Ina ua māeʻa le Taua Lona Lua a le lalolagi i le 1945, na matuā faaleagaina ai mea i Siamani. Na faaleagaina aai, aʻoga, falemaʻi ma na taatitia solo pomu e leʻi pāpā. E lē gata i lenā na utiuti meaʻai, o le iʻuga na sii ai i luga le tau. Mo se faataʻitaʻiga, i maketi e faatau faasolitulafono ai e tagata oloa o le tau o le 500 kalama (1 pauna) o le pata, e tutusa ma le totogi o le tagata i vaiaso e ono.

 Na aafia ai foʻi i lenā faafitauli le faitau selau o Molimau a Ieova na faafalepuipuiina mo le tele o tausaga i nofoaga o faasalaga mamafa, ona o lo latou faatuatua. I le 1945, na faasaʻolotoina ai i latou ma na ō e aunoa ma ni meafaitino, ae na o lavalava o le falepuipui na latou ofuina. O isi Molimau na faaleagaina uma a latou meatotino. O nisi na matelāina i le fia aai ma na matapogia i taimi o sauniga faa-Kerisiano.

 Na vave ona tali atu Molimau a Ieova mai i isi vaega o le lalolagi i le manaʻomia vave e o tatou uso i Siamani o ni meaʻai ma lavalava. Na talosaga atu le ofisa ulu i le Iunaite Setete i le ofisa o le lālā i Bern, Suisilani ina ia fesoasoani i uso i Siamani. Na asiasi atu i Europa le uso o Nathan H. Knorr mai le ofisa ulu, e faatulaga ma auina vave atu le fesoasoani laveaʻi i o tatou uso na aafia.

 Na foaʻi atu ma le agalelei e Molimau i Suisilani meaʻai, lavalava ma tupe. Na auina muamua atu i Bern a latou foaʻi, ina ia faavasega ai ma tuu i pusa a o leʻi auina atu i Siamani. Na auina atu foʻi e Molimau a Ieova mai i isi atunuu e aofia ai Suetena, Kanata ma le Iunaite Setete fesoasoani laveaʻi, lea na aogā i auauna a Ieova i Siamani faapea foʻi isi atunuu na aafia i le taua i Europa ma Asia.

 I ni nai masina, ae auina atu loa e le lālā i Suisilani kofe, susu, suka, saito, fualaau taumafa mata mamago, fualaau ʻaina ma meaʻai tuu apa. Na aofia ai foʻi tupe i a latou foaʻi.

 Na auina atu foʻi e Molimau i Suisilani le pe ā ma le lima tone o lavalava e aofia ai ofu talaloa māfanafana, ofu mo teine ma suti mo alii. Ua taʻua i Le Olomatamata o Ianuari 15, 1946: “Na faia e uso le mea sili na latou mafaia e fesoasoani ai i o latou uso i Siamani.”

 Na foaʻi atu foʻi e Molimau i Suisilani le toetoe 1,000 pea seevae. Na siaki na seevae ina ia faamautinoa o loo lelei a o leʻi auina atu. Na matuā maofa uso ma tuafāfine i Wiesbaden i Siamani, i le lelei ma le tele o ituaiga seevae eseese. Na tusi se Molimau: “E mautinoa e leai se faleoloa i Siamani e maua ai nei ituaiga seevae.”

 Na faaauau pea ona ave fesoasoani laveaʻi seʻia oo iā Aokuso 1948. O le aofaʻi atoa o pusa tetele o fesoasoani laveaʻi na auina atu e Molimau i Suisilani i o tatou uso i Siamani, e 444 ma e 25 tone le mamafa. E pei ona taʻua, e lē na o Molimau i Suisilani na saunia fesoasoani laveaʻi, ae pito i toʻaitiiti o tatou uso i ina nai lo uso mai i atunuu uma na saunia na fesoasoani. I lenā taimi, e na o le 1,600 Molimau na iai i Suisilani.

 Na fetalai Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:34, 35) O le alofa na uunaʻia ai tagata o Ieova e foaʻi atu mea e latou te leʻi manaʻomia, ae na latou faia foʻi le mea sili na latou mafaia. (2 Korinito 8:1-4) Na taʻua e se tusi mai Zurich: “E toʻatele uso e leai ni a latou meafaitino, ae na latou mananaʻo e fesoasoani e ala i le foaʻi atu o tupe ma isi mea.”

 Na vave ona sologa lelei mea mo tagata o Ieova i Siamani na mafatia i sauāga ma taua. O se tasi o māfuaaga, o le lelei o le auala na faatulaga ai foaʻi tauofo ma le alofa faataulaga moni na faaalia e o latou uso talitonu.