1, 2. Yesuusi taalaantete lawishsha coyiꞌrinohu mayiraati?

 YESUUSI taalaantete lawishsha horoonsiꞌre buurantino harunsaanosi maa assa hasiissannonsaro xawise coyiꞌrino. Kuni lawishshi addu Kiristaana baalanka laꞌꞌannoha ikkino daafira, iimira haꞌrate hexxo noonkerino ikko uullate aana heeꞌrate hexxo noonkeri tirosi huwata hasiissannonke.

² Yesuusi taalaantete lawishsha coyiꞌrinohu, rosaanosi ‘bayicho amadasiranna alamete gumulora malaatu maatiro’ xaꞌmiteennasi dawaro qolanniiti. (Mat. 24:3) Konni daafira, kuni lawishshi woꞌmannohu yannankeraati; qoleno Yesuusi Nugusa ikke bayicho amadinota leellishanno malaati widooti.

3. Yesuusi Maatewoosi fooliishsho 24 nna 25 aana coyiꞌrino lawishshuwanni maa ronseemmo?

³ Yesuusi Maatewoosi 24:45 kayise 25:46 geeshsha coyiꞌrinohu shoolu lawishshi giddo mittu taalaantete lawishshaati. Wolu sasu lawishshino yaano ammanaminohunna wodanaamu borojjichire, tonne seemore, hattono geꞌreewunna meu daafira kultanno lawishshuwano Yesuusi bayicho amadasira malaatu maatiro kulanni coyiꞌrinoreeti. Isi shoolunku lawishshira, tenne goofimarchu barruwara heedhannori addu harunsaanosi hiittoo akata  leellisha hasiissannonsaro xawisino. Borojjichu daafira, seemootu daafiranna taalaantete daafira kultanno lawishshuwa buurantino harunsaanosira coyiꞌrinoreeti. Yesuusi ammanamino borojjichire kulanno lawishsha horoonsiꞌre, goofimarchu barruwara soqqamaanosira ayyaanaamittete sagale shiqishshannoti shiima buuramaasinete gaamo ammanantinotanna wodanaame ikka hasiissannoseta xawise coyiꞌrino. Seemootu daafira kulanno lawishshira kayinni, buurantino harunsaanosi baalanti isi insa affinokki barranna saatera daanni noota huwatte qixxaabbenna baqqi yite agadhitanno gede duure coyiꞌrino. Qoleno taalaantete lawishshira, buurantino harunsaanosi uyinoonninsa looso ceeꞌmitukki jawaatte loosa hasiissannonsata xawisino. Yesuusi jeefote lawishsha yaano geꞌreewunna meu daafira kulanno lawishsha coyiꞌrinohu uullate aana hegerera heeꞌrate hexxo noonsariraati. Isi konni lawishshira, insa ammanantinore ikka hasiissannonsatanna uullate aana noore buurantino roduuwasi kaaꞌla hasiissannonsata xawisino. a Hanni xa taalaantete lawishsha laꞌno.

4, 5. Lawishshu giddo kulli manchi woy mootichi aye riqiwanno? Mitte taalaante mageeshshi waaga afidhino?

⁴ Maatewoosi 25:14-19 nabbawi. b (Mat. 25:20-30) Konni lawishshira kulloonni manchi woy mootichi Yesuusa ikkinotanna isi 33 M.D. iimira haꞌrasi wole gobba haꞌra ikkitinota borronke giddo lowo dirinni hananfe xawinsanni keeshshinoonni. Yesuusi wolu lawishshira, wole gobba haꞌrannohu “nugusimmate silxaane adhate” ikkinota xawise coyiꞌrino. (Luq. 19:12) Yesuusi Mangistete silxaane adhinohu iimira haꞌranni heeꞌrenni diꞌꞌikkino. c Hatteentenni, isi ‘Maganoho qiniiteenni ofolle diinnasi lekkasira woroonni qolla geeshsha hakkuyinku jammare agadhino.’—Ibi. 10:12, 13.

⁵ Lawishshu giddo kulli manchi sette taalaante afiꞌrinoho; kuni qole hakkawaro lowo woxeeti. d Isi wole gobba haꞌrara albaanni, borojjootisi daddaltanno gede taalaantesi beehinonsa. Hakkuyi manchinte gede, Yesuusira iimira haꞌrara albaanni lowo waaga afiꞌrino coyi noosi. Hakku coyi maati? Isi uullate aana noo waro loosino loosooti.

6, 7. Taalaante maa riqibbanno?

⁶ Yesuusi sabbakatenna rosiisate loososi kaffi asse laꞌꞌanno. (Luqaasi 4:43 nabbawi. e) Isi konne looso loose, lowo guma laalanno irsha qixxeessino. Isi rosaanosira togo yiino: “Illeꞌne irshu widira kayissine gidu laale waajjiꞌrino gara laꞌe.” (Yoh. 4:35-38) Isi tenne coyiꞌrinohu suwashshu wodani noonsahu wolu lowo manni rosaanosi ikkannota hedeeti. Worbu gawartichinte gede, Yesuusi midote iillinoha konne irsha towaatannoha worikkinni agure haꞌra dihasiꞌrino. Konni daafira isi reyotenni kae iimira haꞌrara albaanni rosaanosira togo yee lowo halaafinate uyinonsa: “Hadhine daga baalanta rosaano asse.” (Mat. 28:18-20) Konni garinni isi rosaanosira lowo waaga  afiꞌrino miinja yaano Kiristaanu soqqansho hadara uyinonsa.—2 Qor. 4:7.

⁷ Konni daafira mayyaa dandiineemmo? Yesuusi rosaanosi manna rosaano assitanno gede hajaji wote, “miinjasi” yaano taalaantesi aanni noonsahu gedeeti. (Mat. 25:14) Haranchunni, taalaante sabbakatenna manna rosaano assate halaafinate riqibbanno.

8. Mittu mittunku borojjichi adhino taalaante taalo ikka hooggurono, mootichu baalunku ma assitara hasiꞌrino?

⁸ Taalaantete lawishshira, mootichu mittu borojjichisira onte taalaante, mittoho lame, xaano woleho mitte uyinota xawinsoonni. (Mat. 25:15) Mootichu mittu mittunkura taalo taalaante uyinoha ikka hoogirono, sasunku taalaantetenni seekkite daddaltara yaano dandoonsa deerrinni seekkite soqqantara hasiꞌrino. (Mat. 22:37; Qol. 3:23) Kiristoosi harunsaano umi xibbi diro, 33 M.D. Phenxeqosxete barrinni hanaffe taalaantetenni daddala jammartino. Insa diinaggaabbe sabbakkinonna manna rosaano assitino gara Hawaariyaatete Loosi maxaafira kaajja gede borreessinoonni. f—Looso 6:7; 12:24; 19:20.

9. (a) Lamu ammanantino borojjooti adhitino taalaante ma assitino? Tini maa leellishshanno? (b) “Wolu geꞌreewi” mayi qoosso afiꞌrino?

⁹ Uullate aana noori ammanantinori Kiristoosiri buurantino borojjooti, goofimarchu  yannara hakko iso 1919⁠nni hanaffe Mootichu taalaantenni daddaltanni keeshshitino. Umiri lamu borojjooti assitinonte gede, buurantinori meyanna labbaa roduuwi sabbakate looso loosate dandiitannore baala assitino. Insa giddo onte taalaante noosihunna lame taalaante noosihu ayeti yine heda hasiissannota diꞌꞌikkitino. Lawishshu giddo lamunku borojjooti mootichinsa uyinonsa taalaantera aanaho ero tirfite leddino; hakko daafira lamunku jawaatte loossino. Uullate aana hegerera heeꞌrate hexxo noonsari tennera kaaꞌlitannori nooyya? Ee, lowori no! Yesuusi coyiꞌrinohu geꞌreewunna meu daafira kulanno lawishshi, uullate aana hegerera heeꞌrate hexxo noonsari Yesuusire buurantino roduuwira sabbakatenna rosiisate looso kaaꞌlate qoosso afidhinota xawisanno. Tenne goofimarchu barruwa giddo lamenti gaamo ‘mitte hoshsha’ ikkite manna rosaano assate looso mitteenni diinaggaabbe loossanni no.—Yoh. 10:16.

10. Yesuusi bayicho amadinota leellishanno malaati giddo mittu qaru coyi maati?

¹⁰ Mootichu borojjootisi loosse guma abbitanno yee agadhasi garankolla. Aleenni qummi assininte gede, umi xibbi diro heedhino harunsaanosi loosse jajjisi tirfanno gede assitino. Taalaantete lawishshi woꞌmannote tenne goofimarchu yannarana? Ammanantinorinna diinaggaabbe loossannori Yesuusi harunsaano yannankera taalle nookkiha sabbakatenna manna rosaano assate looso loossino. Insa mittimmatenni loossino loosi, diru dirunku lowo kume ikkitannoti haaro rosaano lexxite Maganu Mangistere dudubbannore ikkitanno gede assino; konni garinni, sabbakatenna rosiisate loosi Yesuusi Maganu Mangiste silxaane adhe bayicho amadinota leellishanno malaati giddo mitto qara coye ikka dandiino. Ee, Mootichinsa tennera baasa hagiidhannoti egennantinote!

11. Yesuusi woxesi shallaqqate daannohu bayiru qarri yannaraati yineemmo gede assannonkeri maati?

¹¹ Yesuusi borojjootisi ledo woxesi shallaqqate daannohu bayiru qarri goofara kaꞌꞌanno woteeti. Togo yineemmohu mayiraati? Yesuusi Maatewoosi fooliishsho 24 nna 25 masaalino masaalo giddo, daasi daafira marro marro hige coyiꞌrino. Isi bayiru qarri yannara farandanni firdere kulanni, mannu “manchu Beetti iimi gomichinni daanna laꞌꞌanno” yiino. Qoleno, goofimarchu barruwara heedhanno harunsaanosi baqqi  yite agadhitanno gede amaalanni togo yiino: “Mootichiꞌne ma barra daannoro diaffinoonni”; qoleno “manchu Beetti heddinoonnikki saatera daanno.” (Mat. 24:30, 42, 44) Konni daafira, Yesuusi “kuri borojjooti mootichi daye insa ledo woxesi shallaqqi” yiinohu isi tenne alame goofimarchira firde farade Sheexaanu alame hunanno yanna kulateeti. g—Mat. 25:19.

12, 13. (a) Mootichu umire lame borojjoota mayyaanno? Mayira? (b) Buurantinorira jeefote sumuda sumundannihu mamooteeti? (“ Reyote Yannara Woxe Shallaga” yitanno saaxine lai.) (c) Geꞌreewoho yine farandanninsari mayi baraarsha afidhanno?

¹² Lawishshu buuxisannonkente gede, mootichu daanno wote lamu borojjootisi yaano onte taalaantenna lame taalaante adhituri daddalte ero tirfe abbitino daafira ammanantinoreeti. Mootichu lamunkura mitto gara coyiꞌrino: “Hashshu worbaꞌya, ati danchahonna ammanamootto borojjichooti! Shiimu coyira ammanamootto. Hakko daafira, lowo coyira shoomeemmohe.” (Mat. 25:21, 23) Ikkina, lowo ayirrinye afiꞌrinohu Mootichu Yesuusi albillitte daanno wote maa assanno?

¹³ Umiri lamu borojjooti riqibbannorira yaano diinaggaabbe loossannori buurantino harunsaanosira jeefote sumuda sumundannihu bayiru qarri hanafara albaanniiti. (Aju. 7:1-3) Armagedooni oli kaꞌꞌara albaanni, Yesuusi insara iimi baraarsha aannonsa. Kiristoosi roduuwira sabbakate looso kaaꞌlitinore uullate aana heeꞌrate hexxo noonsare hatte yannara geꞌreewoho yine farandanni daafira, insa Maganu Mangiste hunda uullate aana heeꞌrate qoosso afidhanno.—Mat. 25:34.

14, 15. Yesuusi bushu borojjichire coyiꞌrinohu buurantino roduuwisi giddo batinyu bushuullenna ceeꞌmaleeyye ikkitannota kulateeti? Xawisi.

¹⁴ Lawishshu giddo, sayikki borojjichi adhino taalaantenni daddala woy woxe soorritannoriwa wora agure baatto ume waamino. Kuni borojjichi afanni heeꞌrenni mootichisi tirfe afiꞌrannokki gede assino daafira bushaho. Mootichu iso “bushunna ceeꞌmaaleessu borojjichi” yaasi garankolla. Mootichu uyinosi taalaante haare tonne taalaante noosi borojjichira uyino. Hakkiinnino busha borojjicho ‘gobbara fushshine tunsichu giddora tungoonni.’ “Hakkiicho [isi] wiꞌlanno hattono hinkosi quruuxanno.”—Mat. 25:24-30; Luq. 19:22, 23.

¹⁵ Yesuusi sasu borojjooti giddo mittu mootichisi taalaante waamino yiinohu, buurantino harunsaanosi giddo batinyu bushuullenna  ceeꞌmaleeyye ikkitannota kulateetini? Deeꞌni. Hanni qooxeessaho noo assaawe laꞌno. Yesuusi ammanaminohunna wodanaamu borojjichire kulanno lawishshi giddo, wole borojjoota gananni qarrisanno borojjichire coyiꞌrino. Yesuusi tenne coyiꞌrinohu, bushu borojjichi gaamo kalaqantannota masaalate diꞌꞌikkino. Isi tenne coyiꞌrinohu ammanamino borojjichira bushu borojjichi akatta heedhannosikki gede qorowisiisateeti. Hatteente gede, tonne seemore kulanno lawishshira, buurantino harunsaanosi giddo darate ikkitannori onte gowwootu seemooti gede ikkitanno yaasi diꞌꞌikkino. Isi tenne coyiꞌrinohu, ayyaanaamittete roduuwisi baqqi yite agadhanna qixxaawa hoogguro mayi ikkannoro qorowisiisateeti. h Hatteente gede, Yesuusi taalaantete lawishshi giddo, goofimarchu barruwara buurantino roduuwisi giddo batinyu bushuullenna ceeꞌmaleeyye ikkitanno yaasi diꞌꞌikkino. Isi bushu borojjichire coyiꞌrinohu, ammanantino harunsaanosi ceeꞌmitukki loossanno gede yaano taalaantensanni ‘daddaltanno’ gedenna bushu borojjichi gede ikkitannokki gede qorowisiisateeti.—Mat. 25:16.

16. (a) Taalaantete lawishshinni maa ronseemmo? (b) Kuni birxichi taalaantete lawishsha garunni huwanteemmo gede kaaꞌlinonkehu hiittoonniiti? (“ Taalaantete Lawishshi Tiro Huwata” yitanno saaxine lai.)

¹⁶ Taalaantete lawishshinni ronseemmoti lame coyibba hiikkuriiti? Umihunni, Mootichu Kiristoosi kaffi asse laꞌꞌanno coye yaano sabbakatenna manna rosaano assate looso buurantino borojjootisira hadara uyino. Layinkihunni, Kiristoosi ninke baalunku sabbakate looso jawaante loonsammora hasiꞌranno. Hatto ikkiro, ammanankera, baqqi yine agadhankeranna ammanamankera Mootichu baraarsha aannonketa dihuluullammeemmo.—Mat. 25:21, 23, 34.