E lē o faaaogāina e le Tusi Paia le upu “faapaʻū tama” e faamatala ai le aveesea faamalosi o se pepe e leʻi fanau mai. Peitaʻi, e tele mau i le Tusi Paia o loo taʻua ai le silafaga a le Atua i le ola o se tagata, e aofia ai ma se pepe e leʻi fanau mai.

 O le ola o se meaalofa mai i le Atua. (Kenese 9:6; Salamo 36:9) E tāua iā te ia ola uma, e aofia ai ma le ola o se pepe e leʻi fanau mai. Pe afai e fasioti ma le loto iai e se tasi se pepe e leʻi fanau mai, e tutusa lenā ma le fasioti tagata.

 Na taʻua i le Tulafono na tuuina atu e le Atua iā Isaraelu: “Afai e fetauaʻi ni tamāloloa ma lavea ai se fafine ua tō ma ua faafuaseʻi ai ona fanau o ia ae e lē oti se tasi, e ao ona faasalaina lava lē na māfua ai, e tusa ma le mea e fai mai ai le tane a le fafine iā te ia; e ao ona faia e tusa ma le faaiʻuga a faamasino. Ae afai e oti ai se tasi, e ao ona avatu le ola e sui ai le ola.”—Esoto 21:22, 23. a

•  O le ā le taimi e amata ai le ola o se tagata?

•  Pe e faamagaloina e le Atua se tasi na faia le faapaʻū tama?

•  Pe e sēsē le faapaʻū tama pe afai ua lamatia le ola o le pepe po o le tinā?

 I le silafaga a le Atua, e amata le ola o le tagata i le taimi e afuafua ai. I lana Afioga le Tusi Paia, o loo taʻua ai e silasila le Atua i se pepe e leʻi fanau mai o se tagata. Iloilo nisi o faaaʻoaʻoga e iloa ai, e lē faaeseeseina e le Atua le ola o se pepe e leʻi fanau mai ma se pepe ua fanau mai.

•   Na faagaeeina le Tupu o Tavita ma faapea atu i le Atua: “Na silasila mai lava ou fofoga ina o afuafua aʻu.” (Salamo 139:16) Na silasila le Atua iā Tavita o se tagata a o leʻi fanau mai.

•   E lē gata i lea, na silafia e le Atua o le a ia faaaogāina le perofeta o Ieremia mo se fuafuaga faapitoa a o leʻi fanau mai. Na faapea atu le Atua iā te ia: “Na ou iloa oe ae ou te leʻi faia oe i le manava, ma na ou faapaiaina foʻi oe ae e te leʻi fanau mai i le manava. Na ou faia oe ma perofeta i atunuu.”—Ieremia 1:5.

•   Na faaaogā e Luka, o se tusitala o le Tusi Paia ma o se fomaʻi, le upu Eleni e tasi e faamatala ai se pepe e leʻi fanau mai, ma se pepe faatoʻa fanau mai.—Luka 1:41; 2:12, 16.

 E mafai ona faamagaloina e le Atua se tasi na faia le faapaʻū tama. Pe afai e latou te vaai i le ola pei ona silasila iai le Atua, e lē toe manaʻomia la ona lofitūina i latou i faalogona nofosala. “E alofa mutimutivale Ieova ma alofa fua . . . E pei ona vavamamao o le mea e oso aʻe ai le lā mai i le mea e goto ifo ai, e faapea foʻi ona faamamao e ia o a tatou solitulafono mai iā i tatou.” b (Salamo 103:8-12) E faamagaloina e le Atua i latou uma e faaalia le salamō moni mai i a latou agasala na faia i le taimi ua teʻa, e aofia ai ma le faapaʻū tama.—Salamo 86:5.

 Pe a fua i le manatu o le Tusi Paia i le ola o se pepe e leʻi fanau mai, e lē taʻutonuina se tasi e faapaʻū lana pepe e leʻi fanau mai, ona ua lamatia lona ola po o le ola o le pepe.

 Ae faapefea pe afai e iai se tulaga faafuaseʻi i le taimi e fanau mai ai, e tatau ai ona filifili pe faasaoina le ola o le tinā po o le pepe? I lenā tulaga, e tatau iā i latou o loo aafia ai ona filifili po o ai e faasaoina.