1, 2. (a) Yesuusi muli jaallasira hiittee lawishshuwa kulinonsa? (Umi misile lai.) (b) Geꞌreewunna meu daafira kulanno lawishsha lainohunni afa hasiissannonkeri maati?

 YESUUSI muli jaallasi ledo yaano Pheexiroosi, Indiriyaasi, Yaaqoobinna Yohaannisi ledo hasaawanni no. Isi ammanaminohunna wodanaamu borojjichire, tonne seemorenna taalaantennire kultanno lawishshuwa kule kainonsa. Jeefote wole mitto lawishsha kulinsa. Isi “manchu Beetti” ‘daga baalantera’ yoo yaanno yannare coyiꞌrino. Kuni lawishshi rosaanosira dhagge ikkinsakki digatino! Yesuusi konni lawishshi giddo lame gaamore yaano geꞌreewunna meu daafira coyiꞌrino. Qoleno, “Nugusu” ‘roduuwaꞌya’ yiinoti wole sayikki gaamo noota xawisino.—Maatewoosi 25:31-33, 40, 41, 45, 46 nabbawi; Mat. 25:34-39, 42-44.

² Yihowa soqqamaasine lowo dirinni jammarte konne lawishsha huwatate woꞌnaaltino; Yesuusi konni lawishshira mannu oosote albillittete kaayyore coyiꞌrinohura konne assansa garankolla. Yesuusi mitu manni hegere heeshsho afiꞌrannohu, mitu kayinni hegerera baꞌꞌannohu mayiraatiro xawisino. Heeshsho afiꞌneemmohu Yesuusi konni lawishshira coyiꞌrino halaale huwante hakko garinni heeꞌneemmoha ikkirooti. Konni daafira, aante noo xaꞌmuwara dawaro afiꞌra hasiissannonke: Yihowa konne lawishsha garunni huwanteemmo gede  yannate kiiro kaaꞌlinonkehu hiittoonniiti? Kuni lawishshi sabbakate loosi hasiisannoha ikkinota leellishanno yineemmohu mayiraati? Sabbakkanno gede hajanjoonniri ayeooti? ‘Nugusahonna’ isi ‘roduuwaꞌya’ yiinorira ammanammoommore ikkate yanna xaati yineemmohu mayiraati?

3, 4. (a) Geꞌreewunna meu daafira kulanno lawishsha huwatate afa hasiissannonketi qara coyibba hiikkuriiti? (b) Agarooshshu Shae 1881⁠nni konne lawishsha xawissinohu ma garinniiti?

³ Geꞌreewunna meu daafira kulanno lawishsha garunni huwatate, sase qara coye afa hasiissannonke: lawishshu giddo kulloonniri ayeootiro, firdete yanna mamarootironna manna geꞌreewoho woy meꞌꞌeho yinannihu mayiraatiro afa hasiissannonke.

⁴ Agarooshshu Shae 1881⁠nni, “manchu Beetto” woy “Nugusa” yinihu Yesuusa ikkinota xawissino. Hakkawaro Qullaawu Maxaafi Rosaano Nugusu ‘roduuwaꞌya’ yiiri, iima Kiristoosi ledo mookkannore calla ikkitukkinni albillitte uullate aana guuta ikkanno manna baalanka riqibbanno yite heddino. Qoleno, geꞌreewonna meꞌꞌe Kiristoosihu Kumi Diri Gashshooti yannara bandanniha lawinonsa. Hattono geꞌreewoho yinannihu Maganunnite baxillu higge garinni heeꞌranno mannaati yite ammantino.

5. Konne lawishsha 1920 balla albinni roore garunni huwantoommohu hiittoonniiti?

⁵ Yihowa 1920 balla soqqamaanosi konne lawishsha roore huwattanno gede kaaꞌlino. Birra 15, 1923 Agarooshshu Shae, “manchu Beetti” Yesuusa ikkinota buuxissino. Kiristoosi roduuwa ikkitinori kayinni iima isi ledo mookkannore calla ikkitinota leellishshanno taje shiqinshoonni; qoleno geꞌreewoho yiniri Kiristoosi Mangiste hunda uullate aana heeꞌrate hexxo noonsare riqibbannota xawinsoonni. Geꞌreewonna meꞌꞌe bandannihu mamarootiyya? Hatti Agarooshshu Shae, Kiristoosi roduuwi Kumu Diri Gashshootisi yannara iima isi ledo mookkanno daafira, hatte yannara uullate aana noori insa kaaꞌlite woy qakke affannokkita xawissino. Hakko daafira, geꞌreewonna meꞌꞌe bandannihu Kumu Diri Gashshooti jammarara albaanni ikka hasiissannosi. Manna geꞌreewoho yinanni korkaata lainohunni kayinni, Yesuusa Mootichansa assiꞌre doodhino mannanna Mangistesi hexxanno manna geꞌreewoho yinanni yine hatte metseetera xawinsoonni.

6. Yannankera 1990 balla, konne lawishsha huwantoommo gara taashshinoonnihu ma garinniiti?

⁶ Tenne goofimarchu barruwara loosamanni noohu sabbakate loosinni manna geꞌreewoho woy meꞌꞌeho yine bandanni heeꞌnoonni yine lowo diro hendanni keeshshinoommo. Sabbankeemmo sokka adhituro geꞌreewoho, adha gibburo kayinni meꞌꞌeho yine hendoommo. Ikkollana 1990 mereedhi balla tenne hedo taashshinoonni. Birra 15, 1995 Agarooshshu Shaera fultinoti lame birxichuwa Yesuusi Maatewoosi 24:29-31 (Xiqise nabbawi^[2]) nna Maatewoosi 25:31, 32 (Xiqise nabbawi^[3]) aana coyiꞌrino qaali mitto dana ikkinota xawissino.^[4] Konni daafira mayyaa dandiinanni? Hatti metseete togo yitino: “Manna geꞌreewoho woy meꞌꞌeho yine farandannihu konni kaꞌaati.” Konni kaꞌa mamaro? “Maatewoosi 24:29, 30 aana kulli ‘qarri’ jammarinna manchu Beetti ‘ayirrinyisinni dayi’ gedensaanniiti. . . . Hakkiinni, woꞌmu bushu seeri baꞌꞌanno wote Yesuusi yoote wombarera ofolle mitoho dancha firde, mitoho kayinni baote firde faradanno.”

7. Geꞌreewunna meu daafira kulanno lawishshi tiro xawisi.

⁷ Xaa yannara meunna geꞌreewunnire kulanno lawishsha garunni huwantoommo. “Manchu Beetto” woy “Nugusa” yinihu Yesuusaati. Nugusu “Roduuwaꞌya” yiinsari kayinni iima Kiristoosi ledo gashshitannore ayyaanunni buurantinore labballonna meya roduuwaati. (Rom. 8:16, 17) ‘Geꞌreewonna meꞌꞌe’ yiniri, duuchante daga giddo noo manna riqibbanno. Kuri qullaawu ayyaaninni buurantinore diꞌꞌikkitino. Firdete yanna  mamarootiyya? Tenne firde farandannihu bayiru qarri goofara kaꞌꞌanno woteeti. Manna geꞌreewo woy meꞌꞌe yine farandannihu maa laꞌneeti? Uullate aana gattinorira Kiristoosi roduuwira assannore laꞌneeti. Kuni bushu seeri baꞌꞌara kae noote tenne yannara, Yihowa konne lawishshanna Maatewoosi fooliishsho 24 nna 25 noore wole lawishshuwa garunni huwanteemmo gede kaaꞌlinonke daafira lowo geeshsha galanteemmosi!

8, 9. Yesuusi geꞌreewo ‘keeraanote’ yiinohu mayiraati?

⁸ Yesuusi geꞌreewunna meu daafira coyiꞌrino lawishshi giddo sabbakate loosire xaawate dicoyiꞌrino. Ikkina, kuni lawishshi sabbakate loosi hasiisannota leellishanno yineemmohu mayiraati?

⁹ Umihunni, Yesuusi lawishsha horoonsiꞌre rosiisanni noota huwati. Isi coyiꞌranni noohu addinta geꞌreewonna meꞌꞌe badate daafira diꞌꞌikkino. Hattonni, geꞌreewoho yine farandanni manni roduuwasi addinta itisanno, uddisiisanno woy usuru mine mare laꞌꞌanno yaasino diꞌꞌikkitino. Hatteentenni, isi kuri lawishshunni geꞌreewoho yaamantannori roduuwasi ma garinni laꞌannoro xawisanni no. Isi geꞌreewo ‘keeraanote’ yiinohu insa buurantinore Kiristoosi roduuwa ikkitino gede assite laꞌannonna tenne goofimarchu barruwara insara ammanantinore ikkitanno daafiraati.—Mat. 10:40-42; 25:40, 46; 2 Xim. 3:1-5.

10. Geꞌreewoho yaamantannori Kiristoosi roduuwa kaaꞌlitannohu hiittoonniiti?

¹⁰ Layinkihunni, Yesuusi coyiꞌrino lawishshira qooxeessaho noo hedo laꞌno. Isi bayicho amadasiranna alamete gumulora malaatu maatiro kulanni no. (Mat. 24:3) Hanafote, konni malaati wido gaamamannoha mitto hasiisanno looso qummi assino; yaano Mangistennihu danchu duduwi “uulla woꞌmate sabbakamanno” yiino. (Mat. 24:14) Qoleno, Yesuusi geꞌreewunna meu daafira coyiꞌrara albaanni, taalaantete lawishsha coyiꞌrino. Sai birxichira laꞌnummonte gede, Yesuusi konne lawishsha coyiꞌrinohu ayyaanunni buurantinori yaano ‘roduuwisi’ sabbakate looso diinaggaabbe loosa hasiissannonsata rosiisateeti. Ikkollana, goofimarchu daara albaanni “duuchante dagara” sabbaka Yesuusi bayicho amadanno yannara uullate aana gattinorira shota coye diꞌꞌikkitino. Geꞌreewunna meu daafira kulanno lawishshi buuramaasine kaaꞌlitannori heedhannota leellishanno. Konni daafira, geꞌreewoho yine farandanniri Kiristoosi roduuwa kaaꞌlitannote qara doogga giddo mitte sabbakate looso kaaꞌlate. Ikkina konni garinni kaaꞌlate maa maa assa hasiissanno? Konni loosira woxe fushsha woy buurantinore jawaachisha calla baqeteni?

11. Mayitanno xaꞌmo xaꞌma dandiineemmo? Mayira?

¹¹ Xaa yannara, sette miliyoone meddi yitannote Yesuusi rosaano giddo rooru ayyaanunni buurantinore diꞌꞌikkitino. Insa Yesuusi buurantino borojjootisira uyino taalaante diadhitino. (Mat. 25:14-18) Hatto ikkiro, ‘Ayyaanunni buurantinokkiri sabbakke yine uyinoonni hajajo agadha hasiissannonsayya?’ yine xaꞌma dandiinanni. Hanni tennera ee yine qolleemmo gede assannonkere laꞌno.

12. Yesuusi Maatewoosi 28:19, 20 aana coyiꞌrino qaalinni maa ronseemmo?

¹² Yesuusi rosaanosi baalanti sabbakkanno gede hajajino. Yesuusi reyotenni kaihu gedensaanni, harunsaanosi isi ‘hajajinore baalankare’ rosiisse manna rosaano assitanno gede kulino. Isi hajajino coyibba giddo mitte sabbakke yee uyino hajajooti. (Mat. 28:19, 20) Hakko daafira, hexxonsa iima moohano ikkituro woy uullate aana heeꞌrano ikkituro Kiristoosi rosaano baalanti sabbaka hasiissannonsa.—Looso 10:42.

13. Yohaannisi laino ajuuja maa buuxissanno? Mayira?

¹³ Ajuujate maxaafi buurantinorino wolootuno sabbakate looso loossannota xawisanno. Yesuusi, “idayicho” yaano iima Kiristoosi ledo moohannohu 144,000 buuramino manni “heeshshote  waa mulla” adhara manna koyisanna Yohaannisi ajuujatenni laꞌꞌanno gede assino. (Aju. 14:1, 3; 22:17) Lawishshunni kulloonnihu hakku wayi, Yihowa mannu ooso cubbunninna reyotenni gatisate Kiristoosi wodo widoonni qixxeessino qixxaawo riqiwannoho. (Mat. 20:28; Yoh. 3:16; 1 Yoh. 4:9, 10) Wodote kakkalo sabbankeemmo sokkara guulchoho; qoleno, buurantinori mannu tenne wodonni horo afiꞌranno gede kaaꞌlitanni no. (1 Qor. 1:23) Ikkollana, Yohaannisi idayichote gaamo wido ikkitinokkire wolootano ajuujatenni laino. Kurino “Amo!” yitanno gede kulloonninsa. Insano hajajante wole manna heeshshote waa adhanno gede koyissanno. Tini layinki gaamo uullate aana heeꞌrate hexxo afidhinote. Konni daafira, tini ajuuja amo yaanno koyishsha adhitannori baalunkura wolootaho sabbakate halaafinati noonsata buuxisanno.

14. ‘Kiristoosi higgera’ hajajamate maa assa hasiissannonke?

¹⁴ “Kiristoosi higge” hunda noori baalunku sabbaka hasiissannonsa. (Gal. 6:2) Yihowa lamu gari seera difushshino. Lawishshaho, isi Isiraeele togo yiino: “Gobbaꞌne mannirano ikko mereeroꞌne heeꞌrannohu wole gobba manchira mittu gari higge heedhannoꞌne.” (Wol. 12:49; Zel. 24:22) Kiristaanu Muse Higge hunda nooha diꞌꞌikkino. Ikkollana, buurantinorino ikko wolu geꞌreewi “Kiristoosi higge” hunda nooreeti. Hatti higge Yesuusi rosiisinore baalankare amaddinote. Isi rosiisino rosi giddo qaru harunsaanosi baxillu noonsare ikkitanno gede uyino hajajooti. (Yoh. 13:35; Yaq. 2:8) Magano, Kiristoosinna olliichonke banxeemmota leellinsheemmote qara doogga giddo mitte Mangistenniha dancha duduwo sabbakate.—Yoh. 15:10; Looso 1:8.

15. Yesuusi hajajo baalanta harunsaanosi laꞌannote yineemmohu mayiraati?

¹⁵ Yesuusi shiima gaamora coyiꞌrinori mito wote lowo gaamono laꞌꞌannoho. Lawishshaho, Yesuusi Mangistete gondooro einohu 11 rosaano ledo callaati; ikkirono, hakku gondoori 144,000 wido  ikkitinore baalanka laꞌꞌannoho. (Luq. 22:29, 30; Aju. 5:10; 7:4-8) Hatteente gede, Yesuusi sabbakke yee hajajo uyinohu shiima harunsaanosira yaano reyotenni kae leellinonsarira callaati. (Looso 10:40-42; 1 Qor. 15:6) Ikkollana, umi xibbi diro noori ammanantinori Yesuusi harunsaano giddo isi coyiꞌranna macciishshitinori baalanka ikka hooggurono, baalunku hatti hajajo insano laꞌannota huwattino. (Looso 8:4; 1 Phe. 1:8) Hatteente gede, yannankera noote sette miliyoone ikkitanno halashshaano giddo Yesuusi coyishiishe hajajinohu dino. Ikkirono, insa baalunku Yesuusa ammananna tenne ammanansa sabbakate looso loosse leellisha hasiissannonsata affino.—Yaq. 2:18.

16-18. Geꞌreewoho yine farandanninsari Kiristoosi roduuwa kaaꞌlitannohu hiittoonniiti? Konne assate yanna xaati yineemmohu mayiraati?

¹⁶ Sheexaanu uullate aana gattinori buurantinori Kiristoosi roduuwira ola kayise no; qoleno gattinositi ‘shiima yanna’ gooffanni hadhanno wote roore olamannoti egennantinote. (Aju. 12:9, 12, 17) Yannankera buuramaasinete lowo fatani iillanni noonsaha ikkirono, insa taalle nookkihu sabbakate loosira albisa ikkite loossanni no. Addaho, Yesuusi ledonsa nootinna marraꞌꞌanni noonsati dihuluullissanno.—Mat. 28:20.

¹⁷ Geꞌreewoho yine farandanninsari Kiristoosi roduuwa sabbakate loosinnino ikko wole doogganni kaaꞌla lowo qoosso ikkitinota ammantanno. Lawishshaho, Mangistete Addaraashe, Jajjabbu Gambooshshi Addaraashenna sinu biiro mina kaaꞌlitanno hattono konnira woxe fushshitanno; qoleno “ammanaminohunna wodanaamu borojjichi” shoomino roduuwira ammanante hajajantanno.—Mat. 24:45-47; Ibi. 13:17.

¹⁸ Muli yannara sokkaano alamete aana bao abbitanno bubbe amaddinowiinni agurteenna bayiru qarri jammaranno. Kuni ikkannohu uullate aana gattinorira Kiristoosi roduuwira jeefote sumuda sumunde kaꞌneennaati. (Aju. 7:1-3) Armagedooni oli jammarara albaanni buurantinore iimira haaꞌnanni. (Mat. 13:41-43) Konni daafira, geꞌreewoho yine farandansara hasidhannori Kiristoosi roduuwa ammanante kaaꞌla hasiissannonsahu xaati.