“GAMBA assinanni gidi lowoho; gamba assanno manni kayinni shiimaho. Gide gamba assannoha lowo manna soyanno gede, gidu anna huuccidhe!” (Luq. 10:2) Yesuusi mitu 2,000 diri albaanni coyiꞌrinoti tini yaatto, yannankera Miyanimaari gobbara ikkinore dancha gede assite xawissanno. Hatto yineemmohu mayiraati? Miyanimaari gobbara 55 miliyoone ikkanno manni no; konni manni giddo dancha duduwo dudubbanni noo halashshaano 4,200 calla ikkitanno.

Ikkollana ‘gidu Anni’ Yihowa, babbaxxitino gobbara heeꞌrannohu batinyu roduuwi Wodiidi-soojjaati Iisiyira noota tenne gobba daye ayyaanaamittenniha midote looso loosanno gede kakkayisanni no. Kuri roduuwi qaensa agure hakka haꞌranno gede assinonsari maati? Kuri roduuwi Miyanimaari haꞌranno gede kaaꞌlinoonninsahu hiittoonniiti? Insa mayi atoote afiꞌrino? Konni birxichira kuri xaꞌmuwara dawaro afiꞌneemmo.

Kaazuhiro yinannihu Jaappaanete heeꞌranno suwisaanchi shiimu diri albaanni hawwunaatu amadeennasi dammeenna hospitaale haaꞌne haꞌnoonnisi. Dokiterichu lamu diri geeshsha makeena kadannokki gede kulinosi. Hatte yannara Kaazuhiro lowo geeshsha masino. Isi ‘Baxeemmota suwisaanchimmate soqqansho hiitto ikke soqqamammoraati?’ yee yaadino. Isi suwisaancho ikke soqqama agurannokki gede faro fanasiꞌra Yihowa eegame huucciꞌrino.

Kaazuhiro togo yiino: “Mittu agani gedensaanni Miyanimaari gobbara soqqamanno jaaliꞌya iillinoe qarri daafira macciishshi. Hakkiinni silke bilbile togo yiie: ‘Miyanimaari gobbara rooru manni horoonsiꞌranno hodhishshi otobisete. Kawira dayittoro makeeniweelo soqqama dandaatto.’ Fayyimmaꞌya Miyanimaari haꞌreemmo gede assitannoeronna teꞌee dokitericha xaꞌmummo. Dokiterichu togo yee hedoommokki dawaro qolie: ‘Mittu surrete akimichi Miyanimaari gobbanni daye Jaappaane daaꞌꞌatanni no. Isi ledo egensiiseemmohe. Wole woyite togoori iillihero isi kaaꞌlannohe.’ Dokiterichu kulinoere Yihowa huuccattoꞌyara qolino dawaro gede asse laoommo.”

Kaazuhiro bayichonko Miyanimaari noote sinu biirora sokka borreessino; isi minaamasi ledo hatte gobbara suwisaano ikke soqqama hasiꞌrannota xawisino. Ontu barri gedensaanni sinu biiro “Suwisaano hasiissannonkena amme!” yite qoltinonsa. Kaazuhironna minaamasi Maari makeenansa hiꞌri, hattono Miyanimaari gobbara heeꞌrate fajjo afiꞌri gedensaanni horophillu tikkeette mudhe Miyanimaari haꞌri. Xaa yannara insa Mandaaleyi noote danqootu afii gaamora hagiirrunni soqqamanni no. Kaazuhiro togo yiino: “Kuni woꞌnaalshi Maganu Faarso 37:5 te aana, ‘Doogokki Kaaliiqira eeggo uyiꞌri; iso addaxxi; isino towatannohe’  yee coyiꞌrinore albinni roore ammaneemmo gede assinoe.”

Miyanimaari heedhannoti Yihowa Farciꞌraasine 2014nni baxxino gambooshshe qixxeessitino. Konni gambooshshiwa wole gobbanni dayino roduuwino no. Insa giddo mitte 30 diri balla ikkannosete Ameerikunni dagginote Moniki yinanni rodooti; ise togo yitino: “Gambooshshuwiinni higummati, heeshshoꞌya giddo konninni aanche asseemmari daafira Yihowa huucciꞌrumma. Hattono ayyaanaamittete mixoꞌya daafira anniꞌyanna amaꞌya ledo amaalamumma. Hakkiinni baalunku Miyanimaari haꞌreemma gede sumuu yinummo; ikkollana tenne mixoꞌya wonshiꞌrate mite yanna geeshsha agadhanna ganye huucciꞌra hasiissinoe.” Monika tenne xawissanni togo yitino:

“Yesuusi rosaanosi ‘ofolte maꞌlitanno’ gede jawaachishinonsa. Konni daafira aneneeto togo yee xaꞌmumma: ‘Hakkira haꞌre soqqamate ikkanno geeshshi woxi nooe? Lowo yanna looso loosummakki hasiisannoere wonshiꞌra dandeemma?’” Ise ledde togo yitino: “Bayichonko [Miyanimaari] gobba haꞌre soqqamate ikkanno geeshshi woxi nooekkita wodanchumma.” Ikkina hakkira hadhe soqqama dandiitinohu hiittoonniiti?—Luq. 14:28.

Monika togo yitino: “Mitto barra loosiisaanchoꞌya hasaawissaera hasidhannota kultue. Hatte yannara ise loosunni fushshite huntaeraati yee waajjoomma. Ise kayinni danchu loosiꞌyara galattinoe. Hakkiinni ise afansha uyitaera heddinota kultue; uyitinoe woxi nooe asale baala baaxxate ikkannoho!”

Monika Sadaasa 2014nni hanaffe Miyanimaari gobbara soqqantanni no. Ise sabbakkannori roore hasiissannowa hadhe soqqamasenni mayi macciishshaminose? Ise togo yitino: “Kawira daaꞌyanni tashshi yiinoe. Xa sase Qullaawu Maxaafi xiinxallo nooe. Xiinxalloꞌya giddo mitte 67 diro ikkannosete. Ise woꞌmante yannara faasiiqqe hanqaffe keere haadhannoe. Ise Maganu suꞌmi Yihowa ikkinota affuti wiꞌlitino. Ise togo yitino: ‘Konni albaanni Maganu suꞌmi Yihowa ikkinota macciishshe diegennoomma. Ani ate lowo diro rooreemma; ikkollana heeshshoꞌya giddo rosoommare baala rooranno coye rosiisoottae.’ Hatte yannara anino wiꞌlumma. Sabbakkannori roore hasiissannowa haꞌre soqqamatenni afiꞌnanni hagiirri giddo mittu togoo woꞌnaalshaati.” Muli yannara Monika Maganu Mangiste Sawaakooti Rosi Mine rosate qoosso afidhino.

Mitootu Miyanimaari hadhe soqqantanno gede assinonsari, 2013nnihu Yihowa Farciꞌraasinehu Diru Maxaafira tenne gobba daafira nabbawansaati. Lii yinanniti 30 diri balla ikkannose rodoo Wodiidi-soojjaati Iisiyira heedhanno. Isera woꞌma yanna loosi nooseha ikkirono, Diru Maxaafira noo hedo Miyanimaari hadhe soqqamate heddanno gede assitinose. Ise togo yitino: “Yangooni yinanniwa 2014nni assinoonniha baxxinoha qoqqowu gambooshshe haꞌroomma; hakkiicho Miyanimaari gobbara Chayinu Afoo coyiꞌnanni qoqqowira soqqamanno minaanninna minaama ledo xaadoomma. Ani Chayinu Afo dandeemma daafira, Miyanimaari haꞌre Chayinu Afii gaamo kaaꞌlate hedumma. Hakkiinni Monika ledo Mandaaleyi soqqama hanafumma. Yihowa kaaꞌlonni lamenti mittu rosi mine shiima yanna rosiinseemmo loosonna hakko qooxeessira galleemmo mine afiꞌnummo. Hakkiicho iibbillunna wolu injaannokkiri nooha ikkirono, soqqansho lowo geeshsha hagiirsiissannoe. Miyanimaari gobbara mannu dureeyye ikka hoogirono, manna ayirrisannoho, hattono dancha duduwo macciishsha hasiꞌranno. Yihowa loosu rahe loosamanno gede assanni noo gari dhaggete. Mandaaleyi haꞌre soqqamaꞌya Yihowa fajjo ikkitinota dihuluullameemma.”

Sabbakkannori roore hasiissannowa haꞌre soqqamannohu batinyu roduuwi huuccatto afidhino wolqa huwatino. Hanni 30 diri balla ikkannonsari Jumpenna  minaamasi Naao woꞌnaalsha laꞌno. Insa alba Jaappaanete gobbara danqootu afii songora soqqamanno. Ikkina insa Miyanimaari haꞌrinohu mayiraati? Jumpe togo yiino: “Aninna minaamaꞌya wole gobba haꞌne sabbakkannori roore hasiissannowa soqqamate mixo noonke. Jaappaanete noote danqootu afii songonkenni mittu rodii Miyanimaari haꞌre soqqama hanafino. Suuqiꞌnoommo woxi shiima ikkirono, ninkeno Onkoleessa 2010nni Miyanimaari haꞌnummo. Miyanimaari heedhanno roduuwi anga fante haadhinonke!” Isira Miyanimaari gobbara noohu danqootu Afii qoqqowi daafira mayi macciishshaminosi? Isi togo yiino: “Hakko batinyu hasatto noonsa manni no. Danqootu insa afiinni viidiyo leellinsheemmonsa woyite dhagge assidhanno. Kawira dange Yihowara soqqamate murciꞌrankenni tashshi yiinonke.”

Jumpenna Naao woxu qarra qeeltinohu hiittoonniitiyya? Jumpe togo yiino: “Sasu diri gedensaanni woxinke goofara rahino daafira, aane noo dirira minu kira baanteemmori dinonke. Aninna minaamaꞌya tenne daafira duucha hinge huuccatto assiꞌnoommo. Hakkiinni hedeweelcho sinu biiro yannate geeshsha baxxitino suwisaano ikkineemmo gede kultanno sokka sokkunke! Yihowa addaxxinoommo daafira, isi horo dituginonke. Qoleno duuchante doogonni towaatinonke.” Muli yannara Jumpenna Naao Maganu Mangiste Sawaakooti Rosi Mine rosate qoosso afiꞌrino.

Ixaaliyu gobbara ilaminoha Simoone yinanniha 40 diri balla ikkannosi rodoonna 30 diri balla ikkannoseta Niwuzilaandete ilantinota Aana yinanni minaamasi Miyanimaari haꞌre soqqamanno gede kakkayisinonsari maati? Aana “2013nnihu Diru Maxaafira Miyanimaari gobba daafira fultino hedooti” yite qoltino. Simoone togo yiino: “Miyanimaari haꞌre soqqamaꞌyanni tashshi yiinoe. Hakkiicho bikku heeshsho heeꞌneemmo daafira, roore yannaꞌyanni Yihowa looso loosa dandeemmo. Sabbakkannori roore hasiissannowa haꞌne soqqammeemmo woyite Yihowa towaatannonke gari dhaggete.” (Far. 121:5) Aana togo yitino: “Xa albinni roore hagiirraame ikkoomma. Hattono bikku heeshsho heeꞌneemmo. Xa minaanniꞌya ledo lowo yanna sayinseemmo daafira, albinni roore mimmitunniwa shinqoommo. Qoleno lubbote jaalla afiꞌnoommo. Hakkiicho mannu Yihowa Farciꞌraasine digiwanno; qoleno halaale macciishsha lowo geeshsha baxanno.”

Aana togo yitino: “Mitto barra dikkote mitte yuniversitete rossanno rosaanchora farciꞌrumma gedensaanni wirro xaadate dinye dinyinummo. Wirro xaandummota, ise jaalase haadhe daggino. Wole woyite qole boode jaallase haadhe daggino. Yannate gedensaanni xaano wole jaallase haadhe daggino. Xa insa giddo onte Qullaawa Maxaafa xiinxallisanni noomma.” Simoone togo yiino: “Hakko qoqqowira mannu faasiiqahonna afate hasatto noonsaho. Insa giddo batinyu hasaawa hasiꞌranno. Isinni hasatto noonsare baala hasaawisate yanna diꞌꞌikkitannonke.”

Ikkina mitootu Miyanimaari haꞌre soqqamate maa assitino? Jaappaanete ilantinoti Mizoho togo yitino: “Aninna minaanniꞌya Saachiyo sabbakkannori roore hasiissanno gobba haꞌne soqqama hasiꞌnoommo.  Mamira haꞌneemmoro kayinni dianfoommo. Miyanimaari gobba daafira, 2013nnihu Diru Maxaafira fultinota hagiirsiissanno woꞌnaalshuwa nabbambummo gedensaanni, ninkeno Miyanimaari haꞌne soqqama dandiineemmoronna teꞌee heda hananfummo.” Saachiyo lede togo yiino: “Miyanimaariha qara katama Yangooni mitte lamala daaꞌꞌatate, wole yaattonni qotate hendummo. Hakko qooxeessa daaꞌꞌatanke, hakkira haꞌrate kaꞌneemmo gede assitinonke.”

Rodininna Jeeni yinanniri 50 diri balla ikkannonsari Awustiraaliyunni dayino minaanninna minaama, Joordaaninna Daanika yinanni oosonsa ledo 2010nni hanafe Miyanimaarira soqqamanni no. Rodini togo yiino: “Hakkiicho mannu ayyaanaamittete coye goorino gari dhagge ikkinonke. Wole maateno Miyanimaari gedeewa hadhe soqqamate sharrantanno gede jawaachisheemmonsa.” Mayira? “Hakkira haꞌre soqqamanke maatenke ayyaanaamittetenni baasa kaaꞌlitino! Batinyu wedelli hedannohu silkete, makeenu, loosunna wolu coyi daafiraati. Oosonke kayinni soqqanshote horoonsidhannota haaro qaalla rosate sharrantanni no. Qoleno gariti Qullaawu Maxaafi egenno noonsakkire hasaawisa dandiinanni gara, hatte gobba afii songora dawaro qola dandiitanno gara rosiisidhanninna wole ayyaanaamittete coye assitanni no.”

Oliveeri yinannihu 30 diri balla ikkannosihu Ameerikunni dayino rodii wolootuno togoo soqqansho soqqantanno gede jawaachishannohu mayiraatiro xawisanni togo yiino: “Rosoommo qooxeessa agure wolewa haꞌre Yihowara soqqamaꞌyanni lowo horo afiꞌroommo. Qaeꞌya agure wolewa haꞌre soqqamaꞌya, aye coyi tuncu yiierono Yihowa addaxxeemmo gede assitinoe. Konni albaanni egennoommokkiri ayyaanaamittete roduuwiꞌya ledo soqqamaꞌya, tenne alamera Maganu Mangiste geeshsha hasiisannohu wolu coyi nookkita huwateemmo gede kaaꞌlitinoe.” Xaa yannara Oliveerinna minaamasi Aana Chayinu Afii songora diinaggaawe soqqamanni no.

Tiraazeli yinanniti Awustiraaliyunni dagginoti 50 diri balla ikkannose rodoo 2004nni kayise Miyanimaari gobbara soqqantanni no. Ise togo yitino: “Sabbakkannori roore hasiissannowa hadhe soqqama dandiitannori, togo assitanno gede jawaachisheemmansa. Yihowa isira soqqamate hasatto heedhunkero maassiꞌrannonketa ane heeshshonni laoomma. Togoo heeshsho heeꞌreemma yee hede diegennoomma. Ani hedoommahunni roore, hagiirsiissannonna tashshi assitanno heeshshooti.”

Kuri Miyanimaari gobbara soqqamanno roduuwi giddonsanni coyiꞌrinori, atino sabbanke egenninoonnikki qoqqowo hadhe soqqamatto gede kakkayisahera halchineemmo. Ee, sabbakkannori roore hasiissannowa hadhe soqqantanno roduuwi “Miyanimaari daggine kaaꞌlenke ballo!” yitanni no.