Muli yannara fultinota Agarooshshu Shae metseetta seekkite nabbawootto? Hanni aante noo xaꞌmuwara dawaro qolate woꞌnaali:

Wole gobbara heedhannori qaaqquullensa ayyaanaamittetenni kaaꞌlate hiikkonne afoo horoonsidhannoro heda hasiissannonsahu mayiraati?

Oosoꞌne heedhinanni gobba afoo rosu minenna hossannowa rossara dandiitanno. Mittu qaaqqi haammata afoo rosasi kaaꞌlitasira dandiitanno. Annuwunna amuuwu oosonsa halaale seekkite huwatatenna ayyaanaamittetenni lophate, heedhanno gobbara coyiꞌnanni afiinni massanganni songonso, afoo dadhitino qaalinni massanganni songo hadhuro woyyannoro heda hasiissannonsa. Annuwunna amuuwu uminsa hasattonni roore oosonsa ayyaanaamittete kaaꞌlitanno gara heda hasiissannonsa.—w17.05, qool. 9-11.

Yesuusi Pheexiroosi, “Kurinni roorsite baxattoe?” yee xaꞌminohu maa xawisateeti? (Yoh. 21:15)

Yesuusi mulesi noo qulxuꞌme woy qulxuꞌme woshshaadate loosi daafira coyiranni nooha lawanno. Yesuusi reyi gedensaanni, Pheexiroosi albi loosisiwa yaano qulxuꞌme woshshaadate higino. Kiristaanu loosoho quwa saꞌꞌannoronna teꞌee layiꞌra hasiissannonsa.—w17.05, qool. 22-23.

Yesuusi ‘Xaartinoonte’ yiinohu hiikkonne Ayihudete rosicho giweeti? (Mat. 5:34)

Yesuusi waro Ayihude coyidhinori halaale ikkinota lellishate kaꞌurira baalaho xaara roso assidhino. Insa xaartannohu coyidhanno coye ammannara yiteeti; Yesuusi kayinni togoo rosicho giwannota lame hige coyiꞌrino. Togo yino: “Coyidhinanniri addahoro, ‘Ee,’ kaphohoro, ‘Deeꞌni’ yiiyye.” (Mat. 5:33-37; 23:16-22) Yesuusi xaaro ajinshe laꞌnannita hoolino. Woꞌmanka wote halaale coyiꞌneemmoha ikkiro, mannu ammanankera yine xaara dihasiissannonke.—w17.10 qool. 32.

Eeliyaasi Huteri Ibiraawootu Afoo rosa hasidhannore kaaꞌlate maa assino?

Isi, rosaano Qullaawu Maxaafi giddo noota Ibiraawootu Afiita qara qaalla, qaru qaalira albaanna badheenni borreessinanni fidallanni baddanno gede kaaꞌlate hedino. Konni daafira, qara qaale giddose fano bayicho afidhinokki fidallanni borreessino; qaru qaalira albaanna badheenni eꞌanno fidalla kayinni giddose fano bayicho afidhino fidallanni borreessino. Xawishshu Ledo Noote Qullaawa Borrote Haaro Alame Tirorano lekkaalliidi qaagiishshira hattoo hayyo horoonsiꞌnoonni.—wp17.3, qool. 11-12.

Kiristaanu mannu gawajjannonsata gargadhate olu uduunne horoonsiꞌra lainohunni hiikkuri coyibba heda hasiissannonsa?

Aane noore heda hasiissannonsa: Maganu albaanni heeshsho qullaawate. Yesuusi harunsaanosi bise qodhitanno gede kulinohu, meessaneeto gargadhate yine bagado qodha hasiissanno yaate diꞌꞌikkino. (Luq. 22:36, 38) Ninke bisenke haantote soorriꞌra hasiissannonke. Heeshsho maalaamittete coyinni roortanno. Wolu manni tiia gawajjannore assineemmokki gede qoropha hasiissannonke. (2 Qor. 4:2)—w17.07, qool. 31-32.

Maatewoosinna Luqaasi Yesuusi ilama daafira addi addi garinni borreessitinohu mayiraati?

Maatewoosi borreessinohu Yooseefi ledo xaado afiꞌrinoreeti; lawishshaho Maariyaami godobbinota afi wote Yooseefira mayi macciishshaminosiro, sokkaasinchu haaqeetenni tenne haja daafira xawise kulinosi garanna sokkaasinchu kulinosire ammane adhinota borreessino. Luqaasi kayinni, Maariyaami ledo xaadooshshe afiꞌrino coye illachishino. Isi Maariyaami Gebirieeli yinanni sokkaasinchi hasaawisinota, ise fiixase Elsaabeexi laꞌara hadhinotanna Maariyaami Yihowa guwwissanni yitinore borreessino.—w17.08, qool. 32.

Qullaawu Maxaafi hiikkuri coyibba qeele saino?

Yanna saꞌnanni hadhuta Qullaawu Maxaafi giddo horoonsiꞌnoonni qaallanna yaatto soorrantino. Poletiku gashshooti soorramanno wote duuchu manni coyiꞌranno afii soorramanno. Qullaawa Maxaafa wolu afiira qolle tirrannita gibbinori no.—w17.09, qool. 19-21.

Maganu Qaali afiꞌrino wolqa horoonsira dandaattohu hiittoonniiti?

Heeshshokki giddo: Ganyite nabbawi, nabbawoottore hiinci, rosoottore loosunni leellishi. Soqqamatto wote: Qullaawa Maxaafa seekkite horoonsiꞌri, qummeeshshunnita qara hedo xawisi, qummeeshshuwa mannu Maganu Qaale ayirrisanno garinni egensiisi. Madirake fulte rosiisatto wote: Qummeeshshuwa seekkite horoonsiꞌri; mannu Qullaawu Maxaafi aana illachisha agure, kulatto woꞌnaalshuwa, lawishshuwanna lallawo shiqishatto gara illachishannokki gede qorophi; nabbawatto qummeeshshuwa seekkite xawisi, lawishsha horoonsiꞌri, hattono qummeeshshu rosu ledo xaadooshshe afiꞌrino gara xawisi.—w17.9, qool. 23-27.

Baalanka rooranno baxilli hiikkonneeti?

Agaappe gara ikkinohu xintu seeri aana xintamanno yannara, baalanka rooranno baxilleeti. Kuni baxilli manna seekke baxate akataati; roorenka wolootaho yine meessi horo agurre insara danchare assine leellinshanniho.—w17.10, qool. 7.