O se Faamoemoe Moni mo se Lumanaʻi Manuia

PLAY

Po o e taumānatu o le a faaleleia le tulaga o mea i le lumanaʻi? E toʻatele tagata e taumafai e faatumauina pea se vaaiga saʻo e ui i le ogaoga o faafitauli o loo tatou fesagaʻia i aso nei. Pe e tatou faatalitalia moni lava o le a faaleleia le tulaga o mea? Ioe! O loo taʻua i le Tusi Paia se faamoemoe moni ma se lumanaʻi manuia.

O le ā le faamoemoe o loo folafola mai i le Tusi Paia?

Ua faailoa mai i le Tusi Paia le feagai o tagata ma faafitauli ogaoga. Peitaʻi, o loo folafola mai i le Tusi Paia e lē tumau ona tatou mafatia i na faafitauli. Seʻi iloilo ni faaaʻoaʻoga patino.

Faafitauli: Leai ni fale e nonofo ai

Manatu o le Tusi Paia: “O le a latou fausia fale ma nonofo ai.”—Isaia 65:21.

Le mea o le a tupu i le lumanaʻi: O le a maua e tagata o latou lava fale.
Faafitauli: Leai ni galuega ma le mativa

Manatu o le Tusi Paia: “O le a matuā fiafia uma oʻu tagata ua filifilia i galuega a o latou lima.”—Isaia 65:22.

Le mea o le a tupu i le lumanaʻi: O le a faamalieina tagata uma, olioli ma tauia a latou galuega.
Faafitauli: Faiga lē tonu

Manatu o le Tusi Paia: ‘O le a pule ni perenise ma le faamasinotonu.’—Isaia 32:1.

Le mea o le a tupu i le lumanaʻi: O le a lē toe iai ni faiga lē tonu i ituaiga po o tulaga o tagata ma tulaga tau tamaoaiga. O le a tonu le auala e feutagaʻi ai tagata uma.
Faafitauli: Lē lava o meaʻai ma le fia ʻai

Manatu o le Tusi Paia: “O le a tele saito i le laueleele; O le a fau ma soloi i tumutumu o mauga.”—Salamo 72:16.

Le mea o le a tupu i le lumanaʻi: O le a fau ma soloi meaʻai paleni e maua e tagata. O le a leai se tasi e toe fia ʻai pe mafatia ona o le lē lelei o meaʻai.
Faafitauli: Soligatulafono ma faiga sauā

Manatu o le Tusi Paia: “E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—Mika 4:4.

Le mea o le a tupu i le lumanaʻi: O le a saogalemu ma malupuipuia tagata uma ona o le a faaumatia tagata amioleaga, ma o le a “fai lava le lalolagi mo ē e amiotonu.”—Salamo 37:10, 29.
Faafitauli: Taua

Manatu o le Tusi Paia: “E lē toe sii le pelu e le tasi atunuu i le tasi atunuu, pe latou te toe aʻoaʻo foʻi i taua.”—Isaia 2:4.

Le mea o le a tupu i le lumanaʻi: O le a iai le filemu i le lalolagi atoa. (Salamo 72:7) O le a leai se tasi e faanoanoa ona o le maliu o sē e pele i taua, ma o le a lē toe iai se tasi e sulufaʻi ona o taua.
Faafitauli: Maʻi ma faamaʻi

Manatu o le Tusi Paia: “E lē fai mai foʻi se tasi ua nofo ai: ‘Ou te maʻi.’”—Isaia 33:24.

Le mea o le a tupu i le lumanaʻi: O le a lē toe iai se tasi e mafatia ona o manaʻoga faapitoa pe maʻi foʻi. (Isaia 35:5, 6) Ua folafola mai foʻi i le Tusi Paia, o le a “lē toe iai se oti.”—Faaaliga 21:4.
Faafitauli: Faaleagaina o le siʻosiʻomaga

Manatu o le Tusi Paia: “O le a olioli le toafa ma le laueleele ua leai se vai, o le a fiafia foʻi le fanua laugatasi o le toafa ma e fua mai e pei o le lili.”—Isaia 35:1.

Le mea o le a tupu i le lumanaʻi: O le a avea le lalolagi atoa ma parataiso ina ia nonofo ai tagata, e pei ona muaʻi fuafuaina e le Atua.—Kenese 2:15; Isaia 45:18.

Pe e te talitonu o le a taunuu moni le faamoemoe ua folafola mai i le Tusi Paia?

Atonu e te mafaufau e lē moni le faamoemoe ua folafola mai e le Tusi Paia. Peitaʻi, e faalaeiauina oe e suʻesuʻe atili i manatu o le Tusi Paia e faatatau i le lumanaʻi. Aiseā? O folafolaga a le Tusi Paia e ese mai i folafolaga e faia e tagata. O folafolaga o loo taʻua i le Tusi Paia e mai i le Atua. O nisi nei o māfuaaga e matuā eseese ai folafolaga a le Atua ma folafolaga a tagata:

E maufaatuatuaina le Atua. O loo taʻua i le Tusi Paia “e lē mafai ona tala pepelo” le Atua. (Tito 1:2) E lē gata i lea, e na o le Atua e mafai ona valoia mea o le a tutupu i le lumanaʻi. (Isaia 46:10) E tele faaaʻoaʻoga o loo taʻua i le Tusi Paia e faamaonia ai e taunuu moni lava so o se folafolaga a le Atua. Mo nisi faamatalaga, maimoa i le vitiō E Faapefea Ona Tatou Mautinoa e Saʻo Aʻiaʻi le Tusi Paia?
E iā Ieova le mana e foʻia ai o tatou faafitauli. Ua faapea mai le Tusi Paia e iai i le Atua le mana e ‘faia ai mea uma ua ia finagalo i ai e faia.’ (Salamo 135:5, 6) I nisi faaupuga, e leai se mea e mafai ona taofia le Atua mai i le faataunuuina o ana folafolaga. E lē gata i lea, e finagalo le Atua e fesoasoani mai ona e alofa iā i tatou.—Ioane 3:16.

Atonu e tatou te tomānatu, ‘Pe afai e finagalo le Atua e fesoasoani mai iā i tatou ma e iā te ia le mana e faia ai faapea, aiseā la e tutupu ai pea faafitauli?’ Ina ia tali lenā fesili, maimoa i le vitiō Aiseā ua Lē Taofia ai e le Atua Mafatiaga?

E faapefea ona faataunuu lenei faamoemoe?

O le a faaaogā e le Atua lona Malo, o se pulega i le lagi ina ia faataunuu ana folafolaga. Ua ia tofia Iesu Keriso e Pule i lenā Malo, ma ua tuuina atu iā te ia le pule e tausia ai le lalolagi ma tagata. A o iai Iesu i le lalolagi, na ia faamālōlō ē mamaʻi, fafaga i ē na fia aai, faatonutonu le tau, ma toe faatutū mai ē ua maliliu. (Mareko 4:39; 6:41-44; Luka 4:40; Ioane 11:43, 44) O lona faia faapea, ua faailoa mai ai mea o le a ia faia o se Tupu i le Malo o le Atua.

Maimoa i le vitiō, O le ā le Malo o le Atua? ina ia aʻoaʻo atili e faatatau i auala o le a e maua ai aogā mai i le Malo o le Atua.

O afea o le a faataunuu ai lenei faamoemoe?

Ua toeitiiti lava! E faapefea ona tatou mautinoa? O loo valoia mai i le Tusi Paia mea o le a tutupu e faailoa ai o le a amata ona pule le Malo o le Atua i le lalolagi. (Luka 21:10, 11) O mea o loo tutupu i le lalolagi i aso nei ua ōgatusa ma mea o loo valoia e le Tusi Paia.

Ina ia aʻoaʻo atili, faitau i le mataupu “O Afea o le a Pule ai le Malo o le Atua i le Lalolagi?”

E faapefea ona fesoasoani iā i tatou le faamoemoe o loo folafola mai i le Tusi Paia?

Na faatusa e se tusitala o le Tusi Paia le faamoemoe o loo i le Tusi Paia o se “taula i o tatou ola.” (Eperu 6:19) E pei lava ona taofi e se taula se vaa i taimi o afā, e faapena foʻi ona fesoasoani le faamoemoe mo le lumanaʻi o loo i le Tusi Paia e tatou te tumau ai i le onosaia o faafitauli i aso nei. E mafai e lo tatou faamoemoe ona puipuia ai lo tatou itu tau faalogona, mafaufau ma lo tatou soifua mālōlōina.—1 Tesalonia 5:8.