Ua e tosina atu i se isi na e feiloaʻi i ai, ma ua lua ioe uma e te lua faia se tuugātala, ina ia iloa ai pe e fetaui le tasi i le isi e avea ma paaga faaipoipo. O le ā e tatau ona lua faatalitalia a o faasolo ina māfana le lua faauōga?

I lenei mataupu

•  Ia saʻoloto le auala e talanoa ai

•  O le a eseese o oulua manatu

•  O le a iai mea e faapopoleina ai a o lua tuutala

 E mautinoa o le a tele mea e aʻoaʻoina e le tasi e faatatau i le isi, a o lua faifai mea faatasi. O nisi mea o le a lua aʻoaʻoina, a o mātauina e le tasi uiga o le isi.

 Peitaʻi, e iai foʻi mataupu e manaʻomia ona faamaoni ai le tasi i le isi a o lua talanoaina. A o lua faia faapea, ia saʻoloto le talanoa ma ʻalofia le faia o faaiʻuga e fua i lua faalogona.

 O nisi o mataupu e ao ona lua talanoaina, e aofia ai:

•   Tupe. Pe e iai ni a oulua aitalafu? Pe e faigatā iā te oulua ona faasoasoa lelei tupe? Pe a oulua faaipoipo, e faapefea ona lua faia faaiʻuga e faatatau i tupe maua ma tupe faaalu?

•   Soifua mālōlōina. Po o lelei o oulua soifua mālōlōina? Pe na aafia se tasi o oulua i se maʻi ogaoga i le taimi ua teʻa?

•   Sini. O le ā le auala lua te mananaʻo e faaaogā ai o oulua olaga? Pe e tutusa o oulua sini? Pe a uma ona oulua faaipoipo, po o le a lua maua pea le lotomalie, pe a lē ausia na sini ona ua suia le tulaga o mea?

•   Aiga. Pe e iai nisi o o oulua aiga o loo lua tausia? Pe e iai nisi o o oulua aiga e te lua ono tausia i le lumanaʻi? Pe e te lua mananaʻo e fai sa oulua fanau? E toʻafia e te lua mananaʻo ai?

 A o oulua talanoa i na mataupu, ia saʻoloto le talanoa ma ia faamaoni le tasi i le isi. Aua le nanāina le mea moni pe mimilo sesē faamatalaga, ina ia logolelei ai i le faalogo a lau uō.—Eperu 13:18.

 Ia mafaufau i ai: O le ā e manaʻomia ona e iloa e faatatau i le tagata o loo lua tuutala? O le ā e tatau ona ia iloa e faatatau iā te oe? E faapefea i lo oulua faamaoni i a oulua talanoaga i le taimi lenei, ona fesoasoani e faalelei ai a oulua fesootaʻiga pe a lua filifili e faaipoipo?

 Mataupu Silisili o le Tusi Paia: ʻIa tautala i le mea moni.’—Efeso 4:25.

 “E ono manatu se teine, ʻAtonu o le a fai le ma faamau pe a atoa le ono masina,’ ae e ono manatu le tama faatoʻā fai pe a atoa le tausaga. Pe a tupu lenā mea, e ono tigā ai faalogona o le teine ma lē mautonu ai, ona na ia faatalitalia o le a vave ona la uia lenā laasaga. E tāua la le malamalama o le tasi i manatu o le isi.”—Ariana, tasi le tausaga talu ona faaipoipo.

 E lē tutusa uma oulua. Aua e te faatalitalia o le a oulua ioe i mea uma, pe tutusa o oulua manatu e faatatau i mea. O le mea moni, o aganuu ma le auala na e ola aʻe ai, e mafai ona aafia ai lau vaai i mea.

 Ia mafaufau i ai: Pe a eseese o oulua manatu i ni mataupu lāiti e lē solia ai ni mataupu silisili o le Tusi Paia, po o le a oulua lotomalilie e lolo atu le tasi i manatu o le isi ina ia tausia ai le filemu?

 Mataupu Silisili o le Tusi Paia: ʻIa iloa lo outou magafagafa.’—Filipi 4:5.

 “Po o le ā lava lou manatu e fetaui lelei oulua, e iai lava mea e te lua eseese ai. E ui e tāua le ioe faatasi i se mea, ae sili atu ona tāua uiga e faaalia e le tasi i le isi pe a eseese o oulua manatu.”—Matthew, lima tausaga talu ona faaipoipo.

 E mautinoa o tuugātala o le a tele le taimi e alu ai, ma e ono iai mea e faapopoleina ai oe. O le ā e mafai ona fesoasoani iā te oe?

 E ao ona faatulaga ni tapulaa talafeagai a o lua tuutala. Aua neʻi alu uma lou taimi i le lua faigāuō, ma e faatalalē ai i isi ou tiute tauave pe lē amanaʻia ai isi au uō. Ua faapea mai Alana ua lima tausaga talu ona faaipoipo: “E te lua manaʻomia a oulua uō, e tusa lava pe ua uma ona lua faaipoipo, ma e latou te manaʻomia foʻi oulua. Aua e te lua lē ano i a oulua uō ona o lenā ua lua tuutala.”

 Ia manatua, pe a lua faaipoipo, e manaʻomia ona paleni vala uma o o oulua olaga. Aiseā e lē taumafai ai e faapaleni o oulua olaga i le taimi lenei a o lua tuutala?

 Ia mafaufau i ai: Po o e manaʻo e faoa uma le taimi o le isi, ma uaʻi uma mai iā te oe a o lua feoaʻi? Pe e te manatu ua tagisā naʻuā lau uō? E faapefea ona faapaleni la oulua vaaiga i mea, ina ia aua ai neʻi avea la oulua faauōga o se avega mamafa?

 Mataupu Silisili o le Tusi Paia: “E iai le taimi e atofaina mo mea uma, o le taimi mo mea uma e tutupu.”—Failauga 3:1.

 “Pe afai e na o tafaoga e faaalu ai le taimi o se tama ma se teine o loo tuutala, e ono faateʻia la i laʻua i ni tulaga lē lelei e tulaʻi mai pe a la faaipoipo. O se mea lelei mo i laʻua le faia o feʻau i aso fai soo, e pei o le faia o faatau, faia o feʻau i le fale, ma tapuaʻi faatasi. O le faia faapea, o le a fesoasoani iā i laʻua e atiaʻe ai se faavae mautū mo le la faaipoipoga.”—Daniel, lua tausaga talu ona faaipoipo.

 Ia manatua, e lē tumau pea ona lua tuutala, ae o se laasaga tāua e faia ai la oulua filifiliga pe faaipoipo pe faamuta le faigāuō. O le Vaega 3 o lenei faasologa o mataupu, o le a talanoaina ai mea e ao ona lua iloiloina pe a faia lenā filifiliga.