E faitau sefulu afe mafuiʻe e tutupu i tausaga taʻitasi. E ui e lē malolosi nisi mafuiʻe, ae o isi ua māfua ai le leaga o le tele o mea, mafatiaga, ma le oti. I nisi taimi e faapogaia ai ni galulolo lea e aafia ai nofoaga tū matafaga ma maliliu ai i latou e nonofo ai i inā. Pe na valoia mai e le Tusi Paia nei mafuiʻe tetele?

I lenei mataupu

•  Pe na valoia e le Tusi Paia le iai o mafuiʻe?

•  Po ua faataunuuina e mafuiʻe o loo tutupu i aso nei valoaga a le Tusi Paia?

•  O le ā le aogā o valoaga a le Tusi Paia mo i tatou?

•  Manatu sesē e faatatau i valoaga o le Tusi Paia ma mafuiʻe

 Na taʻua e Iesu mafuiʻe i se valoaga o loo i le Tusi Paia. O loo faamauina ana fetalaiga i mau nei e tolu:

 “Auā o le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea.”—Mataio 24:7.

 “Auā o le a siitaua le isi atunuu i le isi atunuu, ma le isi malo i le isi malo, o le a iai mafuiʻe i lea mea ma lea mea, o le a iai foʻi oge.”—Mareko 13:8.

 “O le a iai foʻi mafuiʻe tetele, o faamaʻi ma oge i lea mea ma lea mea.”—Luka 21:11.

 Na valoia e Iesu o le a iai mafuiʻe tetele i lea mea ma lea mea ma i le taimi e tasi o le a iai foʻi taua, oge, ma faamaʻi. O le tutupu o nei mea e faailogaina ai se vaitaimi i le talafaasolopito o tagata e taʻua “o le taufaaiʻuiʻuga o le faiga o mea a le lalolagi” po o “aso e gata ai.” (Mataio 24:3; 2 Timoteo 3:1) Pe a fua i tusitusiga a le Tusi Paia, na amata “aso e gata ai” i le 1914 ma e leʻi faaiʻuina.

 Ioe. O valoaga na taʻua e Iesu lea e aofia ai ma mafuiʻe, e tutusa lelei ma mea o loo tutupu i aso nei. Talu mai le 1914, ua silia ma le 1,950 mafuiʻe tetele ia na maliliu ai le silia ma le lua miliona o tagata. a Mātau nisi o faaaʻoaʻoga nei.

 2004—Vasa Initia. O le mafuiʻe e 9.1 le malosi na māfua ai se galu lolo na aafia ai ni atunuu e 12, lea na feoti ai le pe ā ma le 225,000 o tagata.

 2008—Saina. O le mafuiʻe e 7.9 le malosi na faaleagaina ai nuu ma aai, ma e pe ā ma le 90,000 tagata na maliliu, e pe ā ma le 375,000 na faamanuʻalia, ma le faitau miliona o i latou ua leai ni mea e nonofo ai.

 2010—Haiti. O le mafuiʻe e 7.0 le malosi ma isi mafuiʻe na lūlū mulimuli ane ai, na maliliu ai le silia ma le 300,000 tagata, ma e silia ma le miliona i latou ua leai ni mea e nonofo ai.

 2011—Iapani. O le mafuiʻe e 9.0 le malosi ma le galu lolo na maliliu ai le pe ā ma le 18,500 tagata, ma e faitau selau afe i latou e leʻi toe maua. Na faaleagaina le fale e gaosia ai le eletise i Fukushima, ma māfua ai se faalavelave faaniukilia. I le sefulu tausaga mulimuli ane, e leʻi mafai lava e i latou e nonofo latalata i le fale e gaosia ai le eletise ona toe foʻi i o latou fale, ona o lenā faalavelave faaniukilia.

 O le valoaga a le Tusi Paia e faatatau i mafuiʻe, ua lapataʻia ai i tatou i mea o le a tutupu i le lumanaʻi. Na fetalai Iesu: “Pe a outou vāai ua tutupu nei mea, ia outou iloa ua latalata mai le malo o le Atua.”—Luka 21:31.

 O loo faamatalaina i le Tusi Paia le Malo o le Atua o se faigāmalo moni i le lagi, lea ua avea ai Iesu Keriso ma Tupu. O le Malo lea na aʻoaʻo ai e Iesu ona soo e tatalo ai.—Mataio 6:10.

 Pe a pulea e le Malo o le Atua le lalolagi, o le a faamautinoa e le Atua o le a leai ni mala faalenatura e pei o mafuiʻe toe aafia ai tagata. (Isaia 32:18) E lē gata i lea, o le a ia aveesea aafiaga faaletino ma tau faalogona lea e aafia ai tagata i aso nei, ona o mafuiʻe. (Isaia 65:17; Faaaliga 21:3, 4) Mo nisi faamatalaga, faitau i le mataupu “O le ā o le a Faataunuuina e le Malo o le Atua?”