Muli yanna kawa haaru Maganiweelu manni hedo kultannoti batinye maxaaffa gobba tuqqino. Tini maxaaffa lowo manni afate quqquxamanno gede hattono lowo hasaawinna heewo kaꞌanno gede assitino. Tenne lainohunni nervete daafira xiinxallannohu sayinsete fullahaanchi Deevidi Iiglimani togo yee borreessino: “Mite nabbawaano . . . sayinsete fullahaano baalanka coye affe guddinohu gede assite heddanno.” Isi lede togo yiino: “Dancha sayinse kayinni ayewoteno wolootu hedo macciishshitanno; qoleno sayinsete lopho kultanno xagge haaru coyi woꞌminote.”

Lowo diro, sayinsete fullahaano kalaqamu daafira kaꞌannote hibbo ikkitanno xaꞌmuwara dawaro afate xiinxallitino xiinxallo lowore dhaggeeffantannire assitino. Ikkirono, insa giddo mitootu xiinxallitanni lowo soꞌro loossino wotino no. Hundinni kayisse egennantinori sayinsete fullahaano giddo mittu Ayizaaki Niwuteniiti. Isi goshoonshete wolqa pilaaneetta, beeddahenna gaalaksuwa mitteenni amadisiisante mitte kalqete alame ikkitanno gede assitanno gara xawisino. Qoleno kompiyuterete loosira, gordo haꞌre xiinxallatenna niyukileerete fiiziksera horoonsiꞌnanni shallago kalaqino. Ikkollana, Niwuteni irsaase yinanni siwiilanna wole siwiilla culkaho soorrate, alkemii yinannita ayyaantotenna digintete wolqanni loossannota kaphu sayinseno harunsino.

Niwuteni heeꞌrihunni mitu 1,500 diri albaanni heeꞌrinohu Girikennihu gordu bissa xiinxallo fullahaanchi Tolemii, illetenni calla laꞌꞌanni gordoho noore xiinxallino. Isi hashsha iima pilaaneetta hadhanno doogga afino; hattono kaarta loosate fullahinoho. Ikkollana uulla baalunkurira mudukkoho woy mereeroho yee ammananno. Gordu bissa orte xiinxallanno fullahaanchi Kaarli Saagani, Tolemii daafira togo yee borreessino: “Isi Uulla kalqete alamera mudukkoho yiinota mannu 1,500 diro ammane heeꞌrino; tini qolte fullahaano nafa lowo geeshsha sodhara dandiitannota leellishshannote.”

Yannankete sayinsete fullahaanorano gurcheessanno coyi tuncu yaannonsa. Insa kalqete alame daafira affe guda dandiitakka? Sayinse lophitino dirimanna ninkera kaaꞌlannore assitinota ammana gara ikkiturono, sayinse dandiitannokkiri nootano heda hasiissanno. Fiiziksete fullahaanchi Pooli Deeviisi togo yiino: “Mittu mittunku coyira ikkadonna isi isiniiwa sumuu yaanno xawishsha afiꞌra didandiinanni.” Tini yaatto mitto morommannikki halaale xawissanno: Mannu ooso kalaqamu daafira affe guda didandiitanno. Konni daafira, sayinse baalanka coye xawisse kula dandiitanno yine coyiꞌnannita ammanne adhate albaanni heeshshi gotti asse heda busullete.

Qullaawu Maxaafi kalaqamu giddo noote dhaggete coyibba daafira togo yaanno: “Kuneeti! [Maganu] doogga giddo tini qacce qaccetella; isi daafira macciishshinoommo coyi hashaanshe kulloonniri geeshshaatilla!” (Iyyoobi 26:14) Mannaho afatenna wodanchate wolqansara aleenni ikkinohu lowo coyi no. Ee, hawaariya Phaawuloosi mitu 2,000 diri albaanni borreessinori xaano ikkiro halaaleho: “Maganu durummanna hayyosi hattono egennosi hiitto xeertidhino! Yoosino xiinxalline dianfannite! Dooggasino diꞌꞌiillinannite!”—Roomu Sokka 11:33.