Pe e te fiafia e faaaogā vitiō ma fesili faatupu manatu i le tusi Se Olaga Fiafia e Faavavau!? Ae ā vaega “Ua Faapea Mai Nisi,” “Sini,” ma “Manatu Faaopoopo”? O ā nisi vaega o le tusi e ono fesoasoani iā te oe a o faia lau suʻesuʻega faale-Tusi Paia?—Mat 28:19, 20.

Vitiō ma Mataupu: Pe afai e te faaaogāina se lomiga ua uma ona lolomi e fai ai se suʻesuʻega faale-Tusi Paia, o fea e mafai ona e maua ai vitiō ma mataupu uma mo vaega taʻitasi? Pe a e tagaʻi i le lomiga i luga o masini faaonapōnei, filifili se vaega se tasi mai i vaega autū e fā. O le pito lava i lalo o le lisi o lesona, o loo iai vitiō ma mataupu uma mo lenā vaega. (Tagaʻi i le ata 1.)

Vaega “Printed Edition”: Pe a lua suʻesuʻe ma se tasi e faaaogā ai se masini faaonapōnei, atonu e fesoasoani le faaaogā o le vaega “Printed Edition,” a o faagasolo le lua suʻesuʻega. A o iai i le lesona, tagaʻi i togitogi e tolu i le pito i luga i le itu taumatau, ma oomi le vaega “Printed Edition.” O le a e iloa ai foliga o le itulau atoa, ma fesoasoani e iloa ai le fesootaʻiga o le vaega o le suʻesuʻega o loo oulua talanoa ai, ma le matua o le lesona o loo talanoaina. Ina ia toe foʻi i le digital edition, toe oomi togitogi e tolu i le pito i luga i le itu taumatau, ma oomi le vaega “Digital Edition.”

“Po ua Ou Sauni?”: E maua nei pusa e latalata i le faaiʻuga o le tusi, ma o loo faamatala mai ai agavaa e mafai ona ausia ina ia avea ma tagata talaʻi faatasi ma le faapotopotoga ma agavaa e ausia mo le papatisoga. (Tagaʻi i le ata 2.)

Faaopoopoga: O le faaopoopoga o loo maua ai faamatalaga atili e faatatau i nisi mataupu tāua. I le lomiga i masini faaonapōnei, o loo iai i le pito i lalo o faaopoopoga taʻitasi se link, e toe foʻi ai i le vaega o le lesona lea o loo suʻesuʻeina. (Tagaʻi i le ata 2.)