1, 2. (a) Goofimarchu barruwa daafira Yesuusi mayino? (b) Aanchine hiittee xaꞌmuwara dawaro afiꞌneemmo?

 HANNI Yesuusi Ejedhete Ilaalira ofolle Yerusaalamete noo beetemeqidese laꞌꞌanni noohu gede assite hedi. Isi hakko shoole hawaariyaatesi yaano Pheexiroosi, Indiriyaasi, Yaaqoobinna Yohaannisi ledo no. Insa isi albillittete yanna daafira dhagge ikkitanno masaalo coyiꞌranna hixamanyite macciishshitanni no. Hatti masaalo isi Maganu Mangiste Nugusa ikkannote goofimarchu barruwara alamete aana ikkannore kultannote. Yesuusi hattee baxxitino yannara “ammanaminohunna wodanaamu borojjichi” uullate aana iso riqiwe loosannotanna soqqamaanosira hasiissanno yannara ayyaanaamittete sagale aannota coyiꞌrino.—Mat. 24:45-47.

² Yesuusi aantete hattee masaaloranni, tonne seemore kulanno lawishsha coyiꞌrino. (Maatewoosi 25:1-13 nabbawi.^[1]) Hanni aante noo xaꞌmuwa laꞌno: (1) Konni lawishshiti qara sokka maati? (2) Ammanantino buuramaasine konni lawishshi sokka loosu aana hosiissinohu hiittoonniiti? Tennenni mayi guma afidhino? (3) Yesuusi coyiꞌrinohu kuni lawishshi ninke baalunkura kaaꞌlannonkehu ma garinniiti?

3. Tonne seemore kulanno lawishsha alba xawinsoonnihu hiittoonniiti? Konni garinni xawisa kayinni ma assitara dandiitanno?

³ Sai birxichira laꞌnummonte gede, ammanamino borojjichi muli dirra kawa Qullaawa Borro roorse xawisannohu mayi maaho caale ikkannoro ikkikkinni maa ronseemmorooti. Alba borronke giddo, tonne seemore kulanno lawishshi giddo qummi assinoonni coyibba caabbichu, zayitenna zayitete uduunnichi nafa gatikki wole coyibbara caale ikkitinota xawinsoonni. Kayinni konni garinni xawisa konni lawishshinni ronsannihu lowo geeshsha hasiisanno rosi teeꞌle baꞌꞌanno gede assitannotalla ikkita? Tenne xaꞌmo dawaro afa hasiissannonke.

4. Lawishshu giddo kulloonni (a) idayichi ayeti? (b) seemooti ayeooti?

⁴ Hanni Yesuusi coyiꞌrinohu konni lawishshita qara sokka laꞌno. Umihunni, lawishshu giddo kulloonni manna hedi. Konni lawishshi giddo kulli idayichi ayeti? Yesuusa umosi ikkinoti egennantinote. Isinni Yesuusi wole yannara isonooto idayicho ikkinohu gede asse coyiꞌrino! (Luq. 5:34, 35) Lawishshu giddo kulli seemootina? Yesuusi konni lawishshi giddo, seemootu caabbichonsa xawisiꞌre idayichu daanno yanna baqqi yee agadha hasiissannonsata coyiꞌrino. Isi buurantino harunsaanosi amaddinota “shiima hoshsha” mayyee hajajinoro wodanchi: “Halloꞌne qodhitine qixxaabbe, hattono caabbichoꞌne xawisidhe; mootichinsa sargetewiinni higa geeshsha agartanno . . . mannooti gede ikke.” (Luq. 12:32, 35, 36) Qoleno, Kiristoositi buurantino harunsanno seemoota ikkitinota hawaariya Phaawuloosinna hawaariya Yohaannisi qullaawu ayyaaninni borreessitino. (2 Qor. 11:2; Aju. 14:4) Konni daafira, Yesuusi Maatewoosi 25:1-13 aana noo lawishsha coyiꞌrinohu buurantino Kiristaana amaalatenna qorowisiisateeti.

5. Yesuusi coyiꞌrino lawishshi woꞌmanno yannare qummi assinohu hiittoonniiti?

⁵ Tenne hanni yannate daafira hendo. Yesuusi coyiꞌrino lawishshi hiittee yannara woꞌmannoho? Yesuusi hakko lawishshira jeefote, yannate daafira kulannore coyiꞌrino; isi, “Idayichu dayi” yiino. (Mat. 25:10) Maaja 15, 2013 Agarooshshu Shaera xawinsoonninte gede, Yesuusi Maatewoosi fooliishsho 24 nna 25⁠te coyiꞌrino masaalo isi “daa” daafira sette bayicho kultanno; settenkawa einohu Girikete qaali mittoho. Settenka bayicho kuni qaali, Yesuusi faradatenna tenne busha alame hunate daannota bayiru qarri yanna leellishanno. Konni daafira, kuni lawishshi woꞌmannohu goofimarchu barruwaraati yaate; Yesuusi ‘daannohu’ kayinni bayiru qarri yannaraati.

6. Qooxeessaho noo hedo garinni, tonne seemore kulanno lawishshiti qara sokka maati?

⁶ Konni lawishshiti qara sokka maati? Hanni konni lawishshira qooxeessaho noo hedo laꞌno. Yesuusi hakkuyira albaanni “ammanaminohunna wodanaamu borojjichi” daafira coyiꞌrino. Hakku borojjichi, goofimarchu barruwara Kiristoosi harunsaano mereero sooreeyye ikkitannore buurantino labballo amaddinote shiima gaamooti. Yesuusi kuri labballi ammanantinore ikkite heedhanno gede qorowisiisinonsa. Isi hakkiinni aanche, goofimarchu barruwara heedhannori buurantino harunsaanosi baalanti afidhanno baraarshi gate baꞌꞌannonsakki gede ‘ayewoteno baqqi yite agadhitanno’ gede amaalino. (Mat. 25:13) Xa hanni konne lawishsha seekkine xiinxallino; hattono buurantinori kuni lawishshi amadino amaale harunsitino gara laꞌneemmo.

7, 8. (a) Busulootu seemooti qixxaawe agadhinohu hiittee lame doogonniiti? (b) Buuramino Kiristaani qixxaawe agadhinota leellishinohu hiittoonniiti?

⁷ Yesuusi coyiꞌrino lawishshi, busulootu seemooti gowwootu gede ikkikkinni idayichu daanno yanna qixxaawe agadhinota xawise kulanno. Hiitto? Insara lame hasiissanno akatta noonsa; hasiisannore qixxeesse wodhino, qoleno dea agure baqqi yee agadhino. Hattee qaxaqaꞌa yitinote hashshi saatera idayichu daanno yanna agadhino seemooti, caabbichinsa xoikki idayichu  daa geeshsha seeda yanna baqqi yiinore ikka hasiissinonsa. Onte gowwoota seemoota agurranna, onte busulooti caabbichinsa ledo wole zayiteno anga adhe fulino daafira addinta qixxaawino. Ammanaminohu buuramino Kiristaani konni garinni qixxaawinota leellishinoyya?

⁸ Ee, leellishino! Tenne goofimarchu barruwara, buuramino Kiristaani uyinoonninsa looso jeefote geeshsha ammaname loosate qixxaawino daafira busulootu seemooti gede ikkino. Kuni Kiristaani Maganoho ammaname soqqamate tenne Sheexaanu alame giddo qawaaxxote heeshsho heeꞌra agura hasiissannonsata afino. Insa heeshshonsa Yihowara gudisse uyite soqqantannohu, goofimarchu gambise dayino daafira yite ikkikkinni isonna Beettosi baxxanno daafiraati. Qoleno, tenne busha alamera noote maalaamittete coye baxate hedowiinni, amanyootu maaeellenni, hattono meessira roorsiꞌrate hedowiinni xeertidhe ammanantinore ikkitanno. Insa Idayichu keeshshannoha lawinsaro nafa ayewoteno xawaabba xawissanni qixxaabbe agartanno.—Fil. 2:15.

9. (a) Yesuusi kalaqamunni daafure goxate daafira qorowisiisinohu ma garinniiti? (b) Buuramaasine, “Idayichu dayino” yitanno huuro macciishshite ma assitino? (Lekkaalliidi qaagiishsha lai.)

⁹ Busuloota seemoota qixxaawanno gede kaaꞌlinonsahu layinki coyi dea agure baqqi yee agadhansaati. Buuramino Kiristaani giddo seeda yanna agadhe keeshshi gedensaanni goxannohu heeꞌrara dandaanno? Ee, heeꞌranno. Yesuusi tonnente seemore kulanni, idayichu daa keeshshita “baalunku daafure goxi” yiinota wodanchi. Yesuusi, maalu daafuraancho ikkino daafira baqqi yee agadhate hasatto noosihu diinaggaawanno manchi nafa daafuraranna hedosi billaallitara dandiitannota afino. Ammanantino buuramaasine konne qorowishsha huwattino daafira, ayewoteno baqqi yite agadhate wolu wotinni roore diinaggaabbe loossanni keeshshitino. Yesuusi coyiꞌri lawishshi giddo, hashshu taalootira “Idayichu dayino!” yinita baalunku seemooti macciishshino. Jeefote geeshsha kaajjitinori kayinni baqqi yite agadhiture callaho. (Mat. 25:5, 6; 26:41) Xaa yannara noo buuramaasinena? Tenne goofimarchu barruwara, buuramaasine “Idayichu dayino” yitanno huuro macciishshitino; wole yaattonni, Yesuusi daara kainota leellishshanno taje ammantanno. Qolteno kaajjite uurritino, hattono Idayichu daanno yanna qixxaabbe agadhitanni no.^[2] Ikkollana, Yesuusi coyiꞌrino lawishshi jeefote roorse bade kulanno yanna no. Hiittoonni?

10. Busulootunna gowwootu seemooti hasaawino hasaawi mayine xaꞌminanni gede assannoho?

¹⁰ Yesuusi coyiꞌri lawishshi giddo huwatate roore qarrisara dandaannohu, gowwootunna busulootu seemooti hasaawino hasaawaati. (Mat. 25:8, 9) Ikkina, kageeshshi geeshsha ammanantino buuramaasine kaaꞌlo xaꞌmiꞌrino manna kaaꞌla gibbino woti nooni? Xaano kuni lawishshi woꞌmanno yanna hedanke tenne xaꞌmo dawaro afate kaaꞌlitannonke. Idayicho yaamaminohu Yesuusi firde faradate daannohu bayiru qarri goofara kaꞌꞌanno wote ikkinota qaagi. Hatto ikkiro, seemootu hasaawino hasaawire kulannohu lawishshu gafi woꞌmannohuno hattee yannara ikkannoha dilawannohe? Hatto yee heda garaho; korkaatuno, hatti yanna buuramaasinete jeefote sumuda sumunde gundannite.

11. (a) Bayiru qarri hanafara albaanni maa assinanni? (b) Busulootu seemooti gowwoota zayite hiranno manniwiinni hadhine hidhe yaansa mayyaate?

¹¹ Konni daafira, bayiru qarri hanafara albaanni, uullate aana noo buuramaasine baalantera jeefote sumuda sumunde gundanni. (Aju. 7:1-4) Hakkuyi gedensaanni, iimi woshshattonsa huluullo nookkita ikkitanno. Kayinni hanni bayiru qarri hanafara albaanni noo dirra hedi. Baqqi yite agadhanna ammanama hoogganno buuramaasine ma ikkitannoha lawannohe? Insa iima afidhanno baraarsha afidhukki gattanno. Kuri bayiru qarri hanafara albaanni sumundanniha jeefote sumuda diafidhanno. Hatte yannara,  wolootu ammanantinori buurantanno. Gowwootu bayiru qarri hanafanno wote, Bayira Baabiloonera iillitanno bao laꞌe massara dandiitanno. Insa Idayichu daanno wotira qixxaabbinokkita huwattannohu hatte saatera ikkara dandaanno. Hattee barritino yannara, insa higgannowa hoogge kaaꞌlo xaꞌmidhuro mayi maikkanno? Yesuusi coyiꞌrino lawishshi tennera xawise qolanno. Busulootu seemooti zayitensa gowwootaho uyite guxxa agurte, hiranno manniwa haꞌre hidhara kultinonsa. Kayinni hatti yanna ‘hashshu taaloote’ ikkitinota wodanchi. Gowwootu hatte saatera zayite hiranno manna afidhannoni? Yanna lowo geeshsha yannitino daafira diafidhanno.

12. (a) Buurante kaꞌe jeefote sumuda sumundansara albaanni ammanamansa huꞌnitannorira bayiru qarri yannara mayi iillannonsa? (b) Gowwootu seemooti gede ikkitannori jeefote hiikkitanno?

¹² Hatteente gede, bayiru qarri yannara ammanantino buuramaasine ammanama hooginoha aye manchono kaaꞌla didandiitanno. Hatte yannara uyinanni kaaꞌlo diheedhanno. Hatti saate yanna lowo geeshsha yannitinote. Hattoo manni jeefote ma ikkannoyya? Yesuusi gowwootu seemooti mulla beebba fule haꞌri gedensaanni ikkinore xawise kulino: “Idayichu dayi. Qixxaawe noo seemooti isi ledo sargete jilira ei; hakkiinnino saanqa cunfi.” Kiristoosi bayiru qarri gumulora lowo ayirrinyinni daanno wote, ammanantino buuramaasinesi iimira haaranno. (Mat. 24:31; 25:10; Yoh. 14:1-3; 1 Tes. 4:17) Gowwootu seemooti gede ikkitannorira ammanantannokkirira saanqa cunfanni. Hakkiinni insa, “Mooticha, Mooticha faninke!” yitara dandiitanno. Ikkollana, insarano hattee firdete saatera meu gede ikkino mannira qollannite gedee dawaro qollanninsa: “Halaalinta yeemmoꞌne, kiꞌne diegennoommo.” Tini dadillissannote!—Mat. 7:21-23; 25:11, 12.

13. (a) Buuramino Kiristaani giddo batinyu albillitte ammanantukki gattanno yine heda hasiissannonkekkihu mayiraati? (b) Yesuusi uyino qorowishshi, isi buurantino harunsaanosi ammanannotano leellishanno yineemmohu mayiraati? (Umi misile lai.)

¹³ Aleenni laꞌnummo assaawe hendiro, mayyaa dandiinanni? Yesuusi buurantino harunsaanosi giddo batinyu ganaanni ammanantukki gattanno daafira wole buurranni yaasiiti? Deeꞌni. Yesuusi hakkuyira albaanni “ammanaminohunna wodanaamu borojjichi” busha borojjicho ikkannokki gede qorowisiisinota qaagi. Hatto yaasi kayinni isi togoori ikkanno yee agaranno yaa diꞌꞌikkitino. Hatteente gede, kuni lawishshi qorophe yaate coyiꞌrinoho. Onte seemooti gowwoota ikkeenna onte kayinni busuloota ikkinonte gede, mittu mittunku buuramino Kiristaanchi qixxaawenna baqqi yee agadha woy gowwimmanna ammanama hooga doodha dandaanno. Hawaariya Phaawuloosi isinte gede buuramino Kiristaanira borreessino sokkano tenne assaawe amaddino. (Ibiraawuyaani 6:4-6, 9 nabbawi;^[3]Ibi. 6:7, 8; Marro 30:19 ledo heewisiisi.) Phaawuloosi ammanate roduuwasi seekke qorowisiisinoha ikkirono, insa ‘woyyite nootanna’ albillitte baraarshansa adhate geeshsha iillitanno yee ammanannota aanche coyiꞌrino. Hattonni Yesuusi coyiꞌrino lawishshi amadino qorowishshi, isino buuramaasine ammanannota leellishannoho. Kiristoosi buurantino soqqamaanosi giddo mittu mittunku ammaname heeꞌranna hagiirru baraarsha adha dandaannota afino!

14. Tonne seemore kulanno lawishshi ‘wolu geꞌreewirano’ kaaꞌlanno yineemmohu mayiraati?

¹⁴ Yesuusi tonne seemore kulanno lawishsha coyiꞌrinohu buurantino harunsaanosira ikkino daafira, kuni lawishshi Kiristoosihu ‘wolu geꞌreewira’ kaaꞌlannori dino yaate? (Yoh. 10:16) Deeꞌni, hatto yaa diꞌꞌikkino! Konni lawishshiti qara sokka, “Ayewoteno baqqi yitine agadhe” yitannota ikkitinota qaagi. Tini amaale hasiissannohu buurantinorira callaati? Yesuusi mitte hige togo yiino: “Kiꞌnera yeemmore baalunkura yeemmo: Ayewoteno baqqi yitine agadhe.” (Marq. 13:37) Yesuusi harunsaanosi baalanti ammanante soqqamate wodanansa qixxeessidharanna  baqqi yite agadhitara hasiꞌranno. Konni daafira baalunku Kiristaani heeshshonsa giddo Maganu soqqansho balaxisiissanno buuramaasineha dancha lawishsha harunsa dandaanno. Qoleno, ninke mittu mittunku gowwootu seemooti busuloota zayite huucciꞌrinota deꞌnoonke. Insa zayite huuccidhe hoogansa, ninkera yee ammanaminoha ikkannohu, ninkera yee halaalu giddo kaajje uurrannohu woy ninkera yee baqqi yee agarannohu nookkita qaagiissitannonke. Ninke mittu mittunku Yihowa shoomino Daanyira uminke daafira dawaro qolleemmo. Isi rahe daanni noo daafira qixxaambe agadha hasiissannonke!

15. Kiristoosinna idayichosi sarge baalunku Kiristaanira hagiirsiissannota ikkitinohu mayiraati?

¹⁵ Yesuusi coyiꞌrino lawishshira kulloonniti qara ikkitono ninke baalunkura kaaꞌlitannote. Albillitte ikkitannote hattee sarge daafira hagiidhannokkihu ninke giddo hige ayi no? Buuramaasine iimira hadhanno; Armagedooni oli gedensaanni insa Kiristoosi idayicho ikkitanno. (Aju. 19:7-9) Hatti sarge baalanka gashshannohu guutu gashshooti heeꞌranno gede assitanno daafira, hakkuyi gedensaanni uullate aana heeꞌrannohu baalunku tennenni horo afiꞌranno. Hexxonke iimira haꞌrano ikkituro woy uullate aana heeꞌrano ikkituro, tonne seemore kulanno lawishshinni ronseemmo roso dea hoogate murciꞌne kaꞌno. Yihowa qixxeessinonketa dhaggete heeshsho ragiꞌrate, wodananke qixxeessiꞌne, ammanammoommore ikkinenna baqqi yine agadhine qixxaamboommore ikkanke leellinsho!