Na fetalai atu le Atua i tagata Iutaia na ola i le taimi o le perofeta o Ieremia. Talu ai na teena e tagata tulafono amiotonu a Ieova a, ma ana faasaʻoga alofa e ala mai i ana perofeta, e na te leʻi puipuia ai i latou mai i āuga faanoanoa o o latou ala leaga.—Faataoto 1:24-32.

 “O le mea lenei ua fetalai mai ai Ieova.” O le faaupuga “o le mea lenei,” e fesootaʻi mai ai fuaiupu na muamua atu i lenei fuaiupu. I le Ieremia 11:1-10, na faailoa atu ai e Ieova i ona tagata, ua latou solia le feagaiga po o le maliega na ia faia ma o latou augātamā. (Esoto 24:7) Nai lo o le tapuaʻi atu o tagata Iutaia i Lē na faia i latou, na latou tapuaʻi atu i tupua. O lo latou fulitua i le tapuaʻiga moni, na latou faia ai mea leaga uma e aofia ai ma le ofo atu o a latou fanau e fai ai taulaga!—Ieremia 7:31.

 “Ou te faaoo atu iā i latou le malaia.” O le tele o taimi, pe a faapea mai le Tusi Paia na faia e le Atua se mea, e uiga atu i lona faatagaina o lenā mea e tupu. E faapefea ona faamaonia lenā manatu i lenei mau? Ina ua tapuaʻi atu tagata o le Atua i atua sesē ma teena tapulaa amiotonu a Ieova, na oo ai le tele o puapuaga iā i latou. E latou te leʻi toe maua foʻi le puipuiga a le Atua. O le iʻuga, na faatoʻilaloina Ierusalema e se fili malosi, le tupu o Papelonia, ma ave faapagota i latou na iai. E leʻi mafai e atua sesē na latou faatuatuaina ona laveaʻia i latou.—Ieremia 11:12; 25:8, 9.

 O le faataga e le Atua o puapuaga e oo i ona tagata, e lē faapea ai ua ia lē fai le mea tonu, pe ua ia faia foʻi se mea leaga. Ua faapea mai le Iakopo 1:13: “Aua e lē mafai ona faaosoosoina le Atua i mea leaga. E lē faaosooso atu foʻi o ia i se tasi.” Ua faapea mai le faaliliuga a le King James Version, o le a faaoo mai e le Atua “mea leaga [i tagata Iutaia].” O le upu i le uluaʻi gagana b lea o loo faaliliuina i le “mea leaga” i le Ieremia 11:11, e mafai foʻi ona faaliliuina i le “malaia” po o “mala,” o ni upu e talafeagai lelei e faamatala ai puapuaga na oo i tagata Iutaia.

 “Pe a latou valaau mai iā te aʻu mo se fesoasoani, ou te lē faalogo atu iā i latou.” E lē faafofoga mai Ieova i tatalo a i latou ua ʻtutumu o latou lima i le faamasaatoto,’ po o i latou ua faamoemoe atu i atua sesē mo se laveaʻiga. (Isaia 1:15; 42:17) Peitaʻi, e faafofoga o ia i ē ua salamō mai i o latou ala leaga ma toe foʻi atu ma le lotomaulalo iā te ia.—Isaia 1:16-19; 55:6, 7.

 I le 647 T.L.M., na tofia ai e Ieova Ieremia e avea ma ana perofeta. E 40 tausaga o lapataʻia e Ieremia tagata o Iuta e faatatau i le toʻasā o le Atua, ae e latou te leʻi fia faalogo. O le taimi lenā na tusia ai e le perofeta o Ieremia upu o loo i le Ieremia 11:11. I le 607 T.L.M., na taunuu ai valoaga a le perofeta o Ieremia ina ua faaumatia Ierusalema e le ʻautau a Papelonia.—Ieremia 6:6-8; 39:1, 2, 8, 9.

 O loo taʻua foʻi i le tusi o Ieremia se faamoemoe. Na fetalai Ieova: ʻPe a atoa tausaga e 70 i Papelonia, ona ou faataunuuina lea iā te outou o laʻu folafolaga i le toe faafoʻisia mai o outou i lenei mea [nofoaga o tagata Iutaia].’ (Ieremia 29:10) Na “faataunuuina” e Ieova lenā folafolaga i le 537 T.L.M. ina ua faatoʻilalo Papelonia e Metai ma Peresia. Na faataga e Ieova ona tagata o ē na taapeape solo i laueleele na pulea e Papelonia, ina ia toe foʻi i o latou laueleele ma toe faafoʻisia le tapuaʻiga moni.—2 Nofoaiga a Tupu 36:22, 23; Ieremia 29:14.

 Ia matamata i lenei vitiō puupuu o loo aumaia ai se aotelega o le tusi o Ieremia.