1, 2. Heeshshoꞌne giddo harunsitinanni mixo fushshidhinanni woyite, Kalaqaanchiꞌne yaannoꞌnere macciishsha hasiissannoꞌnehu mayiraati? (Hanafote noo misilla lai.)

 ATI wedellichahoro, albillittete heeshshokki daafira batinye amaale uyinoonniheha ikkara dandaanno. Rosiisaano, rosu mini amaalaano, woy wolu manni kaffi yiino roso rosatto gedenna lowo woxe baantanni looso amadatto gede jawaachishshahera dandiitanno. Yihowa kayinni kawiinni baxxinore assattora amaalannohe. Isi jawaattine rossine looso afidhine umoꞌne dandiitinara hasiꞌrannoti egennantinote. (Qol. 3:23) Ikkollana heeshshoꞌne giddo balaxisiissinanni coyibba doodhitinanni woyite, isi fushshino biddishsha harunsitinara hasiꞌranno; kuni biddishshi tenne goofimarchu yannara iso hagiirsiisanno garinni heedhinanni gede kaaꞌlannoꞌne.—Mat. 24:14.

² Yihowa baalankare afinota qaaga hasiissannonke; isi tini heeꞌnoommo alame albillitte ma ikkitannoronna baose gambissinota afino. (Isa. 46:10; Mat. 24:3, 36) Qoleno isi ninke daafira seekke afino; hattono addu hagiirrenna harshammo aannonkerinna  dadillenna yaaddo abbannonkeri maatiro afino. Konnira mannu aannonke amaale gara labbunkero nafa, Maganu Qaali aana xintantinota ikka hooggu geeshsha hatti amaale hayyonnite yaa didandiinanni.—Law. 19:21.

3, 4. Addaaminna Heewani busha amaale macciishshansa insa umonsano ikko sirchonsa gawajjitinohu hiittoonniiti?

³ Umo mannu oosora busha amaale amaalinohu Sheexaaneho. Sheexaanu eessannosikkiwa eꞌꞌe, umosi amaalaancho asse shoome Heewani amaalino; isenna minaannise uminsa doogonni heeꞌriro hagiirraamma ikkannota kulinose. (Kal. 3:1-6) Ikkollana Sheexaanu hatto assinohu insara shete ikkikkinni umisira yeeti. Sheexaanu Addaaminna Heewanino ikko albillitte ilantanno oosonsa, Yihowa agurte iso magansidhannonna isira gashshantanno gede hasiꞌrino. Sheexaanu insara maa assinonsa? Noonsare baala uyinonsahu Yihowaati; Yihowa insara galte, biifado qaenna hegerera heedhannota guuta billiite uyinonsa.

⁴ Addaaminna Heewani kayinni Maganoho hajajama gibbe isi ledo noonsa aante huꞌnitino. Anfummonte gede, tini lowo coye daaffino. Tayinsoonni awawi gede, insa gale hose geedhe reyino. Oosonsano cubbu guma mixxa hanaffino. (Rom. 5:12) Yannankerano batinyu manni Maganoho hajajama giwino. Insa uminsa doogonni heeꞌra hasidhanno. (Efe. 2:1-3) Hatto assansa abbitino gumi “Mannu egenno, . . . Kaaliiqi yiinore ittisa” dandiitannokkita leellishshanno.—Law. 21:30.

5. Maganu mannu ooso lainohunni maa addaxxanno? Hatto assasi garaho yineemmohu mayiraati?

⁵ Yihowa mannu ooso mereerinni isi daafira rosanna isira soqqama hasiꞌranno manni heeꞌrannota afino; togoo manni giddo batinyu wedelli no. (Far. 103:17, 18; 110:3) Togoo wedelli Yihowa albaanni muxxete! Ati insa giddo mittoho? Hatto ikkiro, Maganu hagiirraamo ikkatto gede assannoheha batinye “dancha coye” aanni nooheti egennantinote. (Faarso 103:5 nabbawi; Law. 10:22) Konninni aanchine ronseemmonte gede, kuri ‘dancha coyibba’ giddo mitu ayyaanaamittete sagaleeti, dancha jaallaati, hagiirsiissanno mixootinna addu wolaphooti.

6. Ayyaanaamittete hasattoꞌne wonshiꞌra hasiissannoꞌnehu mayiraati? Yihowa ayyaanaamittete hasattoꞌne wonshannohu hiittoonniiti?

⁶ Mannu ooso ayyaanaamittete hasatto noonsare ikkitino daafira, saadatenni baxxitinoreeti; tenne hasatto wonshara dandaannohu Kalaqaanchonsa callaho. (Mat. 4:4) Isi yaannoꞌnere macciishshitinanniha ikkiro, wodancha, hayyonna hagiirre afidhinanni. Yesuusi, “Ayyaanaamittete coye goodhinori hagiirraammaho” yiino. (Mat. 5:3, NW) Maganu Qaalisi, hattono “ammanaminohunna wodanaamu borojjichi” widoonni shiqishannonkete falakkinote ayyaanaamittete sagalenni hasattonke wonshanno. (Mat. 24:45, NW) Tini sagale dhaabbannotenna ceeꞌmishshannokkite!—Isa. 65:13, 14.

7. Maganu qixxeessannoꞌneta ayyaanaamittete sagale sagaꞌlaꞌne maaho kaaꞌlitannoꞌne?

⁷ Maganu aannoꞌneti ayyaanaamittete sagale albinni roore hayyootanna wodanchitinannire ikkitinanni gede kaaꞌlitannoꞌne; tini akatta qolte duucha doogonni agarooshshe ikkitannoꞌne. (Lawishsha 2:10-14 nabbawi.) Lawishshaho hayyonna wodancha ‘Kalaqaanchu dino’ yaannohanna wole kaphu roso baddine affinanni gede ille fantannoꞌne. Qoleno ‘Hagiirraamma assannohu qaru coyi woxehonna maalaamittete jirooti’ yinannite kaphu hedonni agartannoꞌne. Hattono hayyonna wodancha busha yortonna gawajjanno rosicho baddine affinanninna gargadhitinanni gede kaaꞌlitannoꞌne. Konni daafira, Maganu hayyonna wodancha afiꞌra, hattono kuri akatta muxxe jiro gede assitine laꞌꞌa agurtinoonte!  Kuri muxxe akatta heedhuꞌnero, Yihowa baxannoꞌnetanna woyyino coye halchannoꞌneta umiꞌne heeshshonni laꞌinanni.—Far. 34:8; Isa. 48:17, 18.

8. Xa Maganunniwa shiqqi yaa hasiissannoꞌnehu mayiraati? Togo assaꞌne albillittete kaaꞌlitannoꞌnehu hiittoonniiti?

⁸ Muli yannara Maganu Sheexaanu alame uullate gananno; hatte yannara agarooshshe ikkankera dandaannohu Yihowa callaati. Wole agurina afooho wodhineemmore afiꞌrate nafa, isi anga laꞌꞌa hasiissannonkeha ikkara dandaanno! (Imb. 3:2, 12-19) Wedella, iimi Anniꞌnewa shiqqi yitinannitinna isira nooꞌne ammana kaajjishidhinanni yanna xaati! (2 Phe. 2:9) Hatto assitiniro, baxiri dayirono Daawiti gede “Woꞌmanka woyite Kaaliiqa albaꞌyaanni nooha afeemmo; qiniiteꞌyaanni noo daafira dimaseemmo” yaa dandiitinanni.—Far. 16:8.

9. (a) Yohaannisi 6:44te garinni Yihowa maa assanno? (b) Yihowa Farciꞌraasine ikkinonna ikkinokki manchi ledo xaada mayi badooshshe afidhino?

⁹ Yihowa baxillunni kae suwashshu wodani noonsa manna isiwa abbe ayyaanaamittete maatesi miilla assannonsa. (Yohaannisi 6:44 nabbawi.) Yihowa Farciꞌraasincho ikkinokki manchi ledo mite yitine xaaddinanni woyite, hakko manchi daafira maa afa dandiitinanni? Suꞌmasinna danasi agurranna, garire afa hoogginara dandiitinanni. Yihowa afinonna Iso baxanno manchinni mite yitine xaaddinanni woyite kayinni hatto diꞌꞌikkino. Hakku manchi lophino gari, budisi, gaꞌresi woy gobbasi kiꞌnetenni baxxitinota ikkituro nafa, isi daafira batinye coye afa dandiitinanni; isino kiꞌne daafira duuchare afa dandaanno!

10, 11. Yihowa daga mitto assannonsari maati? Tini kaaꞌlitannonkehu hiittoonniiti?

¹⁰ Lawishshaho coyidhinanni afii babbaxxinoha ikkirono lamunku halaalunniha “xalala qaale” coyidhinanni. (Sof. 3:9, NW) Konnira, Maganu daafira nooꞌne lao, harunsitinannihu amanyootu biddishshinna albillittete daafira nooꞌne hexxo mitte ikkitinota affinanni. Qoleno tenne afaꞌne hakkonne mancho addaxxitinanni gede assitannoꞌne. Kuri, mannu ledo geedanno jaalooma kalaqiꞌrate xinta ikkitino coyibbaati.

¹¹ Yihowa soqqamaano ikkaꞌne baalantenni  roortino jaalla afidhinanni gede assitinoꞌneti dihuluullissanote. Insa giddo rooru ledo xaaddine egentinoonnikkiha ikkirono, alamete doyichora batinye jaalla nooꞌne! Yihowa soqqamaano agurranna, togoota muxxe elto afiꞌrinohu wolu nooni?

12. Hiittenne ayyaanaamittete mixo fushshiꞌra dandaatto?

¹² Rosiisaancho 11:9–12:1 nabbawi. Wonshiꞌrate heddinoonni mixo nooꞌne? Barru baala mito Qullaawu Maxaafi gafa nabbawate mixo fushshidhinoonniha ikkara dandaanno. Woy qole coyiꞌratenna rosiisate dandooꞌne woyyeessiꞌrate sharrantinanni heedhinoonniha ikkara dandaanno. Mixoꞌne ikkitutano ikkituro, dancha guma afidhinanni woyite woy wolootu sharrantinanni sharro naaddanno woyite mayi macciishshamannoꞌne? Tenne yannara tashshi yaannoꞌneti egennantinote! Tennera hagiidhaꞌne garankolla; korkaatuno Yesuusi gede umiꞌne fajjo ikkikkinni Maganu fajjo balaxisiissinanni heedhinoonni.—Far. 40:8; Law. 27:11.

13. Alamete mixo shorrantenni Maganoho soqqama woyyitannohu mayiraati?

¹³ Ayyaanaamittete mixoꞌne wonshiꞌrate sharramaꞌne harshammo afidhinanni gede assitannoꞌne; korkaatuno loossinanni loosi mullawa digatanno. Soqqamaasinchu Phaawuloosi togo yee borreessino: “Roduuwaꞌya, Mootichaho soqqantinanni daafurtinoonni daafuri mullawa gatannokkita affinoonnina, Mootichu looso woꞌmanka woyite agurtinikkinni kaajjitine loosate hixamanye!” (1 Qor. 15:58) Alamete mixo harunsanna lowo deerra iillate sharrama hagiirsiissannota labburono nafa, togoorira sharrammanni sharro galte hosse mullawa gattanno. (Luq. 9:25) Moote Selemooni heeshsho tennera lawishsha ikkitannonke.—Rom. 15:4.

14. Selemooni hagiirre afiꞌrate assinorinni maa rosa dandiitinanni?

¹⁴ Hoqino dureessinna wolqaataamu Moote Selemooni, ‘hagiirru maatiro afatenna isonooto hagiirsiisate’ qodhe kaino. (Ros. 2:1-10) Konnira isi minna miꞌnino, kaashshu basenna paarke qixxeessiꞌrino, hattono hasiꞌrinore baala assino. Hakkiinni isira mayi macciishshamisiyya? Isi hagiirrenna harshammo afiꞌrino? Selemooni umisi togo yee coyiꞌrino: “Loosoommo loosonna daafuroommo daafuro baala laoommo. Kuni baalunku haafaho; diilallo cuꞌmate gedeeti. Kalqete aana lexxinanniri mitturino dino.” (Ros. 2:11) Tennenni kaajja roso ronseemmo! Kiꞌne Selemooni xaggenni rossine hayyoota ikkitinoonnita leellishshinanni?

15. Ammana hasiissannohu mayiraati? Faarso 32:8 kultanno garinni ammananke kaajjishiꞌra maaho kaaꞌlitannonke?

¹⁵ Yihowa qarrantine kaꞌine rossinara dihasiꞌranno. Maganoho hajajamatenna heeshshoꞌne giddo isi fajjo wonshate ammana hasiissannoꞌne. Togoo ammana taalle nookkitenna horonta irraaambanni gede assitannota diꞌꞌikkitino. Ee, Yihowa “leellishshinoonnisi baxille dihawanno.” (Ibi. 6:10) Konni daafira, kaajjado ammana heedhannoꞌne gede sharramme; hatto assitiniro, iimi Anniꞌne baalunkurinni woyyino coye afidhinara hasiꞌrannota wodanchitinanni.—Faarso 32:8 nabbawi.

16. Afiꞌnoommo wolapho lowori gede asse laꞌꞌanna hayyotenni horoonsiꞌra hasiissannonkehu mayiraati?

¹⁶ Phaawuloosi “Mootichu ayyaani noowa wolapho no” yee borreessino. (2 Qor. 3:17) Ee, Yihowa wolapho baxanno; kiꞌne kalaqinoꞌnehuno wolapho baxxinanni gede asseeti. Ikkollana afidhinoonni wolapho garunni horoonsidhinara hasiꞌranno; tini qolte agarooshshe ikkitannoꞌne. Teeda baꞌino misilla laꞌannore, maaeela coye assitannore, gawajjitanno ispoorte loossannore  woy jingilli assitanno dhagga adhitannorenna ago quwa sayisse aganno ooso afoottoha ikkara dandaanno. Tini ooso yannate geeshsha hagiirre afidhara dandiitanno. Ikkollana kuri coyibba assite afidhanno hagiirri gale hose qarra abbannonsa; lawishshaho, dhibbunna araado amaddansara woy reyitara dandiitanno. (Gal. 6:7, 8) Kuri ooso wolapho afidhinoha lawinsarono, insaneeto dogganni no.—Tit. 3:3.

17, 18. (a) Maganoho hajajama wolassitannohu hiittoonniiti? (b) Hunda Addaaminna Heewani afiꞌrino wolapho xaa yannara mannu oosora noonsa wolapho ledo heewisiisi.

¹⁷ Yihowa biddishshi garinni heeꞌra kayinni uminkera kaaꞌlitannonke. Hatto assanke fayyimmanna addu wolapho afiꞌneemmo gede kaaꞌlitannonke. (Far. 19:7-11) Wolaphoꞌne hayyotenni horoonsidhinanniha yaano, Maganunnihu guutu seerinni massagantinanniha ikkiro, Maganohono ikko anniꞌneranna amaꞌnera addaxxinannirenna wolapho lendanniꞌnere ikkitinoonnita leellishshinanni. Maganu mannisira guuta wolapho aa hasiꞌranno; Qullaawu Maxaafi tenne wolapho “Maganu oosota ayirrinyu wolapho” yee xawisanno.—Rom. 8:21.

¹⁸ Addaaminna Heewani umi qara togoo wolapho afiꞌrino. Maganu Edenete kaashshu basera mitto coye calla hoolinonsa. Insa mitte haqqicho laalo calla itannota hoolloonni. (Kal. 2:9, 17) Tini hajajo furro fuuqqo hoꞌlitannota ikkitinoni? Diꞌꞌikkitino! Maganu uyino hajajo furro fuuqqo hoꞌlitannota ikkitinokkita huwatate, isi hajajo mannu ooso fushshitinohu kiirre tunqannikki seeri ledo heewisiisa dandiinanni.

19. Wolapho afiꞌneemmo gede rosiinsanni heeꞌnoonninkehu hiittoonniiti?

¹⁹ Yihowa soqqamaasinesi hayyotenni amadannonsa. Isi kiirre tunqannikki seera aantenni baxillu seerinni heeꞌnammora hasiꞌranno. Qoleno isi fushshinoha xintu seera harunsinammoranna bushare gimbammora hasiꞌranno. (Rom. 12:9) Tennera dancha lawishsha ikkannohu Yesuusi Ilaalu Sibikatesi yannara rosiisino rosooti; Ilaalu Sibikate illachishshannohu cubbo loonsanniwa qole massanno coyi aanaati. (Mat. 5:27, 28) Maganu Mangiste Moote ikkinohu Yesuusi Kiristoosi, keeraanchimmatenna finqillete daafira isira noosi gedee lao heedhannonke gede haaro alamerano rosiisannonke. (Ibi. 1:9) Qoleno surrenkenna bisinke guuta ikkanno gede kaaꞌlannonke. Hanni hedi! Haaro alamera cubbunniwa hinge dooꞌneemmo gede assitanno hedonnino ikko cubbu abbannohu bushu qarrinni ganteemmo! Hakkiinni Yihowa qaale einonketa “ayirrinyu wolapho” afiꞌneemmo.

20. (a) Yihowa wolaphosi horoonsiꞌrannohu hiittoonniiti? (b) Maganu lawishshinni maa ronseemmo?

²⁰ Mannu ooso dannu nookki wolapho afiꞌra didandiitanno. Wolaphonke Maganohonna mannaho baxillu noonketa leellishanno garinni horoonsiꞌra hasiissannonke. Tennera Yihowa isi lawishsha harunsinammora hasiꞌranno. Isi dannu nookki wolapho noosiha ikkirono, hedate dandoo noonsa kalaqama baxillunni amadanno. (1 Yoh. 4:7, 8) Konnira, wolaphonke woꞌmunni woꞌma horoonsiꞌnoommo yaa dandiinannihu Maganu baxillinni massagammeemmoha ikkiro callaati.

21. (a) Daawitira Yihowa daafira mayi macciishshaminosi? (b) Aananno birxichira maa ronseemmo?

²¹ Yihowa falakkinota ayyaanaamittete sagale, dancha jaalla, kaajja mixonna addu wolapho afiꞌrate hexxo uyinoꞌne. Ikkina isi uyinoꞌneta ‘dancha coyibba’ naaddinanni? (Far. 103:5) Hatto ikkiro faarsaasinchu Faarso 16:11te huucciꞌrino huuccatto ledo sumuu yitinara dandiitinanni; isi togo yiino: “Heeshshote doogo leellishoottoena, ledokki heeꞌraꞌya hagiirrunni wonshitannoe; qiniitekkiinni heeꞌra hegere hagiirre uyitannoe.” Aananno birxichira Faarso 16te noota mite ayyaanaamittete jiro xiinxallineemmo. Tini, addu hagiirri noo heeshsho heeꞌra dandiinanni gara ledde huwatatto gede kaaꞌlitannohe.