E manaʻomia ona tausia meafaitino tāua e pei o se fale po o se taavale. E faapena foʻi lau faiā ma le Atua. E faapefea ona e faatumau lenā faiā pe a uma ona e papatiso?

I lenei mataupu

•  Ia faaauau ona suʻesuʻe le Afioga a le Atua

•  Ia faaauau ona tatalo iā Ieova

•  Ia faaauau ona faasoa atu i isi ou talitonuga

•  Ia faaauau ona auai i sauniga faa-Kerisiano

 Mau autū: “[Ia] faaauau ona outou fua mai fua o galuega lelei uma, ma ia tupu pea lo outou poto saʻo i le Atua.”—Kolose 1:10.

 Lona uiga: Pe a uma ona papatiso, e manaʻomia ona faaauau ona e suʻesuʻe le Tusi Paia ma manatunatu loloto i mea ua e aʻoaʻoina.—Salamo 25:4; 119:97.

 Le mea e faatalitalia: O le a iai taimi e te lē fia suʻesuʻe ai. E te ono manatu ai e lē o oe o se tagata e fiafia e suʻesuʻe.

 Mea e mafai ona e faia: Ia suʻesuʻe loloto i mataupu faale-Tusi Paia e te fiafia i ai. Ia filifili le auala ma le taimi e suʻesuʻe ai le Tusi Paia ma lomiga faale-Tusi Paia. O le faia o se faasologa, o le a lē avea ai le suʻesuʻe o se avega mamafa iā te oe. O lou sini, ia tuputupu aʻe lou alofa mo Ieova ma lana Afioga. O lenā auala e lē gata o le a aogā iā te oe ae o le a e maua ai foʻi le fiafia.—Salamo 16:11.

 Fesoasoani: Ina ia e maua le tele o aogā mai i au suʻesuʻega, ia taumafai e saʻili se nofoaga toʻafilemu e leai se mea e tosina ese ai.

 Fesoasoani atili

•   Faitau:

   “E Faapefea ona Fesoasoani le Tusi Paia iā te Aʻu?—Vaega 2: Ia Maua le Fiafia i le Faitauina o le Tusi Paia”

   “E Faapefea Ona Ou Uaʻi Atoatoa Atu i se Mea?”

•   Maimoa:

   Tala a Isi Talavou—Faitauga Tusi Paia

•   Kopi:

   “Faasologa mo le Faitauga Tusi Paia”

 Mau autū: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.”—Filipi 4:6.

 Lona uiga: E lua vala e aofia ai i le fesootaʻiga ma le Atua: E te faalogo iā te ia pe a e faitau i lana Afioga; e te talanoa iā te ia pe a e tatalo. Pe a e tatalo, e mafai ona e talosaga i le Atua e fesoasoani mai, ma faafetai iā te ia mo faamanuiaga ua e maua.

 Le mea e faatalitalia: O le a iai taimi e te lagona ai ua fai faatauloto pe e leai foʻi se uiga o au tatalo. E te ono masalosalo foʻi po o faafofoga moni mai lava Ieova iā te oe.—Salamo 10:1.

 Mea e mafai ona e faia: A o faagasolo le aso, ia mafaufau i mea e mafai ona e tatalo ai. Pe afai e lē o talafeagai lou tulaga i lenā taimi e fai ai se tatalo umī, ia manatua e faaaofia na mea i lau tatalo i se isi taimi o lenā aso. E lē gata o mea e tāua iā te oe, ae ia tatalo foʻi mo isi.—Filipi 2:4.

 Fesoasoani: Pe afai e foliga mai ua fai faatauloto au tatalo, ia tatalo patino iā Ieova e faatatau i lenā mea. E finagalo o ia e faafofoga mai i ou popolega uma, e aofia ai ma ou popolega e faatatau i le tatalo.—1 Ioane 5:14.

 Fesoasoani atili

•   Faitau:

   “Aiseā e Tatau ai Ona Ou Tatalo?”

•   Kopi:

   “How to Improve Your Prayers”

 Mau autū: “Ia uaʻi totoʻa iā te oe lava ma lau aʻoaʻo atu. . . . O le faia faapea e faaolaina ai oe lava atoa ma i latou o faalogo iā te oe.”—1 Timoteo 4:16.

 Lona uiga: Pe a faasoa atu ou talitonuga i isi, o le a faamalosia ai foʻi lou faatuatua. O le iʻuga, o le a faasaoina ai oe faapea i latou e faalogo iā te oe.

 Le mea e faatalitalia: O le a iai taimi e te lē manaʻo ai e faasoa atu ou talitonuga i isi. E te ono lagona foʻi le fefe e faia faapea aemaise lava i le aʻoga.

 Mea e mafai ona e faia: Ia maumauaʻi e aua le faatagaina faalogona lē lelei, e pei o le fefe e pulea au filifiliga. Na tusi le aposetolo o Paulo: “Afai ou te lē [folafola atu le tala lelei] faia ma le lotomalie, ua tuuina mai pea iā te aʻu le tiute tauave ia faataunuuina.”—1 Korinito 9:16, 17.

 Fesoasoani: Pe a faataga e ou mātua, ia saʻili se tasi e mafai ona fesoasoani iā te oe ma o se faaaʻoaʻoga lelei mo oe. O se faataʻitaʻiga, o se Molimau o loo fai ma faaaʻoaʻoga lelei i le faiva.—Faataoto 27:17.

 Fesoasoani atili

•   Faitau:

   “Aiseā Ou te Fefe ai e Taʻu Atu Oʻu Talitonuga?”

 Mau autū: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou.” —Eperu 10:24, 25.

 Lona uiga: O le māfuaaga autū e tatou te ō ai i sauniga o le tapuaʻi iā Ieova. E lua foʻi isi aogā o le auai i sauniga. Muamua, e te maua ai faalaeiauga mai i le ʻauuso. Lua, e faalaeiauina ai foʻi i latou i lou auai ma faia sou sao.—Roma 1:11, 12.

 Le mea e faatalitalia: O le a iai taimi e ono tosina ese ai lou mafaufau mai i le uaʻi atu i faatonuga aogā. Atonu foʻi o le a tofotofoina oe e fai ma misi sauniga ina ia faamuamua ai isi mea e pei o meaaʻoga.

 Mea e mafai ona e faia: Ia maumauaʻi e fai ma masani le auai i sauniga ma maua mai ai aogā e aunoa ma le lē ano i meaaʻoga. Ia faia sou sao i le sauniga. Pe a uma le sauniga, ia faamālō i se tasi na faia sona sao.

 Fesoasoani: Ia sauniuni a o leʻi auai i le sauniga. Ia kopi le JW Library® app ma tagaʻi i le vaega “Meetings” e iloa ai mataupu o le a talanoaina i sauniga taʻitasi.

 Fesoasoani atili

•   Faitau:

   “Aiseā e auai ai i sauniga faa-Kerisiano?”