Ua faaaogā e tagata aʻoaʻoga a Iesu Keriso e faatū ai le tele o “lotu Kerisiano.” Ae ua faaalia mai i le Tusi Paia e na o le tasi le Faa-Kerisiano moni. Seʻi o tatou iloiloina ni vala se tolu.

1.   Na fetalai Iesu o loo ia aʻoaʻoina “le upu moni” ma sa faasino atu foʻi e uluaʻi Kerisiano la latou tapuaʻiga o le “upu moni” lea. (Ioane 8:​32; 2 Peteru 2:2; 2 Ioane 4; 3 Ioane 3) O nei faaupuga e faaalia ai o i latou o loo faaauilumaina aʻoaʻoga e feteenaʻi ma aʻoaʻoga a Iesu, e latou te lē o faia le Faa-Kerisiano moni.

2.   O loo aʻoaʻo e le Tusi Paia Kerisiano “ia outou autasi i a outou upu.” (1 Korinito 1:10) Peitaʻi o le tele o lotu Kerisiano e lē ioe i aʻoaʻoga faavae e pei o le ā le uiga o le avea ma Kerisiano. E lē saʻo aʻoaʻoga a na lotu.​—1 Peteru 2:​21.

3.   Na valoia e Iesu, o le toʻatele e faapea mai o Kerisiano ae lē usiusitaʻi i ana poloaʻiga, ma o le a ia teena foʻi i latou na. (Mataio 7:​21-​23; Luka 6:​46) Ua taʻitaʻisesē nisi tagata ona o taʻitaʻi lotu o loo faaleagaina le tapuaʻiga moni ina ia faia ai le mea e mananaʻo ai. (Mataio 7:​15) Peitaʻi ua filifilia e isi tagata le faaaʻoaʻo i le Faa-Kerisiano, talu ai e mafai ona taʻu atu iā i latou mea e fia faalogo ai nai lo upu moni mai i le Tusi Paia.​—2 Timoteo 4:​3, 4.

 I lana tala faatusa i le saito ma vao leaga, na valoia ai e Iesu le tele o teteega faasaga i le Faa-Kerisiano moni. (Mataio 13:24-​30, 36-​43) O le a faaauau pea mo se taimi umi le faigatā ona iloa le eseesega o Kerisiano moni ma Kerisiano pepelo. E pei ona valoia e Iesu, ina ua mavae le maliliu o aposetolo, na matuā toʻatele ai ē na liliuese mai i le upu moni. (Galuega 20:29, 30) E ono eseese aʻoaʻoga a i latou ua liliuese mai le upu moni, ae o ituaiga o Faa-Kerisiano pepelo uma lava ua ʻliliuese mai i le upu moni.’​—2 Timoteo 2:​18.

 O le a oo ina manino mai le eseesega o Kerisiano moni ma Kerisiano pepelo e pei ona valoia e Iesu. E tupu lenei mea i o tatou taimi, ao faagasolo “le taufaaiʻuiʻuga lea o le faiga o mea a le lalolagi.”—Mataio 13:30, 39.