemmokkinna Yihowawa shinqeemmo gede kaaꞌlitannonke. (Law. 2:10-12) Tini qolte ‘Maganu baxilli giddo heeꞌneemmo’ gedenna hegere heeshsho afiꞌneemmo gede assitannonke.—Yih. 21.

2. Maganu seejjannonke seejjo naadate mayi kaaꞌlannonke?

² Cubbaataamma ikkanke, lossinoonninke gari, woy wolu korkaati seejjo adha qarra ikkitannonke gede assara dandaanno. Heeshshonke giddo seejjo afidhino horo laꞌneemmo wote Maganu seejjannonkehu baxannonkehura ikkinota huwanteemmo; tini qolte uyinanninke seejjo naandeemmo gede kaaꞌlitannonke. Lawishsha 3:11, 12 “Beettoꞌya ballo, Kaaliiqi seejjo mishshooti; . . . Kaaliiqi baxannonsare seejjannonsa” yitanno. Qoleno Yihowa assannonkeri kaaꞌlannonkere ikkinota deꞌooti. (Ibiraawoota 12:5-11 nabbawi.) Maganu seekke egenninonke daafira, isi seejjannonkehu garunninna quwa saikki ikkinota  addaxxa dandiineemmo. Konninni aanchine shoolu gari seejjo xiinxallineemmo. (1) meessaneeto seejja, (2) annunna ama oosonsa seejjanno seejjo (3) Kiristaanu songo giddo seejjinanninke seejjonna (4) seejjinanninke wote macciishshantannonke xissonni roore busha ikkino coye ronseemmo.

3. Mittu qaaqqi isonooto seejjannoha ikka dandaannohu hiittoonniiti? Lawishshunni kuli.

³ Meessaneeto seejjate yaa, ninkeneeto qeeꞌline akattankenna hedonke woyyeessiꞌrate yaate. Meessaneeto seejja kalaqamunni afiꞌnannire diꞌꞌikkino. Togo assate qajeelshu hasiisannonke. Lawishshaho, mittu qaaqqi biskilliite kada rosiisiꞌranno woyite, annisi woy amasi uwannokki gede amadannosi. Kayinni qaaqqu biskilliite kada shiima geeshsha rosanno wote sununni asse amada agurannosi. Qaaqqinsa woꞌmunni woꞌma dandaanno wote qole callisi kadanno gede agurtannosi. Hatteente gede annuwunna amuuwu oosonsa “mootichu amaalenni seejjitanni” ganyite cincatenni qajeelsitannonsaha ikkiro oosonsa umonsa seejjitannore ikkitannonna hayyo afidhanno gede kaaꞌlitannonsa.—Efe. 6:4.

4, 5. (a) Meessaneeto seejja lowo geeshsha hasiissannote ‘haaro mannimma’ kifileeti yineemmohu mayiraati? (b) ‘Lamala hinge umbummoro’ nafa hexxo mudha hasiissannonkekkihu mayiraati?

⁴ Yihoware jajjabbu heeꞌre rosino mannino konne xintu seera harunsa hasiissannonsa. Insa mito geeshshano ikkiro umonsa seejja dandiitannoha ikkara dandaanno. Ikkirono insa ayyaanaamittetenni gikki yaa hasiissannonsareeti. Togoo manni “haaro mannimma” uddirannonna Kiristoosite gedee hedo heedhannonsa gede sharramannoha ikkiro gikki yiino Kiristaana ikka dandaanno. (Efe. 4:23, 24) Mittu manchi ayyaanaamittetenni gikki yaanno wote heedhannosi akatta giddo mitte isonooto seejjiꞌrate. Togo assanke “ammana giwanna maalu yorto agurre umo qeeꞌline, sumbetenninna ayyaanaame heeshshonni tenne gobbara heeꞌneemmo gede” kaaꞌlitannonke.—Tit. 2:12.

⁵ Ninke baalunku cubbaataammaho. (Ros. 7:20) Ikkollana mittu manchi soꞌro loosiro xaate biddi yaa woy umosi seejjira didandaanno yaa diꞌꞌikkino. Lawishsha 24:16 “Keeraanchu lamala hige uwiro nafa kaꞌꞌanno” yitanno. Tennera kaaꞌlannosiri maati? Umisi wolqa calla dikaaꞌlitannosi, hatteentenni Maganu ayyaani kaaꞌlannosi. (2 Qorontoosi 4:7 nabbawi.) Maganu ayyaani laalanno gumi giddo mitte meessaneeto qeeꞌlate; kuni akati meessaneeto seejjiꞌrate ledo xaado afiꞌrinoho.

6. Maganu Qaale danchu garinni xiinxallate mayi kaaꞌlannonke? (Hanafote noo misile lai.)

⁶ Ninkeneeto seejjiꞌrate giddonkenni huuccatto assiꞌra, Qullaawa Maxaafa xiinxallanna hiinca hasiissanno. Maganu Qaale xiinxalla qarra ikkitinohehalla ikki? Qullaawa Maxaafa xiinxalla baxisannohekkiha ikkara dandaanno. Ikkollana, maahoyye yiittoro Yihowa kaaꞌlannoheta deꞌooti. Isi ‘Qaalesi halchatto’ gede kaaꞌlahera dandaanno. (1 Phe. 2:2) Umihunni, ateneeto qeeꞌlite Qaalesi xiinxallatto gede kaaꞌlahera Yihowa huucciꞌri. Hakkiinni huuccattokki ledo sumuu yaannore assi; shiima yanna xiinxalla dandaatto. Sunu sununni Qullaawa Maxaafa xiinxalla shota ikkitannohe, hattono baxissannohe! Qoleno muxxe ikkitinota Yihowa hedo hiincitanni sayisatto yanna hagiirsiissannohe.—1 Xim. 4:15.

7. Ninkeneeto seejjiꞌranke ayyaanaamittete mixonke wonshiꞌrate kaaꞌlitannonkehu hiittoonniiti?

⁷ Umonke seejjiꞌneemmore ikkanke ayyaanaamittete mixonke wonshiꞌrate kaaꞌlitannonke. Lawishshaho mittu anni soqqanshote noosi diinagge albisi geeshshita ikkitinokkita huwati. Tennera isi woꞌma yanna suwisaancho ikkate mixo fushshiꞌri, hattono borronke giddonni suwisaancho ikkate daafira kultanno birxichuwa hase nabbawino, qoleno huuccatto assiꞌrino. Togo assasi ayyaanaamittetenni kaajjanno gede kaaꞌlitinosi. Isi injaannosi wote kaaꞌlaancho suwisaancho ikkate coye biddi assiꞌrino. Tini kaaꞌlitinosiyya? Fonqolo ikkannori  iillinosiha ikkirono, mixosi aana illachishe yannate gedensaanni woꞌma yanna suwisaancho ikkino.

8-10. Kiristaana ikkino anninna ama oosonsa Yihowara soqqantanno gede asse lossate mayi kaaꞌlannonsa? Lawishsha kuli.

⁸ Kiristaana ikkino anninna ama oosonsa ‘Mootichu amaalenni seejjanni’ lossate qoosso noonsa. (Efe. 6:4) Hakko iso tenne heeꞌnoommote busha alame giddo ooso konni garinni lossa shota diꞌꞌikkitino. (2 Xim. 3:1-5) Ooso bushanna dancha badate dandoo adhite ilantannoha diꞌꞌikkino. Insara kalaqamunni tiiu noonsaha ikkirono, konni tiiꞌꞌira rosunna qajeelshu hasiisannosi. (Rom. 2:14, 15) Mitte Qullaawa Maxaafa xawissanno borro “seejjo” yaannohu Giriikete Afii qaali “ooso lossa” yitanno tirono afiꞌrinota xawissino.

⁹ Annuwanna amuuwa, oosoꞌne baxillunni seejjitinanninsaha ikkiro baxxinanninsata huwattanno. Insa mittu manchi hasiꞌri gede ikka dandaannokkitanna doodhitanno doorshinna assitannori kaaꞌlansara woy gawajjansara dandaannota rossanno. Konni daafira, Kiristaana ikkino annuwinna amuuwi Yihowawiinni biddishsha afiꞌrate sharrama hasiissannonsa. Mannu ooso lossiꞌrate daafira coyiꞌrannori budu budu garinninna yanna yannate kiiro babbaxxara dandaanno. Yihowa biddishsha harunsanno annuwinna amuuwi, oosonsa insara lawinonsa garinni woy wolu manni coyiꞌranno garinni lossa dihasiissannonsa.

¹⁰ Hanni Nohi lawishsha hedi. Nohi Yihowa markaawe seekki yiisi wote, isira lawinosi garinni diseekkino. Isi hakkuyira albaanni markaawe seekke diegennino. Konni daafira, Nohi Yihowa addaxxe “Maganu hajajinosire baala” assa hasiissinosi. (Kal. 6:22) Tini mayi guma abbituyya? Nohi Yihowa yiinore assasi, maatesi ledo markaawete giddora eꞌꞌe gatanno gede kaaꞌlitinosi. Nohi mittu maatete umo ikkino manchi assa hasiissannosire assino; tennera kaaꞌlitinositi Magano addaxxate. Magano addaxxasi oososi dancha gede rosiisannonna insara dancha lawishsha ikkanno gede kaaꞌlitinosi; Baote Wayira albaanni noote busha alame giddo ooso konni garinni lossiꞌra shota diꞌꞌikkitino.—Kal. 6:5.

11. Annuwunna amuuwu oosonsa qajeelsa hasiissannonsahu mayiraati?

¹¹ Annuwanna amuuwa, Nohi gede ‘Maganu hajajinoꞌnere baala assa’ dandiitinannihu hiittoonniiti? Yihowa kulannoꞌnere macciishshe. Qaalisinna dirijjitesi widoonni ooso lossiꞌnanni gara kulannoꞌne wote macciishshe. Hatto assitinoro, yannate gedensaanni oosoꞌne galattaꞌnera dandiitanno! Mittu rodii togo yee borreessino: “Anniꞌyanna amaꞌya dancha gede asse lossinoe daafira galateemmonsa. Halaalu wodaniꞌyara qaꞌmiranno gede lowo geeshsha sharrantino. Xa ayyaanaamittetenni gikki yeemmo gede kaaꞌlitinoeri insaati.” Ikkollana annuwunna amuuwu oosonsa danchu garinni lossiꞌrate sharramanni heeꞌreenna mite ooso Yihowa mininni fultara dandiitanno. Ikkollana oosonsa wodanira halaalu qaꞌmiranno gede assate sharramino anninna ama tenne yannara insaneeto bushiisha dihasiissannonsa. Qoleno barrunni mitto barra qaaqqinke Yihowa “minira” higanno yee hexxa dandaanno.

12, 13. (a) Kiristaana ikkino anninna ama beettinsa songotenni bohamanno wote Yihowara hajajantannota leellisha dandiitannohu hiittoonniiti? (b) Mitte maate Yihowara hajajamansa kaaꞌlitinonsahu hiittoonniiti?

 ¹² Mitu anninna ama qaaqqinsa songotenni bohamanno yannara Yihowara hajajama qarra ikkitannonsa. Hanni mitte rodoo lawishsha laꞌno. Beettose songotenni bohantu gedensaanni mininni fulte hadhino. Amase togo yite maaxxukki coyidhino: “Qaaqqoꞌyanna qaaqqoꞌya qaaqqo ledo xaadate yee borronke giddo, bohaminohu ledo xaada dandiinanni doogo nookka yee hasiꞌroomma.” Ise ledde togo yitino: “Ikkollana minaanniꞌya, beettonke xaate ninke anga nookkitanna ninke mereero ea hasiissannonkekkita huwateemma gede kaaꞌlinoe.”

¹³ Shiimu diri gedensaanni beettonsa songo higgino. Amase togo yitino: “Xa ise barru baala silke bilbiltannoe, woy sokka borreessitannoe. Ise ninke Maganoho hajajammeemmota buuxxino daafira lowo geeshsha ayirrissannonke. Xa mereeronke dancha aante no.” Beettiꞌne songotenni bohaminoha ikkiro, ‘umiꞌne egennonni irkira’ agurtine ‘Yihowa addaxxitinanni?’ (Law. 3:5, 6) Yihowa seejjo taalle nookki hayyosinna baxillesi leellishshannota qaagge. Yihowa qaaqqiꞌnerano ikko mannu ooso baalate Beettosi sayise uyinota deꞌinoonte. Yihowa mittu manchino baꞌꞌara dihasiꞌranno. (2 Pheexiroosi 3:9 nabbawi.) Yihowa seejjonna biddishshi gara ikkinota ammanne. Yihowara hajajama shota ikkitannoꞌnekki yannarano Isi yaannoꞌnere asse. Ee, Maganu seejjo ledo sumuu yaannore asse ikkinninna gara gibbinoonte.

14. Yihowa ‘ammanamino borojjichisi’ widoonni rosiisannonke rosinni horo afiꞌra dandiineemmohu hiittoonniiti?

¹⁴ Yihowa Kiristaanu songo towaateemmo, agareemmonna rosiiseemmo yee qaale eino. Isi hatto assannohu addi addi doogganniiti. Lawishshaho, Beettosi songote umo asse shoomino, Beettisi qole yannatenni hasiissanno sagale shiqishanno gede ‘ammanamino borojjicho’ doorino. (Luq. 12:42) Addi addi doogganni shiqqannonketi tini ayyaanaamittete sagale, kaajja biddishsha woy seejjo afiꞌrate kaaꞌlitannonke. Konnira ateneeto togo yite xaꞌmi: ‘Lallawo shiqinshanna macciishshoommo hedo woy borronke giddo fulino rosi akataꞌya woy assooteꞌya biddi assiꞌreemmo gede kakkayisannoe?’ Hatto ikkiro hagiidha hasiissannoꞌne! Yihowa seekke biddi assaꞌnera woy seejjaꞌnera maahoyye yitinanni heedhinoonni.—Law. 2:1-5.

15, 16. (a) Songote giddo noori ‘elto’ ikkitino cimeeyyewiinni horo afiꞌra dandiineemmohu hiittoonniiti? (b) Cimeeyye loosonsa hagiirrunni loossanno gede kaaꞌla dandiineemmohu hiittoonniiti?

¹⁵ Yesuusi Maganu hoshsha towaattanno cimeeyye shoome songote ‘elto’ asse uyino. (Efe. 4:8, 11-13) Tenne eltonni horo afiꞌra dandiineemmohu hiittoonniiti? Tenne assa dandiineemmo doogga giddo mitte, cimeeyyete noonsa ammananna insaha dancha lawishsha harunsate. Wole doogo qole insa Qullaawu Maxaafinni amaaltannonke amaale macciishshate. (Ibiraawoota 13:7, 17 nabbawi.) Songote cimeeyye baxxannonketanna ayyaanaamittetenni gikki yinammora hasidhannota deꞌooti. Lawishshaho, gambooshshe honseemmota woy bashsho gede soqqanshote diinaggaawa agurroommota huwatturo rakke kaaꞌlitannonketi egennantinote. Insa coyiꞌneemmo woyite macciishshitannonke; hakkiinni Qullaawu Maxaafinni mite hedo kulte jawaachishshannonke. Tini qixxaawo Yihowa baxannonketa leellishshannota diꞌꞌikkitino?

¹⁶ Cimeeyye ninke shiqqe amaala shota ikkitannonsakkita deꞌooti. Lawishshaho, Moote Daawiti loosinoha shota ikkinokki cubbo maaxate woꞌnaali gedensaanni masaalaanchu Naataani iso mare hasaawisa mageeshshi geeshsha qarrissinosiro heda dandaatto! (2 Sam. 12:1-14) Soqqamaasinete giddo mitto ikkinohu Pheexiroosi Ayihude ikkino roduuwa roorsannota leellishannore assi yannara soqqamaasinchu Phaawuloosi iso seejjate worbimma hasiissinositi egennantinote. (Gal.  2:11-14) Ikkina songokkira noo cimeeyye atewa shiqa qarra ikkitannonsakki gede assa dandaattohu hiittoonniiti? Umo heeshshi assattoha, waajjinikki shinqannihanna galatattoha ikki. Insa kaaꞌlitannohe kaaꞌlo, Maganu baxannoheta leellishanno doogo gede assite lai. Tini ate calla kaaꞌlitannoheha ikkikki, insano loosonsa hagiirrunni loossanno gede assitannonsa.

17. Songote cimeeyye mitte rodoo baxillunni kaaꞌlitinosehu hiittoonniiti?

¹⁷ Mitte rodoora alba iillinoserinni kainohunni Yihowa baxannoseha lawa giwinose. Ise togo yitino: “Alba iillinoerinninna wolu korkaatinni kainohunni ragu baalu tunsannoe wote cimeeyyete hasaapha hasiissannoeta afoomma. Cimeeyye hanqiteno ikko mishshe coyidhe diegentinoe; hatteentenni jawaateemmanna kaajjeemma gede kaaꞌlitinoe. Loosu batiꞌrannonsa yannara nafa ajayi ajeenna mittu cimeessi gambooshshu gedensaanni shiqe hasaawisannoe. Alba sayisoomma heeshsho hedeemma wote Yihowa baxilli hasiisannoeta diꞌꞌikkoomma yee hedoomma. Ikkollana, yannate kiiro Yihowa songotenna cimeeyyete widoonni baxannoeta buuxisinoe. Xaate iso agudheemmakki gede huucciꞌreemma.”

18, 19. Seejjinanninke wote macciishshantannonke xissonni roore busha maati? Lawishsha kuli.

¹⁸ Seejjo xiissiissannoha ikkirono, seejjinanninke seejjo adha giwa kayinni roore gawajjitanno. (Ibi. 12:11) Hanni Qaaeelinna Moote Sedeqiyaasi lawishsha hedi. Qaaeeli rodoosi Abeeli giwe shaate hedi yannara Maganu togo yee seejjinosi: “Mayira giiramitto? Albikkino mayira kolishshiꞌri? Dancha assoottoha ikkoommero albikki xawanno; dancha assa hoogittoro kayinni cubbu waalchikkira agarannohe; hasattosino ate amadateeti; ati kayinni qeelattora hasiisannohe.” (Kal. 4:6, 7) Qaaeeli Magano dimacciishshino. Iso cubbu qeelinosi. Hakkiinni Qaaeeli qarrunna shettote giddo uwino. (Kal. 4:11, 12) Qaaeeli Yihowa seejjo macciishshinoha ikkoommero, kuni qarri diꞌꞌillannosi.

¹⁹ Bushunna hoogimu moote Sedeqiyaasi gashshe noo yannara Yerusaalamete heeꞌranno manni quuxxote giddo no. Masaalaanchu Ermiyaasi, Sedeqiyaasi busha doogosinni higanno gede duucha hige seejjinosiha ikkirono macciishsha giwino. Hakkunni gedensaanni Sedeqiyaasino Qaaeeli gede qarraho uwino. (Erm. 52:8-11) Yihowa ninke togoo qarrinni gatisa hasiꞌranno!—Isayaasi 48:17, 18 nabbawi.

20. Maganu seejjo adhitannokkirira mayi iillannonsa? Yihowa seejjo macciishshitannori mayi atoote afidhanno?

²⁰ Tenne heeꞌnoommo alamera mannu umonsa diseejjiꞌranno; qoleno seejjo mishanno. Ikkollana togoota busha hedo afiꞌrino manni muli yanna giddi baꞌꞌanno. (Law. 1:24-31) Konni daafira ‘seejjo adhine egennaamma ikkino.’ Lawishsha 4:13 togo yitanno: “Seejjo seekkite cuꞌmiri, facci assite agurtooti; heeshshokkiitina seekkite agadhi.”