“Maganu Yihowa Edenete kaashshu base latisannonna towaatanno gede mancho masse hakko wori. Qoleno Maganu Yihowa manchoho tenne hajajo uyi: ‘Kaashshu basera noote baalante haqqe guma duuwatto geeshsha ita dandaatto. Danchanna busha afisiissanno haqqicho guma kayinni ittooti; korkaatuno ise guma itootto barra mitte huluullono nookkiha reyatto.’”—Kalaqo 2:15-17.

Maganu umi mancho Addaami uullate aana lowo saadanna baxissanno haqqe woꞌmitino gannatera Edenete kaashshu basera worinosi. Hakkiicho Addaami hasiꞌri gede ita dandaannoti guma laaltanno haqqe no. Ikkollana, Maganu Yihowa mitte haqqicho bade kule Addaami ittooti yiino; qoleno giwe itiro reyannota kule qorowisiisinosi.

Addaamira tini hajajo mayyaatero leellinosi? Isi reyo maatiro afino; korkaatuno hakkawaro saada reyitanna laino. Maganu Addaami kalaqinohu gedensaanni hige reyara ikkiro, reyattokki gede qorophi yaasi waaga diafidhino. Hatteentenni, Addaami Maganoho hajajamannohanna hoolloonni haqqicho guma itannokkiha ikkiro, gawalo nookki heeshsho heeꞌrannota yaano reyannokkita afino.

Mitu manni hoolloonni haqqicho yiniti siimu xaadooti yee ammananno; tini kayinni digaraho. Yihowa Addaaminna Heewani ‘ile ilame batiꞌranno gedenna uulla woꞌme ise gashshanno’ gede hasiꞌrino. (Kalaqo 1:28) Konni daafira hoolloonni haqqicho addinta haqqichote. Yihowa tenne haqqicho “danchanna busha afisiissanno haqqicho” ikkitinota coyiꞌrino; korkaatuno tini haqqicho Maganoho mannu oosora danchunna bushu maatiro wossanate noosi qoosso riqibbannote. Addaami tenne haqqicho ita hoogoommero, hajajamannoha ikkinotanna Kalaqinosihanna lowo coye oye maassiꞌrinosi Magano galatannota leellisha dandaanno.

“[Maganu] Addaami togo yii: ‘. . . Itattokki gede hajajoommohe haqqicho guma itootto daafira, . . . fulootto baatto higatto geeshsha albikki hunkiinni daabbo itatto. Bushsha ikkootto daafira, bushsha higatto.’”—Kalaqo 3:17, 19.

Addaami ittooti yinoonnisi haqqicho guma itino. Hajajama giwe tenne assasi mulluri gede assine laꞌnannire diꞌꞌikkino. Kuni assootisi finqillete; qoleno Yihowa assinosihura lowohu danchu coyira hili diniqo nafa noosikkita leellishannoho. Addaami hatte haqqicho guma itasinni Yihowa facci asse agurino; konni garinni buutote qarra abbitannota umisi doogo haꞌra doodhino.

Yihowa balaxe kulinonte gede, Addaami jeefote reyino. Maganu Addaami kalaqinohu ‘baattote aaninni bushsha’ haareeti; qoleno reyanno wote galagale ‘baatto higannota’ kulinosi. Addaami reyiti wolu garinni heeꞌra woy wolewa haꞌre heeꞌra jammarino yaa diꞌꞌikkino. Isi reyi wote kalanqoonnisi bushshi gede heeshsho nookkiha ikkino.—Kalaqo 2:7; Mekibibi 9:5, 10.

“Cubbu mittu manchi widoonni alame ei, reyo qolte cubbu widoonni eꞌino; baalunku cubbo loossino daafira reyo manna baalaho tuqqino.”—Roomu Sokka 5:12.

Addaami finqille woy cubbi lowore daafino. Addaami huꞌninoti 70 woy 80 diri heeshsho ikkitukkinni hegerera heeꞌrate farooti. Hakkiinni saeno, Addaami cubbo loosi yannara guuntesi huꞌnino; konni daafira, sirchisi baalunku isiwiinni guuntete xeꞌne ragiꞌranno.

Ninke baalunku Addaami sirchooti. Cubbu nootanna reyote widira massitannota guuntete xeꞌne noo mannimma isiwiinni ragiꞌnoommo; tenne ragiꞌnoommohu uminke doodhine diꞌꞌikkino. Phaawuloosi mannu ooso qarra dancha gede asse xawisino. Isi togo yee borreessino: “Ani cubboho hiramoommoho maala uddiꞌroommo manchooti. Ani horo tidhoommokki manchooti! Reyote widira massitannote tenne mannimmanni ayi gatisannoe?” Phaawuloosi xaꞌmino xaꞌmora umisi togo yee qolino: “Mootichinke Yesuusi Kiristoosi widoonni gatisannoe Magani galatamo!”—Roomu Sokka 7:14, 24, 25.

“Annu Beettosi alamete Gatisaancho asse soyino.”—1 Yohaannisi 4:14.

Maganu Yihowa cubbu abbino qarrinninna reyote qorichinni ganteemmo doogo qixxeessinonke. Hiittoonni? Isi baxanno Beettosi Addaami gede guuta mancho ikke ilamara uullara soyino. Ikkollana, Yesuusi “hili cubbono diloosino”; konninni Addaamiwiinni baxxinoho. (1 Pheexiroosi 2:22) Yesuusi guuta ikkino daafira, reyote qorichi diꞌꞌiillannosi; konnira isi guuta mancho ikke hegerera heeꞌra dandaannonka.

Ikkirono, Yihowa Yesuusa diinnasi shitara fajjino. Reyihunni sayikkita Yihowa ayyaanaame heeshsho oye reyotenni kayisinosi; gedensaanni isi wirro iimira higino. Addaami umisinna oososi hoogganno gede assino heeshsho qolate Yesuusi iima mare guuta maalaamitte heeshshosi waaga Maganoho shiqishino. Yihowa tenne kakkalo adhe Yesuusa ammantannori hegere heeshsho afiꞌra dandiitanno faro fanino.—Roomu Sokka 3:23, 24; 1 Yohaannisi 2:2.

Konni garinni Yesuusi Addaami huninore qolate waaga kaffalino. Isi ninke hegerera heeꞌnammora yee reyino. Qullaawu Maxaafi togo yaanno: “Yesuusi reyote geeshsha qarra duqqino; . . . isi mittu mittunku manchira yee reyino.”—Ibiraawuyaani 2:9.

Tini qixxaawo Yihowa daafira lowore kultanno. Kaffi yiinohu Yihowahu taashshote seeri garinni, guuntete xeꞌne noonsa manni insaneeto woxxa didandaanno. Ikkollana, baxillisinninna maarosinni isi umisi mannu ooso wodate hasiisannore asse lowo waaga kaffalino; yaano wodote waaga kaffalate umisi Beetto sayise uyino.—Roomu Sokka 5:6-8.

“Kiristoosi reyitinorira bayira ikke reyotenni kaino. Reyo mittu manchi widoonni dagginonte gede, kaono mittu manchi widoonni dagganno. Korkaatuno, baalunku Addaaminni kainohunni reyannonte gede, hattonni baalunku Kiristoosinni kainohunni heeshsho afiꞌranno.”—1 Qorontoosi 15:20-22.

Yesuusi uullate aana heeꞌre kae reyinoti dihuluullissannote; ikkina isi reyotenni kainota leellishshanno taje nooyya? Ammansiissanno taje giddo mitte, Yesuusi reyotenni kai gedensaanni lowo mannira addi addi yannara babbaxxino bayicho leellasiiti. Mitte hige isi 500 saꞌꞌanno mannira leellino. Hawaariya Phaawuloosi Qorontoosi Kiristaanira borreessino sokka giddo, Yesuusi reyotenni kaeenna lainohu mitu manni hakkawote lubbote noota xawisino; hakku manni lainorenna macciishshinore farciꞌra dandaanno.—1 Qorontoosi 15:3-8.

Phaawuloosi Kiristoosi reyotenni kaꞌannorira “bayira” ikkinota qummi assasi, gedensaanni wolootuno reyotenni kaꞌannota leellishshannote. “Qaagooshshu waamma giddo noori baalunku” fultanno yanna daggannota Yesuusi umisi coyiꞌrino.—Yohaannisi 5:28, 29.

“Maganu alame lowo geeshsha baxino daafira, Beettosi ammanannota loosunni leellishannohu baalunku hegere heeshsho afiꞌranno gede ikkinnina baꞌꞌannokki gede, mitto Beettosi uyino.”—Yohaannisi 3:16.

Qullaawu Maxaafihu umi maxaafi reyo dagginonna Gannate baꞌino yanna kulannonke. Jeefote maxaafi kayinni reyo baꞌannonna Maganu uulla Gannate assanno yannare kulanno. Hatte yannara mannu hegerera hagiidhanni heeꞌranno. Ajuuja 21:4 togo yitanno: “Reyo higgeno diheedhanno.” Kuni halaale ikkinota buuxisate kiiro 5 togo yitanno: “Kuni qaali ammannannihonna halaaleho.” Yihowara asseemmo yiinore assate wolqa noosi.

Kuni qaali ‘ammannannihanna halaale’ ikkinota ati ammanatto? Hatto ikkiro, Yesuusi Kiristoosire ledde rosi, hattono iso ammanattota heeshshokkinni leellishi. Tenne assattoha ikkiro, Yihowa hagiirsiisatto. Qolteno, xa afiꞌrattoha falahino atooteno agurranna ‘reyo higgeno heedhannokkiwa, hattono dadillu woy raare woy xisso higgeno heedhannokkiwa’ Gannate ikkitino uullara hegerera heeꞌrate hexxo heedhannohe.