I lenei mataupu

•  O le ā e uiga i ai tuugātala?

•  Po ua e sauni mo se tuugātala?

  E vaai nisi i le faia o tuugātala ua na o se mea e maua ai le fiafia. I lenei mataupu, o loo faasino atu “tuugātala” i le vaitaimi lea e faaalu e se tama ma se teine ina ia iloa ai, pe e talafeagai ona la faaipoipo. E iai la le fuafuaga o tuugātala, ae e lē na o se faauōga e tau ina fiafia ai.

 E iai le taimi a o faagasolo le tuugātala, e tatau ai ona faia se filifiliga po o le a faaipoipo, pe e faauma le faigāuō, ma e manaʻomia ona sauniuni i ai.

 O le manatu tāua: Pe afai e te manatu ua e sauni mo se tuugātala, e tatau foʻi la ona e sauni e te faaipoipo.

  O le tuugātala, e ono iʻu atu ai i se faaipoipoga. O lea la, e manaʻomia ona iloilo po o ā uiga e tatau ona e atiaʻe, e faamalosia ai le lua faiā. O se faaaʻoaʻoga, mātau vala nei:

•   Faiā faaleaiga. O le auala e tou te feutagaʻi ai ma ou mātua ma nai ou tei, aemaise lava pe a e lē fiafia, e masani lava ona faailoa mai ai le auala o le a e feutagaʻi ai ma lau paaga.

   Mataupu silisili o le Tusi Paia: “Ia tuu lo outou ita faamoemoe, ma le itaitagofie, ma le lotoa, ma le soona eʻē, ma upu masoā, atoa foʻi ma mea leaga uma.”—Efeso 4:31.

   Ia fesili ifo: ‘Pe e manatu oʻu mātua ma nai oʻu tei o loo oʻu feutagaʻi ma i latou i se auala faaaloalo? Pe a eseese o matou manatu i se mataupu, pe ou te tali atu i se auala filemu, pe e vave ona ou ita ma finau atu?’

•   Faataulaga. Pe a e faaipoipo, e tatau ona e amanaʻia manatu o lau paaga, ma faamuamua ona manaʻoga nai lo o le mea e te manaʻo i ai.

   Mataupu silisili o le Tusi Paia: “Aua neʻi saʻilia e se tasi lona lava lelei, ae ia faaauau ona saʻili le lelei o isi.”—1 Korinito 10:24.

   Ia fesili ifo: ‘Pe ou te tausisi lava e fai le mea ou te manaʻo ai? Pe e vaai isi iā te aʻu o se tagata e fetuutuunaʻi? O ā ni auala o loo oʻu faailoa atu ai ou te faamuamua manaʻoga o isi nai lo o oʻu lava manaʻoga?’

•   Lotomaulalo. O se paaga faaipoipo lelei, e taʻutino atu ona sesē ma faatoese atu.

   Mataupu silisili o le Tusi Paia: “E sesē i tatou uma i le tele o taimi.”—Iakopo 3:2.

   Ia fesili ifo: ‘Pe e vave ona taʻutino atu aʻu mea sesē pe ou te fai faamolemolega? Pe e vave ona ou ita pe a fautua mai nisi i mea e manaʻomia ona faaleleia iā te aʻu lava ia?’

•   Tupe. O tupe o se tasi lea o māfuaaga taatele o faafitauli i le faaipoipoga. Pe a mafai e se tasi ona faasoasoa lelei le faaaogāina o tupe, o le a ʻalofia ai lenā faafitauli.

   Mataupu silisili o le Tusi Paia: “Afai e manaʻo se tasi o outou e fau se ʻolo, e lē muamua ea ona nofo o ia i lalo ma faitau tupe o le a faaalu, ina ia iloa ai po ua lava mea e faauma ai?”—Luka 14:28.

   Ia fesili ifo: ‘Pe e mafai ona ou pulea le soona faaalu o tupe, po ou te aitalafu soo? O ā auala ua ou faaalia atu ai e mafai ona ou faasoasoaina lelei tupe?’

•   Faasologa faaleagaga. Pe afai o oe o se tasi o Molimau a Ieova, e tatau ona iai sau faasologa lelei o le suʻesuʻeina o le Tusi Paia ma auai i sauniga e lē aunoa.

   Mataupu silisili o le Tusi Paia: “E fiafia o ē e manatu mamafa i o latou manaʻoga faaleagaga.”—Mataio 5:3.

   Ia fesili ifo: ʻPo o oʻu tausisi i laʻu faasologa faaleagaga? Po ou te faamuamua laʻu faasologa faaleagaga i loʻu olaga, pe ou te faataga isi mea e faalavelavea ai?’

 O le manatu tāua: E tatau ona avea oe o se paaga faaipoipo lelei. Pe a e galue mamafa e avea o se paaga faaipoipo lelei, o le a atili māfana ai le lua faauōga.