Pe a e faaaogāina le Initaneti, ia faatalitalia po o le ā lava le taimi ae e iai a le taimi o le a e vaai ai i ata matagā tau feusuaʻiga. Na taʻua e Hayley e 17 tausaga: “E te lē tau alu e saʻili, e sau lava le ata matagā e suʻe oe.”

 E oo lava iā i latou e maumauaʻi e ʻalofia ata matagā tau feusuaʻiga, e faaosoosoina lava i latou. Na taʻua e Greg e 18 tausaga: “Na ou faapea ifo e lē taitai tupu lenā mea iā te aʻu, ae na tupu lava. E lē mafai ona e faapea ifo e lē taitai tupu iā te oe.”

 I aso nei, ua sili atu ona faigofie ona maua ata matagā tau feusuaʻiga nai lo o le taimi muamua. Talu ai ua mafai ona lafoina upu ma ata matagā tau feusuaʻiga i le telefoni, e toatele talavou ua faia a latou lava ata matagā tau feusuaʻiga ma faasalalau atu.

 Manatu autū: E sili atu luʻi ua e fesagaʻia nai lo o ou mātua po o mātua o ou mātua, a o avea foʻi i latou ma talavou. O le fesili, pe e mafai ona e teena ata matagā tau feusuaʻiga?​—Salamo 97:10.

 O le tali o le ioe, pe a e filifili e faia faapea. Ae muamua, e tatau ona e talitonu o ata matagā tau feusuaʻiga e leaga. Seʻi o tatou iloilo nisi o talafatu ma tala moni e faatatau i lenei mataupu.

 Talafatu: E lē mafai e ata matagā tau feusuaʻiga ona aafia ai aʻu.

 Tala moni: E faaleagaina e ata matagā tau feusuaʻiga lou mafaufau, e pei foʻi ona faaleagaina e le ulaula tapaa ou māmā. O le a faaitiitia ai le malosi ma le tumau o le sootaga lea na foafoaina e le Atua mo tagata e toʻalua. (Kenese 2:​24) A o faasolo taimi, e ono mafai ai ona faapogaia oe e manatu māmā i le mea saʻo ma le mea sesē. Mo se faataʻitaʻiga, na faapea mai ni tagata suʻesuʻe, o tane e fai ma a latou masani le matamata i ata matagā tau feusuaʻiga, o le a latou manatu māmā i le faileagaina o fafine.

Ua faamatalaina i le Tusi Paia i latou na, o ē ua “lē toe lagona le mā.” (Efeso 4:19) O le a lē toe gaoioi ai o latou lotofuatiaifo ma oo atu ai i se tulaga ua lē toe lagonaina le matuiā o le faia o le mea leaga.

 Talafatu: E aʻoaʻoina e ata matagā tau feusuaʻiga oe ia iloa feusuaʻi.

 Tala moni: E aʻoaʻoina e ata matagā tau feusuaʻiga oe ia manaʻo tele. Ua faaitiitia ai le tāua o tagata i lau vaai ma ua pei ai i latou ua na o ni mea e faamalie ai ou tuʻinanauga. E lē o se mea e faateʻia ai, na faaiʻu mai se tasi o suʻesuʻega e faapea, o i latou e fai ma masani le matamata i ata matagā tau feusuaʻiga, o le a faaitiitia le faamalieina i feusuaʻiga i totonu o faipoipoga.

Ua fautua mai le Tusi Paia i Kerisiano ia ʻalofia mea uma o loo faaauilumaina e ata matagā tau feusuaʻiga, e pei “o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele.”​—Kolose 3:5.

 Talafatu: O i latou e teena ata matagā tau feusuaʻiga e matamumuli e talanoa e faatatau i feusuaʻiga.

 Tala moni: O i latou e ʻalofia ata matagā tau feusuaʻiga e latou te vaai i feusuaʻiga o se mea e tāua. E latou te vaai i ai o se meaalofa na foafoaina e le Atua, e faamalosia ai le faiā i le va o le tamāloa ma le fafine ua uma ona faaipoipo. O i latou e iai lenā vaaiga, o le a faateleina le faamalieina i feusuaʻiga i totonu o faaipoipoga.

E lē ʻalo faamatalaga a le Tusi Paia e faatatau i feusuaʻiga. Mo se faataʻitaʻiga, o loo faapea mai le Tusi Paia e faatatau i tane: “Ia e fiafia i lau avā na fai a o e tauleʻaleʻa . . . Ia e matuā fiafia pea foʻi i lona alofa.”​—Faataoto 5:​18, 19.

 Ae ā pe a e manatu ua lē mafai ona e teena le faaosoosoga o le matamata i ata matagā tau feusuaʻiga? E mafai ona fesoasoani le vaega galuega faatino “How to Reject Pornography” iā te oe.

 Ia mautinoa, e mafai ona e teena le faaosoosoga ia matamata i ata matagā tau feusuaʻiga. E mafai foʻi ona e aʻoaʻoina le auala e taofia ai le matamata i ia ata matagā tau feusuaʻiga, pe afai o loo e faia faapea. O le a tele mea lelei e mafai ona e maua mai ai.

 Seʻi mātau le faaaʻoaʻoga a Calvin o lē na taʻutino mai na amata ona ia atiaʻe lenei masaniga o le matamata i ata matagā tau feusuaʻiga, i le 13 o ona tausaga. Na faapea mai Calvin: “Na ou iloa e sesē. Ae e leʻi mafai ona ou manumalo mai i le faaosoosoga e matamata pea i na ata. Ina ua uma ona ou matamata i ai, na lē lelei oʻu faalogona. Na iʻu a na iloa e loʻu tamā ma o le mea moni na pei e matuu atu se avega. Mulimuli ane, na ou maua le fesoasoani na ou manaʻomia.”

 Na mafai e Calvin ona teena ata matagā tau feusuaʻiga. Na ia faapea mai: “O le aafia i ata matagā tau feusuaʻiga, o se mea sesē lea o loo faaauau ona faasalaina ai aʻu, ona e fai ma oso aʻe pea i loʻu mafaufau na ata. A o faagasolo taimi, e faaosoosoina aʻu e faaāta po o le ā le ituaiga tagata ou te iai, pe a toe matamata i ata matagā tau feusuaʻiga. Peitaʻi, ou te mafaufau i se lumanaʻi manino ma le fiafia, pe a faia mea uma i le auala a Ieova.”