1. Tini heeꞌnoommo yanna hiittoote?

 HEEꞌNOOMMOHU ‘dandee heeꞌrate qarrisannoha baxxino diro’ yaamantino yanna giddooti. “Goofimarchu barruwa” hanaffu dirinni yaano 1914⁠nni kayisse alamete ikkito saꞌu yanna baalantenni roore bushshino. (2 Xim. 3:1-5) Qullaawu Maxaafi “bushuullunna dogaasine bunshete aana bunshe leddanni” hadhannota masaalino daafira, tini alame roore maaeeltanni hadhanno.—2 Xim. 3:13.

2. Batinyu manni hiittoo boohaarsha baxanno? (Umi misile lai.)

² Batinyu manni boohaarshaho yee finqille, foorre, agaanintete looso woy wole togoore laꞌꞌanno woy assanno. Lawishshaho Interneete, televizhiinete pirogiraame, filmuwa, qalote borronna metseetta finqillenna foorre danchuri gede assite shiqishshanno. Alba makkiꞌnanni amanyooti xa mite gobbuwara higge affinoha ikkino. Hatto yaa kayinni togoo amanyoote Maganu baxanno yaa diꞌꞌikkino.—Roomu Sokka 1:28-30 nabbawi; a Rom. 1:31, 32.

3. Qullaawu Maxaafi seeri garinni heedhannore alame ma garinni laꞌanno?

 ³ Umi xibbi diro heedhinori Yesuusi harunsaano bushu boohaarshiwiinni xeertidhino. Konninna wolu danchu amanyootinsanni kainohunni mannu giwinonsa, hattono daramanno gede assinonsa. Hawaariya Pheexiroosi togo yee borreessino: “Amanyoote baꞌinote togoote maaeela heeshshonni insa ledo doda agurtinanni daafira, coyi gurchaawannonsa; konni daafira xontannoꞌne.” (1 Phe. 4:4) Yannankerano alame Maganu seeri garinni heedhannore mannunni galtinokkire ikkitinohu gede assite laꞌanno. Qoleno, “Kiristoosi Yesuusi ledo mittimma kalaqidhe Maganoho galtinore ikkite heeꞌra hasidhannori baalunku darantanno.”—2 Xim. 3:12.

4. Qullaawu Maxaafi alame ma assineemmokki gede amaalannonke?

⁴ Qullaawu Maxaafi Maganu fajjo assa hasidhannori tenne alamenna assootese baxxannokki gede amaalanno. (1 Yohaannisi 2:15, 16 nabbawi. b) Tenne alame gashshinohu ‘maganose’ ikkinoho Sheexaane Daawuloosiiti; isi manna soꞌrisiisate ammaꞌno, mangistuwa, daddalu dirijjittanna xaadooshshu buusa horoonsiꞌranno. (2 Qor. 4:4; 1 Yoh. 5:19) Konni daafira, ninke Kiristaanu busha jaaloomanna hoshsha qoropha hasiissannonke. Ayyaanunni borreessaminohu Maganu Qaali konne xinta ikkino halaale kulanno: “Dogantinoonte. Bushu jaaloomi dancha amale hunanno.”—1 Qor. 15:33.

5, 6. Hiittoo manni ledo jaalooꞌma qoropha hasiissannonke? Mayira?

⁵ Danchu amalinke baꞌꞌannokki gede agadhate, bushare assate rosichi noonsa manniwa aana qoropha hasiissannonke. Hatto yaa bushare assannohu ammaninokki manni ledo calla ikkikkinni, Yihowa magansiꞌneemmoreeti yaanni afanni heeꞌrenni higgesi diiganno manni ledono jaalooꞌma qoropha hasiissannonke yaate. Ani Kiristaanaho yaannohu togoo manni kabbaade cubbo loose kae maaro eannokkiha ikkiro, insawa aana agura hasiissannonke.—Rom. 16:17, 18.

⁶ Maganu higgera hajajamannokki manni ledo jaalooꞌmineemmoha ikkiro, insa hagiirsiisate yine insa assitannore assate widira hinge dooꞌnammora dandiineemmo. Lawishshaho, fooranno manniwa aanneemmoha ikkiro, ninkeno amanyoote bainore assate kaꞌnammora dandiineemmo. Mitu roduuwinkera togoori iillinonsa; kuri giddo mitu isinni maaro ea gibbino daafira bohantino. (1 Qor. 5:11-13) Kuri mannooti Yihowawa higgannokkiha ikkiro, Pheexiroosi yiinori gede ikkitanno.—2 Pheexiroosi 2:20, 22 nabbawi; c 2 Phe. 2:21.

7. Muli jaallanke assiꞌra hasiissannonkehu hiittoo mannaati?

⁷ Maganu higge harunsitannokkirira nafa danchuulle ikkineemmoha ikkirono, togoo manna muli jaallanke assiꞌra dihasiissannonke. Konni daafira, mine kalaqiꞌrinokkihu mittu Yihowa Farciꞌraasinchi, heeshshose Maganoho sayisse uyitinokkitenna ammanantinokkite, hattono Maganu seera ayirrissannokki meyaate ledo adhamate hede mitteenni yanna sayisa dihasiissannosi. Yihowa higge garinni heeꞌrannokki manninni dukkisamantenni Maganoho ammanammoommore ikka woyyitanno. Muli jaallanke assiꞌra hasiissannonkehu Maganu fajjo assitannore callaati. Yesuusi togo yiino: “Maganu fajjo assannohu baalunku labbaa rodooꞌyaati, meya rodooꞌyaatinna amaꞌyaati.”—Marq. 3:35.

8. Bushu jaaloomi hundi Isiraeele gawajjinohu hiittoonniiti?

 ⁸ Bushu jaaloomi hundi Isiraeele lowo geeshsha gawajjino. Yihowa insa Gibitsete borojjimmanni fushshe Hexxote Gobba haare haꞌranni noonsa yannara, hakko heedhanno daga ma garinni laꞌꞌa hasiissannonsaro togo yee kulinonsa: “Magannansara sagaddooti woy dogante insara soqqantooti; insa assitannore harunsitooti. Insa fiite huni, magansiꞌrate horoonsidhanno heelliichuwansano uullate gani. Maganiꞌnera Yihowara soqqamme.” (Wol. 23:24, 25) Gedensaanni kayinni, roore Isiraeele Maganu uyino biddishsha diharunsitino. (Far. 106:35-39) Insa Maganoho ammanantinokkire ikkitino daafira yannate gedensaanni Yesuusi togo yiinonsa: “Kuneeti! Mineꞌne kiꞌnera facci assine agurranni.” (Mat. 23:38) Yihowa Isiraeele facci asse agure, atootesi haarote kalaqantinote Kiristaanu songora uyino.—Looso 2:1-4.

9. Tenne alamehu xaadooshshu buusi daafara dandaannoho yineemmohu mayiraati?

⁹ Tenne alamehu batinyu xaadooshshu buusi lawishshaho televizhiinete pirogiraame, webisayitenna maxaaffa ayyaanaamittenke daaffara dandiitannoreeti. Togoo coyibba qixxaabbannohu Yihowaranna isi uyino hexxora noonke ammana kaajjishate diꞌꞌikkino. Tini coyibba Sheexaanunnita busha alame hexxinanni gede xixxiibbannote. Konni daafira, “alamete yorto” kakkayisanno boohaarsha doodhineemmokki gede lowo geeshsha qoropha hasiissannonke.—Tit. 2:12.

10. Muli yannara, gawajjitannoti nabbambanninna laꞌnanni coyibba hiikkitanno?

¹⁰ Muli yanna giddo, gawajjitannoti nabbambanninna laꞌnanni coyibba baꞌanno. Sheexaanu alame baꞌanno wote tini baalanti coyibba diheedhanno. Maganu Qaali togo yaanno: “Tini alamenna yortose saꞌanni no; Maganu fajjo assannohu kayinni hegerera heeꞌranno.” (1 Yoh. 2:17) Faarsaanchuno togo yee faarsino: “Bushuullu baꞌanno; Yihowa hexxitannori kayinni uulla ragidhanno. Jooguullu kayinni uulla ragidhanno; keeru woꞌmanno daafira lowo geeshsha tashshi yaannonsa.” Mageeshshi geeshsha? “Keeraano uulla ragidhanno; ise aanano hegerera heedhanno.”—Far. 37:9, 11, 29.

11. Maganu mannisira dancha ayyaanaamittete sagale shiqishanni noohu hiittoonniiti?

¹¹ Tenne goofimarchu barruwara Yihowa dirijjite qixxeessitanno coyibba alame qixxeessitanno coyi gede ikkikkinni, hegere heeshsho afiꞌrate kaaꞌlanno akati heeꞌrannonke gede kaaꞌlitannote. Yesuusi Yihowa huucciꞌranni togo yiino: “Hegere heeshsho afidhanno gede, ati callu halaalaancho Magano ikkoottoha atenna soottoha Yesuusi Kiristoosi afa hasiissannonsa.” (Yoh. 17:3) Iima noo Anninke dirijjitesi widoonni kiꞌannotanna falakkinota ayyaanaamittete sagale shiqishanni noonke. Halaalu magansiꞌrara kaaꞌlitanno metseetta, birosherubba, maxaaffa, viidiyonna Webisayite noonke daafira lowo geeshsha maassammoommoreeti! Qoleno, Maganu dirijjite alamete deerrinni 110,000 saꞌanno songuwara lamalate kiiro gambooshshu heeꞌrannonke gede assitino. Songote gambooshshiwa, hattono woradunna qoqqowu gambooshshiwa, Maganohonna isi uyinonke hexxora noonke ammana jawaata ikkitanno gede kaaꞌlannonkeha Qullaawu Maxaafi aana xintamino roso ronseemmo.—Ibi. 10:24, 25.

12. Qullaawu Maxaafi ‘Mooticha ammaninohu ledo calla’ adhamate daafira aanno amaale xawisi.

¹² Busha jaalooma qoropha hakko iso adhama hasiꞌranno Kiristaanira roore hasiissannote. Maganu Qaali xawise togo yee amaalanno: “Ammantinokkiri ledo gara ikkitinokki doogonni quraanyantinoonte. Keeraanchimmanna finqile  mayi xaadooshshe afidhino? Woy xawaabbahonna tunsichoho mayi guti noonsa?” (2 Qor. 6:14) Qullaawu Maxaafi, adhama hasidhannori Maganu soqqamaano ‘Mooticha ammaninohu ledo calla’ yaano heeshshosi Yihowara sayise oye cuuaminohunna Qullaawa Borro seeri garinni heeꞌranno manchi ledo calla adhama hasiissannonsata amaalanno. (1 Qor. 7:39) Kiristaanu ammanate roduuwinsa mereerinni adhitannoha ikkiro, Maganoho ammanantinore ikkate kaaꞌlitannonsata Yihowa baxxanno aggaare afidhanno.

13. Maganu adhanna adhama lainohunni Isiraeelete uyino hajajo hiitteeti?

¹³ Yihowa soqqamaanosira woyyannore afino; qoleno, adhanna adhamate daafira noosi lao disoorrantino. Hanni Muse widoonni Isiraeelete dagara uyino hajajo hedi. Yihowa magansidhannokkire qooxeessaho heedhanno daga lainohunni Isiraeelete togo yitanno hajajo uyinoonni: “Insa ledo horonta adhantooti. Seennekki labballi oosonsara uyitooti, woy seennensa labballi oosokkira haadhooti. Korkaatuno insa labballi oosokki ane harunsa agurte wole magannara soqqamate widira higganno gede assitanno; hakkiinnino Yihowa hanqi ate aana buwanno, isino bayichonko hunannohe.”—Marro 7:3, 4.

14, 15. Salamooni Yihowa hajajo lashshi asse agurasi gawajjitinosihu ma garinniiti?

¹⁴ Daawiti beetti Salamooni nugusa ikki wote umi qara, hayyo afiꞌrate huuccatto assiꞌrino; konnira Maganuno lowo hayyo uyinosi. Konni garinni, Nugusu Salamooni hayyosinninna qawaaxxote gobba gashshaancho ikkasinni maccaha ikki. Saaba gobba mootitte Salamooniwa daggu yannara dhagge assidhe togo yitino: “Kawira daye illeꞌyanni laumma geeshsha kulloonniere diammanoomma. Kuneeti! Darate nafa dikulloonnie. Macciishshoommahunni lowo geeshsha roortanno hayyonna durumma noohe.” (1 Neg. 10:7) Ikkollana, Salamooniti dadillissanno xagge, mittu manchi ammantinokkiri ledo adhantinoonte yitannota Maganu higge lashshi assanno wote mayi ikkannoro leellishshannote.—Mek. 4:13.

¹⁵ Salamooni, Maganu lowore assinosiha ikkirono Yihowa magansiꞌrannokkihu qooxeessu manni ledo adhama hooltannota maganittete hajajo lashshi asse agurino. Salamooni “batinye wole gobba meento baxino”; isi 700 minaamuwanna 300 wole meento gashshino. Tini ikkitosi mayi guma abbitino? Salamooni geedhi yannara, “minaamuwisi wodanasi wole maganna widira qoltusi; . . . qoleno Salamooni Yihowa albaanni busha ikkinore assi.” (1 Neg. 11:1-6) Bushu jaaloomi Salamoonira hayyosi baꞌanno gedenna halaalu magansiꞌra giddonni fulanno gede assinosi. Ee, Yihowa magansiꞌrannokki manchi ledo adhamate hedo noonsa Kiristaani tenne lae qoropha hasiissannonsa!

16. Ammantinokki galte noonsa Kiristaana Qullaawu Maxaafi mayyee amaalanno?

¹⁶ Adhami gedensaanni Maganu soqqamaancho ikkinohuna? Qullaawu Maxaafi togo yaanno: “Minaamuwa, qaaleho hajajamannokki minaanni heeꞌriro mitto qaaleno coyiꞌnikki minaamuwinsa amanyootinni qeelamanno gede, minaanniꞌnera maahoyye yitine galle.” (1 Phe. 3:1) Tenne yinoonnihu Kiristaana ikkino minaamuwira ikkirono, tini amaale ammantinokkita adhe heeꞌre Yihowa soqqamaancho ikkino minaannirano kaaꞌlitannote. Qullaawu Maxaafi yaanni noori goꞌlinore diꞌꞌikkino: Dancha minaanna woy minaama ikki; qoleno Maganu adhanna adhama lainohunni fushshino seeri garinni heeꞌri. Ammantinokkiri batinyu minaannuwi woy minaamuwi, galtensa Maganu seera rossu gedensaanni woyyaabbino gara laꞌe halaalu minira daggino.

17, 18. Nohi Baote Waa gate saꞌꞌanno gede kaaꞌlinosiri maati? Umi xibbi diri Kiristaani Yerusaalamete baonni gatanno gede kaaꞌlinonsari maati?

¹⁷ Bushu jaaloomi dancha amale hunannoha ikkirono, danchu jaaloomi kayinni dancha  guma laalanno. Hanni Nohi lawishsha laꞌno; isi busha alamera heeꞌrinoha ikkirono, qooxeessisira noo daga muli jaallasi diassiꞌrino. Hatte yannara, “Yihowa mannu bunshe uullate aana lowota ikkitinotanna wodaninsa hedo baalanti duuchanka wote bunshete widira higge dooꞌinota huwati.” (Kal. 6:5) Konni daafira Maganu alame woꞌmate aana baote waa abbe hattee busha alamenna ise baxxannore hunino. Ikkollana, “Nohi keeraancho manchooti. Isi dirisira noo manni mereero mishsho nookkiha ikkinota leellishino. Nohi halaalaanchu Magani ledo qaafino.”—Kal. 6:7-9.

¹⁸ Ee, Nohi Magano baxannokki manni ledo dijaalooꞌmino. Isinna lamala ikkitannoti maatesi miilla Maganu uyino looso diinaggaabbe loossino; hakkuyi loosi giddo mittu markaawe seekkate. Qoleno Nohi “keeraanchimmate daafira sabbakannoho.” (2 Phe. 2:5) Nohi wolu mannira sabbakasi, markaawe seekkasinna maatesi ledo gamba yee heeꞌrasi Magano hagiirsiisannoha dancha coye assanni heeꞌranno gede kaaꞌlitinosi. Konni garinni, Nohinna maatesi Baote Waa gatte saꞌino. Ninke baalunku insa oosooti; konni daafira, Nohinna maatesi Yihowara hajajante busha jaalooma qorophitino daafira galata hasiissannonke. Ammanaminohunna hajajamannohu umi xibbi diri Kiristaanino Maganiweelu manniwiinni xeertiꞌransanni 70 M.D. Yerusaalame baꞌu yannara keere saino.—Luq. 21:20-22.

19. Yihowara ammanammoommore ikkine heeꞌrate kaaꞌlannonkeri maati?

¹⁹ Yihowa magansiꞌneemmore ikkinoommo daafira, Nohi, maatesinna umi xibbi diri Kiristaani faale haꞌra hasiissannonke. Tenne busha alame manniwiinni xeertiꞌne, haammata miliyoone ikkitannori ammanantino roduuwinke ledo dancha jaalooma kalaqiꞌno. Maganittete hayyonni massagantannori ledo quraanyamanke, qarrissannote tenne yannara ‘ammanatenni kaajjine uurrineemmo’ gede kaaꞌlitannonke. (1 Qor. 16:13; Law. 13:20) Qoleno, albillitte afiꞌneemmoha kaajja atoote hedi! Ee, tenne goofimarchu yannara busha jaalooma qorophineemmoha ikkiro, tenne busha alame baonni gante dagge furduggi yitara noota haaro alame eꞌneemmo.