Qullaawu Maxaafi, Maganu halcho mannu ‘foorretewiinni xeertiꞌranno gede’ ikkinota kulanno. (1 Teselonqe 4:3) Soorro, labbaahu labbaahu ledonna meyati meyate ledo foora, hattono adhaminokkiri labbaahunna meyaati assitannoha siimu xaadooshshe Qullaawu Maxaafi “foorrete” yaanno.

•  Maganu labbaahunna meyaati adhamara hasiꞌrannohu mayiraati?

•  Sumuu yee heeꞌra dandaannoronna teꞌee laꞌꞌate yee adhamara albaanni mitteenni heeꞌranno mannina?

•  Hagiirru noota dancha maate kalaqiꞌra dandiinannihu hiittoonniiti?

•   Adhanna adhama xintinohu Maganoho. Maganu umi labbaahanna meyata kalaqe xaadisi woyite adhanna adhama xintino. (Kalaqama 2:22-24) Isi hedo, labbaahunna meyati mimmitoho qaale eꞌꞌe adhamikki mitteenni heeꞌrara diꞌꞌikkitino.

•   Mannu oosora woyyannore afinohu Maganoho. Maganu adhanna adhama geedonnita ikkitara hasiꞌranno; labbaahunna meyati konni garinni adhamansa maate woꞌmate kaaꞌlitanno, hattono agarooshshe ikkitanno. Hanni mitto lawishsha laꞌno. Mitto mini uduunnicho gari garisinni xaadinse horoonsiꞌrate hakkonne uduunnicho seekkino ogeessi aanno biddishsha harunsa hasiissannonte gede, Maganu aannonke biddishshino hagiirsiissannota dancha maate kalaqiꞌrate kaaꞌlannonke. Maganu seera harunsitannori woꞌmanka woyite horo afidhanno.—Isayaasi 48:17, 18.

•   Adhammikkinni siimu xaadooshshe assa buutote qarra abbitara dandiitanno. Lawishshaho, hasiꞌnoonnikki godowi gatara, siimu xaadooshshinni saꞌꞌanno dhibba abbitara, hattono wodanu yaaddo naqqara dandiitanno.

•   Maganu, labbaahunna meyati siimu xaadooshshinni siranno gede dandoo uyinonsa. Heeshsho Maganu albaanni qullaawate; sirate dandoono muxxe eltooti. Maganu isi fushshinoha adhatenna adhamate seera ayirrinse tenne elto naandeemmota leellinshammora hasiꞌranno.—Ibiraawoota 13:4.

 Adhanna adhama seekkitannoti, adhammara albaanni mitteenni heeꞌnanni “woꞌnaala” diꞌꞌikkitino. Hatteentenni, adhanna adhama seekkannohu minaanninna minaama mimmitoho ammaname heeꞌrate murciꞌrinorenna qarransa qeelate mitteenni kaaꞌlame loosannore ikkirooti. a Adhamansa mimmito cuꞌmire heeꞌranno gede kaaꞌlitannonsa.—Maatewoosi 19:6.

 Guuta galte woy maate dino. Ikkirono, minaanninna minaama Qullaawu Maxaafi amaale harunsannoha ikkiro, hagiirru noota dancha maate kalaqiꞌra dandaanno. Hanni mito lawishsha laꞌno:

•   Umikki hasattonni roore galtekki hasatto balaxisiisi.—1 Qorontoosi 7:3-5; Filiphisiyusi Sokka 2:3, 4.

•   Mimmito baxxe, hattono ayirrisse.—Efesooni Sokka 5:25, 33.

•   Coyiꞌratto coye eemadhi.—Lawishsha 12:18.

•   Cinca ikki; qoleno keeshshittokki gatona yii.—Qolasiyaasi Sokka 3:13, 14.