E tusa ai ma se lipoti a le U.S. Centers for Disease Control and Prevention, pe tusa o le ʻafa o i latou na faatalanoa mai i le 15 i le 19 tausaga, na faia feusuaʻiga e faaaogā ai le gutu. Na taʻua e Sharlene Azam o le tusi tala o le tusi Oral Sex Is the New Goodnight Kiss: “Pe a e talanoa i se talavou e [faatatau i feusuaʻiga e faaaogā ai le gutu], e latou te faapea mai e lē o se mea leaga. E lē o se feusuaʻi lenā mea iā i latou.”

•  O le ā sou manatu?

•  O ā mea moni?

•  Aiseā e te fia iloa ai?

 Ia tali fesili o loo mulimuli mai i le ioe po o le leai.

1.  1. Pe e mafai ona tō se teine i le faia o feusuaʻiga e faaaogā ai le gutu?

   1.  A. Ioe

   2.  E. Leai

2.  2. Pe e iai se aafiaga o lou soifua mālōlōina i le faia o feusuaʻiga e faaaogā ai le gutu?

   1.  A. Ioe

   2.  E. Leai

3.  3. Po o se feusuaʻi le faia o feusuaʻiga e faaaogā ai le gutu?

   1.  A. Ioe

   2.  E. Leai

 Ia faatusatusa au tali ma tali o loo mulimuli mai.

1.   Pe e mafai ona tō se teine i le faia o feusuaʻiga e faaaogā ai le gutu?

    Tali: Leai. O se tasi lenā o māfuaaga ua sesē ai le vaaiga a le toʻatele o tagata, ma faapea mai e lē leaga le faia o feusuaʻiga e faaaogā ai le gutu.

2.   Pe e iai se aafiaga o lou soifua mālōlōina i le faia o feusuaʻiga e faaaogā ai le gutu?

    Tali: Ioe. O se tagata e faia feusuaʻiga e faaaogā ai le gutu, e mafai ona aafia i faamaʻi e pei o le ate fefete (A po o le B), papala o totogasā, maʻi afi, HIV ma isi faamaʻi o totogasā.

3.   Po o se feusuaʻi le faia o feusuaʻiga e faaaogā ai le gutu?

    Tali: Ioe. O le faia o so o se amioga e aafia ai totogasā o le isi tagata, e pei o feusuaʻiga, feusuaʻiga e faaaogā ai le gutu, feusuaʻiga e faaaogā ai le ala feʻau, taaloalo i totogasā o le isi tagata, o le faia lava lenā o feusuaʻiga.

 Seʻi o tatou iloiloina nisi o mau o le Tusi Paia e fesootaʻi i le faia o feusuaʻiga e faaaogā ai le gutu.

 Manatu o le Tusi Paia: “O le finagalo lenei o le Atua ina ia [outou] . . . faamamao mai i le faia o le faitaaga.”​—1 Tesalonia 4:​3.

 O le upu i le uluaʻi gagana o loo faaliliu mai ai le “faitaaga,” o loo faasino atu i so o se ituaiga feusuaʻiga e faia i fafo atu o le liʻo o le faaipoipoga, e aofia ai feusuaʻiga, feusuaʻiga e faaaogā ai le gutu, feusuaʻiga e faaaogā ai le ala feʻau, ma le taaloalo i totogasā o le isi tagata. O se tasi e faia le faitaaga, e oo i ai aafiaga matuiā ma o le aafiaga e pito sili ona matuiā, o le faaleagaina ai o le la faauōga ma le Atua.​—1 Peteru 3:12.

 Manatu o le Tusi Paia: “O lē e faaauau ona faitaaga, ua agasala o ia i lona lava tino.”​—1 Korinito 6:18.

 O le faia o feusuaʻiga e faaaogā ai le gutu, e faaleagaina ai le soifua mālōlōina ma le itu faaleagaga. E aafia ai foʻi ou faalogona. Ua faapea mai le tusi Talking Sex With Your Kids: “E lē na o tagata e faia feusuaʻiga i le auala masani e iai faalogona ua faaaogā i latou, salamō po o le aafia gofie i faalogona fefe po o le popole. O faalogona leaga uma e ono aafia ai se tagata i le faia o feusuaʻiga, e mafai ona aafia ai so o se tasi e faia so o se ituaiga o feusuaʻiga. O le feusuaʻi lava o le feusuaʻi.”

 Manatu o le Tusi Paia: “O aʻu o Ieova, lou Atua, o Lē o loo aʻoaʻo oe i mea e aogā iā te oe.”​—Isaia 48:​17.

 Pe e te talitonu e aogā moni lava iā te oe tulafono a le Atua e faatatau i feusuaʻiga? Pe e te manatu ua faasāsā naʻuā tele na tulafono? Ina ia fesoasoani iā te oe e tali na fesili, seʻi mafaufau i se auala pisi o loo iai ni faailoilo o le saosaoa faatapulaa, molī auala, ma faailoilo o mea e tatau ona taofi ai le taavale. Pe e te manatu i na faailoilo o ni faasāsāaga po o se puipuiga? O le ā e tupu pe a outou lē amanaʻia ma isi ave taavale na faailoilo?

 E faapena foʻi tapulaa a le Atua. Pe afai e te lē amanaʻiaina na tapulaa, o le a e selesele la i le mea na e lūlūina. (Kalatia 6:7) Ua faapea mai le tusi Sex Smart: “O le tele lava e te lē amanaʻiaina ai ou talitonuga ma mea lelei na aʻoaʻoina ai oe, ma faia mea e te iloa e lē saʻo, o le leai foʻi lenā o sou faaaloalo iā te oe lava.” Peitaʻi, pe a e ola e tusa ai ma tapulaa a le Atua, ua e faaalia atu la le ituaiga tagata moni e iai oe. Ae e sili atu i lenā, o le a e maua ai pea se lotofuatiaifo mamā.​—1 Peteru 3:16.