Ua taʻua i le Tusi Paia le finagalo o le Atua mo tagata, ina “ia faamamao mai i le faia o le faitaaga.” (1 Tesalonia 4:3) O le faaupuga “faitaaga” lea o loo faaaogāina i le Tusi Paia, e aofia ai le mulilua, faia o feusuaʻiga i le va o le itupā e tasi, ma feusuaʻiga i le va o se tamāloa ma se fafine e leʻi faaipoipo.

•  Aiseā e tāua ai i le silafaga a le Atua le faaipoipo, ma le lē faaipoipo o se ulugalii?

•  Pe e mafai ona nonofo faatasi a o leʻi faaipoipo, ina ia iloa ai pe tatau ona faaipoipo?

•  E faapefea ona faamalosia e se ulugalii le la faaipoipoga?

•   O le faaipoipoga o se faatulagaga mai le Atua. Na ia faavaeina le faaipoipoga ina ua ia tuufaatasia le uluaʻi ulugalii. (Kenese 2:22-24) E leʻi finagalo le Atua e nonofo faatasi se tamāloa ma se fafine ae leʻi faaipoipo.

•   E silafia e le Atua le mea e sili ona lelei mo tagata. Na ia faia le faaipoipoga o se faatasiga tumau a se tamāloa ma se fafine, lea e maua ai e sui uma o le aiga aogā. Seʻi iloilo se faataʻitaʻiga. E pei lava ona aumaia e se fale fai meafale ni faatonuga i le auala e faapipii ai meafale, e aumaia foʻi e le Atua faatonuga i le auala e atiaʻe ai aiga ina ia taulau manuia. O tapulaa a le Atua e maua ai e i latou e mulimuli i ai aogā.—Isaia 48:17,18.

•   O feusuaʻiga a o leʻi faaipoipo, e iai ni ona aafiaga matuiā. Mo se faataʻitaʻiga, e ono iʻu atu ai i se maʻitaga e lē manaʻomia, o faamaʻi pipisi e māfua mai i feusuaʻiga, ma faalogona lē mautonu.

•   Na tuuina e le Atua i tane ma fafine le avanoa e faia ai ni fanau e ala i feusuaʻiga. E paia le ola i le silafaga a le Atua, ma o se meaalofa le mauaina o ni fanau. E finagalo o ia ina faaalia le faaaloalo i lenā meaalofa, e ala i le faamamaluina o lana faatulagaga mo le faaipoipoga.—Eperu 13:4.

 Ina ia maua se faaipoipoga taulau manuia, e lē tatau ona “nonofo faatasi mo sina taimi,” ina ia iloa atili ai e le tasi le isi. Nai lo lea, e taulau manuia se faiā pe a naunau paaga uma e galulue faatasi e foʻia faafitauli.  a O le faaipoipoga e faamalosia ai le tautoga.—Mataio 19:6.

 E leai se faaipoipoga e lelei atoatoa. Peitaʻi, e mafai e ulugalii ona atiaʻe se faaipoipoga taulau manuia pe a faatatauina fautuaga a le Tusi Paia. O nisi nei o fautuaga:

•   Ia faamuamua manaʻoga o lau paaga nai lo ou lava manaʻoga.—1 Korinito 7:3-5; Filipi 2:3, 4.

•   Ia atiaʻe le alofa ma le faaaloalo o le tasi i le isi.—Efeso 5:25, 33.

•   Ia pulea le auala e tautala ai.—Faataoto 12:18.

•   Ia faaalia le onosaʻi ma vave ona faamagalo atu.—Kolose 3:13, 14.