MINAANNIRANNA MINAAMARA
1: Ammaname Heeꞌrate Murciꞌra
HATTO YAA MAYYAATE?
Galtensara ammaname heeꞌrate muciꞌrino minaanninna minaama, adhamansa geedonnita ikkitinota ammananno; tini lamunku mimmito ammananno gede assitanno. Minaannino minaamano qarru yannara nafa kuꞌu koꞌoye agurannokkita addaxxanno.
Mitu minaanninna minaama mitteenni heeꞌrannohu dagoomu woy ayiddu mayyaannoe yeeti. Ikkollana, mimmito baxenna ayirrise mitteenni heeꞌrate murciꞌriro, hatti roore kaaꞌlitannonsa.
QULLAAWU MAXAAFI BIDDISHSHA: “Minaannino minaamasi fushshe haꞌrisoonke.”—1 Qorontoosi 7:11.
“Ammanante heeꞌrate murciꞌroottoha ikkittoro, shiimurira koffi diyaatto. Maarano maaro xaꞌmiꞌrano diqarrissannohe. Kalaqamanno qarra doogote noo gufichi gede assite laꞌꞌatto ikkinnina adhama diigate geeshsha massannoreeti yite dihedatto.”—Mayika.
HASIISSANNOHU MAYIRAATI?
Ammaname heeꞌrate murciꞌrinokki minaanninna minaama qarru kalaqamanno woyite roore anga, ‘Atinna ani sumuu yine heeꞌra didandiineemmo’ yee hedanno; hakko daafira, adhamansa diiganno faro hasiꞌranno.
“Batinyu manni ‘Sumuu yaa hoongummoro, adhamanke diingeemmollana’ yaanni adhamanno. Adhamansa diiga dandaannota hedanni adhamino manni, wonanni mimmitoho ammaname heeꞌrate murciꞌrinoha diꞌꞌikkino.”—Jiini.
MAA ASSA DANDAATTO?
ATENEETO LAYIꞌRI
Mereeroꞌne coyi kawa kaꞌaa higanno woyite, . . .
‘Mayi isella adha hoogo’ yite gaabbatto?
Wole adhoottoro hagiidhatto gara hedatto?
Galtekki “Hasiꞌrittaro fulte haꞌra dandaatta” woy “Anera woyyitannota dihoogeemmo” yaatto?
Tenne xaꞌmuwa giddo mittete nafa ee yite qoloottoha ikkiro, galtekkira ammanante heeꞌrate albinni roore murciꞌra hasiissannohehu xaati.
AANTE NOO XAꞌMUWA GALTEꞌNE LEDO HASAABBE
Mimmitoho ammanamme heeꞌrate albi gede ikka agurroommo ikka? Hatto ikkiro, mayira?
Mimmitoho ammanamme heeꞌrate murciꞌnoommota leellishate maa assa dandiineemmo?
KAAꞌLITANNO AMAALE
Galtekki baxattota leellishannore saꞌe saꞌe borreessite soyise
Galtekkira ammanante heeꞌrate murciꞌroottota leellishate, fotose loosu bayicho xarapheessaho wodhi
Barru baala, mitteenni heedhinoonnikki saatera galtekkira silke bilbilise
QULLAAWU MAXAAFI BIDDISHSHA: “Maganu mitto assinore mannu badoonke.”—Maatewoosi 19:6.
