E iai taimi e taumānatu ai nisi tagata tapuaʻi o le Atua, po o aogā a latou taumafaiga ina ia ola ai i tapulaa a le Tusi Paia. (Salamo 73:2, 3) E latou te ono faia ni gaoioiga e feteenaʻi ma tulafono a Ieova, ma taumafai e faasesēina isi tagata tapuaʻi e ala i le nanā o a latou amioga leaga.

 Ua saunia lenei mataupu e fesoasoani iā i latou o loo mananaʻo e taofia le ola i se olaga uigalua.

E maua i lenei itulau

•  O le ā e uiga i ai le ola i se olaga uigalua?

•  Po o aʻu o se tagata leaga ona o loo oʻu ola i se olaga uigalua?

•  E faapefea ona ou lē toe ola i se olaga uigalua?

•  Tala a isi talavou

 O le ola i se olaga uigalua, e uiga atu i lou faia o mea sesē pe a e faatasitasi ma au uō e lē usiusitaʻi iā Ieova, ae pe a e iai faatasi ma auauna faamaoni a Ieova, ona e faafoliga atu lea o loo e naunau e auauna iā te ia. E tai pei e lua ni olaga eseese o loo e ola ai, ma e te lē manaʻo e iloa e tagata na ituaiga o olaga.

 “O le ola i se olaga uigalua, o lenā ua e nanāina na ituaiga olaga, ma lē iloa ai e isi le ituaiga o tagata e iai oe. O le mea moni lava ia, o lou ola i se olaga uigalua, ua e faasesēina ai tagata uma lava.”—Erin.

 E te silafia? O le ola i se olaga uigalua, e aofia ai foʻi le faia o gaoioiga e lē fiafia i ai le finagalo o Ieova pe a na o oe.

 “Na amata ona ou matamata i ata matagā i le Initaneti ina ua 14 oʻu tausaga. Pe a ou iai faatasi ma isi, ou te faafoliga atu ou te ʻinoʻino i ata matagā, ae e lē o oʻu faalogona moni na.”—Nolan.

 Mataupu silisili o le Tusi Paia: “E lē mafai ona pologa se tasi i ni matai se toʻalua; auā e ʻinoʻino o ia i le tasi ae alofa atu i le isi, pe e pipii atu i le tasi ae manatu faatauvaa i le isi.”—Mataio 6:24.

 Atonu e leai. O nisi tagata ua lē mananaʻo e ola i tapulaa a le Tusi Paia. Po o ou faalogona na? Pe e iai se māfuaaga ua e ola ai i se olaga uigalua? Atonu o nisi nei o māfuaaga:

•   E te popole ina neʻi ese mai oe i isi au uō.

•   E te lagona e tutusa mea e te fiafia i ai ma tamaiti o lau aʻoga nai lo o talavou o le faapotopotoga.

•   E te lagona ua lē mafai ona e mulimuli i tulafono uma a le Atua.

 “O nisi talavou o ē e ola i ni olaga uigalua, e sili atu ona saʻoloto pe a iai faatasi ma tagata e lē o ola i tapulaa faa-Kerisiano, ona e latou te mananaʻo e talia i latou i so o se tulaga.”—David.

 O le mea moni, e lē o ni faamolemolega na e ola ai i se olaga uigalua. Ae ua fesoasoani e tatou te iloa ai e oo lava i tagata lelei, e mafai ona lolo atu i lenā faaosoosoga. O le ā e mafai ona e faia pe afai ua tupu lenā mea iā te oe?

1.  1. Iloilo le ituaiga olaga o loo e ola ai i le taimi lenei. Ia fesili ifo: ʻPo o oʻu fiafia i le ituaiga tagata lea ou te iai? Afai ou te faaauau ai lava faapea, o le ā le iʻuga ou te oo i ai?

    Mataupu silisili o le Tusi Paia: “O lē ua iai le utaga mamao e na te iloa atu le lamatiaga . . . , a o lē ua leai se poto masani e alu atu pea o ia ma mafatia ai i āuga.”—Faataoto 27:12.

2.  2. Ia faailoa atu i isi. Ia faamatala atu lou tulaga i ou mātua, po o se uō taʻumatuaina e na te faatāuaina tulafono a Ieova. E lē taumatea o le a latou fiafia pe a e talanoa atu mo se fesoasoani. O le a latou fiafia foʻi e iloa o loo e manaʻo e fai le mea saʻo.

    “O le faailoa atu o aʻu mea sesē i isi o le mea lenā sa sili ona faigatā iā te aʻu, ae na matuā lelei ai oʻu faalogona.”—Nolan.

    Mataupu silisili o le Tusi Paia: “O lē ua ufiufi i ana solitulafono e lē taulau manuia o ia, a o sē e taʻutino atu ma lafoaʻi ia mea, o le a faaalia i ai le alofa mutimutivale.”—Faataoto 28:13.

3.  3. Talia āuga o au amioga. Ia manatua e faigatā ona talitonuina oe e ou mātua ma le faapotopotoga, pe a e nanāina se mea mai iā i latou. O le iʻuga, atonu o le a faasā oe e ou mātua pe e taofia foʻi oe e toeaina o le faapotopotoga mai i le faia o nisi o mea. Ia talia āuga o au gaoioiga, ma taumafai malosi loa e “faia mea uma ma le faamaoni.”—Eperu 13:18.

    Mataupu silisili o le Tusi Paia: “Ia faalogo i le fautuaga ma talia le aʻoaʻiga, ina ia e atamai ai i aso o i luma.”—Faataoto 19:20.

4.  4. Ia e mautinoa e alofa le Atua iā te oe. Talu ai e alofa Ieova iā i tatou, e na te silafia lelei so o se gaoioiga e tatou te faia. E silafia lelei la e Ieova pe a e ola i se olaga uigalua, ma e faanoanoa ai. E naunau o ia e fesoasoani mai e faasaʻo ou ala, “auā o loo manatu mamafa mai” iā te oe.—1 Peteru 5:7.

    Mataupu silisili o le Tusi Paia: “E silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.”—2 Nofoaiga a Tupu 16:9.