Oosoꞌne ledo dancha gede hasaabbinoonni yaa dandiinannihu mimmitoho giddoꞌneta fantine kultinanniha ikkirooti.

Roorenkanni wedella ikkitino oosoꞌne ledo hasaawa qarra ikkitaꞌnera dandiitanno. Oosoꞌne shiimmaaddu noo waro baalankare kultannoꞌne. Wedelloota ikkitanno woyite kayinni garire dihasaabbannoꞌne; hakko daafira hedonsanna giddonsata afa didandiitinanni. Mittu lowo lagira kawaanna kaꞌaanni uurritinoonnihu gedeeti. Tenne yannara oosoꞌne kiꞌne ledo hasaawa hasidhannokkiha lawara dandaanno; ikkirono, oosoꞌne albinni roore hasaawisa hasiissannoꞌne yanna tenneeti!

Oosoꞌne hasaawa hasidhanno yannara hasaawate maahoyye yiiyye. Oosoꞌne hashsha yanna yannitino woyite hasaawissaꞌnera hasidhuro nafa macciishsha gibbinoonte.

“‘Barra diledo honsummo! Xa kaꞌe hasaambo yaatto?’ yaate hendeemmoha ikkara dandaanno. Kayinni, oosonke hasaawissankera hasidhuro caaccaawa dihasiissannonke. Kuni di-annuwunna amuuwu baalu hasidhanno coyeeti?”—Liisa.

“Yannante goxa baxeemmoha ikkirono, roore woyite wedellu oosoꞌya ledo dancha gede hasaambeemmohu hashshu taalooti gedensaanniiti.”—Herberti.

QULLAAWU MAXAAFI BIDDISHSHA: “Ayino wolu qiniite ikkinnina umisi qiniite hasiꞌroonke.”—1 Qorontoosi 10:24.

Seekkitine macciishshe. Mittu anni togo yiino: “Mito woyite oosoꞌya hasaawissanni heedheennae ani wolere hedeemmo. Hakkawote insa, macciishsha agure wolere hedanni noommota affanno!”

Aterano hedokki bebbeehantannoha ikkiro, televizhiine cufi woy silke worte aguri. Oosoꞌne coyidhanno woyite seekkitine macciishshe; insara huluullinori hakkeeshshi geeshsha dhiwinore lawa hoogiꞌnero nafa hixamanyitine macciishshe.

“Oosonke huluullinonsa coye mulluri gede assine laꞌneemmokkita affanno gede assa hasiissannonke. Hatto ikka hoogiro, dhiwinonsare ninkera dihasaaphitanno woy kaaꞌlo afiꞌrate wolu manniwa hadhanno.”—Maaranda.

“Oosoꞌne heddinori gara lawa hoogiꞌnero nafa hanqitinoonte.”—Antooni.

QULLAAWU MAXAAFI BIDDISHSHA: “Ma garinni macciishshitinanniro seekkitine wodanche.”—Luqaasi 8:18.

Hasaawa dandiitinanni faro hasidhe. Mito woyite ooso giddonsata roore fushshite coyidhannohu anninsanna amansa ledo ofolte hasaabbanno woyite ikkikkinni insa ledo mitteenni mitore loossanno woyiteeti.

“Qaaqqoꞌya ledo makeenunni haꞌneemmo woyite hasaambeemmo. Ofolline alba alba hinge hasaawantenni makeenu giddo qote qoteho ofolline haꞌra hasaawate roore faro fantinonke.”—Nikooli.

Sagalete yannano hasaawate dancha faro fantanno.

“Hashsha hurbaatu yannara baalunku hakko barra tuncu yiinonkeha bushano ikko dancha coye kayinse hasaambeemmo. Kuni rosichi mittimma heedhannonke gede assinonke; qoleno qarrinke yannara kaaꞌlannonkehu noota huwanteemmo gede assinonke.”—Roobini.

QULLAAWU MAXAAFI BIDDISHSHA: “Mannu baalu macciishshate rahinoha, coyiꞌrate . . . muddamannokkiha ikko.”—Yaiqoobi 1:19.