UA FESILI MAI TALAVOU

E Faapeʻī Oʻu Foliga Vaaia?

PLAY

Aiseā e tatau ai ona e manatu mamafa i ou laʻei? Talu ai o laʻei e mafai ona taʻu atu ai le ituaiga tagata e iai oe. O le ā o loo faailoa atu i ou laʻei?

Manatu sesē e tolu e faatatau i laʻei ma teuga, ma le auala e ʻalofia ai

Manatu Sesē #1: Ia fua le auala e te laʻei ai i mea o aumai i faasalalauga.

“O nisi taimi ou te tosina ai i se āʻega ona e tele ina ou vaai ai i faasalalauga,” ua faapea mai ai se talavou e igoa ia Theresa. “Pe a tele ina e mafaufau i ata o tagata o loo ofuina se ituaiga laʻei, o le a e fia faataʻitaʻi ai foʻi.”

E lē na o tamaʻitaʻi e faigofie ona tosina atu i faasalalauga. Ua faapea mai le tusi The Everything Guide to Raising Adolescent Boys, “E faigofie foʻi ona taaʻina tama i laʻei ma āʻega fou,. . . Ua iloa e le ʻaufaasalalau mea e taaʻina ai i latou mai lava a o lāiti.”

Se manatu e sili atu: Ua faapea mai le Tusi Paia: “E faatuatua le tagata ua leai se poto masani i upu uma, a o le tagata e iai le utaga mamao, e na te iloilo lelei ona laasaga.” (Faataoto 14:15) Ina ia faatatau lenei mataupu silisili, e tatau ona e iloilo lelei mea o loo sau i faasalalauga. O se faataʻitaʻiga, pe a e vaai i faasalalauga o ofu e faapea atu e faatosina, ia fesili ifo:

ʻO ai e maua aogā pe a ou faataʻitaʻi i lenā aʻega?’
ʻO le ā le ituaiga olaga e atagia atu ai pe a ou filifilia lea ofu?’
ʻPo o atagia atu ai le tagata moni ou te iai ma tapulaa o loo ou ola ai?’

Sina Fautuaga: Mo se vaiaso, ia iloilo lelei faasalalauga e faatatau i laʻei ma āʻega fou. O le ā le ituaiga olaga o loo faalauiloa mai ai? Po o atagia mai ai ni taumafaiga e uunaʻia oe e manatu, e tatau ona e faataʻitaʻi i lenā āʻega? Ua faapea mai se talavou e igoa Karen, “Ua taatele le faanaunauga o le manaʻo ia lelei atoatoa foliga vaaia, ia lelei atoatoa le auala e laʻei ai, ma faaalialia atu se fuaitino manaia. O le iloaina e le ʻaufaasalalau o lenā mea, ua faigofie ai ona latou taaʻina talavou.”

Manatu Sesē #2: Ia filifili se āʻega fou ina ia fiafia mai ai isi.

Ua faapea mai se talavou e igoa iā Manuel, “Pe a avea se ituaiga ofu ma sikaili fou, o le a talia e le toʻatele lenā sikaili. Pe a e lē ofu ai, o le a lē fiafia ai tagata iā te oe.” E faapena le manatu o se talavou e igoa iā Anna o lē na faapea mai, “E lē o le mea tāua le auala e laʻei ai, ae o le mea e fiafia mai ai isi ia te oe.”

Se manatu e sili atu: Ua faapea mai le Tusi Paia: “Aua tou te mulimuli i lenei faiga o mea a le lalolagi.” (Roma 12:2) Ina ia faatatauina lenei fautuaga, ia toe vaai lelei ou laʻei o loo iai ma fesili ifo:

ʻO ā ni mea o loo taaʻina ai laʻu filifiliga i laʻei?’
ʻO le ā le tāua iā te aʻu o ofu e faia e ni kamupani lauiloa?’
ʻPo o oʻu taumafai e faaofo isi i oʻu laʻei?

Sina Fautuaga: Pe a faia lau filifiliga, e lē lava le tau ina e vaai po o se āʻega fou (ma e talia) po o se sikaili ua lē toe taatele (ma teena), ae ia iloilo le manatu lona tolu lenei: o le mea e talafeagai ma lelei ai ou faalogona. Pe a iā te oe se vaaiga mautinoa iā te oe lava, o le a e lē popole la ina ia faia se mea e fiafia mai ai isi.

Manatu Sesē #3: ʻA lē faatosina, e lē manaia.’

Ua taʻutino mai e se teine e igoa iā Jennifer, “O le mea moni, e iai taimi e faaosoosoina ai e fai se ofu faatosina, a lē puupuu tele pe fufusi tele.”

Se manatu e sili atu: Ua faapea mai le Tusi Paia: “Aua foʻi neʻi faia a outou teuga e tusa ai ma le vaaiga a tagata . . ae o le tagata lilo i totonu.” (1 Peteru 3:3, 4) Ina ia faatatau lenei fautuaga, ia mafaufau po o lē fea e sili ona tosina i ai tagata, po o laʻei e maofa ai po o uiga lelei e pāʻia ai le loto.

Sina Fautuaga: O le auala sili e laʻei ai, ia onomea. O le mea moni, e lē o toe taatele lenā manatu i aso nei. Ae seʻi mafaufau i le tulaga lenei:

Pe na e talanoa muamua i se tagata e tautala soo, ma e talanoa mai lava o ia e faatatau iā te ia lava? O le itu e faanoanoa ai, e na te lē o iloa mai ua ia taofia ai lou fia talanoa atu iā te ia.

E pei o talanoaga, pe a tatou soona faauaʻi mai tagata i o tatou laʻei, o le a latou lē fia faifaimea faatasi ma i tatou

Pe a lē onomea ou laʻei, o le a pei ai oe o lenā tagata. O na ituaiga laʻei e ono tosina mai ai le vaai a tagata iā te oe, ma manatu ai o oe o se tagata e lē mautonu pe manatu faapito, po o uiga uma foʻi na e lua. E ono vaai ai foʻi tagata iā oe o sē o loo matuā naunau e faauaʻi atu isi iā te oe, e tusa pe i se auala e lē talafeagai.

Pe afai e te lē manaʻo e manatu faapena tagata ia te oe, e tatau la ona e laʻei ia onomea. Ua faapea mai se talavou e igoa ia Monica, “Ina ia onomea, e lē faapea ai e tatau ona e laʻei e pei o se loomatua. Ae e uiga atu i lou manatu mamafa iā te oe lava ma isi.”