1. Qullaawu Maxaafi Yihowa daafira hiikkonne jawaachishanno halaale kulannonke?

 MANNU danakki, albakki woy geeshshakki lae isi togooho yaahera hasiꞌratto? Hasiꞌrattokkiti egennantinote! Yihowa aananke lae yoo yaannokkita afanke lowo geeshsha jawaachishshannonke! Lawishshaho, Saamueeli Isseyi ooso Yihowa laino garinni dilaino. Yihowa Saamueelira Isseyi ooso giddo mittu Israeelete moote ikkannota kulinosi. Ikkina, Yihowa doorinohu ayeti? Saamueeli Isseyiha bayira beetto Eeliyaabi lai woyite “Addinta Kaaliiqi doorino manchi kune albasiinni uurre no” yiino. Eeliyaabi moote ikkate malinoha lawanno. Yihowa “kayinni Saamueeli, ‘Ani iso dihasiꞌroommona, danasinna uurrinshasi laꞌooti ‘” yiino. Tennenni ninke maa ronseemmo? Yihowa togo yiino: “Ani mannu laꞌꞌanno garinni dilaeemmo; mannu aaniido laꞌꞌanno, ani kayinni wodana laeemmo.”—1 Sam. 16:1, 6, 7.

2. Yohaannisi 7:24 kultanno garinni mitto mancho aana laꞌne isi hattooho yaa hasiissannonkekkihu mayiraati? Lawishsha kuli.

² Ninke baalunku guuta ikkinoommokki daafira, manna aaniido laꞌne insa hattooreeti yaa rakkannonke. (Yohaannisi 7:24 nabbawi.) Kayinni mitto mancho aaniido laꞌne isi daafira anfeemmori shiimareetilla. Lawishshaho, mittu lowo egennonna woꞌnaalshi noosi akimichi nafa dhiwamino mancho aana lae hakko manchi xisso daafira lowore afa didandaanno. Isi, manchu alba hiittoo dhibbi noosironna, hiitto asse dhiwannosiro kuꞌlanno woyite seekke macciishsha hasiissannosi. Akimichu dhiwamino manchita giddooyidi mannimma laꞌꞌate raaje kai yaasira nafa dandaanno. Hatto assa hoogiro, manchoho amadinosikki dhibba kulasira dandaanno. Hatteente gede roduuwanke aaniido calla laꞌne insa daafira  garire afa didandiineemmo. Hakko daafira, giddooyidi ayimmansa afate woꞌnaala hasiissannonke. Mannu wodanita afa dandiineemmokki daafira, Yihowa gede wolootu ayimma woꞌmunni woꞌma huwata didandiineemmo. Ikkirono, Yihowa lawishsha harunsa dandiineemmo. Hiittoonni?

3. Konni birxichira kulloonniti Qullaawu Maxaafi xagge Yihowa lawishsha harunsate kaaꞌlitannonkehu hiittoonniiti?

³ Yihowa iso magansidhannore maa assanno? Macciishshannonsa. Lophitino garanna heeshshonsa gara hedanno. Hattono, mararannonsa. Yihowa Yoonaasira, Eeliyaasira, Aggaararanna Looxira assinore ronseemmo woyite, roduuwanke isi laꞌꞌanno garinni laꞌꞌa dandiineemmo gara wodanchino.

4. Yoonaasi bushiinshammora dandiineemmohu mayira ikkara dandaanno?

⁴ Yoonaasi daafira woꞌmunni woꞌma anfoommokkihura isi dihexxinanniho woy diammanaminoho yinammora dandiineemmo. Yihowa iso Nennewe haꞌre hakko heeꞌranno mannira yoote sokkasi duduwara hajajinosi. Yoonaasi kayinni hajajama giwe “Kaaliiqiwiinni miliqe” wolewa haꞌrara markaawe giddino. (Yon. 1:1-3) Kiꞌne ikkitinoommero, Yoonaasi hattee yoote sokka kulanno gede wirro soqqitinanni? Soqqa hoogginara dandiitinanni. Yihowa kayinni hatto assino.—Yon. 3:1, 2.

5. Yoonaasi 2:1, 2, 9 noo hedonni isi daafira maa ronseemmo?

⁵ Yoonaasi huucciꞌrino huuccatto ayimmasi leellishshannote. (Yoonaasi 2:1, 2, 9 nabbawi.) Isi Yihowa duucha hige huucciꞌrinoti dihuluullissannote; tenne yannara huucciꞌrino huuccatto iso Yihowa uyinosi looso giwe xooqino mancho ikkinohu gede calla assine laꞌneemmokki gede kaaꞌlitannonke. Hatteentenni isi coyiꞌrinori umosi heeshshi assannoha, galatannohanna Yihowara hajajamate murciꞌrinoha ikkinota leellishanno. Yihowa Yoonaasita soꞌrosi calla dilaino; hatteentenni isi huuccattosi macciishshino hattono masaalaancho asse soqqa diagurino.

6. Woloota seekkine macciishshanke maaho kaaꞌlitanno?

⁶ Woloota seekkine macciishshate umo heeshshi assineemmorenna cincineemmore ikka hasiissannonke. Hatto assinummoro sase horo afiꞌneemmo. Umihunni, hatto assanke manna muddamme bushiinsheemmokki gede kaaꞌlitankera dandiitanno.  Layinkihunni, rodiinkera macciishshaminosirenna mitto coye assinohu mayiraatiro huwanteemmo; tini iso roore mararreemmo gede kaaꞌlitannonke. Sayikkihunni, rodiinkera hiittoo akati noosiro afanno gede kaaꞌlinammosira dandiineemmo. Mito woyite coyiꞌra hoongummoro hiitto akati noonkero afiꞌra hoongammora dandiineemmo. (Law. 20:5) Mittu Iisiyaho heeꞌrannohu songote cimeessi togo yiino: “Mitte hige macciishshummokki coyire soꞌro loosoommo. Mitte rodoo gambooshshunniwa qolatta dawaro isilanchimma woyyeessiꞌra hasiissannohe yee amaaloommo. Gedensaanni ise gari geeshsha nabbabbe affannokkitanna dawaro qolate lowo geeshsha qarrantannota huwatoommo.” Baalanti cimeeyye amaaltara albaanni ‘macciishsha’ lowo geeshsha hasiissannote.—Law. 18:13.

7. Yihowa Eeliyaasira assinorinni maa ronseemmo?

⁷ Mitu roduuwinke lophitino garinni, budinsanninna akatinsanni kainohunni giddonsata wolootaho hasaapha qarrissannonsa. Ikkina, hattoo roduuwi ruxxi yitukkinni hasaaphitanno gede kaaꞌla dandiineemmohu hiittoonniiti? Hanni Eeliyaasi Elzaabeeli xooqe haꞌre noo yannara Yihowa assinosire qaango. Eeliyaasi giddosita woꞌmunni woꞌma iimi Annisira kuꞌlinohu hakka woyintenni diꞌꞌikkino. Yihowa seekke macciishshinosi. Qoleno, jawaachishinosi hattono kaajja looso uyinosi. (1 Mot. 19:1-18) Roduuwinkeno, ninke fiile haadhe giddonsata hasaaphitannohu lowo yanna saꞌuhu gedensaanni ikkara dandaanno; giddonsata afa dandiineemmohu hasaaphituro callaati. Yihowa gede cincineemmore ikkinummoro, roduuwinke ammaꞌnitannonkere ikkineemmo. Qoleno, hasaaphate heddinota anfummoro seekkine macciishsha hasiissannonke.

8. Kalaqama 16:7-13 kultanno garinni Yihowa Aggaara kaaꞌlinohu hiittoonniiti?

⁸ Saarayi soqqamaancho Aggaara Abiraami minaama ikkituhu gedensaanni gara ikkinokkire assitino. Aggaara godobbuti ila noosekkita Saarayi misha hanaffino. Saarayi coyi bushanni haꞌrita Aggaara mininni fushshite haꞌrissino. (Kal. 16:4-6) Guuntete xeꞌne noonkere ikkankenni, Aggaara naaxxaleette ikkitino daafira waagase adhitino yinammora dandiineemmo. Yihowa kayinni Aggaara hakko garinni dilaino. Isi Aggaarawa sokkaanchosi soyino. Sokkaanchu Aggaara laose biddi assidhanno gede kaaꞌlinose; hattono maassiꞌrinose. Ise Yihowa laꞌꞌanni noosetanna iillinosere baalanka afinota huwattino. Hakkiinni Aggaara “laꞌꞌannoe Magano illeꞌyanni” afumma yitino.—Kalaqama 16:7-13 nabbawi.

9. Yihowa Aggaara daafira maa hedino?

⁹ Yihowa Aggaara daafira maa hedino? Yihowa, ise lophitino garanna qarrase woꞌmunni woꞌma afino. (Law. 15:3) Aggaara Ibiraawichu mine heedhanno Gibitsaawitteeti. Ise mito woyite ani manni gobbara noomma yite heddanno ikka? Woy ayiddesenna gobbase qalli yitino ikka? Qoleno, ise Abiraamira layinki minaamaati. Hakka waro mite ammanantinoti Maganu soqqamaano mitte galte saꞌe adhitanno. Ikkollana, Yihowa umo hedinoti tenne diꞌꞌikkitino. (Mat. 19:4-6) Hakko daafira, togoo maate giddo hinaasonna gibbo heeꞌrase digattanno. Yihowa Aggaara Saarayi mishase garaho diyiino; ikkirono isi albi heeshshosenna noo gara hedinoti dihuluullissannote.

10. Roduuwanke seekke afate maa assa dandiineemmo?

¹⁰ Roduuwanke seekkine afate woꞌnaalle Yihowa lawishsha harunsa dandiineemmo. Roduuwaꞌne seekkitine affe. Gambooshshu hanafara albaanninna goofihu gedensaanni  mimmitu ledo hasaabbe; ledo soqqamme; hattono dandiitinanniha ikkiro sagale wortine woshshensa. Hatto assitiniro, mitte mannunniwa gambo gibbannota labbinoꞌne rodoo waajjitannota ikkitinota, maalaamittete coye baxannoho yitine heddinanni rodii lowo geeshsha shaqqado ikkinota, hattono mitte gambooshshe barrisidhe dagganno maate gimbanninsata dandiite heedhannota huwattinara dandiitinanni. (Iyo. 6:29) “Manni coyi giddora” ea hasiissannonkekkiti egennantinote. (1 Xim. 5:13) Ikkirono, roduuwinke daafira afanna insa hattoore ikkitanno gede assinonsare huwatate woꞌnaala hasiissannonke.

11. Cimeeyye songote giddo noo geꞌreewo seekkite afa hasiissannonsahu mayiraati?

¹¹ Roorenkanni cimeeyye songonsara noo roduuwita albi heeshsho afa hasiissannonsa. Hanni, woradu aliidi laꞌꞌaancho ikke soqqaminohu Arteri yinanni rodii lawishsha laꞌno. Isi mittu cimeessi ledo mannunniwa gambo gibbannota labbanno rodoo towaatino. Arteri togo yiino: “Ise mine assidhuhunni shiima yanna gedensaanni minaannase shiidhinota huwantoommo. Addi addi qarri iillinoseha ikkirono, ise lame seennese ayyaanaamittetenni worbuulle assite lossidhino. Xa isera ille dunkitinose; hattono quwa saꞌino yaaddo waadannose. Ikkirono, Yihowara noose baxillinna ammana jawaatate. Isehu danchu lawishshinni lowore ronsoommo.” (Fil. 2:3) Kuni woradu aliidi laꞌꞌaanchi Yihowa lawishsha harunsino. Yihowa geꞌreewosinna xissonsa seekke afino. (Ful. 3:7) Cimeeyye songote giddo noo geꞌreewo seekkite affuro, danchu garinni kaaꞌla dandiitanno.

12. Yippi Yuu yinanni rodoo mitte songosera noo rodoota albi heeshshose afase kaaꞌlitinosehu hiittoonniiti?

¹² Mittu rodii ikkito giwissannoꞌneha ikkiro, albisi heeshsho huwattiniro, iso roore marartinara dandiitinanni. Hanni aane noo lawishsha laꞌno. Yippi Yuu yinanni rodoo togo yitino: “Mitte songonke rodoo hasaabbanno woyite cancitanno. Konni daafira, danchu amanyooti dinoosete yee hedoomma. Ikkollana, ledo soqqammanna ise alba maatesera dikkote qulxuꞌme hira kaaꞌlitannota huwatoomma. Ise dikkaanchu daara yite cancite coyidhanno. Roduuwaꞌya seekke huwatate albi heeshshonsa afa hasiissannoeta wodanchoomma.” Roduuwanke seekke afa shota diꞌꞌikkitino. Ikkirono, Qullaawu Maxaafi wodaniꞌne halaꞌlo yee amaalannonke  amaale harunsineemmoha ikkiro, baalunku gari manna baxannohu Yihowa lawishsha harunsineemmo.—1 Xim. 2:3, 4; 2 Qor. 6:11-13.

13. Kalaqama 19:15, 16 kultanno garinni Looxi fula keeshshita sokkaasine maa assitino? Mayira?

¹³ Looxi quuxxote giddo heeꞌre Yihowara rahe dihajajamino. Lame sokkaasine minisira marte Looxi maatesi adhe Soddoomu kataminni fulanno gede kultinosi. Mayira? Sokkaasine “Konne katama hunnammoraati” yitino. (Kal. 19:12, 13) Looxinna maatesi layinki soodono katamu giddonni difultino. Hakko daafira sokkaasine Looxi wirro qorowisiissinosi. Isi ‘kayinni keeshshino.’ Looxi Maganu yiinosire lashshi assino woy dihajajamino yine hendeemmoha ikkara dandaanno. Yihowa kayinni iso facci asse diagurino. Yihowa “mararinosi daafira” sokkaasine Looxi, galtesinna lamenta seennesi anga amadde katamu gobbaanni fushshitanno gede assino.—Kalaqama 19:15, 16 nabbawi.

14. Yihowa Looxi mararinosihu mayira ikkara dandaanno?

¹⁴ Yihowa Looxi mararanno gede assinosihu duuchu korkaati heeꞌrara dandaanno. Looxi katamu giddonni fulate hobbi ruxxi yiinohu katamu gobbaanni noo manna waajjino daafira ikkara dandaanno. Isi hobbi ruxxi yaanno gede assinosiri wolurino no. Looxi Soddoomu katami qooxeessira noohu mittu Lagichira noo bale giddo ubbinote lame mootoolla daafira macciishshikkinni digatino. (Kal. 14:8-12) Qoleno, isi anna ikkino daafira maatesira yaadinoha ikkara dandaanno. Hattono, Looxi dureessa ikkino daafira Soddoomu katami giddo dancha mine miꞌnikkinni digatino. (Kal. 13:5, 6) Ikkollana, kuri coyibba Looxi Yihowara hajajama giwate gari korkaata diꞌꞌikkitino. Yihowa kayinni Looxi soꞌro diꞌꞌillachishino; hatteentenni iso “keeraanchu manchi” gede asse lainosi.—2 Phe. 2:7, 8.

15. Mittu manchi assinorira bushiishantenni ma assa hasiissannonke?

¹⁵ Mannu assinorira bushiishantenni hedonsa huwatate woꞌnaalle. Veroonika yinanniti  Awuroppaho heedhanno rodoo hatto assate woꞌnaaltino. Ise togo yitino: “Mitte rodoora duucha woyite albise dihisatanno; ise mannunniwa gamba diyitanno. Mito woyite ise hasaawisa waajjeemma. Kayinni ‘Ani ise ikkoommaro jaala heedhaera hasiꞌreemma’ yee hedoomma. Hakko daafira makkitinoro xaꞌmate hedoomma. Hakkiinni giddoseta kultue. Xa ise daafira lowore afoomma.”

16. Albinni roore mararreemmore ikkineemmo gede kaaꞌlankera Yihowa huucciꞌra hasiissannonkehu mayiraati?

¹⁶ Giddonketa woꞌmunni woꞌma afannohu Yihowa callaati. (Law. 15:11) Hakko daafira, woloota isi laꞌꞌanno garinni laꞌꞌatenna marartinanninsa gara afate iso huuccidhe. Huuccatto Anzhiila yinanni rodoo roore woloota marartannota ikkitanno gede kaaꞌlitinose. Anzhiila togo yite noore maaxxukkinni coyidhino: “Mitte rodoo bushiisha rakkannoe; hattono isewa diaaneemma. Konnira, ise marareemma gede kaaꞌlaera Yihowa huucciꞌroomma.” Ikkina, Yihowa Anzhiila huuccatto macciishshinoyya? Ise ledde togo yitino: “Hattee rodoo ledo soqqansho fulloommo; hattono gedensoonni lowo saate hasaamboommo. Ise hasaabbanna mararrotenni macciishshoomma. Xa ise albinni roore baxeemmase; hattono kaaꞌlamasera hasiꞌreemma.”

17. Maa assate murciꞌra hasiissannonke?

¹⁷ Mallaandummokkinni baalanka roduuwanke marara hasiissannonke. Insa baalunkura Yoonaasi, Eeliyaasi, Aggaaranna Looxi gede qarru iillannonsa. Mito woyite insa qarru giddo ubbannohu uminsa loossino soꞌronni ikkara dandaanno. Ninke baalunku mito woyite loonsoommo soꞌronni qarru giddo umbammora dandiineemmo. Konnira, Yihowa mimmitonke mararreemmore ikkineemmo gede hasiꞌrasi garankolla. (1 Phe. 3:8) Hatto assinummoro, alamete doyichora noo maatenke mittimma kaajjado ikkitanno gede assineemmo. Hakko daafira, roduuwanke macciishshate, egennatenna mararate murciꞌno.