E ave e nisi mātua e faigaluega uma, a latou fanau lāiti i se nofoaga e vaavaaia ai tamaiti e tai pei o se potu aʻoga. Pe e tatau ona ave lau tama i lenā nofoaga?

•  O fesili e tatau ona fesili ai

•  Mea e mafai ona e faia

 Pe e iai se aafiaga leaga i le ma faiā ma laʻu tama pe a ave i le nofoaga e vaavaaia ai tamaiti? E iai. I uluaʻi tausaga o se tamaitiiti, e vave ona taaʻina lona mafaufau i ē latou te faifaimea faatasi, ma aafia ai lana faiā ma isi. Ia taumafai e faatasi pea ma lau tama i le tele e mafai ai i lenā taimi tāua o lona olaga.—Teuteronome 6:6, 7.

•    E tatau i mātua o loo manatu e ave a latou fanau i se nofoaga e vaavaaia ai tamaiti, ona mafaufau pe faapefea ona faatumauina se la faiā vavalalata ma lana tama.

 Pe e iai se aafiaga o le lua faiā ma lau tama pe a ave i lenā nofoaga? E iai. Ua taʻua e le tusi Hold On to Your Kids, “O le tele o le taimi e faifaimea faatasi ai tamaiti lāiti ma isi, o le tele foʻi lenā o le taaʻina o i latou e na tamaiti.”

•    E tatau i mātua o loo manatu e ave a latou fanau i nofoaga e vaavaaia ai tamaiti, ona mafaufau pe o le a mafai ona avea pea i latou ma taaʻiga lelei i a latou fanau.

 Pe e mafai ona fesoasoani lenā nofoaga ina ia faigofie ai i le tamaitiiti ona aʻoaʻoina mea pe a alu i le aʻoga? Ua faapea mai nisi, e mafai. Ae fai mai nisi e itiiti se aogā o na nofoaga po o le lē mafai foʻi ona fesoasoani i se tamaitiiti e atiaʻe le tomai e aʻoaʻo ai mea. Po o le ā lava le tulaga ae na tusi Penelope Leach o se fomaʻi o le mafaufau mo tamaiti: “Aua tatou te talitonu o mea e aʻoaʻoina e le fanau i le aʻoga e aogā iā i latou i le olaga atoa. Aua foʻi tatou te talitonu e faapea e lelei i taimi uma le vave ave o tamaiti i le aʻoga. O lou faia o lenā mea, ua e lē amanaʻia ai le tāua o mea o loo e aʻoaʻoina ai lau tama talu ona fanau mai.”

•   E tatau i mātua o loo manatu e ave a latou fanau i nofoaga e vaavaaia ai tamaiti, ona mafaufau pe e aogā le faia faapea ma pe e manaʻomia.

 Pe e mafai e se tasi o oulua ona nofo i le fale o se matua? I nisi tulaga, e faigaluega uma mātua ina ia maua le tele o meafaitino. Ae pe e tāua le maua o meafaitino po o le tausia o le tamaitiiti?

•   E tatau i mātua o loo manatu e ave a latou fanau i nofoaga e vaavaaia ai tamaiti, ona mafaufau pe e mafai ona faafaigofie o la olaga ina ia nofo ai se tasi o laʻua i le fale e vaai tamaiti.

 E tatau ona fai le filifiliga pe e ave le fanau i nofoaga e vaavaaia ai tamaiti pe a uma ona iloilo lelei itu lelei ma itu leaga o le faia faapea. Ae ā pe a uma ona fai lau iloiloga ma e manatu ai o le ave o lau tama i se nofoaga e tausia ai tamaiti e lelei mo le aiga?

 Ua faapea mai le Tusi Paia, “o le tagata e iai le utaga mamao, e na te iloilo lelei ona laasaga.” (Faataoto 14:15) Ia mafaufau lelei i lenā mataupu silisili, a o leʻi faia lau filifiliga po o lē fea ituaiga o nofoaga e vaavaaia ai tamaiti e ave i ai lau tama.

 Ia iloa mea e mafai ona e faia

•   O nisi mātua e filifili e ave a latou fanau i se nofoaga e vaavaaia ai tamaiti i se fale o se aiga, lea e toʻatasi pe toʻalāiti tagata e vaaia lenā nofoaga, ma e toʻalāiti foʻi tamaiti e iai.

•   O nisi mātua e iai so latou tauaiga e latou te nonofo faatasi e vaavaaia le tamaitiiti.

 O filifiliga uma, e iai lava itu lelei ma itu lē lelei. Aiseā e lē talanoa ai i ni mātua na latou faaaogāina na auaunaga? Ua faapea mai le Tusi Paia: “E iai le atamai iā i latou o ē e soālaupule faatasi.”—Faataoto 13:10.

 Ae faapefea pe a e filifili e ave lau tama i se nofoaga e vaavaaia ai tamaiti? I lenā tulaga . . .

 Ia iloa le nofoaga o loo vaavaaia ai tamaiti

•   Po ua uma ona fai se laisene e faagaoioi ai? O ā agavaa ma talaaga o tagata e faigaluega ai?

•   Pe e mamā ma saogalemu lenā nofoaga?

•   O ā mea e fai ai? a

 Ia iloa i latou e vaavaaia tamaiti

•   O ā ni agavaa o loo iā i latou? Pe ua toleni i latou e faatatau i aʻoaʻoga mo tamaiti lāiti, faia o fesoasoani muamua ma le CPR?

•   Pe e mafai ona e siakiina pe e iai ni solitulafono a i latou o le a vaavaaia lau fanau?

•   Pe e sui soo tagata e faigaluega ai? O le sui soo o tagata faigaluega ai, o lona uiga o le a taumafai lau tama e faamasani i tagata fou i taimi uma.

•   O le ā le toʻatele o tamaiti ma tagata e faigaluega ai? O le toʻatele o tamaiti e vaavaaia e se tagata e toʻatasi, o le itiiti foʻi lenā o le avanoa e uaʻi atu ai i lau tama. O le uaʻi atu i manaʻoga o se tamaitiiti, e fua i lona matua ma ona tomai.

•   Pe e faigofie ona talanoa mai i latou e vaavaaia tamaiti i o latou popolega po o ou popolega?