Ammaꞌninanni manni amanyootinsanni anninsanna amansa, jaallansanna loosiisaanonsa ammantannonsa gede assiꞌranno. Togoo manni wodho ayirrisanno, yiinore assanno, hattono woꞌmanka woyite noore coyiꞌranno.

Roore anga wolapho afiꞌrattohu amanyootikkinni mannu ammaꞌnannohe gede assiꞌritto deerrinniiti.

“Annikkinna amakki ammaꞌnitannohe gede assiꞌra dandaattoti qara doogo gikki yoottohanna loosokki affe loosattoha ikkoottota leellishate; annikkinna amakki ledo nootto woyite calla ikkikkinni wole woyiteno hatto assa hasiissannohe.”—Seerahi.

QULLAAWU MAXAAFI BIDDISHSHA: “Kiꞌnenee fonqoltine laꞌe.”—2 Qorontoosi 13:5.

Aante noo hedo mannu roore ammanannohe gede woy wirro ammanannohe gede assiꞌrate kaaꞌlitannohe.

Noore coyiꞌrattoha ikki. Kaphattoha ikkiro, mannu bayichonko ate ammaꞌna aguranno. Noore coyiꞌrattohanna hakko iso loosootto soꞌro maaxattokkiha ikkiro kayinni mannu ammaꞌnannohe gede assiꞌratto.

“Hakkeya qarra kalaqannokki coyira, noore coyiꞌra diqarrissanno. Kayinni mannu mishannohe gede assara dandaannore ikkiro nafa noore coyiꞌrattoha ikkiro, mannu roore ammaꞌnannoheha ikkatto.”—Kamaani.

QULLAAWU MAXAAFI BIDDISHSHA: “Woꞌmante yannara dancha coye assate halchinoommo.”— Ibiraawoota 13:18.

Loosokki affe loosattoha ikki. Ameerikaho assinoonniti mitte xiinxallo leellishshanno garinni, mannu jiro gashshooti biirora loossanno ogeeyye giddo xibbunni 78 anga ikkitannori “loosoho qaxaramate hasiissannote sase qara dandoo giddo mitte” looso afe loosa ikkitinota coyidhino. Xa wedellichu heedhe loosokki affe loosakki jawa ikkatto woyitirano kaaꞌlitannohe.

“Anniꞌyanna amaꞌya xaa xaa kultaera agadhummakki mine woy qaete assa hasiissannoere umiꞌya afe asseemma woyite insa hattee afanno. Mitto coye albinni roore umiꞌyanni afe assumma kiiro, anniꞌyanna amaꞌya roore ammaꞌnitannoe.”—Saara.

QULLAAWU MAXAAFI BIDDISHSHA: “Ani yoommohunni roore assattotano afoommo.”—Filimoona 21.

Cincattoha ikki. Manninatiꞌne lophinota mannu mulenni afara dandaanno; gikki yitinoonnitanna ammaꞌninannire ikkitinoonnita kayinni bayichonko afa hoogara dandaanno.

“Mitte higge calla assoottori annikkinna amakki woy wolootu ammaꞌnitannohe gede diassanno. Ikkirono, duucha higge loosokki umikkinni affe loosattoha ikkiro, mannu ammaꞌnannohe gede assiꞌra dandaatto.”—Birandeni.

QULLAAWU MAXAAFI BIDDISHSHA: “Cinca, uddanote gede assitine uddidhe.”—Qolasiyaasi Sokka 3:12.