Diru kiiro lowo miliyoone ikkannoha Qullaawa Maxaafanna Qullaawu Maxaafi aana xintantino borro attamme mannaho tuqinseemmo. Alamete deerrinni sinu biironna borro attammanni maashine worranni bayicho minneemmo. Lowo kume ikkitanno songuwa Mangistete Addaraashe yinannihu biifadunna mereerimu magansiꞌnanni bayichira gamba yitanno. Konne baala assate woxe afiꞌneemmohu hiikkiinniiti?

Loonseemmo loosira woxe afiꞌneemmohu meessi fajjonni fushshinanni fushshonniiti. (2 Qorontoosi 9:7) Tonaasettu lamalayina honsunni fultinoti tenne metseeteti layinki ittime togo yitanno: “‘Tsiyoonita Agarooshshu Shae’ [hakkawaro tenne metseete suꞌmaati] YIHOWA umisi irkisannota ammanneemmo; hakko daafira, Agarooshshu Shae manna woxe dihuuccidhanno, hattono dieegantanno.” Xaano ikkiro tini hedonke disoorrantino.

Mannu uminsanni fushshanno fushsho sinu biironke sonkanni, woy mitte mittente Mangistete Addaraashenke giddo noote fushshote saaxinera worranni. Ikkollana kayinni asaraate, woy mutsuwaate gamba diassineemmo; hattono soqqanshotenna borronkera woxe dixaꞌmineemmo. Qoleno sabbankoommo daafira, songote giddo rosiinseemmohura woy magansiꞌnanni mine mina kaaꞌlinoommo daafira woxe dibaantanninke. Ee, Yesuusi, “Mulla adhitinoonniha mulla uuyye” yiino. (Maatewoosi 10:8) Addi addite sinu biironkeranna qara biironkera soqqantannori hattono Yihowa Farciꞌraasinehu Aliidi Bisi damooza baantannikkihu ammaꞌnote maamari giddo soqqantanno miillaati.

Fushshinanni woxe kalaqamu dano iillitinonsare kaaꞌlateno horoonsiꞌneemmo. Hundi Kiristaani qarru giddo noorira noonsare hagiirrunni uyino. (Roomu Sokka 15:26). Hatteente gede, ninkeno dano iillitinonsa roduuwira galtannonna magansidhanno mine gatamarre, hattono sagale, uddidhannorenna xagga uyine kaaꞌlineemmonsa.