Maarqoosi Wongeella 14:1-72
-
Kakkalaano Yesuusa shitara gano gantu (1, 2)
-
Mitte mancho Yesuusi lekkara shitto duntu (3-9)
-
Yihudi Yesuusa sayise uyi (10, 11)
-
Jeefote Faasika (12-21)
-
Yesuusi Mootichu Hurbaate xinti (22-26)
-
Yesuusi, Pheexiroosi kaadannosita coyiꞌri (27-31)
-
Yesuusi Geetesemaane yinanniwa huuccatto assiꞌri (32-42)
-
Yesuusa amandi (43-52)
-
Yoo yinannisi gede Sanihediriini shongo albira shiqi (53-65)
-
Pheexiroosi Yesuusa kaadi (66-72)
14 Faasikunna Irsho Nookki Timi Ayyaanira lamu barri gate no; kakkalaanote roorrootinna seeru rosiisaano iso amaddannonna* shitanno faro hasidhanni gano gantanni no.
2 Ikkollana, “Mannu cancamara dandaanno daafira, iso ayyaanu yannara amada dihasiissannonke” yitu.
3 Yesuusi Biitaaniyaho Simooni yinannihu dhiigu dhibbi amadinosi manchi mine sagale itanni heeꞌreenna, mitte mancho lowo woxita naardoosi yinannita kaajja shitto* albaasxiroosi yinanni gujuujjera haadhe daggu. Ise gujuujjete goowa hiiqqite fante, shitto Yesuusi umira duntu.
4 Mitootu tennera hanqite mimmito togo yitu: “Hanni tenne shitto mulla mayira hunnanni heeꞌnoonni?
5 Tenne shitto 300 saꞌanno diinaarera* hirre woxe buxanete uyinoommero hanni mayi no!” Qoleno insa manchote lowo geeshsha hanqitu.*
6 Yesuusi kayinni togo yii: “Agurrese. Mayira qarrissinannise? Ise anera dancha coye assitino.
7 Buxane woꞌmanka woyite kiꞌne ledo heedhanno daafira, baxxini woyite insara danchare assa dandiitinanni; ani kayinni woꞌmanka woyite kiꞌne ledo diheeꞌreemmo.
8 Ise dandiitannore assitino; ane waammate qixxeessate bisiꞌyara balaxxe shitto duntino.
9 Halaale yeemmoꞌnena, dancha duduwo alame woꞌmate dudumbanniwa baalankawa, tini mancho assitinoreno ise qaaggora kullanni.”
10 Tonaalamu giddonni mittu, Asqorootu Yihudi, Yesuusa insara sayise aara kakkalaanote roorrootiwa mari.
11 Insa tenne macciishshituti lowo geeshsha hagiidhite woxe* uyitasira qaale eꞌu. Konnira isi, Yesuusa sayise aanno injo hasiꞌra hanafi.
12 Irsho Nookki Timi Ayyaanira umi barra, rosamino garinni Faasiku kakkalo shiqinshanni yannara rosaanosi togo yitusi: “Faasiku hurbaate haꞌne mama qixxeessinammohera hasiꞌratto?”
13 Isino rosaanosi giddonni lame togo yee soyi: “Katama hadhine, hakko wayi gambayicho duhino mancho affinannina isi hoode hadhe.
14 Manchu eannowa eꞌine minu anna, ‘Rosiisaanchu, “Rosaanoꞌya ledo Faasiku hurbaate iteemmoti wosinu kifile hiikkiicho no yiino”’ yiiyye.
15 Isino, minu aana minnoonni minira karre qixxeessinoonnita halaꞌlado kifile leellishannoꞌne. Faasiku hurbaate hakko qixxeessenke.”
16 Rosaanosino hadhe katama iillituti, baalunku coyi Yesuusi yiinonsa gede ikke nooha affu; Faasiku hurbaateno qixxeessitu.
17 Hashshihu gedensaanni, Tonaalamunku ledo dayi.
18 Ofolte hurbaate ittanni heedheenna Yesuusi, “Halaale yeemmoꞌnena, kiꞌne giddo mittu ledoꞌya itanni noohu sayise aannoe” yii.
19 Insano lowo geeshsha dadillite mittu mittunku, “Hakku aneetini?” yitusi.
20 Isino togo yiinsa: “Kiꞌne Tonaalamunku giddonni mittu ane ledo saanete tima qasiꞌranni nooho.
21 Manchi Beetti balanxe isi daafira borreessinoonni garinni reyanno; manchi Beetto sayise aannohura kayinni aanneꞌe! Hakku manchi ilama hoogoommero woyyannosihu baino.”
22 Sagale ittanni heedheenna, Yesuusi tima haaꞌre maassiꞌrihu gedensaanni hiiqqaqqe insara aanni, “Hiiꞌe; kuni maalaꞌyaati yaate” yiinsa.
23 Hakkiinni finiincho haaꞌre Magano galatihu gedensaanni uyinsa; insa baalunkuno finiinchunni aggu.
24 Isino togo yiinsa: “Tini, lowo mannira duꞌnantannote qaalu gondoori mundeeꞌyaati yaate.
25 Halaale yeemmoꞌnena, Maganu Gashshootira haaro woyine ageemmo barri daa geeshsha layinkita tenne woyine horonta diageemmo.”
26 Jeefote, galatu faarso faarsituhu gedensaanni Ejedhete Ilaala hadhu.
27 Yesuusi togo yiinsa: “‘Allaalaancho ganeemmo; geꞌreewuno billaallanno’ yine borreessinoonni daafira, kiꞌne baalunku gufidhinanni.
28 Ikkollana, reyotenni kaummohu gedensaanni kiꞌne balaxe Galiila saeemmo.”
29 Pheexiroosi kayinni, “Wolootu baalu gufidhuro nafa, ani digufiꞌreemmo” yiisi.
30 Hatte yannara Yesuusi togo yiisi: “Halaale yeemmohena, techo konne hashsha lukkichu lame hige ganikki ati sase higge kaadattoe.”
31 Pheexiroosi kayinni, “Reya hasiissuero ate ledo reyemmo ikkinnina, horonta dikaadeemmohe” yee kaajjishe coyiꞌri. Wolootu baalunkuno hatto yitu.
32 Hakkiinni insa Geetesemaane yinanni base daggu; isi rosaanosi, “Ani huuccatto assiꞌrammo geeshsha kiꞌne kowiicho ofolle” yiinsa.
33 Yesuusi Pheexiroosi, Yaaqoobinna Yohaannisi ledosi haaꞌre haꞌri; hakkiicho lowo yaaddonna* dadilli amadisi.
34 Isi togo yiinsa: “Yaaddo shitanni nooe.* Kowiicho heedhine baqqi yitine agadhe.”
35 Hakkiinni insawiinni shiima geeshsha alba hige haꞌre, uulla uwe dandaamannoha ikkiro hatti saate isiwiinni saꞌanno gede huucciꞌri.
36 Togo yii: “Abba,* Anna, atera baalunkuri dandaamannohe; konne finiincho anewiinni hoolie. Kayinni, ani hasiꞌroommori ikkikki ati hasiꞌroottori ikkona.”
37 Higi woyite, insa goxxe noore afe Pheexiroosi togo yii: “Simooni, goxxe nootto? Mitte saate nafa baqqi yite agadha hoogitto?
38 Jifamate giddora eꞌinannikki gede baqqi yitine agadhe, hattono agurtinikkinni huuccidhe. Hige ayyaanu qixxaawaho; maalu kayinni daafuraamoho.”
39 Hakkiinni galagale haꞌre, wona yiinota yaanni huucciꞌri.
40 Galagale dayi woyiteno mugichu amadeennansa goxxe noore afi; konnira insa haadhe qoltannore hooggu.
41 Sayikkimeeshshono galagale hige togo yiinsa: “Tini gonxanninna fooliishshiꞌnanni yanna diꞌꞌikkitino! Xaate ikkino! Saate iillitino! Kuneeti manchi Beetto cubbaataammu angara sayinse uyinaraati.
42 Kaꞌe haꞌnona. Kuneeti sayise aannoehu dayinona.”
43 Hakkawoyintenni, isi coyiꞌranni heeꞌreenna Tonaalamu wido ikkinohu Yihudi kae dayi; kakkalaanote roorrooti, seeru rosiisaanonna cimeeyye sokkinohu bisenna dulla adhinohu lowo manni ledosi no.
44 Sayise aannosihuno togo yee malaate kulinonsa: “Hasidhinannihu ani sunqeemmohona iso amadde; fule baꞌꞌannokki gede seekkitine amaddine haadhine haadhe.”
45 Isi hakkawoyintenni Yesuusiwa mare, “Rosiisaancho!” yee kimmi asse sunqisi.
46 Insano, Yesuusa amadde usurtu.
47 Ikkollana, mulesi uurrite noori giddonni mittu bise fushshiꞌre, kakkalaanote biili borojjichira macca gane tayisi.
48 Yesuusi kayinni togo yiinsa: “Mulqiꞌrannoha amandannihu gede, bisenna dulla adhitine dagginihu ane amaddinaraati?
49 Barru baala qullaawu mini giddo rosiisanni ledoꞌne noommo; kiꞌne kayinni hakkawoyite diamaddinoonnie. Ikkollana, kuni ikkinohu Qullaawa Borro yitannori woꞌmanno gedeeti.”
50 Hatte yannara rosaanosi baalanti iso hunte xooqqu.
51 Ikkollana shalaalatenni gannoonni uddano calla aanaho tuqqinohu mittu wedellichi, lowo geeshsha xeertiꞌrikki Yesuusi hoode haꞌranni no; insano amaddasira woꞌnaaltu;
52 isi kayinni, uddiꞌrinota shalaalatenni gannoonni uddano hune mullichu* xooqi.
53 Yesuusa kakkalaanote biiliwa haadhe massitu; kakkalaanote roorrooti, cimeeyyenna seeru rosiisaano baalunku gamba yitu.
54 Ikkollana Pheexiroosi Yesuusiwiinni xeertiꞌre, kakkalaanote biili hoowe geeshsha hoodesi haꞌri; hakkiicho mini soqqamaano ledo ofolle giira giwaari.
55 Kakkalaanote roorrootinna Sanihediriini shongo woꞌma Yesuusa shaate naqaashshe hasidhanni no; ikkollana diafidhino.
56 Lowo manni isi daafira kapho farciꞌrinoha ikkirono, farcidhinori kayinni dixaadino.
57 Qoleno mitu manni kae isi daafira togo yaanni kapho farciꞌri:
58 “‘Mannu anganni minnoonniha konne mine diige, sasu barri giddo mannu anganni minnoonnikkiha wole mineemmo’ yaanna macciishshinoommo.”
59 Ikkollana, konni coyi daafira farcidhinorino dixaadino.
60 Hakkiinni kakkalaanote biili mereeronsa uurre Yesuusa togo yee xaꞌmi: “Mitte dawarono diqolatto? Mannu mayyee kassasanni noohero dimacciishshootto?”
61 Isi kayinni sammi yee giwi; mitte dawarono diqolino. Xaano kakkalaanote biili, “Ati Maassamino Magani Beetto Kiristoosiitini?” yee xaꞌmisi.
62 Yesuusino togo yii: “Ee; manchi Beetti Wolqaataamu qiniiteenni ofolle gordu gomichinni daanna laꞌinanni.”
63 Hatte yannara kakkalaanote biili uddanosi dare togo yii: “Wole naqaashshe mayira hasiꞌneemmo?
64 Magano xonanna macciishshitinoonni. Kiꞌne iso ma assinona yitinanni?”* Insa baalunku, ‘Reya hasiissannosi’ yitu.
65 Mitootu anja tuffusi; hattono alba dibbe tuntuꞌmotenni gantanni, “Hanni ati masaalaanchohoro ganihehu ayetiro kulinke!” yitusi. Shongote soqqamaanono qawaaddanni haadhe hadhusi.
66 Pheexiroosi eelaanni hoowete giddo heeꞌreenna kakkalaanote biilira soqqamanno seenni giddo mitte kaꞌe daggu.
67 Pheexiroosi giira giwaaꞌranni nooha affuti iso seekkite laꞌe, “Atino konni Naazireetete Yesuusi ledoho” yitusi.
68 Pheexiroosi kayinni, “Konne mancho diegennoommo; maricho coyidhanni noottaronni dileellinoe” yee kaadi; hakkiinni xullichunniwa hige haꞌri.
69 Xaano soqqamaancho isi hakko nooha laꞌe mulesi uurre noo mannira, “Kunino insa widooti” yitu.
70 Isi kayinni xaano kaadi; shiima yanna gedensaanni hakko uurrite noori xaano Pheexiroosi, “Galiilu mancho ikkootto daafira, addaho atino insa widiho” yitusi.
71 Pheexiroosi kayinni, “Konne yitinanni mancho ani diegennoommo” yaanni xaaranni isonooto rumi.
72 Hakkawoyintenni lukkichu layinkimeeshsho gani; Pheexiroosira Yesuusi, “Lukkichu lame hige ganikki ati sase higge kaadattoe” yiinositi qulli yitusi. Hakkiinni lowo geeshsha dadille wiꞌli.
Lekkaalliidi Qaagiishshuwa
^ Woy “usurtannonna.”
^ Noo gedeenni tirriro, “tanni yite suꞌniitanno zayite.”
^ Roomunnite birru saanteeti.
^ Woy “boroortuse.”
^ Birra yinanni siwiila tumme seekkinoonni woxeeti.
^ Woy “masillinna.”
^ Woy “lubboꞌya reyote geeshsha dadillitino.”
^ Ibiraawootu woy Aramayikete Afiinni “Annaꞌya” yaate.
^ Woy “giddoonni uddiꞌrino uddanonni calla.”
^ Woy “Kiꞌnera maa lawannoꞌne?”
