“Ona fetalai mai lea o le Atua: ʻSeʻi o ta faia le tagata i lo taʻua faatusa ia pei o i taʻua, ma ia latou pule i iʻa o le sami, ma manufelelei o le lagi, ma manu lalata, ma le lalolagi atoa, ma meaola fetolofi uma o loo fetolofi i le eleele.’”—Kenese 1:26, Faaliliuga a le Lalolagi Fou.

 “Ona fetalai ane lea o le Atua, ʻIna tatou faia ia o le tagata i lo tatou faatusa, ia foliga ia i tatou; ia pule foi i latou i iʻa i le sami, ma manu felelei, ma manu vaefa, ma le laueleele uma, atoa ma mea fetolofi uma e fetolofi i le eleele.’”—Kenese 1:26, Tusi Paia Samoa—Lomiga 1969.

 Na faia le tagata i le faatusa o le Atua ina ia mafai ona atiaʻe ma faaalia uiga o le Atua, e pei o le alofa, tigā alofa, ma le faamasinotonu. O le māfuaaga lenā ua mafai ai e tagata ona faaaʻoaʻo i uiga o le Atua.

 “Ona fetalai mai lea o le Atua: ʻSeʻi o ta faia le tagata i lo taʻua faatusa.’” A o leʻi faia e Ieova le Atua a mea uma, na ia foafoaina se foafoaga agaga malosi lea na mulimuli ane taʻua o Iesu. E ala iā Iesu, “na foafoaina [ai] isi mea uma i le lagi ma le lalolagi.” (Kolose 1:16) Ua faaatagia mai e Iesu uiga o Ieova, talu ai “o ia ua foliga i le Atua e lē vaaia.” (Kolose 1:15) Ua talafeagai ai la ona faapea atu le Atua iā Iesu: “Seʻi o ta faia le tagata i lo taʻua faatusa.”

 ʻIa latou pule i manu lalata, ma le lalolagi atoa.’ E leʻi faia manu i le faatusa o le Atua. E leʻi foafoaina ina ia faaalia uiga e pei ona faaalia e tagata, e pei o le alofa po o le iai o se lotofuatiaifo. Peitaʻi, e tausia pea ma le alofa e le Atua manu. O le māfuaaga lenā na ia fetalai ai ia “pule” tagata i manu. O lea, sa maufaatuatuaina e Ieova tagata e latou te tausia faapelepele manu. (Salamo 8:6-8; Faataoto 12:10) E faatalitalia e Ieova tagata ina ia tausia lelei le lalolagi ma mea uma o loo iai.

 O loo faamatala i uluaʻi mataupu e lua o le Kenese le foafoaina o le vateatea, le lalolagi paneta, ma le ola. E ofoofogia mea uma na faia e Ieova, ae o le tagata o le palealii lea o ana foafoaga. Ina ua māeʻa galuega o le foafoaga a le Atua, ʻua ia silasila atu i mea uma na ia faia, faauta! ua matuā lelei lava.’—Kenese 1:31.

 Ia matamata i lenei vitiō puupuu ina ia aʻoaʻo atili ai e faatatau i le tala o le foafoaga o loo i le tusi o Kenese.

 Manatu sesē: Ua faamaonia i le Kenese 1:26 o Iesu o le Atua.

 Mea moni: E māfana le faiā a le Atua ma Iesu e pei o le faiā a se tamā ma sona atalii. Peitaʻi, e lē tutusa i laʻua. Na aʻoaʻo e Iesu e sili lona Tamā iā te ia. (Ioane 14:28) Mo nisi faamatalaga, maimoa i le vitiō Po o Iesu Keriso o le Atua? pe faitau i le mataupu “Aiseā ua Taʻua ai Iesu o le Alo o le Atua?”

 Ia matamata i lenei vitiō puupuu o loo aumaia ai se aotelega o le tusi o Kenese.