Sa iai se taimi na faatagaina ai e le Atua le tele o avā a se tane. (Kenese 4:19; 16:1-4; 29:18-29) Ae e lē o le Atua na faavaeina le faatulagaga o le tele o avā. E na o le toʻatasi le avā na ia tuuina atu iā Atamu.

 Sa tuuina atu e le Atua iā Iesu Keriso le aiā e toe faafoʻisia ai Lana uluaʻi faatulagaga, o le tasi o le avā. (Ioane 8:28) Ina ua fesiligia Iesu e uiga i faaipoipoga, na fetalai o ia: “O lē na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ‘O le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi.’”—Mataio 19:4, 5.

 Mulimuli ane na faagaeeina e le Atua se tasi o soo o Iesu e tusi: “Ia taʻitasi le tane ma lana avā, ma ia taʻitasi foʻi le fafine ma lana tane.” (1 Korinito 7:2) Ua taʻua foʻi i le Tusi Paia, o so o se tane faaipoipo i le faapotopotoga Kerisiano e iai ni ona tiute tauave faapitoa, e tatau ona avea o ia “o se tane e toʻatasi lana avā.”—1 Timoteo 3:2, 12.