DIYAANARA 80 diro saꞌꞌannose. Minaannise Alzayimersi yinanni dhibbinni amadame reyara albaanni geerra towaantanni mine keeshshino. Qoleno ise lame oosose shiidhino; hattono unuunu kaansere amaddinose. Ikkollana songose miilla ise Gambooshshu Addaraashera woy soqqansho fulte heedheenna laꞌanno woyite Diyaana woꞌmante yannara hagiirraamete.

Jooni 43 saꞌꞌanno diro songo towaatanni soqqamino. Isi tenne soqqansho lubbora baxanno! Ikkollana isi xiwamino fiixasi towaata hasiissinosi daafira tenne soqqansho giddo keeshsha didandiino; hattono isi xa heeꞌranno qooxeessira noo songora soqqamanno. Konni albaanni Jooni affinori woradu woy qoqqowu gambooshshiwa xaaddanno woyite isi xaano faasiiqaho.

Diyaananna Jooni hagiirraamma ikka dandiinohu hiittoonniiti? Mittu manchi fayyimmate qarri heeꞌreennasi, hattono baxannota soqqanshote qoosso hooge heeꞌrenni hagiirraamo ikka dandaannohu hiittoonniiti? Qullaawu Maxaafi togo yee qolannonke: “Keeraanchoho Maganunni tashshi yaannosi.” (Far. 64:10) Geedote hagiirre afiꞌneemmo gede assannorinna assannokkiri maatiro huwatanke, konne halaale roore wodanchate kaaꞌlitannonke.

Hagiidhinanni gede assitanno coyibba nooti egennantinote. Banxanni manchi ledo adhama, ooso ila, woy ayyaanaamittete qoosso afiꞌra hagiirsiissanno. Kuri coyibba Yihowa elto ikkitino daafira lowo geeshsha hagiirsiissannote. Adhanna adhama xintinohu, ooso ilate dandoo uyinonkehuno ikko Kiristaanu songo giddo mite qoosso heedhanno gede assinohu Yihowaati.— Kal. 2:18, 22; Far. 127:3; 1 Xim. 3:1.

Ikkollana mitu hagiirre abbanno coyi, yannate geeshshiha calla ikkara dandaanno. Minaanninna minaama giddo mittu ammanama hoogara woy reyara dandaanno. (Hiz. 24:18; Hos. 3:1) Mite ooso anninsanna amansara hattono Maganoho hajajama gibbara, wole agurina bohantannoha nafa ikkara dandaanno. Lawishshaho Saamueeli ooso Yihowara garunni disoqqantino; Daawitino assino coyi minisira qarru daanno gede assino. (1 Sam. 8:1-3; 2 Sam. 12:11) Togoo coyi yaaddonna dadille abbara, hattono hagiirre hunara dandaanno.

 Mittu Maganu soqqamaanchi fayyimmate qarrinni, maate towaatate qeechinni, woy Yihowa dirijjite giddo assinoonni taashshonni kainohunni mitte soqqanshote qoosso aana keeshsha hoogara dandaanno. Togoo coyi tuncu yiinonsari batinyu roduuwi alba konne looso loosatenni afidhanno hagiirre hoogginota coyidhino.

Kuri coyibbanni afiꞌnanni hagiirri yannate geeshshiha ikkinota laꞌꞌa dandiineemmo. Ikkina coyi ninke hendoommo gede ikka hoogirono, geedanno hagiirre afiꞌra dandiineemmo? Ee dandiineemmo. Korkaatuno Saamueeli, Daawitinna wole Maganu soqqamaano qarru iillinsarono hagiirrinsa baꞌꞌannokki gede assiꞌra dandiitino.

Yesuusi addu hagiirreeti yinannihu hiittoohoro afino. Isi uullara daye mancho ikkara albaanni iima heeꞌre yaano coyi injee heeꞌreennasi Yihowa albaanni ‘barru barrunkunni tashshi yaannasi heeꞌrino.’ (Law. 8:30) Isi uulla noo yannara kayinni qarru iillinosi woyiti no. Ikkollana Yesuusi Annisi fajjo asse hagiirre afiꞌrino. (Yoh. 4:34) Yesuusi uullate aana sayisinote jeefote yannarana? Qullaawu Maxaafi, “Isi albasiinni noo hagiirri daafira yee, shollinye waajjikkinni masiqalu [“qarru haqqi,” NW] aana” reyinota kulanno. (Ibi. 12:2) Konni daafira Yesuusi hagiirru daafira rosiisankera dandaanno; hanni isi tenne daafira coyiꞌrinoha lame coye laꞌno.

Mitte hige sabbakkanno gede soyinonsari 70 rosaano loosonsa jeefisse higgino. Insa agaaninte fushsitinohuranna wole dhagge ikkitanno maalale loossinohura baasa hagiidhitino. Hakkiinni Yesuusi togo yiinonsa: “Suꞌmiꞌne gordu taje giddo borreessamino daafira ikkinnina, durriisu hajajaminoꞌnehura hagiidhitinoonte!” (Luq. 10:1-9, 17, 20) Ee, baxxitino qoosso afiꞌratenni roore tashshi assitannoti Yihowa hagiirsiisate. Yihowa kuri ammanantino rosaano maassiꞌrinonsa; hagiidhinanni gede assannohu kawiinni saino coyi dino.

Wole yannara qole Yesuusi batinyu mannira rosiisanni heeꞌreenna mitte Ayihuditte mancho isira kaajja rosiisate dandoo noosihura maalaꞌlite Yesuusi ama hagiirraame ikkitinota coyidhino. Yesuusi kayinni, “[Hagiirraammu] Maganu qaale macciishshite hajajantannoreeti” yee kulinose. (Luq. 11:27, 28) Worba ooso ilino anninna ama hagiidhannoti egennantinote; baalunkunni roore hagiirsiissannoti kayinni  Yihowara hajajamatenna isi ledo muli jaalooma kalaqiꞌrate.

Ee, giddiidi hagiirre afiꞌrate kaaꞌlannohu qaru coyi Yihowa hagiirsiinsanni heeꞌnoommota afankeeti. Fonqolu hagiirsiisannoha ikka hoogirono giddiidi hagiirrenke kayinni hunara didandaanno. Isinni iillinonke qarra kaajjine qeelanke roore hagiirraamma ikkineemmo gede assitannonke. (Rom. 5:3-5) Qoleno Yihowa addaxxitannosirira ayyaanasi aannonsa; hattono hagiirru ayyaanu laalooti. (Gal. 5:22) Faarsaasinchu Faarso 64:10te aana “Keeraanchoho Maganunni tashshi yoosi” yee borreessinohu iseraati.

Aleenni qummi assiniri Diyaananna Jooni qarrunna fonqolo ikkannori iillinsarono hagiirraamma ikka dandiinohu iseraati. Diyaana togo yitino: “Mittu qaaqqi annasinna amasi golo assiꞌrannonte gede anino Yihowa golo assiꞌroomma.” Rodoo Diyaana Yihowa hagiirsiissanni noota wodanchitanno gede assinoseri maati? Ise togo yitino: “Yihowa woꞌmante yannara hagiirrunni sabbakanni heeꞌreemma gede asse maassiꞌrinoeha lawannoe.” Roduu Jooni lowo geeshsha baxannoha songuwa towaatate loososi aguri gedensaannino diinaggaawe soqqamino; isi togo yiino: “Soqqamaanote Qajeelshi Rosi Mine rosiiseemmo gede 1998nni koyinsie yannanni kayise, albinni roore hojju xiinxallo seekke assiꞌreemmo.” Isi umisinna minaamasi daafira coyiꞌranni togo yiino: “Yihowa soqqammanni sayinsoommo diri baalunku giddo sonkanninkewi ikkihano ikkiro isira soqqamate murciꞌnoommo; konnira uyinoonninke looso adha hakkeeshshi geeshsha diqarrissinonke. Togoo doorsha doodhankenni horo digaabbineemmo.”

Wole batinye Maganu soqqamaano Faarso 64:10te noo hedo halaale ikkitinota huwattino. Lawishshaho, hanni Ameeriku Beeteelera 30 saꞌꞌanno diro soqqamino minaanninna minaama woꞌnaalsha laꞌno. Yannate gedensaanni insa qanchoho soqqamanno gede assinoonni. Insa togo yee maaxikkinni coyiꞌrino: “Banxeemmo coye hoongeemmo woyite dadilla nooreentilla. Ikkollana dadillinoommo gedeenni heeꞌneemmo yaa diꞌꞌikkino.” Insa songonsara soqqanshotenni jawaatino. Insa lede togo yiino: “Mito coye bande kulle huucciꞌnoommo. Yihowa huuccattonkera dawaro qolanna laꞌꞌanke, jawaantenna hagiirre afiꞌneemmo gede assitinonke. Songo haꞌnummohunni shiima yanna gedensaanni wole songote miilla suwisaano ikkitino; ninkeno ayyaanaamittetenni lophitanni noota lame Qullaawu Maxaafi rosaano afiꞌnoommo.”

Woꞌmante yannara hagiirraamo ikka shota diꞌꞌikkitino; mite yannara dadillisanno coyi iillannonke. Ikkollana Yihowa Faarso 64:10te nooha sheshifachishanno qaale borreessiisinonke. Hexxo mudhineemmo yannara nafa, aye coyi iillinkero ammanamme ‘keeraano’ ikkinoommota leellinshummoro, Yihowanni ‘tashshi yaannonke.’ Qoleno Yihowa ‘haaro gordonna haaro baatto’ abbeemmo yee eino qaale quqquxamme agadhineemmo. Hakkunni gedensaanni mannu ooso baala guuta ikkitanno. Maganu manni woꞌmunku, isi kalaqannonna aannonsa coyinni “hegere geeshsha tashshi” yaannonsa.—Isa. 65:17, 18.

Hanni tini ninkera mayi tiro afidhinoro hedi: Hatte yannara guuta ordu fayyimma afiꞌneemmo; hattono soodo kaꞌneemmo woyite wolqanke haarooꞌmitanno. Konni albaanni baasa xissiisannori iillinonkeha ikkirono, hattenne qaanganni dishenteemmo. Maganu “Sainore baala hambanni; horonta diqaanganni” yee qaale einonke. Shiiꞌnoommo manni ledo wirro xaandeemmo. Lowo miliyoone ikkanno manni Yesuusi 12 diri qaaqqonsa reyotenni kayisi yannara qaaqqote anninna ama ikkita ikkanno; insa qaaqqonsa kaꞌu yannara hagiidhe ikkaata hoogino. (Maq. 5:42) Hatte yannara uullate heeꞌranno manni baalu “keeraancho” ikkanno; hattono hegere geeshsha ‘Maganunni tashshi yaannonsa.’