Mitto qorru barra, Kanaadaho Alberta gashshooti giddo, Boobi yinanni manchi makeenunni qaera haꞌranni no. Kuni manchi mitte saatenni mite 100 kiilomeetire haꞌranni heeꞌreenna, makeenisira badhiidi gommi hedeweelcho dhoohi. Boobi gommu dhoohinota diafino; hakko daafira gattinosita onte kiilomeetire (3 mayile) haꞌre gudate hedino.

 Boobi qooxeessaho nootera Yihowa Farciꞌraasinete Gambooshshu Addaraashera soyino sokka, hakkiinni aane ikkinore kultanno. Isi togo yee borreessino: “Ontu wedellooti makeenunni dagge ani noommowa iillituti maskootensa heeshshi assite, makeeniꞌyara gommu dhoohinota kultue. Hakkiinni insano anino makeenna doogote qacce fushshineenna gomma soorritaera kaꞌu. Hakkawote, wolu gomminna makeena gotti assitanno kiriike nooero nafa diafoommo. Ani doogote qaccera gaareꞌyara (bisu xeꞌne noonsari ofoltanno gaarera) ofolleenna, insa makeeniꞌyara woroonni saꞌe, wolu gomminna kiriike noota affu; hakkiinni gomma soorritue. Hakkawote qorru lexxanni no; kaadeno ubbanni no. Kuri wedellooti dancha uduunne uddidhinoha ikkirono, gomma soorriteennae doogoꞌya haꞌra dandoommo. Wonaatiro konne umiꞌyanni asse diafeemmo.

 “Kaaꞌlitinoere kore onte wedelloota Yihowa Farciꞌraasine galaxxeemmonsa. Insa hakkawote minunni mine hadhe sabbakkara hadhanni no. Kuri wedellooti wolu mannira rosiissannore uminsa assitannoreeti. Insa lowo qarrinni gatissinoe; konnira lowo geeshsha galaxxeemmonsa. Insa Maganu iima heeꞌre soyinoe sokkaasine gede ikkitinoe!”