Maarqoosi Wongeella 15:1-47
15 Hakkawoyintenni soodo guto, kakkalaanote roorrooti, cimeeyyenna seeru rosiisaano yaano Sanihediriini shongo woꞌma gamba yite amaalantu; qoleno Yesuusa usurte, massite Philaaxoosira sayisse uyitu.
2 Philaaxoosino, “Ati Ayihudete Mooteeti?” yee xaꞌmisi. Isino, “Atinni yiittowe” yee qoli.
3 Kakkalaanote roorrooti kayinni duuchare yitanni kassassusi.
4 Xaano Philaaxoosi togo yee xaꞌmisi: “Mitte dawarono diqolatto? Meu coyira kassassanni noohero dilaꞌꞌatto?”
5 Yesuusi kayinni lede didawarino; tini Philaaxoosira dhagge ikkitusi.
6 Philaaxoosi diru kiiro Faasiku ayyaana ayirrinsanni woyite, mannu tirinke yaannoha mitto usuranya tiranno.
7 Hatte yannara Barbaani yinanni manchi, mannu gashshooteho finqilanno gede kakkayissanni manna shite usurantino shittooti ledo usurame no.
8 Konnira mannu Philaaxoosiwa daye bashsho assannonsare assansara xaꞌmiꞌri.
9 Isino, “Ayihudete Moote tirammoꞌnera hasidhinanni?” yiinsa.
10 Philaaxoosi hatto yiinohu, kakkalaanote roorrooti Yesuusa hinaasse sayisse uyitinota afino daafiraati.
11 Ikkollana, kakkalaanote roorrooti Yesuusa agure Barbaani tirannonsa gede xaꞌmiꞌrara manna kakkayissu.
12 Xaano Philaaxoosi, “Konne Ayihudete Mooteeti yitinanniha hiissoyya?” yiinsa.
13 Insano, “Haqqaho suti!” yite xaano ledde cancitu.
14 Philaaxoosi kayinni, “Mayira? Isi assino bunshe maati?” yiinsa. Ikkollana mannu, “Haqqaho suti!” yee lede lede canci.
15 Hatte yannara Philaaxoosi manna hagiirsiisara yee Barbaani tirinsa; Yesuusa kayinni halangetenni gansiisihu gedensaanni haqqaho suntanni gede sayise uyi.
16 Olanto Yesuusa haadhe hoowete giddora yaano gashshaanchu minira massitu; olanto baalano gamba assitu.
17 Qoleno duume xiillitte uddano uddisiissusi; hattono utu worraaqqa seekkite umisira wortu;
18 hakkiinni huuronsa naggi assite, “Ayihudete Moote, keereho?” yitusi.
19 Qoleno leemmichote siqqichonni umo gantanni anja tuffusi; hattono albasiinni guluphite kumbuultu.
20 Jeefote, qacifattusihu gedensaanni duume xiillitte uddano mulqite umisi uddano uddisiissusi. Hakkiinni haqqaho suttara haadhe hadhu.
21 Simooni yinannihu Qereenu katami manchi gaxaretenni daanni hakkaanni hige saꞌꞌanni nooha affe, Yesuusa suntanniha qarru haqqa duhanno gede gadadissusi; kuni manchi Iskindirinna Rufoosi annaati.
22 Hakkiinni Yesuusa Golgoota yinanni bayicho abbitu; hatto yaa “Umu Qooncho” yaate.
23 Hakkiicho woyine dimbissanno kaarbe* ledo karsiisse uyitusi; isi kayinni adha giwi.
24 Yesuusa haqqaho qolte gante suttuhu gedensaanni, anna annaho iillannonsare afate hixa tuqqite uddannasi beeqqitu.
25 Haqqaho suttusi woyite yanna sase saateeti.
26 Iso kassansoonnihu mayiraatiro leellishshanno borro, “Ayihudete Moote” yite borreessite wortu.
27 Qoleno lame shittoota mitto qiniitesiinni mitto gurasiinni haqqaho suttu.
28 * ——
29 Hakkaanni hige saꞌꞌanno manni xonisi; hattono umo shafanni togo yii: “Qullaawa mine diige sasu barri giddo mineemmo yaattohu!
30 Hanni sutamootto haqqi aaninni dirrite umokki gatisi.”
31 Kakkalaanote roorrootinna seeru rosiisaanono, insa insanaawa togo yitanni qacifattusi: “Woloota gatisino; umosi kayinni gatisa didandiino!
32 Laꞌne ammanneemmo gede, Israeelete Moote Kiristoosi hanni xa qarru haqqi aaninni dirrona.” Ledosi haqqaho sutante noori nafa qacifattusi.
33 Lee saatenni kayise honse saate geeshsha gobba baala tunsitu.
34 Yesuusi honse saate ikkita lowo huuronni, “Eeli, Eeli, laama sabaqitani?” yee raari; hatto yaa, “Maganoꞌya, Maganoꞌya, mayira agurittoe?” yaate.
35 Hakko uurrite noori giddo mitu tenne macciishshituti, “Laꞌe! Eeliyaasi woshshiꞌranni no” yitu.
36 Hakkiinni mittu manchi dodanni mare shiishshino woyine giddo haanxicho cuue, leemmichote siqqichora wore agara ee, “Agurre! Hanni Eeliyaasi daye dirrisannasi laꞌneemmona” yii.
37 Yesuusi kayinni lowo huuronni raare reyi.
38 Hatte yannara, qullaawu mini dukko alinni eeli geeshsha lamewa dadhantu.
39 Albasiinni uurre noohu olantote hajajaanchi, Yesuusi reyi woyite ikkinore baalankare laiti, “Addinta kuni Maganu Beettooti” yii.
40 Qoleno hatte yannara xeertote heeꞌre laꞌꞌanni noo meenti no; insa giddo Megidelitte Maariyaami, Shiimiidi* Yaaqoobinna Yoosa ama Maariyaami, hattono Seloome no;
41 kuni meenti Yesuusi Galiilaho noo yannara hoodesi haꞌrinohonna soqqaminosiho; isi ledo Yerusaalame dayinohu wolu batinyu meentino no.
42 Yanna hawarritino; gaꞌa gede Sambata ikkanna techo qole Sambataho qixxaambanni barraati;
43 hakko daafira, ayirradu shongote miilinna Maganu Gashshoote agadhe noohu Armaatiyu katami manchi Yooseefi dayi. Kuni manchi worbe Philaaxoosiwa mare Yesuusi reeshsha aannosi gede xaꞌmiꞌri.
44 Philaaxoosi kayinni, Yesuusi reyinoronna teꞌee afara hasiꞌrino daafira, olantote hajajaancho woshshe reyinoronna teꞌee xaꞌmi.
45 Reyinota olantote hajajaanchiwiinni buuxihu gedensaanni, Yooseefi reeshsha adhanno gede fajjisi.
46 Isi, shalaalatenni gannoonniha dancha imaana hiꞌrihu gedensaanni, reeshsha dirrise hakko imaaninni kafani; hakkiinni kincho kurkurre qixxeessinoonni waammara madaari; hakkunni gedensaanni, kincho gongoꞌmishe waammate afoo cufi.
47 Hatte yannara, Megidelitte Maariyaaminna Yoosa ama Maariyaami reeshsha massine madaarroonni base laꞌꞌanni no.
Lekkaalliidi Qaagiishshuwa
^ Tanni yite suꞌniitanno haphaayyooti.
^ Tini kiiro mite Qullaawu Maxaafi tirora nooha ikkirono, angatenni galchinoonnite hundite qara qara Giriikete Afii borrora dinoote.
^ “Shiimiidi” yaanno qaali, kowiicho kulli Yaaqoobi diro woy hojja Zebidewoosi beetti soqqamaasinchu Yaaqoobinni ajannota leellishannoha ikkara dandaanno.
