O le “lafoina atu o faamatalaga ma ata matagā i le telefoni,” e aofia ai le lafo atu o upu, ata po o vitiō e faatatau i feusuaʻiga. Ua faapea mai se tasi tamāloa, “Ua pei o se auala masani e talanoa ai. E amata i le fetusiaʻi, ae mulimuli ane ua felafoaʻi ata faatosina.”

 Aiseā ua faia ai faapea e tagata? Na taʻua e se lōia sinia lagolago a le malo i le The New York Times e faatatau i talavou, “O le iai o se ata telenoa o sau uō i lau telefoni, ua faaalia ai o loo e faia feusuaʻiga.” Ua taʻua e se tasi talavou, o se “auala saogalemu lea e faia ai feusuaʻiga.” Na ia toe faapea mai, “O lenei auala, e te lē maʻitaga ai ma e te lē maua ai foʻi i faamaʻi pipisi e ala i feusuaʻiga (S.T.D.)”

 O isi māfuaaga nei e lafo ai e talavou faamatalaga ma ata matagā i le telefoni:

•   Ina ia faatafai i se tasi e fia uō i ai.

•   Ona ua lafo atu e se isi se ata matagā, ua manaʻo ai foʻi la o ia e ʻlafo atu sona ata’.

 O le taimi lava e te lafo atu ai se ata mai i lau telefoni, e lē mafai ona e toe puleaina le auala e faaaogā ai e lenā tagata. O le a iai foʻi aafiaga o lou talaaga ona o lenā ata. Ua faapea mai Amanda Lenhart, o se tagata suʻesuʻe sinia ma o le tusitala o le se lipoti i Pew Research Center, e faatatau i le lafoina atu o faamatalaga ma ata mataga i telefoni, “O gaoioiga sesē e tatou te faia, o le a faigofie ona maua ma matamata ai isi.”

 I nisi tulaga

•   Ua tele ata telenonoa e maua e isi ma toe lafo atu e faafiafia ai a latou uō.

•   E masani ona lafo atu e se tama i isi se ata telenoa o se teine ua la lē toe feoaʻi ina ia tauimasui atu ai.

 E TE SILAFIA? I le tele o tulaga, o le lafoina atu o ata telenonoa e tutusa lelei ma le faileagaina o le fanau. O nisi talavou lāiti na aafia i ia gaoioiga na molia i le solitulafono i mataupu e fesootaʻi i feusuaʻiga.

 O loo taʻuleleia i le Tusi Paia le fiafia e maua mai i le faia o feusuaʻiga i totonu o le liʻo o le faaipoipoga. (Faataoto 5:​18) Peitaʻi, o loo taʻusalaina ai feusuaʻiga i le va o tagata e leʻi faaipoipo. Mātau nisi o nei mau mai i le Tusi Paia:

•   “O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou . . . po o amioga e māsiasi ai, pe e tautala i tala valea, po o tausuaga matagā.”​—Efeso 5:​3, 4.

•   “Ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele.”​—Kolose 3:5.

 O nei mau e lē gata o loo lapataʻia mai ai e faatatau i le “faitaaga” (feusuaʻiga i le va o tagata e leʻi faaipoipo), ae o loo teena foʻi mea e pei o “amioga lē mamā” (o se faaupuga lautele e faatatau atu i so o se ituaiga o gaoioiga lē mamā), ma le “tuʻinanau i feusuaʻiga” (e lē o faasino atu i faalogona tau feusuaʻiga masani lea e faamalieina i le faaipoipoga, ae o se tuʻinanauga lea e taʻitaʻia atu ai i amioga lē talafeagai).

 Ia fesili ifo:

•   E faapefea i le lafoina atu o ata telenonoa i le telefoni, ona avea ma ituaiga o “amioga le mamā”?

•   O ā auala e mafai ona faaosofia ai le “tuʻinanau i feusuaʻiga” e le talafeagai?

•   Aiseā o se “mea e tigā ai” le matamata po o le faasalalau atu o ata telenonoa?

 O mau o le Tusi Paia o loo mulimuli mai, o le a fesoasoani atili e teena ai le lafoina atu o faamatalaga ma ata matagā i le telefoni.

•   “Ia e taumafai malosi e avea oe ma lē ua finagalo malie i ai le Atua, o se tagata faigaluega e leai se mea e mā ai.”​—2 Timoteo 2:​15.

•   “E faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua!”​—2 Peteru 3:​11.

 O na mau o loo faailoa mai ai iʻuga lelei o se tagata e mamā tau amio. Pe a e faia pea amioga lelei, o le a e lē popole la neʻi e toe salamō mulimuli ane i se mea e te faia.​—Kalatia 6:7.

 Ia fesili ifo:

•    O le ā le ituaiga tagata e iai aʻu?

•    Pe e tāua ia te aʻu talaaga o isi?

•    Po ou te fiafia i se mea e faatigā ai se tasi?

•    E faapefea i le lafoina atu o faamatalaga ma ata matagā i le telefoni ona aafia ai loʻu talaaga?

•    E faapefea i le lafoina atu o faamatalaga ma ata matagā ona aveesea ai le maufaatuatuaina o aʻu e oʻu mātua?

 TALA MONI “E iai laʻu uō sa feoaʻi faalilolilo ma se tama. Mulimuli ane na ia lafo atu sona ata telenoa i lenā tama, ma lafo mai foʻi se ata faapena a le tama iā te ia. E leʻi atoa se lua aso, ae siaki e lona tamā lana telefoni. Na ia maua ai ni feʻau tusitusia ma na tumu le tamā i le lē fiafia. Na ia talanoa atu i lona afafine ma na ia taʻutino e moni mea uma. Ou te iloa na salamō i lana mea na fai, ae na faateʻia ma lē fiafia ona mātua. E leʻi faigofie ona toe talitonuina o ia e ona mātua.”

 Le mea moni: O le lafoina o faamatalaga ma ata matagā i le telefoni, e taʻu faatauvaaina ai lē na lafoina atu ma lē e matamata i ai. Ua faapea mai se teine talavou na tauanau e lana uō tama e lafo atu ni ata matagā, “Na ou matuā ʻinoʻino ma lē fiafia iā te aʻu lava.”

 O le lafoina atu o faamatalaga ma ata matagā, e iai aafiaga lē lelei iā te oe ma isi, ma o se solitulafono. E tāua ai lou mulimuli i fautuaga a le Tusi Paia:

•   “Ia sola ese mai i tuʻinanauga masani o talavou.”​—2 Timoteo 2:22.

•   “Ia e liliuese oʻu mata mai i le vaai atu i mea e lē aogā.”​—Salamo 119:37.

 Faatatau fautuaga a le Tusi Paia pe a tulaʻi mai nei faafitauli i lou olaga. Faitau i le faamatalaga a Janets, ma filifili po o lē fea e sili ona talafeagai.

 “Na ma fetaui ma se tama ma na ave i ai le numera o laʻu telefoni. E leʻi atoa se vaiaso ae manaʻo e lafo atu ni oʻu ata o loo ofu loʻu ofu taʻele.”​—Janet.

 O le ā sa tatau ona fai e Janet? O le ā o le a e faia?

•  FILIFILIGA 1 E te ono mafaufau: ʻE leai se mea e leaga ai auā a ma ō i le matāfaga, o le a ia vaai lava o ofu loʻu ofu taʻele.’

•  FILIFILIGA 2 E te ono mafaufau: ‘Ou te lē mautinoa po o le ā tonu e manaʻo ai. O le a lafo muamua i ai se ata e lē faatosina tele ma vaai po o le ā sona manatu.’

•  FILIFILIGA 3 E te ono mafaufau: ‘E tasi a le mea lea e manaʻo ai. O le tapē loa o lana feʻau tusitusia.’

 E foliga mai o le Filifiliga 3 e sili ona talafeagai, a ea? Auā ua faapea mai le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.”​—Faataoto 22:3.

 O loo faamatilatila i le faataʻitaʻiga a Janet, le māfuaaga o le lafoina o faamatalaga ma ata matagā i le telefoni, faapea isi ituaiga o amioga lē talafeagai: Po o filifili lelei au uō? (Faataoto 13:20) Ua faapea mai se fafine e igoa ia Sara: “Ia faauō i tagata e ʻinoʻino i amioga lē talafeagai.” E ioe foʻi se fafine talavou e igoa iā Delia: “E taumafai nisi o uō ia e solia au tapulaa tau amio, nai lo le tausisi i ai. E latou te faalaeiauina oe ia e lē faamaoni i na tapulaa pe afai e feteenaʻi a latou amioga ma tulafono a le Atua. Pe e te manaʻo moni e tupu lenā mea?”