“E 19 tausaga o oʻu faatali i le mea lenei!” O le ā le mea na faatalitali ai lo tatou uso? O le mauaina i lana gagana, le gagana Bengali, o le Tusi Paia o le Lalolagi Fou o Tusitusiga Eleni. E faapena foʻi faalogona o le toʻatele pe a tatala se Faaliliuga a le Lalolagi Fou i la latou lava gagana. Ae pe na e taumānatu, po o le ā e aofia ai i le faaliliuina ma le lomiaina o na Tusi Paia?

 Muamua, e tofia se ʻaufaaliliu e ala i le fesoasoani a le Komiti o Tusitusiga a le Vaega Pule. O le ā le umi e faaliliu ai le Tusi Paia? Ua faamatala mai e Nicholas Ahladis e galue i le Vaega mo Faaliliuga i Warwick i Niu Ioka: “E tele mea e aofia ai. E aofia ai le aofaʻi o tagata faaliliu e avanoa mo le galuega, le faigatā o le gagana e faaliliu ai, o le malamalama o tagata o lenā gagana i tu ma aganuu i taimi o le Tusi Paia, ma le eseese o le auala e tautatala ai tagata o lenā gagana i atunuu eseese. I se fua faatatau, e mai i le tasi i le tolu tausaga e faaliliu ai Tusitusiga Paia Eleni, ae pe ā i le fā tausaga pe sili atu e faaliliu ai le Tusi Paia atoa. Ae e umi atu pe a faaliliuina se Tusi Paia i le gagana faataga.”

 E ese mai i le ʻaufaaliliu, e manaʻomia le fesoasoani a isi. E iai tagata e talosagaina e faitau i le faaliliuga ma fesoasoani mai i ni manatu aogā, ae e lē totogia. O na tagata e eseese o latou tulaga, ma i nisi taimi e eseese atunuu e nonofo ai. O manatu aogā mai i nei ʻaufaitau, e fesoasoani i le ʻaufaaliliu e saunia ai se Tusi Paia e saʻo aʻiaʻi, malamalamagofie ma uigā. Ua taʻua e se tane e toleniina tagata faaliliu o le Tusi Paia i Aferika i Saute, “e manatu le ʻaufaaliliu e matuā tāua iā i latou la latou tiute tauave o le faaliliu mo Ieova ma tagata e faitauina lana Afioga.”

 Pe a māeʻa le faaliliuga, ona lolomi lea ma tuufaatasi le Tusi Paia. E sefulu “mea” eseese e faaaogā e fale lomitusi, e lolomi ma tuufaatasi ai le Tusi Paia: o pepa, vaitusi, faavaa o Tusi Paia, kelū, mea e ufiufi ai totonu o faavaa, o laupepa lanu siliva, lipine, o mea e saisai ai pepa, papatua malō o Tusi Paia, ma mea e faamau ai ina ia pipii faatasi ai le Tusi Paia. I le 2019, e silia ma le 20 miliona tālā Amerika na faaaluina mo nei mea eseese. I lenā tausaga, e silia ma le 300, 000 itula na faaaluina e tagata e galulue i a matou fale Lomitusi, i le saunia ma le auina atu o Tusi Paia i atunuu eseese.

 Aiseā ua tele ai le taimi ma tupe e faaalu i lenei galuega? Ua faapea mai Joel Blue e galue i le Matagaluega Lomitusi mo Atunuu Eseese, “O le Tusi Paia o le lomiga lea e sili ona tāua ua matou saunia. O lea, e matou te mananaʻo ai ina ia faamamaluina le Atua o loo matou tapuaʻi i ai ma le feʻau o loo matou talaʻia, i foliga o le Tusi Paia.”

 E matou te saunia foʻi Faaliliuga a le Lalolagi Fou mo tagata e iai manaʻoga faapitoa. O se faaaʻoaʻoga, ua maua nei le Faaliliuga a le Lalolagi Fou mo tagata tauaso i gagana e sefulu. E valu itula e lomia ai e le masini se Tusi Paia o le gagana patupatu, ma e tele tusi e faia aʻe ai se Tusi Paia e tasi o lenā gagana, lea e manaʻomia ai se fata e tusa ma le 2.3 mita (7.5 futu) e teu ai. E matou te saunia foʻi Tusi Paia faapitoa mo pagota i falepuipui lea e faataga ai na o tusi e faavaa i pepa.

 Ua iai aafiaga lelei i olaga o tagata e faitau i le Faaliliuga a le Lalolagi Fou. O se faaaʻoaʻoga, o le faapotopotoga e tautatala i le gagana Kiluba e tu i se vaipanoa e taʻua o Tombe i Congo. E sili atu i le 1,700 kilomita (1,000 maila) le mamao o Tombe mai i le laumua o le atunuu. E na o le tasi le Tusi Paia na maua e Molimau a Ieova i lenā vaipanoa, ma na tusia i le gagana Kiluba e lē o toe tautatala ai tagata. Na feaveaʻi solo e uso lenā Tusi Paia, ina ia mafai ai ona sauniuni a latou vaega i sauniga. Ae talu mai Aokuso 2018, na maua ai e tagata uma o le faapotopotoga kopi o le Tusi Paia atoa o le Faaliliuga a le Lalolagi Fou, i le gagana Kiluba lea e tautatala ai tagata i aso nei.

 Ua faapea mai se tuafafine e tautala i le gagana Siamani, e faatatau i le Faaliliuga a le Lalolagi Fou ua toe teuteuina i la latou gagana: “Ua ou lē toe faapea atu e tatau ona ou faitauina le Tusi Paia. Ae ua ou fesili ifo, ʻO afea e toe faaauau ai laʻu faitau i le Tusi Paia?’” Na tusi mai se pagota: “Na ou maua se kopi o le Faaliliuga a le Lalolagi Fou, ma ua suia ai loʻu olaga. Ou te leʻi malamalama muamua i le Afioga a le Atua, ae o lea faatoʻā ou malamalama lelei ina ua ou faitau i lenei faaliliuga. Ou te fia iloa atili e faatatau i Molimau a Ieova ma le auala e avea ai aʻu ma se tasi o i latou.”

 E matuā talisapaia e i latou uma e faitau i le Faaliliuga a le Lalolagi Fou foaʻi tauofo ua lagolagoina ai le saunia o lenei lomiga. E mafai ona fai nei foaʻi tauofo i le lalolagi aoao, e ala i auala o loo faamatalaina i le donate.dan124.com. Faafetai tele mo lo outou limafoaʻi.