O amioga lelei e mafai ona faaleleia ai vala nei e tolu i lou olaga:

1.   Lou talaaga. O le auala e tou te feutagaʻi ai ma tagata, e mafai ona avatu ai se molimau lelei pe leaga foʻi. Pe a e faaalia amioga lelei, e ono vaai tagata iā te oe o se tagata matua ma maufaatuatuaina​—ma o le a latou feutagaʻi foʻi ma oe i se auala faapena! Peitaʻi, pe a e lē faaaloalo, o le a manatu tagata iā te oe e te manatu faapito, ma e ono faapogaia ai lou lē mauaina o se avanoa faigaluega po o nisi avanoa i le olaga. E pei ona taʻua i le Tusi Paia, “o le tagata sauā ua ia aumaia faafitauli i lona lava tino.”​—Faataoto 11:17.

2.   O au uō. Ua taʻua i le Tusi Paia: “Ia oofu outou i le alofa, auā o le fusi lea e atoatoa ona autasi ai.” (Kolose 3:14) E matuā moni lenā manatu pe a oo i faauōga. E tosina tagata iā i latou e faaalia amioga lelei ma feutagaʻi ma i latou i se auala lelei. Auā o ai e manaʻo e faauō ma se tagata e lē faaaloalo pe faia amioga lē lelei?

3.   Le auala e feutagaʻi mai ai tagata iā te oe. Ua faapea mai se teine talavou e igoa iā Jennifer, “Pe a o oe o se tagata e faaaloalo i taimi uma, a o faagasolo taimi, o le a e mātauina le faaleleia o le auala e feutagaʻi mai ai tagata, e oo lava iā i latou e masani ona lē faaaloalo mai iā te oe.” O le mea moni, a e lē faaaloalo, e ese la le auala o le a tali mai ai tagata. Ua taʻua i le Tusi Paia: “O fua tou te fuaina atu, e fuaina mai ai iā te outou.”​—Mataio 7:2.

 Manatu autū: O le feutagaʻi ma tagata o se vaega o o tatou olaga i aso taʻitasi. O le auala e te taulima ai lenā vala e faalagolago i ai le auala e vaai ma feutagaʻi mai ai tagata iā te oe. Pe a faafaigofie le manatu, e tāua moni au amioga!

1.   Fai se ʻiloiloga o au amioga.’ Fesili ifo iā te oe i fesili nei: ʻPe ou te talanoa ma tagata matutua i se auala faaaloalo? O le ā le tele ou te fai atu ai “faamolemole,” “faafetai,” po o le “tulou lava”? Pe o faalavelavea aʻu a o oʻu talanoa atu i isi​—atonu o loo faitau pe tali atu i se feʻau tusitusia? Pe ou te feutagaʻi ma oʻu mātua ma oʻu tei i se auala faaaloalo, pe ou te pule lava aʻu i aʻu mea e fai ona o i latou o “loʻu aiga”?’

    Ua faapea mai le Tusi Paia: “Ia tausolomua ona faaaloalo le tasi i le isi.”​—Roma 12:10.

2.   Faataatitia ni sini. Tusi i lalo ni vala se tolu e manaʻomia ona faaleleia. Mo se faataʻitaʻiga, na manaʻo Allison e 15 ona tausaga, ia avea ma sē e “faalogologo lelei, nai lo o sē e tautala soo.” Ua faapea mai David, e 19 tausaga, e manaʻomia ona galue ia aua neʻi toe faia ni feʻau tusitusia a o faatasitasi ma aiga po o uō. Na ia fai mai, “E lē o se faaaloalo, e pei o loo oʻu fai atu e sili atu loʻu talanoa i isi nai lo le talanoa iā i latou.” Ua faapea mai Edward, e 17 tausaga, e manaʻomia ona aua neʻi ona toe faasalavei atu i isi a o tautatala. Ua filifili Jennifer lea na taʻua i le amataga, ia faaleleia ana amioga i le auala e feutagaʻi ai ma tagata matutua. Ua ia faapea mai, “Sa ou masani e na o le fai atu lava o se ʻfaatalofa’ puupuu ma suʻe loa se māfuaaga ou te alu ai i aʻu uō talavou. Ae o lea ua ou matuā taumafai ina ia iloa i latou. Ua fesoasoani tele iā te aʻu e faaleleia ai aʻu amioga!”

    Ua faapea mai le Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.”​—Filipi 2:4.

3.   Mātau le auala o loo e agaʻigaʻi ai i luma. Mo se masina, iloilo le auala e te tautala ai po o au amioga i vala ia e te manaʻo e faaleleia.I le faaiʻuga o le masina, fesili ifo iā te oe i fesili nei: Ua faapefea i aʻu amioga lelei ona avea ai aʻu o se tagata lelei? O ā ni vala e manaʻomia pea ona ou faaleleia? Faataatitia nisi sini fou.

    Ua faapea mai le Tusi Paia: “E pei ona outou mananaʻo e faia mai e tagata iā te outou, ia faapea lava ona outou faia iā i latou.”​—Luka 6:31.