AANIIDI QOOLIHA COYI UMO | MAGANU OLA OLAMMANNITA BAXANNO?
Umi Xibbi Diro Maganu Ola Laꞌꞌanno Gara
Umi xibbi diro baasa gadachamino manni no. Kuni Yihudu manni Roomu Gashshooti gadadisinsa yannara albi annuwansante gede Maganu gadadunni fushshansara duucha hige huucciꞌrinoti dihuluullissannote. Hakkiinnino insa Yesuusire kullanna macciishshitu. Isi daanno yine masaalloonni Mesihicha ikkinota buuxisiyya? Hakkawaro batinyu manni, ‘kuni manchi Isiraeele [Roomunnihu kadote gashshootinni] gatisannoho yee hexxino.’ (Luqaasi 24:21) Ikkollana kaaꞌlo afiꞌra didandiitino. Isinni 70 M.D., Roomu olanto dagge Yerusaalamenna hakko katami giddo noo beetemeqidese giirte buluushshitino.
Kuni ikkinohu mayiraati? Maganu hunda olami gede, Yihudootaho olaminokkihu mayiraati? Woy gadadu giddonni fulate olantara hajajinonsakkihu mayiraati? Hatte yannara Maganoho olaho noosi lao soorrantinoni? Disoorrantino. Yihudu manna lainohunni mittu soorramino coyi no. Insa Maganu Beetti Yesuusi Mesihicha woy Buuraminoha ikkinota ammana gibbino. (Hawaariyaatete Looso 2:36) Hakko daafira, Yihudu daga Maganu ledo noonsaha baxxino jaalooma huꞌnitino.—Maatewoosi 23:37, 38.
Hakkuyi gedensaanni Maganu Yihudu dagano ikkito hexxote gobbansa agara agurino; qoleno insa Maganu fajjino ola olammanni heeꞌnoommo yaa didandiitanno. Yesuusi balaxe coyiꞌrinonte gede, Maganu aanno atoote maalaamitte Isiraeelewiinni hoolle wole haaro dagara yaano ayyaanaamitte Isiraeelera uyinoonni; yannate gedensaanni kuri, Qullaawu Maxaafi giddo “Maganu Isiraeele” yinoonni. (Galaatiya 6:16; Maatewoosi 21:43) Ayyaanunni buuramino Kiristaani songo ayyaanaamitte Maganu Isiraeele ikkitino. Umi xibbi diro insa, “Xa kiꞌne Maganu dagaati” yinoonni.—1 Pheexiroosi 2:9, 10.
Umi xibbi diri Kiristaani “Maganu daga” ikkino daafira, Maganu insa Roomu gadadi giddonni fushshara olamiyya? Woy gadadissannonsari ledo olantanno gede hajajinonsa? Dihajajinonsa. Hajajinonsakkihu mayiraati? Sai birxichira laꞌnummonte gede, Maganu ola fajjanno wote olammanni yanna doorannohu iso callaati. Maganu umi xibbi diri Kiristaani daafira diolamino; qoleno insa olantara difajjino. Konni daafira umi xibbi diri Maganu gadadonna bunshe hunate olamanno yanna diꞌꞌikkino.
Hundi warite Maganu soqqamaano gede, umi xibbi diri Kiristaanino Maganu gadadonna bunshe hunanno yanna dagga geeshsha agadha hasiissinonsa. Hakka geeshsha, Maganu insa diinnansa ledo uminsanni fulte olantanno gede difajjinonsa. Yesuusi Kiristoosi rosiisanni tenne xawise kulino. Lawishshaho, isi harunsaanosi olantanno gede dikulino; isinni togo yee rosiisinonsa: “Diinnaꞌne baxanna darantinanni gede assitannoꞌnerira huuccatto assa agurtinoonte.” (Maatewoosi 5:44) Yesuusi Roomu wottaaddari umi xibbi diri Yerusaalame qasannota kuli wote rosaanosi olantanno gede ikkikkinni, xooqqanno gede kulinonsa; insano tenne assitino.—Luqaasi 21:20, 21.
Hawaariya Phaawuloosino ayyaanunni togo yee borreessino: “Kiꞌne umiꞌne rabbisidhinoonte; . . . korkaatuno ‘Rabba anete, ani bado qoleemmo,’ yaanno Yihowa yine borreessinoonni.” (Roomu Sokka 12:19) Phaawuloosi kowiicho qummi assinoti Maganu hundi waro Zelewaawuyaani 19:18 nna Marro 32:35 aana coyiꞌrino hedooti. Sai birxichira laꞌnummonte gede, hundi waro Maganu mannisira rabba qolino doogga giddo mitte diinnansa ledo olantanna kaaꞌlate. Konni daafira Phaawuloosi borreessino qaali, Maganoho olu daafira noosi lao soorrantinokkita leellishanno. Umi xibbi dirono, Maganu ola soqqamaanosira rabbisatenna gadadonna bunshe hunate kaaꞌlannori gede asse laꞌꞌanno. Ikkollana hundi warinte gede, togoo ola olamannohu ayetironna olammanni yanna doorannohu Magano callaho.
Ee, Maganu umi xibbi diri Kiristaani ola olamanno gede dihajajino. Yannankerana? Xaa yannara Maganu ola olantara fajjino daga nooni? Woy tini yanna Maganu soqqaamaanosi daafira olamannota ikkitinoni? Yannankera Maganu ola ma garinni laꞌꞌanno? Konni gafihu jeefote birxichi kuri xaꞌmuwara dawaro qolanno.
